رواية عشق الزين بقلم زيزي محمد (ج2) - الفصل الرابع والعشرون

هذا الموقع محمي بموجب اتفاقية حماية حقوق المحتوي العالمية

رواية عشق الزين بقلم زيزي محمد (ج2) - الفصل الرابع والعشرون

مرحباً بكم أصدقائي وأحبابي عاشقي القراءة والقصص الرومانسية مع روايات حب جديدة للكاتبة زيزي محمد علي موقعنا قصص 26 و موعدنا اليوم مع الفصل الرابع والعشرون من الجزء الثاني من رواية عشق الزين بقلم زيزي محمد. 

رواية عشق الزين بقلم زيزي محمد - الجزء الثاني (الفصل الرابع والعشرون)

رواية عشق الزين بقلم زيزي محمد (ج2)
رواية عشق الزين بقلم زيزي محمد (ج2)

رواية عشق الزين بقلم زيزي محمد - الجزء الثاني | الفصل الرابع والعشرون

هنا بفرحة : بس يا ماما هو دا اللي حصل .
ماهي : اوك ..وانا هاستنى مكالمة ليليان ليا .. بس مفيش مرواح الشركة تاني يا هنا .
هنا : ليه ؟.
ماهي : علشان خلاص مبقاش ينفع وجودك معاه ..كنتوا الاول بتشتغلوا ... بس بعد كدا هاتحبوا في بعض ودا مينفعش من غير اي رابط ما بينكوا .
مهاب دخل فاجأة: وخروجها كان عادي يعني يا ماهي .
ماهي : مهاب .
هنا : بابا.
مهاب : اه ابوكي اللي واثق فيكي ومعطيكي الحرية اللي انتي عاوزاها والمفروض انك رايحة تتدربي في الشركة ..مش تخرجي مع رئيسك في وسط همسات زمايلك وتتفسحي معاه وتقضي يوم .
هنا : بابا انا حضرتك عمري ما خنت ثقتك لو خرجت مع اسر انا مخبتش وحكيت لماما .. ولما خرجت معاه معملتش حاجة غلط.
مهاب : الغلط انك تكوني عاملة الغلط ومش مقتنعة انه غلط .
سارة جت على صوتهم : أسفه.. معلش يا ماهي انتي وهنا ممكن تسيبوني مع مهاب شوية .
( هنا وماهي مشيوا .. هنا دخلت اوضتها عيطت لأنه واضح من كلام مهاب انه رافض فكرة ارتباطها بآسر ..لقت تليفون من آسر ..ردت وحاولت تخلي صوتها طبيعي)
هنا : الو.
آسر لاحظ صوتها الحزين : مالك يا هنا .
هنا : مفيش .
آسر : قوليلي في ايه ؟.
هنا بحزن : بابا سمعني وانا بتكلم مع ماما عليك .. زعل مني جدا عشان خرجنا سوا انا وانت .
آسر: امممم هو ده بس اللي مزعلك يعني .
هنا : بابا شكله ها يعارض خطوبتنا .
آسر: هنا اوعي تخافي او تزعلي من حاجة ... انا خلاص لقيت حب حياتي ومش بعد ما لقيتك وخلاص اعترفتلك بحبي هاسيبك مثلا ..انا لو وصلت ان اخطفك واتجوزك هاعملها .
هنا : كنت عازوة نتخطب من غير اي مشاكل .
آسر : مشاكل ايه بس يا روحي ..بس هو تلاقي والدك زعلان عشان فكرة خروجك معايا بس .
هنا : يعني انت عندك استعداد تعافر عشاني .
آسر : اعافر بس ...انا ممكن اعمل اي حاجة في الدنيا عشان تبقي معايا .
هنا : عمتو سارة قعدت معاه تتكلم مش عارفة هاتقوله ايه ؟.
آسر : اكيد ها تقوله اسر بيحب هنا اوي ومستعد يعمل اي حاجة عشانها .
هنا : انا حاسة اني بحلم والله .
آسر بضحك : ليه يا هنون .
هنا : بين يوم وليلة تقولي بحبك وتقولي كلام حلو ...اكيد في لغز في حمص الشام اللي شربته .
آسر بضحك : و مش هابطل اقولها ابدا .
هنا : آسر ايه اللي غيرك كدا من ناحيتي.
آسر : امي طلبت مني طلب ...لما احس ان البنت اللي بحبها هيا كمان بتحبني .. اعترفلها باني بحبها ومضيعش وقت .. وكلامها صح انا كنت بحبك وكنت بحس ان الاختلاف ما بينا هايكون سبب مشاكل كتير وبعدها فهمت ان اي اتنين بيحبوا بعض حياتهم فيها مشاكل ..بس حبهم هايتغلب على مشاكلهم ...وانا وانتي هانقدر نتغلب على اي حاجة .
هنا : يعني انت حسيت ان في حاجة من ناحيتي ليك.
آسر : اه ...طيب ايه انا قولتلك بحبك وانتي مفيش اي رد .
هنا : هتسمعوا مني اول ما دبلتك تبقى في ايدي .
اسر : اتقلي براحتك يا هنا ..انا وراكي والزمن طويل .
************************
( مهاب قاعد سرحان مش مركز مع سارة وكلامها ..من يوم مقابلته مع مراد وهو بيتهرب من سارة خايف يكون مراد قالها على خطته ...اسئلة كتير في دماغه ..ومخاوف كتير جواه ...مهاب مالوش اخوات سارة الوحيدة اللي اخته مش هايستحمل تكرهه ..طيب يعمل ايه كانت ممكن تموت كانت هاتبقى ضحية شغل مراد ..انتبه اخيرا لكلامها ) .
سارة : ياريت تفهم وجهة نظري..هنا مش غلطت يا مهاب .
مهاب بضيق : انا فاهم وعارف ان هنا عمرها ماتعمل غلط ابدا دي بنتي وانا مربيها كويس ..بس الفكرة انها تسمح لحد انه يتكلم عليها ..وخصوصا ان ده رئيسها في الشغل .
ساره : محدش يقدر يتكلم على آسر وهنا ..وبعدين زين مربي عياله كويس اوي ..وآسر محترم جدا وكفاية انه لما اعترفلها بحبه ...قالها انه هايتجوزها على طول متعقدش انت الامور .
مهاب : طيب يا سارة .. انا هاعديها المرادي لغاية ما نشوف هايتقدم امتى !.
سارة بتنهيدة : على فكرة قراية فاتحة كاميليا يوم الجمعة .
مهاب : على مين ؟.
سارة بابتسامة : على ادهم ..اخو آسر ...هاتبقى في بيت مراد .
مهاب بتوتر: هو اللي قالك .
سارة بحزن : لأ...هو مبيكلمنيش .. كاميليا اللي حكتلي وكتر خيره قالها تخليني احضر .
مهاب : معلش يا سارة ...كلها فترة وهاتعدي وترجعوا لبعض.
سارة : لا هي مش فترة..انا هافضل كدة يا مهاب ..انا اللي حكمت على نفسي زمان واهو اديني بحصد نتيجة عمايلي ...بقولك انا هارجع بيت ابويا .
مهاب قام من مكانه قعد جنبها : تمشي تروحي فين ...انتي مش هاتتحركي من هنا ..دا بيتك قبل ما يكون بيت اخوكي .
سارة : تسلم يا مهاب ..بس حقيقي انا نفسي ارجع بيت بابا هاحس فيه بالراحة وكمان عاوزة أقلم نفسي على الوحدة ..بكرة كاميليا تتجوز وتسيبني .
مهاب : وانا فين ... انتى ناسية ان حضرتك اختي ...ومفيش اخ بيسيب اخته .
سارة بدموع: ربنا يخليك ليا يا مهاب .
مهاب اخدها في حضنه : انا اتحرمت ان يكون ليا اخ او اخت بس حقيقي ربنا عوضني بيكي .
( سارة عيطت ...كان نفسها حد ياخدها في حضنه ويطبطب عليها محدش حاسس بالضغط النفسي الرهيب اللي هيا بتعيشه محدش حاسس بيها محدش قادر يقف جنبها ... مهاب سأل نفسه ليه مراد مقالش لسارة انه السبب في اللي حصل وسارة ومراد هايفضلوا كدا.. اخته هاتفضل بالحزن دا .. وياترى لو عرفت انه السبب هاتعمل فيه ايه ).
*************************
تاني يوم .
في شركة الجارحي .

حازم : ليان جهزي نفسك ..هانطلع نعاين ارض هانعمل عليها ملجأ .
ليان : اوك يا بشمهندس .
( حازم اخد ليان وراحو الارض اللي هايتعمل عليها الملجأ وبدا حازم يشرح لليان الشغل بحرفية شديدة وهيا كانت منتبهة لكل كلمة لدرجة انها مشافتش الطوب المتكسر واتكعبلت لولا ايد حازم اللي انقذتها بسرعة ).
ليان حست بالاحراج : اسفه يا بشمهندس ماخدتش بالي .
حازم بابتسامة : عادي يا ليان ..على فكرة انتي متحفظة جدا معايا ..انتي زي اختي والله ... دا من كتر حبي في اسمك هاسمي بنتي اللي جاية على اسمك .
ليان : ههههه اسم ليان حلو انا بحب اسمي جدا بحسه محدش ..
( ليان كانت بتتكلم ولفت انتباها عربية عمر ...).
ليان : ثواني يا بشمهندس بس .. هاروح اشوف قريبي واجاي .
حازم: اوك .
( ليان راحت لعمر عند عربيته وخبطت على الازاز لغاية ما فتح وكان لابس نضارة شمس يداري بيها العلامة الزرقة اللي جنب عينه ).
ليان : انت بتعمل ايه هنا يا ع..احم يا ابيه .
عمر : مبعملش ...آسر قالي انه بعت اتنين مهندسين يشوفوا الارض اللي هايتعمل عليها الملجأ .
ليان : طب وانت مالك بالملجأ .
عمر : انا اللي هابنيه ... دا هايبقا اسمه الفيروز .
ليان بحزن : على اسم طنط فيروز ... الله يرحمها .
عمر : مين دا ؟.
ليان : دا حازم ...انا بدرب معاه .
عمر بضيق : طب قوليله انك هاتروحي وتعالي يالا اروحك .
ليان كانت هاتوافق بس رجعت في كلامها وقررت تضايقه : لأ يا ابيه روح انت ..انا هاروح انا بالعربيه بتاعتي . عن اذنك .
( ليان مشيت ...وعمر اضايق منها ..فكر انه يتكلم مع مراد ..بس مراد تقريبا مبيكلموش من اخر موقف ملقاش حد غير زين ..قرر انه يروحله ويتكلم معاه ...وصل الشركة واخد نفس طويل ودخل الشركة ).
************************
كاميليا بتتكلم في التليفون مع ادهم بهمس : وانت فين دلوقتي .
ادهم بضيق : في الشغل ...هو احنا هانفضل كدا كتير ..انا خلاص جاي اخطبك يوم الجمعة ..ابوكي دا رخم .. انا مش فاهم وجهة نظره اصلا اننا منتكلمش قبل قراية الفاتحة .
كاميليا : متقولش عليه كدا ... بس كل الحكاية انه اتحرم انه يعيش دور الاب سنين وانا لازم اكون مستوعبة اي حاجة بيعملها .
ادهم : اه فبيطلعه عليا انا ... انا ناقص .. منا محروم سنين زيه .
كاميليا بدلع : بجد يا ادهم انت كنت بتتمنى انك تشوفني .
ادهم : يالهوي انتي جاية تتدلعي عليا في التليفون .. اهدي شوية .
كاميليا بضحك : مااش..
مراد فتح باب الاوضة فاجأة : بتكلمي مين يا كاميليا .
كاميليا قفلت في وش ادهم : م..ماما .
مراد : ماما!!! ..طيب لو سمعتكوا بتتكلموا تاني في التليفون ومحترمتيش كلامي يا كاميليا اعملي في حسابك مفيش خطوبة .
كاميليا : حضرتك بتعمل معايا ليه كدا .
مراد : بعمل ايه ...انا ابوكي ...اعمل اللي انا عاوزه ..لما كنتي في الساحل تصرفتي وكأن مفيش رادع ليكي .. تصرفتي وخرجتي ومعرفتيش ولا ابوكي وامك.
كاميليا : بابا انا اعتذرت وقولتلك مش هاتتكرر تاني .
مراد : طيب ..واللي اقوله بعد كدا يتنفذ.
**************************
في شركة الجارحي .

زين : ايه ياعمر بقالك ساعة قاعد وبتشرب في القهوة وساكت .
عمر بتوتر : احم ..انا اسف لو كنت عطلت حضرتك .
زين : يابني مفيش عطلة ولا حاجة ....مالك.
عمر : حضرتك انا في خلاف بيني وبين مراد الايام دي بسبب غلطة انا غلطتها .
زين : خلاف!!.
عمر اخد نفس طويل : اتمنى انك تتفهمني ومتحكمش عليا بسرعة زي مراد .
زين : انا مش هاقعد كتير في الغاز يا عمر.
عمر : انا بحب ليان ..بحبها من صغرها بس لما دخلت بيتكو وشوفتكو بتعاملوني كاني ابنكو استغبيت نفسي جدا وحاولت ابطل احبها .. بس حقيقي مش قادر كل يوم بتكبر قدام عيني .. كل يوم بتعذب في حبها .. كنت خايف تعرفوا ان بحبها تقولوا عليا خاين العشرة بدخل بيتكو وببص على اهله مع اني والله عمري ما كنت كدا انا بس حبيتها غصب والله كله غصب .. لما والدتي ماتت واتاثرت بسبب فقدانها فكرت انه لأ انا مش هاتجوز ولا اعلق واحدة بيا ويجي الموت يفرقنا... خفت احبها ويجي الموت يفرقنا زي مراد كدا ومراته وكمان امي .. ابويا بيتعذب في بعدها .. وكمان انا كبير عنها وهي صغيرة اسباب كتيرة خلتني محتفظ بحبها في قلبي انا بعترف ان عملت حاجة غلط لما قررت ان ابعتلها رسايل من رقم غريب .. بس كنت حاسس ان لو مقولتش ان بحبها هاموت .. مراد شاف الرسايل على تليفوني والصراحة سمعني كل الكلام اللي كنت خايف اسمعه في يوم من الايام .
زين بهدوء : طيب وانت جاي تقولي الكلام دا ليه .
عمر : انا مخنوق مش مستحمل صاحبي يفكر فيا كدة وفي نفس الوقت والله بحبها بس غصب عني .
زين : لو على مراد ف دا رد فعل طبيعي له .. انت لو كنت جتله وقولتله انا بحب اختك وعاوز اتجوزها كان هايفرح لانك اعز صاحب له ... متزعلش مني يا عمر انت كنت خايف اننا نقول عليك خاين العشرة او بتبص على اهل البيت بس بتصرفك دا خلتنا نقول كدا ... وبعدين يابني الموت علينا حق انا ممكن في اللحظة اللي انا قاعد معاك فيها اموت .. دي كلها اوهام وهواجس شيلها من دماغك علشان ترتاح .
عمر بتفكير : يعني لو قولتلك انا طالب ايد ليان حضرتك هاتوافق .
زين قام من مكانه وراحله : ومش اوافق ليه ؟. انت راجل يعتمد عليك وانا بحبك زي ولادي وانا متاكد انك هتحافظ عليها .
عمر من فرحته اخد زين بالحضن : متشكر اوي .. بجد متشكر .
زين : خليك جرئ في حبك ..وزي ما قولت لمراد هاقولك يا عمر بطلو تسيطرو على مشاعركو .
عمر : اجيب والدي واجاي اتقدم امتى .
زين : لا دي نرتبها لان ادهم هايخطب يوم الجمعة وكمان بعده آسر ... منا كنت قاعد قدامكو جاين تخطبو مع بعض
عمر : انا بقى خليني بين ادهم وآسر .
زين بابتسامة : مستعجل انت.
عمر : انا عايش سنين بحلم بالخطوة دي.
زين بضحك : خلاص هاستناك يوم السبت .
*************************
مساءا في بيت الجارحي

زين : بتعيطي ليه يا ليليان ؟.
ليليان بدموع : يعني خلاص ليان كبرت وهاتتجوز وتسيبني .
زين : انا مش فاهم حاجة بردو بتعيطي ليه يا حبيبتي .
ليليان : دي دموع الفرح .
زين : دموع فرح !!! ... ياحبيبتي في حد يفرح يعيط .
ليليان : مش عارفة يا زين حسيت قلبي اتخطف كدا لما قولت ان عمر متقدم ليها .
زين بضحك : سلامة قلبك من الخطف يا روحي .. قوليلي في اي اعتراض على عمر .
ليليان مسحت دموعها : لأ طبعا .. بعد كل اللي حكتهولي انا اتاكدت انه بيحبها ... انا متاكدة انه هايقدر يحافظ عليها.
زين : طيب كويس بما ان مفيش اعتراض منك .. روحي بقى قوليلها وخدي رايها ...وتعالي بسرعة علشان انتي واحشاني موت .
ليليان ابتسمت : عمرك ما تتغير .
( ليليان راحت لليان لقاتها بتلعب في تليفونها وليان اول ما شافتها اتوترت وقفلت التليفون ).
ليليان بشك : في ايه يا ليان ... قفلتي تليفونك ليه ؟.
ليان بارتباك : م..مفيش .
ليليان : افتحي التليفون دا يا ليان .
( ليان اتوترت وفتحت تليفون وعطته لليليان وليليان بصت فيه لقتها فاتحة اكونت عمر على الفيس بتابع المنشور الي نزله انه اسعد انسان في الدنيا ... ليليان ابتسمت ).
ليليان : انتي عارفة ليه بيقول كدا ؟.
ليان : ليه ؟.
ليليان : لان عمر اتقدم لبابكي انهاردة .
ليان : مش فاهمة .
ليليان : عمر عاوز يتجوزك .
ليان بصدمة : انا .
ليليان : اه انتي ...اوع كدا قعديني جنبك احكيلك قال لبابكي ايه ؟.
*********************
عند مراد وميرا .

مراد بيتكلم مع عمر في التليفون : والله لابهدلك يوم السبت وهاطلع عينك يا عمر.
عمر بضحك : قلبك ابيض بقا .
مراد : ماشي ياعم ..انا سامحتك علشان خاطر ابويا بس .
عمر : والله ابوك صدق اللي سماه زين الرجال .
مراد بفخر : طبعا يابني دا زين الجارحي مش اي حد بردو .
عمر : ربنا يخليهولك ...هاروح اقول لابويا بقا لسه مش عرفته .
مراد : ماشي ..سلام .
( مراد قفل مع عمر لقي ميرا قاعدة بتبصله و مبتسمة ).
مراد : في ايه .
ميرا قامت من مكانها وقعدت جنبه : اللي يشوفك من برا يقول عليك قلبك قاسى ... بس انت اطيب خلق الله .
مراد بضحك : طبعا يابنتي انا قلبي قلب خساية .
ميرا : بتكلم جد .
مراد : عارفة انتي شايفني كدا ليه؟.. علشان قلبك اللي شافني وحس بيا .
ميرا : وياترى قلبك بيقولك انا قد ايه بحبك .
مراد اخدها في حضنه : انا كل يوم بضرب نفسي على الايام اللي ضيعتها معاكي في خناق.
ميرا : ابقى قولي وانا اضرب ..بلاش انت اصل ايدك تقيلة .
مراد بضحك : اه الصراحة الواد عمر بيشتكي مني في كدا .
ميرا : تدوم الضحكة يا حبيبي .
مراد قرب همس : طيب وربنا انتي اللي حبيبي ... بحبك .
***************************
( يوم الجمعة جه والكل بيستعد ...)
ليليان بتعدل كرافته ادهم : بس كدا اتظبطت .
ادهم : انا مخنوق من البتاعة دي .. لازم البس بدلة ما كنت البس لبس كاجول وخلاص .
ليليان : لا ... دي الاوصول يا حبيبي .. الف مبروك انا فرحانة لفرحتك .
عز : اخدت مني البت يا ادهم ماشي .
ادهم بص لزين : ارجوك بلاش يجي معانا ..والله مش عاوزه يحضر .
زين بضحك : يابني بطل غلبة بقى بتشاكس في الكل .
مراد : انا زهقت وربنا ما خلاص يا ماما تظبيط فيه .
ليليان : يالا انا خلصت .
************************
في بيت مراد الالفي .

( كاميليا بتلبس ..ومراد وسارة قاعدين مستنين عيلة زين ... والسكوت كان هو سيد الموقف ... مراد قاعد باصص على التلفزيون وساكت وسارة نفسها تتكلم ومش قادرة ... اخدت نفس طويل وقررت تتكلم مش هاتخسر حاجة ).
سارة : مراد .
مراد من غير ما يبصلها : نعم .
سارة قامت قعدت جنبه وبدموع سالته : هو احنا مفيش امل نرجع ... ربنا بيغفر الذنوب وانا غلطت سامحني .
مراد بصلها وشاف دموعها المحبوسة في عينها : لأ مفيش امل ومش هاسامحك .
سارة دموعها نزلت بغزارة: ليه ؟.
مراد : علشان انتي مش عاقبتيني سنة ولا اتنين ولا تلاتة لا انتي ازيد من عشرين سنة وانا بتعاقب ولولا خطة ماهي كنتي كملتي وفضلت انا حزين عليكي .
سارة : كنت خايفة من ردة فعلك .
مراد : سارة انتي مش متخيلة انك بتتكلمي في سنين انتي عارفة سنة دي فيها كام شهر وعارفة الشهر دا فيه كام يوم وعارفة الساعات والثواني .. انتي عارفة انا كنت بأكل وبشرب وبصحى وبنام ازاي ...انتي ليه مش حاسة بحجم اللي انتي هببتيه .
سارة بصوت مبحوح : والله حسيت والله حسيت وكنت بحس وانا بعيدة عنك .
مراد : ايه دا انتي بتحسي زينا ... فين احساسك دا وانتي بتعملي فيا كدا ... ربنا يسامحك على سنين عمرنا اللي ضاعت لو كنتي استنيني وسمعتي بس يا سارة كان زمانا غير دلوقتي .
سارة : مرا...
( قطع كلام سارة جرس الباب سكتت ومسحت دموعها ومراد قام فتح ... استقبلو عيلة زين كلها وقعدو وكاميليا خرجت وقعدو كلهم وزين بدا الكلام ).
زين بجدية : مراد احنا جايين نطلب ايد كا..
عز : هه‍ههههههههه هههه‍ههههههههههه .
( الكل بصله ومستغرب منه ).
عز : اسف والله يا جماعة ... بس مش متخيلنا قاعدين قعدة جد .
ادهم : والله قولتلك يابابا بلاش هو يجي مسمعتش كلامي .
زين بحدة : عز ...تقعد زي الكرسي مسعمش حسك لغاية ما نروح .
عز هز راسه وزين بصله بحدة وبدا يتكلم تاني : مراد احنا جاييين...
( ميرا عطست غصب عنها )
ميرا بإحراج : اسفة .
مراد الجارحي بخوف عليها : انتي اخدتي برد .
( زين غمض عينيه بعصبية وسكت وليليان كتمت ضحكتها وبصت لادهم ).
ادهم بزهق : انت عارف احنا جاين ليه ...نقرى الفاتحة ونخلص بقا .
مراد الالفي : عندي شروط .
زين : شروط!!.
مراد الالفي : ايوة يا زين شروط .
زين : اه بقى ايه هى شروطك .
مراد الالفي : مفيش جواز الا بعد ٣سنين .
زين : نعم!!... ليه ان شاء الله هو ادهم لسه هايكون نفسه .. وبعدين انت بطلع عقدك على ابني يا مراد .
مراد : عقد!!.
زين : ايوة اللي حماتك عملته فيك زمان عاوز تعمله في ابني .
مراد : بتفضحني قدام عيالك يا زين .
زين : لا حول ولا قوة الا بالله ... الاتنين بيحبو بعض وادهم جاهز فين التأخير .
مراد : التاخير في ان عاوز اشبع من بنتي .. انا لسه شايفها تقوم تتجوز ومشبعش منها .
زين بتفكير : طيب ايه رايك عندي فكرة ... خليهم يتجوزو في البيت هنا عندك واهو تشبع براحتك منها ومن ناحية تانية يملو عليك البيت عيال .
ادهم : بس انا عاوز اسك...
زين : اسكت علشان ميقولش مفيش جواز خالص انا عارفه كويس .
مراد : اذا كان كدا ماشي ..يتجوزو هنا في البيت .
زين : ام العروسة في اي اعتراض .
مراد : ملهاش رأي اصلا .
سارة بصتله بصدمة : مش معنى اني سايباك تتكلم وتعمل اللي انت عاوزه ابقى انا كدا ضعيفة الشخصية يا مراد .. لأ .. انا سايبك تتكلم علشان انت ابوها وليك حق انك تتكلم بلسان بنتك .
ادهم همس لمراد : هاتولع يا مراد ومش هاتجوز البت يالهوي عليا ..انا حاسس ان انا نحس .
مراد الجارحي : حاسس مش متاكد .
ادهم : اتصرف .
مراد الجارحي : نقرى الفاتحة ومنبوظش فرحة العرسان يا جماعه .
( الكل سكت وقرى الفاتحة وبعدها ادهم طلع من جيبه علبتين فيها دبلتين وراح ناحية كاميليا )
مراد الالفي : دي قراية فاتحة مش خطوبة .
ادهم : لا انا قررت خليها اتنين في بعض وبما ان هاتجوز هنا يبقا الجواز بعد شهرين من دلوقتي .
مراد : نعم !.
زين : عين العقل والله يا ادهم ... وافق علشان يخلفو ليك احفاد كتير .
مراد الالفي : انت واخد القعدة لحسابك يا زين انا ابو العروسة .
زين بضحك : وانا ابو العريس ... يالا يابني لبس العروسة دبلتها خلينا نخلص .
ادهم لبس كاميليا الدبلة همسلها : والله بحبك .
*********************

إلي هنا ينتهي الفصل الرابع والعشرون من الجزء الثاني من رواية عشق الزين بقلم زيزي محمد


تابع جميع فصول الجزء الثاني من هنا: جميع فصول رواية عشق الزين الجزء الثاني

تابع جميع فصول الجزء الأول من هنا: جميع فصول رواية عشق الزين الجزء الأول

تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها

جديد قسم : قصص رومانسية

إرسال تعليق