U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية تمرد صحفية بقلم دودو محمد - الفصل الثالث والسبعون

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة دودو محمد علي موقعنا قصص 26 و موعدنا اليوم مع الفصل الثالث والسبعون من  رواية تمرد صحفية بقلم دودو محمد. 

رواية تمرد صحفية بقلم دودو محمد - الفصل الثالث والسبعون

اقرأ أيضا: روايات رومانسية
رواية تمرد صحفية بقلم دودو محمد
رواية تمرد صحفية بقلم دودو محمد

رواية تمرد صحفية بقلم دودو محمد - الفصل الثالث والسبعون

فى فيلا ادهم

رجع ادهم من الشركه ودخل الفيلا بص على داليا ملاقهاش طلع اوضه بص فيها ملاقاش داليا قفل الباب وراح الاوضه عند الجدة ودخل لاقه داليا نايمه على السرير وحاطه راسها على رجل الجده وعماله تملس ايديها على شعر داليا ابتسم ودخل باس الجده وقال

ادهم :- واحشتينى يا مديحه
الجدة :- انا برضه يا بكاش
ادهم :- قعد جنب داليا ومسك ايديها وباسها وقال انتو الاتنين واحشتونى
داليا :- اتكسفت وابتسمت ليه بحب
الجدة :- ربنا يهنيكم ويسعدكم يارب
داليا :- قامت قعدت وقالت مديحه انتى كنتى فين من زمان بجد انا بحبك اوى وبحس فيكى كتير من امى
الجدة :- يا حبيبتى ربنا يعلم انا بحبك قد ايه وغلاوتك عندى من غلاوة ادهم حبيبى
ادهم :- مسك ايد الجدة وباسها وقال ربنا يخليكى لينا يا توحه
الجدة :- يلاااا روحوا على اوضتكم عايزه اريح شويه
داليا :- كده يا توحه بتطردينى من اوضك
الجدة :- روحى مع جوزك يلا وضحكة ليها
ادهم :- وقف وقال سبيها ترتاح يا داليا ويلا احنا على اوضتنا
داليا :- حاضر وقامت وقفت وباست راسها وخرجوا الاتنين راحوا على اوضتهم
ادهم :- حضن داليا وقال واحشتينى
داليا :- بكسوف وانت كمان واحشتنى
ادهم :- رفع وشها ليه وبص فى عينيها وقال اياكى تبعدى عنى وتسبينى تانى
داليا :- انا مبعدش يا ادهم انت اللى طلقتينى وتط
ادهم :- قطعها وقال خلاص يا داليا ننسى اللى فات بقى منتكلمش فيه تانى
داليا :- اتنهدت وقالت حاضر
ادهم :- قرب من شفايفها وبسها
داليا :- مسكت فيه اكتر واتعمقت معاه فى البوسه اكتر
ادهم :- بعد عن شفايفها وسند راسه على راسها وغمض عينه وقال وهو بينهج واحشانى اوى يا داليا بس مش هقدر المسك علشان مأذكيش واذى الحمل وضمها فى حضنه وقال بحبك اوى يا داليا اوى
داليا :- وهى حاسه ان جسمها كله مش قادره تتحكم فيه مسكت في ادهم اكتر وقالت وانا بعشقك يا ادهم
ادهم :- مسك ايديها وقال تعالى ونام على السرير واخدها فى حضنه وقعد يلعب فى شعرها وقال انا نفسى نبقى كده العمر كله مش عايز يبقى فيه ما بينا زعل تانى لا كبريائى نفع ولا عندك نفع يا داليا الكبرياء والعند كانوا شئ أساسى فى تعذبنا احنا الاتنين
داليا :- اتنهدت وقالت انا اكتر واحده اتعذبت فى الحكايه دى كلها يا ادهم بس حبك بالنسبة ليا احلى واجمل مكافئه لصبرى ده وحطت ايديها على بطنها وقالت وده بقى اجمل ما فى الحكايه يا ادهم حته منك ومنى جوايا احلى شعور احس بيه فى حياتى مش علشان حامل لاء علشان اللى جوايا حته منك يا ادهم
ادهم :- وانا فرحان بيه علشان هيكون واخد منى ومنك
داليا :- انت عايزه بنت ولا ولد
ادهم :- ايه حاجه تيجى منك تبقى حلوه يا قلبى بس بتمنا يكون ولد علشان يبقى صاحبى واعوض فيه اللى ضاع منى يا داليا
داليا :- أن شاءالله يا قلبى يطلع كده ويفرح قلبك
ادهم :- ضمها فى حضنه وباس راسها وقال واهم من ده كله انك تفضلى معايا وفى حضنى
داليا :- انا معاك وعمرى ما هبعت عنك تانى
ادهم :- هتنزلى تشغلى الجريده امته
داليا :- من بكره أن شاءالله وهخلى منتهى وفاطمه ينزلوا يشتغلوا معايا فيها
ادهم:- منتهى ممكن لأنها شغاله عادى إنما فاطمه معتقدش أن أكرم هيوافق يشغلها وبالذات بعد ما بقت حامل
داليا :- لاء لازم نبقى احنا التلاته مع بعض كلمه يا ادهم خليه يوافق ينزلها
ادهم :- هكلمه بس انا عارف رأى اكرم مش هيوافق ينزلها الشغل
داليا :- حاول الله يكرمك خليه يوافق
ادهم :- حاضر يا قلبى هحاول معاه
داليا :- قعدت وقالت انا جعاااانه اوى يا ادهم
ادهم :- خلاص روحى بلغيهم تحت يحضروا الاكل على ما اغير هدومى واجيب مديحه وانزل
داليا :- وقفت وباست ادهم فى خده وراحت فتحت الباب ونزلت
ادهم :- بص عليها وهى ماشيه واتنهد بحب وابتسم وقام دخل الحمام غير هدومه وراح اخد مديحه من اوضتها ونزلها تحت ونزلت سندس وقعدوا ياكلوا مع بعض
~•~•~•~•~•~•~•~•~•~•~•~•~•
عند منتهى

نزلت بدرى من شغلها وراحت عند الدكتوره علشان تكشف وتعرف ايه سبب عدم حملها وانتظرت دورها وبعد وقت جات السكرتيره بلغتها أنها تدخل دورها
دخلت عند الدكتوره وهى متوتره وقعدة قصادها
الدكتوره :- منوره يا مدام منتهى
منتهى :- ش.ش.شكرآ
الدكتوره :- اتفضلى اتكلمى بتشتكى من ايه
منتهى :- انا بقالى شهر وشويه متجوزه ومحصلش حمل فكنت عايزه اطمن اذا كان فيه مشكله ولا لاء
الدكتوره :- شهر بس جواز
منتهى :- ايوه فيها ايه
الدكتوره :- اصل شهر ده حاجه بسيطه من الجواز ومش شرط يحصل حمل من اول شهر ولا تانى شهر
منتهى :- عارفه بس انا عايزه اطمن
الدكتور :- تمام اتفضلى على السرير
منتهى :- قامت نامت على السرير وجهزت نفسها
الدكتوره :- بدأت تكشف عليها وبعد وقت انتهت من الكشف عليها وقالت اتفضلى يا مدام منتهى وخرجت وسابتها
منتهى :- قامت من على السرير وظبطت هدومها وراحت عند الدكتوره وقالت خير يا دكتوره
الدكتوره :- مفيش مانع عندك نهائى ومستعده للحمل فى اى لحظه بس لازم زوج حضرتك يعمل التحليل ده علشان نطمن انكم انتو الاتنين كويسين وعندكم استعداد للحمل
منتهى :- بقلق تحليل لجوزى وبعدين اخدته منها وقالت شكرآ يا دكتوره وسلمت عليها وخرجت وراحت عند الجريده تانى تستنى وصول علاء وبعد وقت وصل علاء ركبت العربيه وباسته فى خده
علاء :- ابتسم ليها وقال واحشتينى يا قلبى
منتهى :- ضحكة ليه بقلق وقالت وانت كمان يا قلبى
علاء :- شغل العربيه وراجعوا البيت وطلعوا عند الشقه وفتح علاء الباب ودخلوا وقفل وراهم الباب وقعدت منتهى على الكنبه وقعدت تدعك فى ايديها وقالت
منتهى :- علاء
علاء :- ايوه يا قلبى
منتهى :- ك.ك.كنت عايزه اقولك حاجه
علاء :- قعد جنبها وقال خير يا حبيبتى
منتهى :- ا.ا.انا روحت كشفت
علاء :- بصلها بصدمه وقال بعصبيه يعنى نفذتى اللى فى دماغك وكسرتى كلمتى
منتهى :- اسمعنى يا علاء انا نفسى ابقى حامل وروحت كشفت عند دكتوره والله العظيم والحمد الله اطمنت أن انا معنديش اى مانع للحمل بس لازم انت كمان تعمل التحليل ده ومدت ايديها بالورقه
علاء :- شد من ايديها الورقه وحدفها فى الارض وقال مش عامل زفت وانتى ملكيش كلام معايا تانى لما تعرفى تحترمى كلام جوزك كويس اوى يبقى ساعتها اكلمك وسابها ودخل الاوضه التانيه وقفل الباب وراه
منتهى :- اتنهدت ودموعها نزلت منها واخدت الورقه من الأرض وشالتها فى شنتطها وراحت خبطت على باب اوضت علاء وفتحت الباب ودخلت
علاء :- امشى يا منتهى
منتهى :- علاء بالله عليك متزعلش منى
علاء :- منتهىىىىىى اطلعى بره الاوضه بقولك
منتهى:- راحت عنده ومسكت أيده وقالت انا اسفه والله انا مقصدش اكسر كلامك ولا حاجه بس نفسى اكون ام يا علاء
علاء :- شد أيده وبص الاتجاه التانى ومردش عليها
منتهى :- علاء بص ليا رد عليا متسبنيش كده
علاء :- روحى اوضك يا منتهى
منتهى :- بصت ليه بدموع وطلعت تجرى على اوضتها
علاء :- بص عليها وهى بتجرى وغمض عينه بوجع واتنهد وقام اتوضى وصلى ركعتين ومسك المصحف وقعد يقراه فيه
منتهى :- دخلت اوضتها واترمت على السرير وقعدت تعيط لحد ما عينيها راحت فى النوم من كتر العياط
علاء :- بعد وقت صدق بالله العظيم وحس نفسه اهدا من الاول قام خرج من الاوضه وفتح الباب عند منتهى لاقها نايمه على السرير راح عندها وقعد جنبها وخبط عليها وقال منتهى يا منتهى
منتهى :- فتحت عينيها لاقت علاء قاعد جنبها اترمت فى حضنه وقعدت تعيط
علاء :- طبطب عليها وقال شششش أهدى يا منتهى
منتهى :- انا اسفه والله العظيم اسفه مش قصدى ازعلك منى واكسر كلمتك
علاء :- خلاص يا توته
منتهى :- قعدت تعيط
علاء:- خلاص يا توته بقى وباس راسها
منتهى :- بدموع لاء مش هسكت علشان انت لسه زعلان منى
علاء :- خلاص مش زعلان منك انا لو لسه زعلان منك مكنتش جيت ليكى دلوقتى
منتهى :- بصت ليه بدموع وقالت بجد مش زعلان منى
علاء :- ابتسم ليها وقال لاء مش زعلان ومسح دموعها ومسك وشها ما بين ايديه وقال انا عايزك تسمعى الكلام يا منتهى انا جوزك ومن حقوقى عليكى الطاعه وده اللى ربنا امرك بيه يا حبيبتى انا نفسى اكون اب زيك بالظبط بس احنا لسه فى أول شهر يعنى ملحقناش انتى عارفه لا قدر الله لو احنا بقالنا سنه ولا حاجه واتأخرنا كنت أنا اللى هطلب منك نشوف ايه سبب تأخرنا ده
منتهى :- واحنا ليه نستنى كل ده ما احنا نطمن من دلوقتى علشان لو فيه حاجه نلحقها من اولها
علاء :- طيب اصبرى شويه كمان يا حبيبتى
منتهى :- انا اطمنت على نفسى يا علاء والدكتوره قالت معنديش اى حاجه تمنع الحمل ناقص انت يا علاء علشان خاطرى اعمل التحليل ده
علاء :- يا حبيبتى
منتهى :- قطعته وقالت علشان خاطرى وافق يا علاء
علاء :- اتنهد بقلة حيله وقال حاضر يا منتهى لما نشوف اخرتها معاكى ايه
منتهى :- اترمت فى حضنه بفرحه وقالت بجد هتعمله انا بحبك اوى يا علاء اوى
علاء :- باس راسها وقال وانا بعشقك يا مجننه علاء معاكى
منتهى :- ضحكة وقالت مجنونه بيك يا روحى وباسته فى خده وقامت وقفت
علاء :- رايحه فين
منتهى :- هروح اغير هدومى وهعمل ليك الاكل بأيدى
علاء :- يبقى هنطلب الإسعاف هههه
منتهى :- غلس وسابته ودخلت الحمام غيرت هدومها وخرجت من الحمام راحت المطبخ وقالت استعنا على الشقا بالله
علاء :- دخل قعد على الكرسى علشان يتفرج عليها وهى بتعمل الاكل
منتهى :- بدأت تعمل الاكل وتبص لعلاء وتبعت ليه بوسه فى الهوا ووشها كله بقى دقيق وبهدلت نفسها على الاخر
علاء :- كان ميت على نفسه من الضحك على منظرها
منتهى :- حطت ايديها فى وسطها وقالت بغيظ انت بتضحك على ايه
علاء :- قام وقف وراح عندها ولف دراعه حاولين وسطها وقال شكلك تحفه وانتى كده
منتهى :- بزعل طفولى شكلى وحش
علاء :- شدها اكتر ليه وقال قمر شكلك زى القمر
منتهى :- بدلع بجد
علاء :- وغلاوة منتهى عندى وقرب من شفايفها وباسها وبعد وقت بعد عنها
منتهى :- بحبك يا علاء
علاء :- بعشقك يا روح علاء
منتهى :- شمت ريحة شياط زقته وقالت الاكل اتحرق
علاء :- ههههههههههه
منتهى :- بغيظ انت بتضحك الاكل اتحرق عجبك كده
علاء :- قرب من البوتجاز واخد المعلقه وداق الاكل ونزله بسرعه من بؤقه وقال بقرف الحمدالله أنه اتحرق يا منتهى انتى حاطه سكر مش ملح يا حبيبتى
منتهى :- احيه لاء بجد وداقته ورجعته من بؤقها وقالت بقرف تصدق عندك حق الاكل محلى فعلا
علاء :- ههههههههه اقعدى يا توته انا هعمل الاكل
منتهى :- بزعل طفولى مليش دعوه انا عايزه اتعلم اطبخ
علاء :- بعدين يا قلبى إنما دلوقتى اقعدى علشان اجهز اكل بسرعه احسن واقع من الجوع
منتهى :- طيب هقف جنبك اساعدك
علاء :- ماشى وبدء يعمل الاكل ومنتهى تساعده وبعد وقت انتهى وحطوا الاكل وبدأوا ياكلوا
~•~•~•~•~•~•~•~•~•~•~•~•~•
فى الفندق

عند دينا وتامر

كانت دينا نايمه فى حضن تامر بكسوف وتامر بيحسس على دراعها العريان وبيقول

تامر :- مبروك يا احلى واجمل زوجه فى الدنيا
دينا :- بكسوف ا.ا.الله يبارك فيك
تامر :- انتى بالنسبه ليا كنتى حلم بعيد اوى عنى ربنا يخليكى ليا ويقدرنى واخليكى اسعد واحده فى الدنيا دى
دينا :- قعدت وقالت عمرك ما هتندم انك اتجوزتنى
تامر :- بأستغراب ليه بتقولى كده يا دينا
دينا :- بدموع ما هو انا مشرفش حد انا واحده أهلها مجرمين واكيد مع الوقت هتتكسف منى وتندم على جوازك منى
تامر :- ايه الهبل اللى بتقوليه ده يا دينا انا بحبك مليش دعوه أهلك ايه المهم عندى انتى وبس وشرف ليا انك مراتى وفخور جدآ بيكى يا قلبى وشدها فى حضنه وقال بعد كده مش عايز اشوف دموعك دى تانى فاهمه
دينا :- حاضر بحبك اوى يا تامر
تامر :- وانا بموت فى التراب اللى بتمشى عليه يا دينا انا هصلى كل يوم ركعتين شكر لله علشان جعلك من نصيبى انا وقرب من شفايفها وباسها
دينا :- بعدت عنه وقالت ا.ا.انا هقوم اخد شاور
تامر :- شدها تانى ليه وقال استنى هنا
دينا :- بكسوف ع.ع عايز ايه
تامر :- هقولك بس وشد الغطا عليهم و(سكتت شهرزاد عن الكلام الغير مباح)
~•~•~•~•~•~•~•~•~•~•~•~•~•
فى فيلا اكرم

وصل اكرم من الشغل ودخل اطمن على ابوه وعلى امه وراح على اوضه وقال

أكرم :- السلام عليكم
فاطمه :- وعليكم السلام احضرك الاكل
أكرم :- لاء مش عايز هدخل اخد دش سخن واطلع انااااام
فاطمه :- براحتك
أكرم :- بطه مالك يا حبيبتى
فاطمه :- مليش
أكرم :-بصوت واطى قال لنفسه اممم بدأت وصلت النكد وراح عندها وقال طمطم طماطيمو مالك يا روح قلب أكرم من جوه
فاطمه :- بعصبيه قولتلك مفيش
أكرم :- براحتك ولسه هيمشى
فاطمه :- وكمان مش هامك زعلى ومش هتسألنى مالك لدرجاتى انا مش مهمه فى حياتك ازعل ولا اتفلق
أكرم:- داس على أسنانه وقال ما انا سألتك يا روحى مالك قولتيلى مفيش
فاطمه :- ما انت لو مهتم بيا كنت عرفت فيا ايه من غير ما تسأل
أكرم:- الله اكبر وبعد كده هندخل على جملة ما الاهتمام ما بيطلبش
فاطمه:- انت بتتريق على كلامى
أكرم :- قطع لسان امى ولو اقصد كده
فاطمه :- بصت ليه بغيظ وسابته وقعدت على الكنبه
أكرم :- لنفسه اجمد يا وحش ده احنا داخلين على ايام سوده وراح عندها وقعد جنبها وقال قلبى يا طمطم اقسم بالله انا تعبان وما قادر اتكلم من الشغل رجاء بلاش وجع قلب ونكد وقوليلى مالك علطول
فاطمه :- وتوجع قلبك ليه سبنى اتفلق
أكرم :- بعصبيه خفيفه لاء ما هو انا اللى هفلق دماغك نصين لو متكلمتيش يا قلبى
فاطمه :- متتعصبش عليا فاهم
أكرم :- حاضر وشدها وقرب من شفايفها وباسها بوسه طويله
فاطمه :- قعدت تزق فيه علشان تبعده عنها
أكرم :- بعد عنها وبص فى عينيها وقال اهو متعصبتش عليكى حلو المعامله كده
فاطمه :- انت قليل الادب
أكرم :- عارف وبموت فيها كمان
فاطمه :- عاااااا غلس
أكرم:- من بعد ما عندك يا روحى
فاطمه :- لسه هتقوم
أكرم :- شدها قعدها تانى وقال فاطمه حبيبت كل واحد وعنده طاقه وانا طاقتى بدأت تنفذ منى ياريت تقولى مالك وخلصى
فاطمه :- عايز اشتغل يا اكرم
أكرم :- بعصبيه يا دين النبى تانى يا فاطمه تاااااانى هنرجع نتكلم فى ام الموضوع ده تانى
فاطمه :- تانى وتالت ورابع لحد ما توافق تنزلنى الشغل
أكرم :- مش موافق يا فاطمه نزولك الشغل تانى مستحيل واحنا اتفقنا على كده ايه غير رأيك تانى يا بنت الناس
فاطمه :- منتهى بتشتغل وداليا بتشتغل اشمعنا انا اللى هقعد فى البيت مش أدهم ده صاحبك وبتحبه ليه متعملش زيه بقى وتخلينى انزل الشغل زي أصحابى
أكرم:- بعصبيه مليش دعوه بحد كل واحد حر مع مراته وانا مش متقبل موضوع الشغل ده وبلاش تبصى لعيشت غيرك علشان متحرمش عليكى عشتك يا فاطمه وسابها ودخل الحمام
فاطمه :- بصت عليه بدموع وقعدت تعيط
أكرم :- اخد شاور وخرج نام على السرير من غير ولا كلمه
فاطمه :- نامت على الكنبه وقعدت تعيط لحد ما عينيها راحت فى النوم
~•~•~•~•~•~•~•~•~•~•~•~•~
فى بيت سعيد

رجع مؤمن من المدرسه ودخل اوضه غير هدومه وخرج من اوضه ودخل لابوه المطبخ وقال

مؤمن :- امال فين أهل البيت راحوا فين
سعيد :- اختك روحت مع جوزها واخوك اخد مراته عند الدكتور
مؤمن :- وانا امته هاخد مراتى وأخرج يا حاج
سعيد :- مش لما تتنيل وتخلص دراستك الاول
مؤمن :- اتنيل مش عارف والله اقولك ايه يا حاج ايه معاملة جوز الام دى يا ابا انا زى ابنك برضه
سعيد :- مؤمن روح شوف هتعمل ايه متلخمنيش فى المطبخ كده
مؤمن :- اه لو تعرف المطبخ ده بيحصل فيه ايه من ابنك كنت طهرته مليون مره والله يا حاج
سعيد :- ضربه بالمعلقه وقال اتلم يا ولد عيل معندهوش أدب ولا خشى ازاى تقول كده على اخوك
مؤمن :- ااااااه يا حاج هو انا قولت جايب واحده غريبه دى مراته وربنا ليه الاڤوره دى بس يا أبا
سعيد :- اطلع بره عيل ابن كلب
مؤمن :- انا طالع بس عيب لما تشتم أبويه انت تعرفه علشان تشتمه
سعيد :- حدفه بالمعلقه اللى فى أيده وقال امشى يالا بره
مؤمن :- طلع يجرى من المطبخ وهو بيضحك بس خبط فى حمزه وقال انت جيت
حمزه :- ايه ده فيه ايه
مؤمن :- ابوك بيضربنى علشان بدافع عليك
حمزه :- بأستغراب بدافع عليا انا
مؤمن :- ايوه ليه وليه بيشتم فيك علشان اللى بتعملوا مع مراتك فى المطبخ دافعت عليك وقولتله انها مراتك مش حد غريب وانك مظلوم مش بتعمل حاجه خاااالص فى المطبخ واخد بالك انت خااااالص قالى أن هو هيطهر المطبخ بسببك
حمزه :- رفع حاجبه وقال بقى بابا هيقول كده
مؤمن :- امال انا يعنى اللى هقول كده
حمزه :- وحياة امك هتشوف منى ايام سوده
مؤمن :- ده على اساس ان انا كنت بشوفها منك فوشيه قبل كده ما طول عمرها سوده من اللحظه اللى بقيت اخويه فيها
ميرفت :- جات وقالت مؤمن عامل ايه
مؤمن :- مرات اخويه يا غالى تعالى شوفى صرفه مع جوزك عمال يشتم فيا علشان بدافع عليكى
حمزه :- انا
مؤمن :- ايوه مالك قلبت على زوزو كده ليه ما كنت عمال تقول عليها نكديه وزهقتك فى حياتك وانا عمال اقولك مراتك ميرفت مفيش منها أبدآ دى بلسم تتحط على الجرح يطيب وانت تقولى يا شيخ اتنيل واسكت اصلك متعرفش حاجه
حمزه :- انا قولت كده
مؤمن :- ايوه امال انا يعنى اللى هقول كده
ميرفت :- سورى يا مؤمن بس انا مصدقش أن حمزه يقول عليا كده هههههههه
حمزه :- يا لهووووى على كسفتك السوده يا مؤمن روح بقى اختفى من قدامنا وباس راس ميرفت وقال ربنا يخليكى ليا يا قلبى يارب
سعيد :- ايه ده واقفين كده ليه عندكم
مؤمن :- تعال يا حاج شوف اخر تربيتك البيه الكبير ومراته مش عاجبهم اكلك وبيتريقه عليه
ميرفت وحمزه :- بصوا لبعض وقالوا بصدمه احنا
سعيد :- امشى يا ابن الكلب يا كداب
مؤمن :-احم طيب يا جماعه انا فى البلكونه لو حد عايزينى ومشى وسابهم
التلاته بصوا لبعض وقعدوا يضحكوا
سعيد :- روحوا يلا غيروا هدومكم على ما احضر الاكل
ميرفت :- لاء خليك انا هغير هدومى وهاجى احضر
سعيد :- يا حبيبتى انا جهزت كل حاجه خلصوا بس وتعالوا
حمزه وميرفت دخلوا الاوضه وكل واحد غير هدومه
حمزه :- قرب منها وقال سامعتى الدكتور قالك ايه
ميرفت :- احم ا.ا ايوه
حمزه :- قال كتروا على قد ما تقدروا وغمز ليها
ميرفت :- خ.خ.خلاص بقى يعنى انت سبت الكلام كله ومسكت فى الكلمه دى بالذات
حمزه :- دى اكتر كلمه لازم اهتم بيها واسمعها وقرب منها وقال وهنبدأ نمشى على كلام الدكتور من دلوقتى
ميرفت :- زقته وقالت حمزه ايه اللى انت بتعمله ده بابا زمانه حضر الاكل
حمزه :- انا مش جعان ولا انتى سيبك بس وتعالى ننفذ كلام الدكتور
ميرفت :- وهى بتبعده يا حمزه بس بقى بلاش جنان وبعدت عنه وفتحت الباب وخرجت
حمزه :- يا بنت ال ماشى يا ميرفت وخرج وراها

عند مؤمن

اتصل على سندس وانتظر ردها عليه

سندس :- مؤمن احنا مش لسه كنا مع بعض
مؤمن :- واحشتينى اعمل ايه
سندس :- وده من ايه أن شاءالله
مؤمن :- من قلبى اللى بيدق ويقول سندس سندس سندس
سندس :- والله
مؤمن :- وحياتك عندى كل دقه بتنده بأسمك
سندس :- لاء انت حالتك صعبه اوى الصراحه
مؤمن :- اوى اوى وحياتك
سندس :- انت عارف انا عايزه اعمل ايه دلوقتى
مؤمن :- اوعى تقوليلى عايزه تبعتى ليا بوسه
سندس :- لاء يا حيلتها عايزه اقفل السكه فى وشك علشان تتلم وتتظبط كده
مؤمن :- اهون عليك يا قمر
سندس :- اه تهون يا اخويه
مؤمن :- اخويه
سندس :- مالك
مؤمن :- ايه اخويه دى كتك خوت
سندس :- هههههههههه
مؤمن :- اموت انا فى الضحكه الجنان دى
سندس :- لاء بجد اتلم يا مؤمن انا لو مكونتش عارفه انك بتهزر وبتحب الهزار كان هيبقى ليا معاك كلام تانى
مؤمن :- وحياة امك انا بحبك بجد مش هزار
سندس :- ا.ا انا لازم اقفل بينادوا عليا علشان اتغدا باى
مؤمن :- اهربى كالعاده باى وقفل السكه وقام دخل من البلكونه وقعد ياكل معاهم
~•~•~•~•~•~•~•~•~•~•~•~•~•
فى تونس

كان قاعد ممدوح كل ده فى الشركه وبيشتغل وايه كانت قاعده وهطق من الزهق بصت على ممدوح لاقته بيشتغل ومش سأل فيها نفخت وقالت

ايه :- لسه كتير
ممدوح :- بصلها وقال فاضل شويه
ايه :- انا زهقت يا ممدوح انا من ساعه ما جيت وانت بتشتغل ومش بتتكلم معايا خالص
ممدوح :- اعملك ايه طيب انتى مش شايفه بعينك عليا شغل قد ايه
ايه :- شايفه بس حتى اتكلم معايا شويه واشتغل شويه
ممدوح :- اتنهد وقال ايه اصبرى شويه وهنروح
وفى الوقت ده خبطت هند وقالت
هند :- باش نروح مسيو ممدوح شنوا تحب مني قبل ما نمشى
ممدوح :- لاء روحى انتى يا هند
هند :- اوك مسيو ممدوح تصبح على خير
ممدوح :- وانتى من أهله
هند :- بصت لايه وقالت تصبحى على خير مدام ايه
ايه :- وانتى من أهله يا هند
وخرجت هند وقفلت الباب وراها
ايه :- بصت لممدوح وقالت طيب انا جعانه وعايزه انام دلوقتى
ممدوح :- اول مره واخر مره تيجى معايا الشركه تانى يا ايه
ايه :- انت بتزهقنى علشان مجيش معاك الشغل تانى صح
ممدوح :- والله ده شغلى كل يوم وقولتلك ده امبارح مصدقتيش وصممتى انك تيجى معايا النهارده الشركه
ايه :- طيب وانا فين يا ممدوح لما يبقى وقتك كله كده فى الشغل
ممدوح :- ده على اساس لما بقعد معاكى بشوف حاجه غير الاكل وجعفر اللى جواكى
ايه :- والله بقى انا جعفر يا ممدوح
ممدوح :- اتنهد وقال سبينى اشتغل يا ايه
ايه :- قعدت تهز فى رجليها وتاكل فى ضوافرها وقالت لاء بقى كفايه شغل انا زهقت وعايزه اروح
ممدوح :- بصلها بغيظ وقال قومى يا ايه مش هخلص من زنك وقام وقف اخد مفاتيحه وتليفونه وفتح الباب وقال بغيظ اتفضلى حضرتك
ايه :- قامت وقفت وخرجت من المكتب
ممدوح :- قفل الباب وراحوا عند الاسانسير ونزلوا الاتنين وركبوا العربيه وراحوا على الفيلا وبعد وقت وصلوا ونزلت ايه من العربيه وراحت فتحت الباب ودخلت
ممدوح :- بص عليها وهى ماشيه واتنهد ومشى وراها ودخل وقفل الباب وطلع على السلم
ايه :- مش هتاكل
ممدوح :- بصلها وقال لاء مليش نفس وطلع على اوضه وقلع الجاكت بتاعه وحدفه على الكرسى وقعد على السرير ومد ايده فى جيبه وطلع الورقه اللى فيها عنوان لينا وبص فيها شويه وبعد كده كرمش الورقه فى أيده وداس عليها بغيظ وحطها تانى فى جيبه وقام دخل الحمام اخد شاور وخرج بالبورنص ونزل عند ايه لاقها واقفه فى المطبخ بتعمل اكل اتنهد ودخل عندها حضنها من ضهرها وقال يويو قلبى انا عايزك
ايه :- اتوترت وقالت م.م.ممدوح انا تعبانه ومش قادره
ممدوح :- حاول يتحكم فى أعصابه وقال يا حبيبتى ما انا كمان تعبان بس اللحظه دى بتنسى الواحد تعبه تعالى يلا انتى واحشتينى اوى
ايه :- بعدت عنه وقالت ا.ا.انا مش مستعده للى فى دماغك ده
ممدوح :- بعصبيه وامته حضرتك هتكونى مستعده ليا ها انتى عارفه انا بقالى قد ايه بتحايل عليكى وكل مره تقولى مش مستعده احنا لسه بقالنا شهر يا ايه الشهر ده ملمستكيش فيهم ست سبع مرات على بعض انا جوزك وليا حقوق عليكى وكل مره اقول اسيبك مضغطش عليكى اسيبك براحتك ده غير طريقة لبسك فى البيت لجوزك فيه ست متجوزه بقالها شهر بس تقعد بترنج وتنام جنب جوزها بترنج خلاص انا تعبت انا لو اعرف ان الجواز كده مكنتش اتنيلت واتجوزت كفايه بقى وسابها وطلع على اوضه
ايه :- بصت بصدمه لممدوح وهو ماشى ودموعها نزلت منها وطلعت وراه الاوضه وقالت بعصبيه هو انت ليه كل اللى فى دماغك الحاجه دى وبس هو الجواز بالنسبه ليك سرير وخلاص انا بنى ادمه زى ما بدور على حقوقك كده ادينى حقوقى فينك انت طول النهار ها ماسك ليا الشغل الشغل الشغل وانا فين فى حياتك مش موجوده وعايز حضرتك ترجع اخر اليوم تلاقى الكرسى اللى جايبه فى البيت جاهزه على سنجة عشره علشان تاخد منها حقوقك وتولع بقى هى كانت عامله ازاى طول النهار حتى لما اخدنى النهارده برضه اعتبرتنى كرسى معاك مسألتش فيا طول النهار ورمينى على الكنبه زى الكلبه انا بقى لو اعرف ان الجواز منك هيبقى كده مكنتش وافقت عليك يا ممدوح بجد انا ندمانه أن انا اتجوزتك ونزلت وسابته قعدت على الكنبه وقعدت تعيط
ممدوح :- اتنهد بوجع ونزل وراها قعد جنبها على الكنبه وشدها فى حضنه وقال خلاص انا اسف متزعليش
ايه :- لو سمحت سبنى لوحدى
ممدوح :- مقدرش اسيبك لوحدك يا ايه
ايه :- ده على اساس انك معايا طول الوقت ما انت علطول سايبنى لوحدى
ممدوح :- خلاص حقك عليا نحاول نشوف ايه الغلط فى حياتنا ونصلحه يا ايه كل واحد مننا غلط فى حق التانى تعالى ننسى كل اللى فات ده ونبدء صفحه جديده
ايه :- ما انت قولت قدامك شهر على ما تخلص الشغل اللى وراك ده يعنى الحال ده هنفضل عليه شهر بحاله
ممدوح :- لاء هخدك معايا الشركه نتكلم شويه واشتغل شويه ايه رأيك
ايه :- سكتت شويه وقالت ماشى
ممدوح :- ايه انا بحبك والله العظيم بحبك بس الإهمال احساس وحش اوى بيخلى الواحد دماغه تروح فى حتة تانيه بلاش الاهمال ليا يا ايه مش عايز يحصل حاجه نندم عليها انا وانتى
ايه :- تقصد ايه مش فاهمه
ممدوح :- لاء ولا حاجه تعالى بقى واحشتينى وشدها ليه
ايه :- قامت من جنبه وقالت بتوتر ا.ا انا بحضر الاكل ناكل الاول
ممدوح :- بصلها بغيظ وقال مش عايز اطفح وسابها وطلع الاوضه تانى
ايه :- بصت عليه وهو ماشى واتنهدت ودخلت المطبخ
ممدوح :- طلع اوضه ونام على السرير وهو متغاظ من ايه وبص على السقف شاف صورة جسم لينا وكلامها ودلعها وحركاتها هز راسه يمين وشمال وقال اطلعى من دماغى بقى ما انتى علطول كنتى قدامى اشمعنا دلوقتى صورتك بقت تيجى ليا علطول وغمض عينه وحاول ينام
~•~•~•~•~•~•~•~•~•~•~•~•~•
فى اسكندريه

فى شقة فادى

وصل فادى من الشغل ودخل الشقه لاقه رودينا ونهى قاعدين بيتفرجوا على التلفزيون وبيضحكوا وقف وسرح فى ضحكة نهى

رودينا :- قلبى انت جيت حمدالله على السلامه
فادي :- انتبه لصوت لرودينا بصلها وقال ها ا.ا الله يسلمك وراح باسها من خدها
نهى :- وقفت وقالت عن اذنكم
رودينا :- رايحه فين يا يا بنتى
نهى :- هدخل اوضى اريح شويه
رودينا :- متبقيش غلسه بقى خليكى قاعده معانا فادى هيدخل يغير هدومه وهيجى
نهى :- معلش اسهروا انتو مع بعض براحتكم
رودينا :- قولها يا فادى تقعد معنا
فادى :- بتوتر خ.خ.خليكى قاعده يا نهى معانا
نهى :- معلش اصل حاسه نفسى تعبانه شويه
رودينا :- بلاش استعباط ما انتى كنتى قاعده وبتضحكى ومش فيكى حاجه علشان خاطرى خليكى قاعده معانا
نهى :- اتنهدت وقالت حاضر وقعدت تانى على الكنبه جنب رودينا
فادى :- بص على نهى ورجع بص على رودينا وقال انا هدخل اغير هدومى
رودينا :- احضرك الاكل
فادى :- ماشى ودخل الاوضه
نهى :- خليكى انتى هروح انا احضر الاكل
رودينا :- لاء خليكى انتى طول النهار مقعديش
نهى :- كله يهون علشان حبيب خالتو ده ومشيت ايديها على بطن رودينا
رودينا :- حضنتها وقالت انا بحبك اوى يا نهى ربنا يخليكى ليا وميحرمنيش منك يارب
نهى :- طبطبت عليها وقالت ولا منك يا قلبى يلا هقوم احضر الاكل لجوزك وقامت دخلت المطبخ تحضر الاكل وفى الوقت ده دخل فادى وقعد على الترابيزه وفضل يبص على نهى وهى بتحضر الاكل وحضرت نهى الاكل على الترابيزه من غير ولا كلمه ولسه هتخرج
فادى :- نهى
نهى :- بصت ليه وقالت نعم
فادى :- اكلتى
نهى :- ايوه اكلنا انا ورودى عن اذنك وخرجت وسابته
فادى :- بص عليها وهى خارجه وقعد ياكل
نهى :- قعدت جنب رودينا وقالت بتعملى ايه
رودينا :- ولا حاجه قاعده ومستنيه نصى التانى تيجى
نهى :- ده نص التانى ده انا ولا سى فادى بتاعك
رودينا :- هقولك انتو الاتنين نصى التانى
نهى :- ده اللى هو ازاى
رودينا :- انتى وفادى نص يعنى انتى ربع وهو ربع يعنى انتو الاتنين بتكملونى يا نونه
نهى :- حطت راسها على كتف رودينا وقالت وربنا انتى ضاربه منك على الاخر
رودينا :- عارفه يا قلبى ومش محتاجه حد يقولى
نهى :- فاكره لما كنتى بتقولى عليا مجنونه ده انتى طلعتى أجن منى ههههههههههه
رودينا :- بصوت واطى قالت هو اللى يتجوز واحد زى فادى ده يكون عنده عقل
نهى :- بصوت واطى طيب بس احسن لو سمعك هيعلقك
والاتنين بصوا لبعض وقعدوا يضحكوا
وفى الوقت ده جه فادى وقال
فادى :- طيب ضحكونى معاكم طيب وقعد الجنب التانى عند رودينا على الكنبه
رودينا :- لاء ولا حاجه كنا بنشكر فيك انا ونهى وبصت لنهى وقعدوا الاتنين يضحكوا
فادى :- الواضح كده أن العكس هو اللى حصل
الاتنين عاملين يضحكوا ومش قادرين يمسكوا نفسهم من الضحك
فادى :- كان بيبص على نهى وهى بتضحك ويسرح فيها وقال انتو الاتنين أجن من بعض والله
رودينا :- علشان احنا الاتنين عايشين معاك فى مكان واحد كتر خيرنا والله
فادى :- والله شاربين ايه انتو الاتنين
رودينا :- وهى بتضحك قالت شاربين حشيش
فادى :- هههههههه ده انتو مسطولين من غير اى حاجه
نهى :- كانت بتضحك ومش قادره وقالت كفايه بجد هموت من كتر الضحك انتى مش طبيعيه والله هرمونات الحمل عامله معاكى احلى دماغ
رودينا :- انا طالبه معايا اكل فشار ولسه هتقوم
نهى :- خليكى هقوم انا اعمله
رودينا :- وربنا ما حد هيعمل الفشار ده غيرى وقامت من جنب نهى وفادى ودخلت المطبخ
فادى :- بص جنبه على نهى وهى بتضحك وسرح فيها وشويه وجت رودينا وقالت
رودينا :- انا جييييييت
فادى :- فاق وبص رودينا وضحك ليها بتوتر
نهى :- كانت بتبص على التلفزيون ومش واخده بالها من نظرات فادى ليها
رودينا :- قعدت تانى مكانها وقالت يلا كلوا
نهى :- مدت ايديها علشان تاخد فشار فى نفس الوقت اللى فادى مد أيده فيها والاتنين أيديهم خبطت فى بعض اتوترت وشالت ايديها بسرعه وقالت ا.ا اسفه
رودينا :- منتبهتش للى حصل وكانت مركزه فى التلفزيون وبعد وقت نامت رودينا على كتف فادى ونهى نامت على كتف رودينا
فادى :- شال رودينا دخلها الاوضه وحطها على السرير وغطاها وخرج من الاوضه بص على نهى وهى نايمه وقرب أيده اتجاه وشها وبعدها تانى قبل ما تلمسها وضم قبضة أيده جامد بندم شديد وخبط براحه على كتف نهى وقال نهى يا نهى
نهى :- امممم
فادى :- قومى نامى فى اوضك
نهى :- فتحت عينيها بصدمه وبصت جنبها ملاقتش رودينا بصت لفادى بتوتر وقالت ه.ه.هو انا نمت ازاى
فادى :- انتو الاتنين نمتوا وانتو بتتفرجوا على التلفزيون
نهى :- وقفت وقالت ع.ع عن اذنك ودخلت اوضتها وقفلت الباب
فادى :- بص على نهى وهى ماشيه واتنهد وطفى التلفزيون ودخل نام جنب رودينا وحط أيده تحت دماغه وقال لنفسه وبعدها معاك يا فادى ايه اللى بيحصلك ده وبص على رودينا وقال مش دى حب عمرك ليه بقى بتبص لغيرها واشمعنا دى بالذات اللى شغلتك اوى كده ما كانت قدامك من زمان فوق يا فادى وبلاش تمشى فى سكه اخرتها سد وغمض عينه وحاول ينام
*********************
إلي هنا ينتهي الفصل الثالث والسبعون من رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة