U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية شرسة ولكن بقلم لولو طارق - الفصل السادس والعشرون

مرحباً بكم أصدقائي وأحبابي عاشقي القراءة والقصص مع رواية اجتماعية جديدة للكاتبة لولو طارق التي سبق أن قدمنا لها العديد من القصص والروايات الجميلة علي موقعنا قصص 26 و موعدنا اليوم مع الفصل السادس والعشرون من  رواية شرسة ولكن بقلم لولو طارق. 

رواية شرسة ولكن بقلم لولو طارق - الفصل السادس والعشرون

اقرأ أيضا: روايات غرام
رواية شرسة ولكن بقلم لولو طارق
رواية شرسة ولكن بقلم لولو طارق

رواية شرسة ولكن بقلم لولو طارق - الفصل السادس والعشرون

نور بتنطر ايديها فى الهوا : احنا ها نستهبل من اولها
حازم : بيستوعب ... بصى من غير غلط
نور : انت خليت فيها غلط والا صح .. ها تقعد تتسحلب وتتدحلب وبعدين تقولى مراتى شرعى وقانونى وبعدين البسى يا نور عيلين كملى بيهم باقى حياتك
حازم تنح وحط ايده على بوئها : ايه ما صدقتى .. افصلى .. انا متعود على كدا لما كنت انام فى الصاله عشان اسمع أمى وهى تعبانه او محتاجه حاجه .. قمت من النوم دخلت اوضتى ونمت وانا مش حاسس .. بتحصل سعتك عادى جدا .. ايه الدنيا اتهدت وفى ثانيه النوايه السيئه طلعت
نور : بص على رأى خالتى .. انا شكلى كدا ها اخلف معاك بدون قصد ونيتنا ها تكون حسنه قوم يا ابووو حسنه من هنا الاوضه دى ما تعتبهاش برجلك تانى
حازم : ودا على اساس ايه .. دى اوضتى زى ما هى اوضتك
نور ابتسمت برخامه وبتنطر ايديها لورا : كانت اوضتك .. دلوقتى وبتشاور بصباعها على السرير اوضتى لوحدى .. يعنى ملكيه خاصه
حازم بعند : لا ملكيه مشتركه وبيشاور عليها وعليه
نوربترفع مناخيرها لفوق : نووو .. نووو .. خاصه ودا اخر كلام يا حازم
حازم بيهز راسه ومغمض عيونه : مشتركه يا نور ودا نهاية الكلام .. ووسعى خلينى اريح جسمى بما انك صحيتى وزقها ونام على السرير
نور بترفع ايديها لفووق وكانها عايزا تضربه .. وقااامت من جمبه وهى قايمه اقفلى النور والباب وانتى خارجه ومش عايز دوشه
نور بتنزل ايديها وتطلعها : اصبر علياااا .. فتحت الدولاب جااامد وخبطت الضلفه
نور : اهاااا.. مش دى ضلفتى .. مسكت الضلفتين وزقتهم بعزم ما فيها الناحيه التانيه .. وبتطلع الهدوم وحازم رافع راسه وبيبص عليها بغيظ ... ها نبتدى شغل المدايقه
نور بتعمل علامه الصدمه بوشها : ايه دا .. سورى ياحازم نسيت انها مشتركه .. وجابت بجامه وزقت الضلفه خبطتها تااانى وبرخامه .. انت جايب دولاب مزعج اعوذ بالله .. وهى خارجه رزعت الباب .. وبعدين خبطت عليه جااامد ... وبتقول بصوت عالى ... نام براحتك يا زومى .
حازم ابتسم : مجنونه .. وفعلا ناااام تانى وكل شويه يقوم مفزوع على صوت حاجه : وبعدين بقى فى الكائن الحى الغير طبيعى إلا برا دا ..
نور فوق راسه : انت بتقول حاجه يا وحش
حازم بخضه رجع لورا : ايه يا نور شغل العفاريت دا .. امال مين الا بيرزع برا
نور : التلفزيون جايبه على توم وجيرى اصلى بحبهم ..
حازم : ولما انتى بتحبيهم واقفه فوق راسى ليه وبيشاور بايده على برا بعصبيه اتفضلى برا شوفى حبايبك
نور : جايه اقولك ان الفطار جاهز وحضرتك قاعد بتزم فيا مع اصحابك ينفع
حازم رفع حواجبه : اصحابى .. اصحابى مين
نور : نواياااك السيئه إلا دايما ملموين عليك وبيلعبو فى دماغك شطرنج .. وسابته وخرجت .. وحازم متنح من كلامها ورجع يريح راسه على المخده تااانى وجسمه .. نور دخلت براسها من الباب وبصوت عالى .. مش ها تقوم تفطر انت واصحابك
حازم بغيظ شال خداديه وبيحدفها بيها وهى جريت على البرا وبتضحك من غير صوت وبتطلع لسانها .. وبتقوله انت الخسران .. وبتلف لقت حازم فى ضهرها ..
حازم : ايه بقى شغل العيال دا
نور قعدت وبأستعباط ؛ حد دايقك يا بطل
حازم بنبرة صوت عاليه : والله .. نور ما تطلعيش
نور رفعت ايديها الاتنين : والله ما انت مكمل .. روح استر نفسك باى ملايه وتعالا افطر عشان انا جعانه
حازم : على فكره انا ما بقعدش غير كدا .. وايه استر نفسك بملايه ما تتعدلى بقى
نور بالامبلاه : مش مهم .. ياله طص وشك بشوية ميه وتعالا
حازم قلب شفايفه : طص
نور : بلاش طص .. رش بخر وشك وانجززز .. وبتاكل
حازم هز راسه وسابها ودخل الحمام اتوضى وخرج .. ودخل الاوضه تانى وبيصلى ..
نور : هو دخل الاوضه مطلعش ليه .. هو ها يشتغلنى دانا اشتغل بلد .. وقامت بتبص عليه لقته بيصلى .. راحت قعدت مكانها ومستنياااه .. على ما خلص .. وطلع قعد قدامها ..
حازم : خلصتى أكل
نور : قربت : لا مستنياك على ما تصلى .. تقبل الله
حازم ابتسم : منا ومنكم يا شيخه نور ياتقوى يا ايمان
نور : الله يباركلك يا مولاناااا .. ها تعزم على الاكل انا جوعت
حازم ضحك من قلبه على رد فعلها السريع .. وبيسمى وبعدين كل .. ولاحظ ان نور بتاكل بطبيعتها جدا ما بتمثلش ابدا .. واخده راحتها ..
نور : بتشيل الاكل بعد ما خلصوو وحازم كمان بيشيل معاها
حازم : وسعى أغسل انا اطباقى الاول
نور تنحت وبصتله : نعم اطباقك .. لا سيب انا ها اعملهم
حازم : انا متعود على كدا من صغرى على فكره .. فا وسعى مش فاضيلك
نور بعدت عن الحوض وواقفه تتفرج عليه .. خلص .. وبعد ما خلص ابتسم وقرب عليها
حازم : تسلم ايدك الفطار كان طعمه جميل ومميز
نور ابتسمت : ميرسى
حازم : هههههه مش لايق عليك يا صاحبى .. وخرج بسرعه وهى حدفته بالفوطه الصغيره إلا على الحوض .. وبصت قدامها وابتسمت خرجت وواقفه فى البلكونه ومعاها السجاير وولعت سجاره .. حازم سحب السجاره من ايديها رامها فى الشارع . وخد علبة السجاير كلها .. ودخل على جوا..
نور قربت عليه وبتحاول تنتش السجاير بس هو رفع ايده : ايه إلا بتعمله دا
حازم : بعمل إلا المفروض أعمله من يوم ما شفتك .. انسى سجاير فى حياتك تانى لاء فاهمه
نور وقفت وحطت ايديها فى وسطها : انت مالك .. ومين انت عشان تمنعى منها .. بص ما تعصبنيش وتطلعو جننوتى وهات علبة السجاير
حازم رفع حواجبه : اعلى ما فى خيلك اركبيه .. طول ما انتى معايا لا يمكن ها تشربيها تانى .. وسميه زى ما تسميه .. وماعنديش مانع احبسك على فكره
نور بزهق : اه ما انت راجل .. عايشين حياتكم عشان تأمرو وتتحكمو وبس .. انا مش ها ابطل سجاير وهجمت عليه وبتحاول تاخد العلبه منه .. لف ايديه الاتنين حوالين وسطها وبقت السجاير عند ضهرها .. ونور فى حضنه ووقع بيها على الكنبه .. وبقى هو فوقيها ..
نور بصوت مبحوح : ابعد عنى
حازم : مش ها ابعد يا نور .. وها تسمعى كلامى والا افطصك وأخلص منك .. سجاير لاء فاهمه
نور : مش فاهمه يا حازم .. مش فاهمه
حازم وهو لسا زى ما هوو مشى ايده على وشها وهى بتغمض عيونها .. وبهمس فتحى عيونك
نور بنهجه : ابعد وبتحرك نفسها جااامد
حازم : ليه عايزا تدمرى نفسك .. ادينى سبب لو هى بتفيد ها اشرب معاكى .. انما هى ها تعجزك وانتى فى عز شبابك
نور بصوت عالى وصريخ : ابعد عنى .. ابعد
حازم اتعدل وعدلها وهى زقته بغل وسابته ودخلت الاوضه وقفلت على نفسها من جوا وحازم متغاظ منها نفسه يلاقى سبب لكل إلا هى بتعمله دا . الناس كلها عندها مشاكل وبتعانى حياتهم مش فل وتمام ..
***************
محى بعد ما روح اتفاجئ بأخته وابنها موجودين عندهم .. حاولت تكلمه لانها قاعده وسهرانه عشان تتكلم معاه بس هو رفض ودخل اوضته ونام على طول .. الصبح على الفطار
فوزيه : انت يابنى ضيف فى البيت
محى : ليه يا ماما
فوزيه : ما بتقعدش معانا نهائى .. ما بنصدق ترجع عشان تقعد معانا وانت تهرب ومأضيها
محمود : سبيه براحته يا فوزيه .. شاب وعايز يعيش
محى ضحك : تعيش يا حج .. منوره يا أميره
أميره : مش باين يا محى .. يا راجل واحشنى وكنت عايزاك وانت تقولى تعبان ونعسان وسيبتنى ودخلت نمت
محى : تتعوض يا حبيبتى ولا يهمك فين محمد
أميره بأبتسامه : لا ما بيصحاش دلوقتى خالص .. المهم
محى : ايوا كدا ادخلى فى المهم
أميره : ايه رايك فى الدكتوره هينووو الا ساكنه قدامى عشان تتقدم لها
محى : هههههه . هينووو .. دى دوا مغص .. عايزا تجوزينى دوا مغص يا اميره .. لا يا حبيبتى ريحى نفسك انا عارف عايز اتجوز مين
أميره سابت الرغيف وبصت له بأنتباه : مين يا حبيبى
محى : بقولك ايه انا عارف انك جايه مخصوص بعد ما محمود وفوزيه كلموكى عشان تيجى تقنعينى انى ابعد عن ورد صح
فوزيه : ايوا يا استاذ صح .. ادام احنا مش عاجبينك ومش قادرين عليك
محى : يا ماما .. يا حبيبتى انتو فوق راسى بس دى حياتى والاختيار بالذات يخصنى انا وبس
اميره : يعنى تضيع نفسك وتقول يخصنى .. مجنون يا محى .. مين البنت دى وبنت مين معاها تعليم ايه .
محى : لو انتوو شايفنها ولا حاجه .. اعتبرونى زيها وبقولكم انا كمان ولا حاجه
فوزيه : قطع لسانك .. بقى امك وابوك واهلك ولا حاجه
محى : يااااه .. ليه كدا .. بتتعاملووو من فوق قوى وباصين للناس كانها مش زيكم
محمود : انت ها تعقل والا اقوم أعقلك يالا . دى اخرها تروح ترعى شوية غنم
محى بهجوم : مش عيب .. الا بيرعى غنم عمره ما كان دا عيب فى حقه .. العيب علينا احنا اننا دايما بنتعامل بالمستوى وانت مين وانا مين . انا ها اتجوز انسانه دم ولحم والانسان دايما يا حج قابل للتغير .. مش يمكن تبقى فى يوم من الايام احسن من ابنك المهندس .. الا طافح الدم ومش قادر حتى يكمل تشطيب شقته والاسم مهندس .. على فاكره فى مهندسين بايعين وسواقين وبردو مهندسين زيى .. وفى ناس بنضرب لها تعظيم سلام ونقول لهم يا ساعة الباشا ويا بيه وهو مكمل تعليمه بالعافيه .. يعنى التعليم مبقاش بالاهميه إلا انتو متصورنها ابدا كله .. كله بيندب حظه اتعلم او لاء بيندب وطافحين الدم
اميره : احنا مش عايزين فلفسه .. دى ها تتعبك مش ها تفهمك .. دايما جهلها ها يظهر عليها فى كل تصرفاتها وها تكسفك وتعرك قدام الناس
محى بثقه : لا يا اميره . ورد ست البنات وانسانه محترمه وواعيه .. وانا حر دا اختيارى انااا
محمود : يوم ما تفكر تتجوزها ما اشوفش وشك هنا تانى فاهم
محى : ها اهون عليك .. ليه كل العداوه دى وعشان ايه
فوزيه : عشان تعقل وترجع لعقلك
محى قام : طيب انا ها أمشى واعرفوو انى ها اتجوز ورد ومش ها اسيبها ابدا من غير زعل ... وطلبت ايديها كمان
محمود بعصبيه : من مين يالا .. دى مقطوعه من شجره كدبت الكدبه وصدقتها
محى : ان شاء الله بكرا ابقى انا كل أهلها .. بعد اذنكم وسابهم ودخل الاوضه
فوزيه : انتوو ها تسيبوه يتجوزها ويقضى على حياته
أميره : بابا قوم اقنعه ان كدا غلط .. ها اقول ايه لجوزى دا عايز يعرنا كلنا
محمود : خلاص مش عايز ولا كلمه .. يغور ويشوف مين ها يساعده يروح يقعدها على المحاره .. وبكرا الايام تعرفه قيمة امه وابوه وخصوصا لما يلاقى محدش جمبه ولا بيساعده
محى قاعد فى الاوضه مهموم وزعلان وبيلم حاجته .. هو مرتاح وكل ركعه بيصليها بيدعى ربنا .. والراحه بتزيد مش بتقل ابدا .. ليه بيبصو للناس بعنصريه وتميز .. ليه الحيااه دايما بنكلكعها ونعقدها وهى سهله وبسيطه وليه دايما إلا فى ايده حاجه .. علم .. فلوس .. حياه .. تفائل .. بيبخل على غيره وبيدور دايما على إلا زيه
************
سيف واقف فى التأمين وكل كيانه مع سلوى ..
محمود : ايه يابنى .. لسا مفوقتش والا ايه
سيف : فايق يا عم
محمود : عم .. لا دانت حالتك خطر .. وغمز .. هى البت لسا مغلابك بردو
سيف : ما تطلع من نفوخى يا محمود على الصبح
محمود : انا غلطان .. تعالا افطر وان شالله تتفلق .. اه يا اخويا هو فى زيك .. فى ايدك دبله ومظبط كمان
سيف : ما تاخد انت الدبله وتحل عنى رمتها لامى وكل ما اكلمها تقولى مش قادره ارجعها يابنى وكانها الدبله الملعونه
محمود ضحك : انا مشغول حاليااا .. دور على غيرى .. ياله .. وقعدو ورا وبيفطرو كلهم مع بعض .. والعساكر واقفه وسيف شال شنطه مليانه سندوتشات وبيدى كل واحد فيهم سندوتش قبل ما يأكل ..وبيهزر مع العساكر هما واخدين منه على كدا والكنيسه خرجت لهم مشروبات ...
سيف مد ايده بابتسامه : شكرا يا جرجس
جرجس بنفس الابتسامه : الشكر للرب يا باشا ودخل
سيف عطا الصنيه لعسكرى وخد كوبيتين شاى وبيناول محمود
محمود : بجد ناوى تعمل ايه
سيف : مش عارف يامحمود عايز افسخ الخطوبه باى طريقه وكل البابين مقفوله فى وشى زعل أمى وابويا بيأثر فيااا بس خلاص انا قولتلهم انا مليش فيها تانى
محمود : هى دى حاجه صعبه قوووى كدا
سيف : لو ابوك وامك واقفين لك فيها بيبقى صعب والا مصعبها اكتر مهما اتلكك وعايز اوصلها اننا ما ننفعش بعض بردو مفيش فايده
محمود : والا يخلصك منها لو رجعت لقتها لازقه بردو
سيف : ياريت
محمود : هى حتة قضية صغيره واخلع منها وبعدين نخرجها منها
سيف : اعوذ بالله ياخى .. لا طبعا حدالله انا أذى بنت او حتى اى حد .. الله الغنى .. انا بدعى ربنا يسامحنى لما بضعف فى الغلط كمان اروح وأذى حد
محمود بغمزه : غلط يا عنتيل .. خلاص غلط بغلط نلبس البت قضيه ونستغفر ونتوب انا وانت
سيف : 😂😂😂 يالا بطل تفكيرك السو دا .. وابعد عنى
محمود : بحسك غبى يالا .. هانخرجها منها مش ها نسيبها
سيف : ليه طيب .. وها تخرج بعد ايه ما حياتها تتهد .. اهدى وقول هديت واسكت خلى حلولك لنفسك ان شاء الل ارجع الاقيها فورجت من عند ربنا
محمود : براحتك .. وقوم عشان انت خنقتنى شوف شغلك
سيف : 😂😂😂 تموت فى المصايب
محمود : 😂😂😂 دا شغل ياااد وقضايا وترقيات ايش فهمك انت ..
سيف ماشى وبيتكلم : صحيح ايه فهمنى ... وصرخ مره واحده وبيقول محمود بصوت عالى وبيجرى عليه وهو بيطلع سلاحه .. واتنين من على موتسكل واحد فيهم نزل ومعاه رشاش وبيضرب كل إلا بيقابله فى وشه والتانى نازل وبيجرى على جوا فى الكنيسه .. وواحد من العساكر جرى وراه وضربه طلقه قتله فى ساعتها ..
وناس بتجرى على جوا وناس بتقع جمب بعض .. وحاله غريبه حصلت فى لمح البصر ..وكلمه يتحط تحتها سطور كتيرر .. مهما كانت قوتك او تحصينك بس الغدر عمره ما كان له حسابات ..
محمود واقع على الارض وبيصرخ بعلووو صوته ودموعه بتنزل لوحدها : سييييف ... سييييييييف .. رد عليااا يالا .. انت لسا كنت بتكلمنى .. سيف وبيرفع راسه من على الارض وسيف بيحاول يفتح عيونه وبيشهق ..
محمود بعياط قطع كل القلوب : سيف اتعدل عشان حياتك وحبيبتك مش نفسك تتجوزها .. ياله والله لاقول لامك وابوك عشان تتجوز يا صاحبى .. بس اتعدل
سيف بيتكلم كلام مش مفهوم ودموع بتنزل: ق وم .. ال ع ي ال .. لا إ ل ه .. إلا ال ل ه .. وصعوبه شديده فى الكلام ونطق محمد رسول الله بصعوبه أكبر ودموع بتنزل من عيونه
محمود : بيبص حواليه وبيشوف العساكر والناس .. لقى ست واقعه ودم كتير نازل منها .. وشابين واخدين رصاص فى كتفهم وقاعدين وبيعيطووو وهما باصين لامهم إلا واقعه ميته قدامهم .. وعسكرى فى حضن عسكرى تانى واخد رصاصه وبيشيله .. كله .. كله على الارض .. عقله مش قادر يستوعب دا حصل ازاى وليه وعشان ايه .. طيب إلا عمل كدا أستفاد ايه .. دم وحرقة قلب وموت أحلام ناس قبل ما تتولد . بتدمر بيوت وبتموت فيها الحياااه
واحد من العساكر .. ابعدو عنه اكيد لابس حازم ناسف .. ابعدو وبيخلو المنطقه كلها من الناس والاسعاف والدعم وصل بدء يوصل الحالات .. ويشيلو فى كل المصابين وصلو المستشفى وكله بيجرى وناس بتصرخ ... وعربية الاسعاف إلا فيها سيف فيها محمود برغم اصابته قاعد جمبه .. ومبطلش عياط وهو شايف صاحبه بيفارق الحياه بينقلو سيف ومحمود بيجرى وراه ودخلوو بيه الاوضه وبيحاولووو يعملو اى حاجه وصلو جهاز النبضات والنبضات بتضعف جدا .. جدا وبتقل .. وبيجهزوه عشان العمليه بعد ما رصاصتين استقرو فى صدره .. دخل العمليات وابوه وامه واخوه اول ما سمعو الخبر طلعووو يجرو وهما قلوبهم محروقه وموجوعه وبيدعو ربنا تكون حاجه بسيطه ... وصلو شافو محمود ومسكو فيه .. دراعه مربوط بعد ما خرجو منه الرصاصه وواقف قدام العمليات إلا طول فيها جدا بقاله ساعه ونص وعدو على محمود كانهم سنه ونص
ساميه بلهفه : ابنى فين يا محمود .. سيف جراله ايه
محمود ساكت ما بيردش
خالد بعياط : قول يا بنى سيف ماله .
محمود : مش عارف يا عمى .. مش عارف
سامر بعصبيه : يعنى ايه مش كنت معاه .. قولنا حالته .. اخويا بيموت والا مات ومخبين انطق
ساميه بتقول لاء بصوت مكتوووم والدموع فى عيونها : ابنى ان شاء الله كويس صح يا محمود
محمود انفجر فى العياااط وخبى وشه بين ايديه الاتنين ..
خرج الدكتور بعد ما عدى اكتر من ساعتين وباين على وشه الأسف .. وكلهم جريووو عليه
خالد : سيف عامل ايه يا دكتور طمنى
الدكتور بأسف : ها يتنقل العنايه حالا ربنا معاكووو ويصبركوو وسابهم ومشى .. وسامر جرى وراه ومسكو يعنى ايه ها تدخلوه العنايه وربنا يصبرنا .. هو عايش والا ميت والا انتوو بتلعبو بينااا
الدكتور بيتكلم فى دخله نور وسلوى وحازم ومحى وورد وبيقول مسئله وقت بس بنعمل إلا علينا بعد اذنكم
سلوى بصرخه : سيف ووقعت من طولها قدام الكل
*********************
إلي هنا ينتهي الفصل السادس والعشرون من رواية شرسة ولكن بقلم لولو طارق
تابع من هنا: جميع فصول رواية شرسة ولكن بقلم لولو طارق
تابعوا صفحتنا على الفيس بوك للمزيد من روايات حب
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة