U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية تمرد صحفية بقلم دودو محمد - الفصل الحادى و الثلاثون

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة دودو محمد علي موقعنا قصص 26 و موعدنا اليوم مع الفصل الحادى و الثلاثون من  رواية تمرد صحفية بقلم دودو محمد. 

رواية تمرد صحفية بقلم دودو محمد - الفصل الحادى و الثلاثون

رواية تمرد صحفية بقلم دودو محمد
رواية تمرد صحفية بقلم دودو محمد

رواية تمرد صحفية بقلم دودو محمد - الفصل الحادى و الثلاثون

فى بيت فاطمه

وصل اكرم البيت عند فاطمه واستقبله ابو فاطمه وفاطمه ورحبوا بى ودخل قعد فى الصالون

انور :- منور يا ابنى
أكرم :- احم بنورك يا عمى
انور :- انا زعلان منك ازاى تروح تقعد بره وبيت عمك انور مفتوح
أكرم :- ربنا يكرمك يا عمى مقدرش على زعلك بس محبتش اتقل عليكم
انور :- لو سمعت الكلمه دى تانى هزعل منك بجد
أكرم :- حاضر يا عمى
انور :- ها اقوم اخلى ام فاطمه تحضر العشا
أكرم :- ملهوش لزوم والله
انور :- بت يا فاطمه عقلى جوزك ده وعرفيه أن خلقى ضيق عن اذنكم وخرج وسابهم
فاطمه :- سمعت بابا قالك ايه خلقه ضيق ومش بيحب يقول الكلمه كذا مره
أكرم :- وانا مقدرش على زعل الحج وبنت الحج
فاطمه :- احم ه.ه.هقوم اجبلك حاجه تلبسها
أكرم :- مسكها من ايديها وقال فاطمه استنى
فاطمه :- بصت على أيده اللى ماسكه ايديها ورجعت قعدت تانى
أكرم :- قرب منها وقال فاطمه انتى زعلانه منى
فاطمه :- هزت راسها بمعنى لاء
أكرم :- فاطمه والله العظيم بحبك اوى وكنت كل ما اجى اعترفلك بحبى تحصل حاجه تمنعنى
فاطمه :- احم م.م.مش وقته الكلام ده يا اكرم ولسه هتقوم
أكرم :- مسكها من دراعها ومنعها تقوم وقال لاء وقته يا فاطمه لازم تعرفى حقيقة مشاعرى ليكى وعايز اعرف اذا كنتى انتى كمان بتحبينى ولا مغصوبه عليا علشان التمثيليه وبقيت عليكى أمر واقع
فاطمه :- احم م.م.مش مغصوب عليا
أكرم :- يعنى بتحبينى
فاطمه :- قامت وقفت وقالت ه.ه.هروح اجبلك حاجه تلبسها
أكرم :- وقف وشد فاطمه من دراعها علشان يمنعها تخرج قبل ما ترد عليه ووقعت فى حضنه
فاطمه :- اتوترت ورفعت راسها بصت ليه فى عينيه وسرحت فيهم
أكرم :- بص فى عينيها وبص على شفايفها وقرب منها ولسه هيبوسها
الباب اتفتح مره واحده ودخل ممدوح وشاف أكرم وفاطمه وقال
ممدوح :- اوبا شكلى جيت فى وقت غير مناسب
فاطمه :- اتكسفت وبعدت عن أكرم وبصت فى الارض
أكرم :- اتغاظ من ممدوح وقال بصوت واطى العن ابو غلاستك
ممدوح :- قعد على الكرسى وقال لاء شغل السهوكه ده مش هينفع على فكره انتو هتقعدوا فى مكان واحد يعنى الهمسات واللمسات دى متنفعش هترد وتقولى ما هى مراتى لا والف لا مراتك اه إنما مينفعش يحصل حاجه زى كده غير بعد الفرح يعنى هى دلوقتى فى حكم المخطوبه ليك
أكرم :- داس على سنانه وقال وانت مالك يا رذل
ممدوح:- وانا مالى ازاى مش بنت عمى دى ولا مش بنت عمى
اكرم:- ومراتى دى ولا مش مراتى
ممدوح :- ما قولتلك يا حلو مراتك اه إنما تحصل حاجه كده ولا كده بعد الفرح يا خفيف
أكرم :- تصدق حلال اللى حصل فيك من ادهم وكان نفسى يخلص عليك علشان نرتاح من برودك يا اخى امته بقى تغور وتسافر من هنا
ممدوح :- والله كان نفسى اقولك قريب بس للاسف طولت فترة الاجازه لحد ما وشى يتصلح
فاطمه :- بفرحه بجد يا توحه يا احلى خبر فى حياتى
أكرم :- بصلها بغيظ وقال والله
فاطمه :- احم ه.ه.هروح اجبلك هدوم من عند توحه
أكرم :- انا ألبس مكان الغلس ده
ممدوح :- وتبوس ايديك وش وضهر كمان أن هلبسك من عندى
أكرم :- ده انت بنأدم ثقيل مش عارف هستحمل انام معاك فى نفس المكان ازاى
ممدوح :- معلش تعال على نفسك واتكرم وشرفنى بوجودك معايا فى نفس الاوضه
فاطمه :- كفايه بقى هو انتو كل ما هتشوفو بعض هتعملوا كده شبه ناقر ونقير
أكرم :- ما هو اللى بنى أدم بارد
ممدوح :- لاء حوش العسل اللى بيخر منك
فاطمه :- بس بس كفايه بقى
أكرم :- بص لممدوح بقرف وقال سكتنا
ممدوح :- اتخرسنا
فاطمه :- عاملين كأنكم اطفال فى الحضانه
وفى الوقت ده دخل انور وقال يلا يا ولاد الاكل جهز
فاطمه :- اشهد ان لا إله إلا الله واشهد أن محمدآ رسول الله كويس انك جيت تنقذنى من شوية المخاليل دول
انور :- هههههههههه ليه يا بنتى
فاطمه :- الاتنين ناقر ونقير مع بعض معرفش هيناموا مع بعض ازاى فى الاوضه
أكرم:- انا عندى النومه فى الشارع اهون من النومه معاه فى نفس المكان
ممدوح :- لاء حوش انا اللى هموت وتنام معايا فى نفس المكان
انور :- اهدوا شويه يا ولاد انتو رجاله كبيره مش اطفال على الكلام ده
ممدوح :- بص بقرف لأكرم وخرج من الاوضه
أكرم :- خرج وراه وراح قعد على السفره وبص لممدوح بقرف
فاطمه :- بصت لابوها والاتنين قعدوا يضحكوا على اللى بيحصل ما بين أكرم وممدوح
واتجمعوا الكل على السفره اكلوا وبعد وقت انتهوا من الاكل ودخلوا كل واحد على اوضه ودخل ممدوح واكرم الاوضه اللى هيناموا فيها سوا وغير أكرم هدومه
ممدوح :- اوعى تكون بتشخر وانت نايم علشان انا نومى خفيف ومش بعرف انام فى دوشه
أكرم:- ياريت كنت بشخر وانا نايم علشان ازعجج وازهقك فى عيشتك بس للاسف مش بشخر بس على الله متكونش انت اللى بتشخر
ممدوح :- انا ده انا نومى زى النسمه مليش نفس خالص ونام على السرير وقال ده سريرى اللى بنام عليه عندك السرير التانى فاضى
أكرم :- بص ليه بقرف وقال شكرآ وراح نام على السرير وقال ممكن تطفى النور اللى جنبك ده
ممدوح :- لاء مش بحب انام فى الضلمه
أكرم :- وانا مش بعرف انام طول ما فى نور مفتوح وضارب فى عينى
ممدوح :- والله مش ذنبى ودى وشك هناك والنور مش هيجى فى عينك
اكرم:- هوف الصبر من عندك يارب ونام الاتجاه التانى بعيد عن النور
ممدوح :- عايز غطا
أكرم.:- لاء شكرآ مش عايز منك حاجه
ممدوح :- احسن برضه وفرت وغمض عينه ونام وبعد شويه قعد يشخر
أكرم :- نفخ وقال فعلا واضح أن نومك زى النسمه الله يحرقك يا بعيد وحط المخده على ودنه وقعد يتقلب كل شويه ومش عارف ينام من صوت شخير ممدوح قام قعد وبص على ممدوح بغيظ وقام خرج من الاوضه وكان الكل نايم وفى الوقت ده خرجت فاطمه من اوضتها علشان تشرب واتخضت اول ما شافت اكرم وقالت
فاطمه :- أكرم بتعمل ايه هنا
أكرم :- بزهق مش عارف انام من مزيكة حسب الله اللى جوه دى
فاطمه :- هههههههه تقصد على شخير ممدوح
أكرم :- وهو فيه غيره حتى فى نومه غلس
فاطمه :- ههههههههه
أكرم :- وانتى كنتى رايحه فين كده
فاطمه :- دخله اشرب من المطبخ
اكرم :- وانا كمان عايز اشرب
فاطمه :- ثوانى اجبلك مايه ودخلت المطبخ
أكرم :- دخل وراها المطبخ
فاطمه :- احم ايه جابك
أكرم :- جيت اخد المايه منك
فاطمه :- مدت ايديها بالكوبايه وقالت احم اتفضل
أكرم :- لاء اشربى منها انتى الاول
فاطمه :- لاء اشرب انت
أكرم :- اخد من ايديها الكوبايه وقربها من شفايف فاطمه وقال اشربى
فاطمه :- بصت ليه بتوتر وشربت من الكوبايه اللى فى ايد أكرم
أكرم :- اخد الكوبايه ولف الكوبايه وشرب من نفس مكان شفايف فاطمه
فاطمه :- احم ر.ر.روح حاول تنام شويه
اكرم :- مش عارف انام مع الرزل ده ما تكسبى فيا ثواب ونيمينى معاكى فى الاوضه
فاطمه :- يا سلام
أكرم :- انا زى جوزك برضه
فاطمه :- بطل استعباط وروح نام يلا ولسه هتمشى
أكرم :- شدها وقربها منه وقال على فكره فيه موضوع كنا بنقوله قبل ما يدخل علينا ابن عمك الغلس
فاطمه :- بتوتر ا.ا.اكرم اوعى بطل قلة ادب
أكرم :- قلة ادب ايه ده انا جوزك
فاطمه :- جوزى اه بس ممنوع اى حاجه غير بعد الفرح
أكرم :- انتى هتعملى زى ابن عمك البارد ده
فاطمه :- يا اكرم اوعى بقى حد يدخل يشوفنا كده
أكرم :- يا بنتى اقسم بالله انتى مراتى ولو اخدك بيتى دلوقتى مش عيب ولا حرام مدام حصل إشهار
فاطمه :- برضه ابعد
أكرم :- تعرفى انك بتزيدى حلاوه لما خدودك بتحمر من الكسوف
فاطمه :- بصت فى الارض ومردتش عليه
اكرم:- رفع وشها ليه وبص فى عيونها ولسه بيقرب من شفايفها
ممدوح :- دخل عليهم
أكرم :- بعد عنها وقال م.م.مش تخلى بالك يا بنتى
فاطمه :- بلعت ريقها بصعوبه وبصت فى الارض
ممدوح :- ربع أيده على صدره وقال خير تخلى بالها من ايه
أكرم :- ها ا.ا اصل وهى داخله راسها اتخبطت وكنت ببص على الخبطه
ممدوح :- يا راجل لاء فيك الخير الصراحه بس هو انت ايه جابك هنا اصلا
أكرم :- كنت بشرب
ممدوح:- وانتى يا هانم
فاطمه :- ك.ك.كنت بشرب
ممدوح :- يا محاسن الصدف القلوب عند بعضها انتو الاتنين عطشتوه فى وقت واحد يا سبحان الله
فاطمه :- ا.ا.انا داخله انام تصبحوا على خير
ممدوح :- وانتى من أهله يا اختى ابقى اعملى حسابك بعد كده وخلى مايه جنبك فى الاوضه
فاطمه :- ح.ح.حاضر وسبتهم ومشيت
ممدوح:- وانت يا عم النحنوح اتفضل امشى قدامى
اكرم :- بصله بقرف وقال بصوت واطى مشش فى ركبك يا بعيد عامل شبه فرقع لوز بيطلع منين للواحد معرفش
ممدوح :- بتقول حاجه
أكرم :- بقولك تصبح على خير
ممدوح:- وانت من أهله يا اخويه وبعد كده لما تحب تشرب المايه اهى جنبك
أكرم :- مأخدش بالى منها العتب على النظر بقى
ممدوح :- ابقه البس نطاره يا ظريف ونام وسابه
أكرم :- نام اللهى تنام عليك حيطه ونام على السرير وغمض عينه وافتكر كسوف فاطمه ضحك وراح فى النوم
~•~•~•~•~•~•~•~•~•~•~•~•~•
عند مؤمن وسندس

وصلت سندس للمكان اللى قال عليه مؤمن لاقته واقف ندهت عليه جه ليها وسلم عليها وقال

مؤمن :- عامله ايه
سندس :- دلوقتى بقيت كويسه علشان خرجت من ام الفيلا دى
مؤمن :- لدرجاتى
سندس :- واكتر انا الفيلا بالنسبه ليا سجن كبير رغم أن عندى مطلق الحريه فى الخروج وعندى حاجات كتير لترفيه بس نقصنى اهم حاجه نقصنى جو العيله نقصنى اب وام يهتموا بيا نقصنى اخت تشاركنى اهتمامتى نقصنى اخ يسألنى محتاجه حاجه ولا لاء نقصنى العيله يا مؤمن رغم وجودهم فى الفيلا بس مش موجودين فى حياتى
مؤمن :- بصلها بزعل وقال طيب ليه محاولتيش تقربى انتى منهم
سندس :- مشيت لقدام شويه وقالت حاولت بس برضه انا اخر اهتماماتهم
مؤمن :- راح عندها وقال انا النهارده هنسيكى اى حاجه مزعلاكى تحبى تروحى فين
سندس :- بصت ليه وقالت اممممم عايزه اروح الملاهى وعايزه اكل سندوتشات فول وفلافل وعايزه اروح اقعد على البحر وعايزه اكل ذره مشوي وعايزه ترمس وعايزه تين شوكى وعايزه حرنكش
مؤمن :- بصلها بصدمه وقال ايه كل ده
سندس :- بزعل ايه كتير طيب انا مطلبتش كل اللى نفسى فيه
مؤمن :- وهو انتى لسه فى نفسك حاجه
سندس :- اه كتير اوى نفسى اكل حلبسه وعايزه فشار وعايزه
مؤمن :- قطعها وقال بااااااااس وربنا ما انتى مكمله كفايه عليكى لحد هنا انا غلطان أن قولتلك نخرج اصلا انا لو اعرف كده كنت سرقت بنك قبل ما اجيلك
سندس :- هههههههههه خلاص بلاش تجيب كلهم هات اللى تقدر عليه
مؤمن :- سرح فى ضحكتها وقعد يبصلها
سندس:- اخدت بالها وقالت ايه فيه ايه بتبصلى كده ليه
مؤمن :- ها م.م.مفيش يلا بينا ووقف تاكسى وراحوا على الملاهى واول ما نزلوا من التاكسى قعدت طنط شبه الاطفال وتقول
سندس :- الله انا عايزه اركب دى الله بحبها اوى اوى يا مؤمن
مؤمن :- بس اللعبه دى صعبه عليكى
سندس:- لا بالعكس دى جميله واحلى ما فيها أن الواحد بيبقى طاير فى الهوا ويصرخ براحته مفيش حاجه تمنعه
مؤمن :- براحتك تعالى
سندس :- بس تركب معايا
مؤمن:- ها
سندس :- بليز يا مؤمن علشان خاطرى
مؤمن :-بقلق م.م.ماشى
سندس :- بضحك انت خايف هههههه
مؤمن :- لاء طبعا
سندس :- هههههههه طيب يلا يا عم الشجاع وراحوا الاتنين مع بعض ركبوا فى مكان واحد وحطوا حزام الامان
مؤمن :- كان خايف ومتوتر وبيبص وبيضحك لسندس بقلق
سندس :- انا فرحانه اوى يا مؤمن اوى
مؤمن :- بصوت واطى افرحى يا اختى انتى وانا قلبى يوقف عليا ومره واحده اشتغلت اللعبه وقعدت سندس تصرخ بفرحه ومؤمن بقى يقول بصريخ يحرق ابو شكلك انا غلطان أن سمعت كلامك الله يحرقك الله يحرقك يااااااارب يا لهوووووووى يا انى يا أبا الحقوانى يا خالق اشوفك ميته أشنع الموتات يا بعيده يا اختتتتتتتتتتى
سندس :- هتموت على نفسها من الضحك وتقول هموووووت لالالا انت مش معقول
مؤمن :- بصريخ اسكوووووووتى سكت حسك من الدنيا يارب يارب يارب يا لهوووووووووى هى اللعبه دى مش هتقف ولا ايه حد يوقفها يا اختتتتتتتتتتى
سندس :- هههههههههههههههه وقعدت تصرخ وتضحك ومؤمن قعد يصرخ من الخوف لحد ما اللعبه وقفت ونزلوا الاتنين من اللعبه
مؤمن :- يا لهوى يا انى يا اما على اللى حصلى يا اختى مش قادر اقف على رجلى
سندس :- هههههههههه طلعت جبان خالص يا مؤمن هههههههههههههه
مؤمن :- ها م.م.مش حكاية جبن اصل معدتى بتوجعنى من اللعب دى احم
سندس :- بتريقه اه ما هو واضح بأمارة ما انت نزلت وبهدلت الدنيا ترجيع
مؤمن :- هتتلمى ولا اخدك ونمشى
سندس :- لاء خلاص خلاص انا عايزه اركب اللعبه دى تانى بليز يا مؤمن
مؤمن :- مع نفسك يا اختى وربنا ما احط رجلى فيها تانى
سندس :- براحتك وراحت تركب اللعبه دى تانى واشتغلت وقعدت تصرخ بفرحه وتضحك وتعمل لمؤمن باى باى
مؤمن :- كان بيضحك على ضحكتها وفرحان علشان هى فرحانه
وبعد وقت ولعب كتير راحوا اشتروا سندوتشات فول وفلافل وراحوا على البحر وقعدوا ياكلوا
سندس :- اممممم جميل اوى كان نفسى اكله من زمان اوى
مؤمن :- ليه مش بتاكلوا
سندس :- ماما مش بترضه بتقول يعنى ده اكل وسكتت
مؤمن :- سكتى ليه
سندس :- علشان يعنى مينفعش اقول ماما بتقول على الفول ده اكل مين
مؤمن :- اكل حيوانات يعنى
سندس :- هزت راسها وقالت اه بس انا بحبه اوى وساعات بشترى منه وانا رايحه المدرسه
مؤمن :- احنا بقى الفول والفلافل دول عندنا وجبه اساسيه يوم الجمعه بعد الصلاه
سندس :- وهى بتاكل يا بختكم بتاكلوا مع بعض بتتكلموا مع بعض بتضحكوا رغم يعنى عايشين فى شقه مش فى فيلا كبيره بس ماشاءالله عندكم ترابط ومبسوطين ربنا يخليكم لبعض
مؤمن :- السعاده ملهاش دعوه بالمكان اللى عايشين فيه ولا الفلوس السعاده بالرضا بالمقسوم السعاده بالتربيه الصح وتعليم اصول دينك هى دى السعاده الحقيقه يا سندس
سندس :- عارف انا كان نفسى اعيش فى بيت زى بيتكم بس يبقى عندى أهل بيخافوا عليا ويهتموا بيا
مؤمن :- بصلها شويه وهى صعبانه عليه وقال كلى يلا السندوتشات هتبرد
سندس :- ههههههههه انت لسه فاكر انا خلصت من زمان انت اللى أكلك زى ما هو
مؤمن :- اجبلك تانى
سندس :- لاء شبعت
مؤمن :- مد أيده بالسندوتش بتاعه وقال طيب كلى ده علشان خاطرى
سندس :- انا شبعت والله
مؤمن :- بقولك علشان خاطرى
سندس :- اخدته من أيده وقالت شكرآ وقعدت تاكله
مؤمن :- وقف وقال هروح اجيب حاجه من هنا بسرعه وجاى
سندس :- هتجيب ايه
مؤمن :- هتعرفى لما اجى ومشى وسابها وبعد وقت جه
سندس :- بصدمه ايه ده كله
مؤمن :- حرنكش وذرة وترمس بس ملاقتش ليكى فشار ولا حلبسه اوعدك هبقى اجبهم ليكى مره تانيه
سندس :- بصت ليه بحب وقالت شكرآ يا مؤمن على كل حاجه حلوه عملتها ليا
مؤمن :- احم انا معملتش حاجه وبعدين مش هتاخدى منى ولا ايه
سندس :- اه اسفه واخدت منه الحاجه وقعدت تاكل منها وقضوا وقت فى الضحك واللعب والأكل وبعد وقت روحها على الفيلا وبعد كده.روح هو على البيت
~•~•~•~•~•~•~•~•~•~•~•~•~•
اشرقت شمس صباح يوم جديد بنورها الساطع فى سماء الصعيد لتبدء ميرفت بفتح عيونها بصت حاوليها بأستغراب لاقت نفسها نايمه فى المستشفى ومتعلق فى دراعها محلول غمضت عيونها علشان تفتكر ايه اللى جابها هنا وبعد وقت افتكرت اللى حصلها الليله السابقه جسمها كله اتنفض من الخوف ودموعها نزلت وقعدت تمسح فى جسمها من أثر دم احمد وقالت بصوت عالى

ميرفت :- حمززززززززه
وفى الوقت ده الباب اتفتح ودخل عليها حمزه
حمزه:- دخل بص الاتجاه التانى من غير ولا كلمه
ميرفت :- ح.ح.حمزه ا.ا.انت كويس الحمدالله ا.ا انا كنت خايفه عليك قوى
حمزه :- بصلها بقرف وقال جهزى نفسك علشان تقولى اقوالك علشان يتقفل المحضر
ميرفت :- انت ليه بتكلمنى كده انت لسه زعلان منى ومصدق أن انا اخد الدهب وضحكة عليك والله العظيم مظلومه و.و.وهو قالى كده قال إن هو حط الدهب فى الدولاب علشان تشوفه وتشك فيا وطلقنى وهو يتجوزنى طيب روح أسأله هيقولك الكلام ده والله ما بكدب عليك ولا عمرى كذبت عليك يا حمزه
حمزه :- كان بيبص الاتجاه التانى ومش بيرد عليها
ميرفت :- مسكت أيده وقالت حمزه رد عليا
حمزه :- شد أيده من ايديها وقال أحمد مات خلاص
ميرفت :- بصدمه مات
حمزه :- ايوه مات
ميرفت :- طيب انت مصدق كلامى يا حمزه رد عليا طمنى بالله عليك انا مقدرش على زعلك منى
حمزه:- بصلها بصه طويله وقال بلاش دموعك علشان انتى واحده كدابه انا لحد دلوقتى مش مصدق نفسى أن واحده زيك قدرت تضحك عليا انا واحد حمار علشان صدقت واحده زيك خاينه وكدابه
ميرفت :- لالالا انا والله العظيم ما خونتك انت تصدق ان انا اعمل كده طيب ما لو كنت عايزه اعمل كده كنت اتجوزته ومهربتش منه لكن انا عمرى ما فكرت فيه هعمل ليه كده بس
حمزه :- داس على سنانه بغيظ وقرب منها وقال بغيظ ما هو ده اللى هيجنينى ليه حصل كل ده ليه هربتى وجيتى ليا انا بالذات ليه ردى عليا
ميرفت :- بدموع هربت منه علشان مكنتش عايزه اتجوزه عارف ليه علشان كنت انت اللى فى قلبى سعتها من اول مره شوفتك فيها ساعة قضية اختك وانا حبيتك بقيت اسرح معاك علطول بخيالى مكنتش شايفه غيرك قصاد عينى ولما حسيت أن الحلم ده هيضيع بجوازى من احمد هربت منه وقدرة ربنا وقعنى فى سكتك أنت الدنيا كانت مش سيعانى لما سمعت صوتك وانت بتقولى رايحه فين مكنتش مصدقه نفسى كنت حاسه ان انا بحلم ولما بصيت عليك واتأكد أن انت حسيت أن ربنا حقق ليا حلمى استجاب دعائى اللى كنت بدعي علطول أن يجمعنى بيك لو صدفه انا بحبك يا حمزه وقلبى وعينى مش شايفين غيرك قدامهم يبقى ليه هخونك واكدب عليك
حمزه :- غمض عينه وقال مش قادر اصدقك بعد ما شوفتك بعينى على سريرى ما ابن خالك
ميرفت :- بلاش تظلمنى يا حمزه ده بيعتدى عليا وانا كنت بحاول أبعده عنى وحطت ايديها على وشها وقعدت تعيط
حمزه :- عااااااا كفايه بقى كدب كفايه تخدعينى بدموعك المزيفه كفااااااايه وخرج وسابها
ميرفت :- بدموع يارب اظهر الحقيقه ليه انا مقدرش اعيش من غيره يارب انت عالم أن انا مخنتهوش ومظلومه يارب فتح عينه على الحقيقه وقعدت تعيط
عند حمزه خرج من الاوضه بتاعة ميرفت وراح قعد على الكرسى بره وغمض عينه بتعب وزعل وقال
حمزه:- يارب انا تعبت مش عارف أصدق قلبى ولا اصدق عينيا ورجع لوراه وقعد يفتكر اللى حصل الليله اللى مضت
~•~•~•~•~•~•~•~•~•~•~•~•~•
فلاش باك

خرج حمزه من البيت وهو متعصب نزل ركب عربيته وقعد يلف بيها وهو مش عارف رايح فين وافتكر عنوان القبر بتاع ابو ميرفت راح عنده ونزل من عربيته ودخل وقف قصاده وبص ليه كتير من غير ولا كلمه وبعد وقت اتكلم وقال

حمزه :- ليه تعملوا فيا كده انا حبيتها بجد معقول الوش البرئ ده يطلع كداب معقوله كنتوا بتضحكوا عليا طول المده دى طيب ليه عملتوا كده رد عليا ليه ليه ودينى لادفع بنتك تمن كل لحظه ضحكة عليا فيها وخدعتنى على قد الحب اللى فى قلبى ليها على قد العذاب اللى هتشوفه منى هعرفها مين حمزه سعيد وراح ركب عربيته ومشى بيها على البيت وهو بيتوعد بالانتقام من ميرفت وبعد وقت وصل بعربيته عند البيت ونزل وهو الشرار بيطلع من عينه وطلع على شقته وفتح الباب ودخل بص ملاقاش حد فى الصاله بس سمع صوت غريب طالع من اوضت النوم بتاعته خرج مسدسه من جيبه ودخل براحه شاف احمد وهو نايم فوق ميرفت والشكل العام كان بيقول أن ميرفت متقبله الوضع لان مكانش ليها صوت غير بسيط جدآ فكر أنها بتخونه من غير ما يفكر وجه المسدس لاحمد ومد أيده على الزناد وخرجت الرصاصه جت فى احمد وشاف ميرفت وهى بتبص فى عينه بخوف واغمى عليها حدف المسدس فى الارض وقعد جنبه وقال بدموع ليه تعملى فيا كده يا ميرفت ليه تخونينى عملت فيكى ايه علشان تعذبينى العذاب ده ليه وقعد يعيط وبعد وقت مسح دموعه ومسك تليفونه بلغ الشرطه والاسعاف وبعد وقت جت الشرطه وعينت الجريمه واخدت حمزه معاهم القسم علشان التحقيق معاه واخدوا جثة احمد فى الإسعاف واخدوا ميرفت فى إسعاف تانيه ووصل حمزه القسم وبدء يتحقق معاه وقال إن هو اتهجم عليهم وحاول يعتدى على مراته وعلشان احمد كان خاطف ميرفت قبل كده وهربان اتقفلت القضيه على أنها دفاع عن النفس والشرف وخرج منها حمزه وراح على المستشفى عند ميرفت قال ليه الدكتور أن هى عندها صدمه عصبيه لما شافت الدم وقتيل قدامها وان هو أداها حقنه مهدائه ومش هتفوق غير الصبح قعد على الكرسى بره وهو حزين ومنكسر من خيانة ميرفت ليه وافتكر أنه هما لعبوا عليه يوم ما قالت انهم خطفوها
~•~•~•~•~•~•~•~•~•~•~•~•~•
بااااااك

حمزه :- معقول اللى شوفته بعينى كدب معقول يكون بيتهيألى انا خلاص تعبت والله العظيم تعبت وقام خرج من المستشفى خالص وركب عربيته ومشى
~•~•~•~•~•~•~•~•~•~•~•~•~•
فى فيلا ادهم الحناوى

فى اوضت داليا

صحيت داليا من نومها لاقت نفسها نايمه على الكنبه استغربت من نفسها وقامت قعدت وكانت حاسه بصداع جامد فى دماغها هزت راسها يمين وشمال علشان تسكن شويه الالم وقامت وقفت وجت تتاوب حست بوجع جامد فى بوقها راحت وقفت قصاد المرايا وبصت على بؤقها لاقت اثار دم على وشها ومتعلم صوابع على وشها بمعنى أن فيه حد ضربها بالقلم بصت لنفسها بأستغراب فى المرايا وقالت ايه اللى بيحصلى ده فيه حاجات كتير بشوفها فى الحلم ولما بقوم الاقى آثارها موجود فى الحقيقه وهزت كتافها ودخلت الحمام اخدت شاور واتوضت وخرجت لبست هدومها وأدت فرضها وجت تخرج من الاوضه لاقت الباب مقفول عليها من بره بالمفتاح خبطت على الباب وقالت مين الحيوان اللى قفل عليا الباب وخبطت تانى وقالت حد يفتح ليا الباب وقعدت تخبط وبعد وقت لاقته بيتفتح رجعت لوراه لحد ما اتفتح بصت لاقته ادهم قالت ليه بغيظ ممكن اعرف مين اللى قفل عليا الباب من بره بالمفتاح
ادهم :- انا
داليا :- وحضرتك بقى بتقفله ليه
ادهم :- والله يعنى انتى مش عارفه ليه
داليا :- وانا هعرف منين
ادهم :- انتى فيه ايه بالظبط قصده تعملى كده ولا لاء
داليا :- اعمل ايه مش فاهمه
ادهم :- انتى مش فاكره خالص أن انتى جيتى ليا الاوضه بتاعتى بليل
داليا :- انا اجيلك اوضك لاء طبعآ ده مستحيل وانا هجيلك ليه
ادهم :- داليا لو قصده تستفذينى بلاش
داليا :- وانا هستفذك ليه انا مش فاهمه انت عايز توصل لايه وراحت وقفت قصاد المرايا
ادهم:- ولا حاجه ولا حاجه ولسه هيمشى شاف كوبايه فاضيه محطوطه على الكومدينو قال كان فيها ايه الكوباية دى
داليا :- بصت على الكوبايه وهزت كتفها بالا مبالاة وقالت كان فيها عصير شربته امبارح فيه مشكله عندك
ادهم :- هز راسه بمعنى لاء وقال معنديش مشكله وسابها ومشى
داليا :- بصت عليه وهو ماشى ورجعت بصت فى المرايا على العلامات اللى على خدها وشويه ونزلت كانت دينا قاعده قالت صباح الخير
دينا :- صباح الخير يا دودى تعالى افطرى
داليا :- لاء مليش نفس بس عندى صداع هيموتنى
دينا :- سلامتك يا حبيبتى بس انتى بقيتى مش بتاكلى خالص يا داليا وجسمك بدء يضعف خالص وبعدين ايه موضوع الصداع ده علطول مصدعه
داليا :- مش عارفه الصداع اللى بقى يجى ليا علطول ده من ايه
دينا :- خلى ادهم يوديكى الدكتور يكشف عليكى ويشوف السبب يمكن إجهاد ولا حاجه
داليا :- اقول لادهم انا عندى الموت اهون
دينا:- بعد الشر عليكى بس بجد محتاجه تكشفى حتى لون وشك مخطوف ومش طبيعى
داليا :- ربنا يسهل هروح الجنينه خلى الشغاله تعمل ليا عصير وتجيب ليا حباية صداع
دينا :- حاضر
داليا :- جت تقوم
دينا :- بصدمه ايه ده اللى فى وشك ده يا داليا كأن حد ضربك بالقلم
داليا :- مش عارفه صحيت من النوم لاقتها فى وشى ممكن اكون اتخبط وانا نايمه ولا حاجه
ادهم :- نزل من فوق وسمع داليا وهى بتقول كده قال بتتكلموا على ايه
داليا :- ملكش دعوه وقامت راحت تقعد فى الجنينه
دينا :- ادهم داليا تعبانه
ادهم :- تعبانه ازاى مش فاهم
دينا :- كل يوم بتقوم مصدعه ومش بتاكل خالص وعايشه على العصير وحباية الصداع وبس وجسمها بيضعف ولون وشها تملى مخطوف
ادهم :- هبقى اخدها لدكتور
دينا :- بس مش هترضا تروح معاك ممكن اروح معها انا
ادهم :- خلاص هحجز ليكم وانتو روحوا
دينا :- ماشى
ادهم :- وقف
دينا :- مش هتفطر
ادهم :- مليش نفس
دينا :- انتو الاتنين فيكم حاجه غريبه حتى انت كمان مش بتاكل ووشك مخطوف
ادهم :- انا كويس
دينا :- روحت لتامر امبارح
ادهم :- ايوه
دينا:- وايه اللى حصل
ادهم :- متشغليش بالك انتى بحاجه ركزى مع داليا بس
دينا :- حاضر
ادهم :- سابها ومشى
دينا :- بصت على ادهم وهو ماشى وقالت هموت واعرف ايه حصل وتامر متصلش بيا من امبارح لما اتصل بي أكلمه وراحت بلغت الشغاله تعمل عصير وتروح تديه لداليا فى الجنينه مع حباية صداع وطلعت على اوضتها مسكت تليفونها واتصلت بتامر وانتظرت الرد

تامر :- روح قلبى واحشتينى
دينا :- بزعل لو كنت واحشتك زى ما بتقول كنت اتصلت بيا من امبارح
تامر :- والله العظيم غصب عنى كان عندى مأموريه ولسه جاى منها دلوقتى حالا ومكنتش عارف اكلمك
دينا :- كنت اتصلت بيا وعرفتنى مكنتش سبتنى قلقانه عليك كده من امبارح لما لاقيت الفون مغلق
تامر :- جت مفاجئه وكان لازم ننزل حالا دى كانت أوامر من قيادة أعلى مننا
دينا :- ماشى خلاص سماح المرادى بس بعد كده ابقى عرفنى مفهوم
تامر :- يسلملى القلب الكبير ده يا ناس اللى خايف على حبيبه وقلقان عليه
دينا :- انت بدلع بنت اختك
تامر :- لاء بدلع بنوتى انا بنت قلبى
دينا :- بكسوف ماشى
تامر :- بحبك فى كل حالاتك
دينا :- احم ه.ه.هو انت عملت ايه امبارح مع ادهم
تامر :- مع انك بتغيرى الموضوع بس هقولك جه امبارح وقولت ليه مين اللى دفع ليه الفلوس
دينا :- اوبا وعمل ايه
تامر :- حلف أن هو مش هيسكت وفكر ان هما عملوا كده علشان يكسروا عينيه
دينا :- ادهم ده ليه دماغ لوحده بيفكر فى أن الناس عايزه تشمت فيه وبس
تامر :- ربنا يهديه ويفتح عينه على الناس اللى بتحبه
دينا :- يارب يا تامر
تامر :- برضه بحبك
دينا :- احم طيب هقفل انا بقى علشان انزل اشوف داليا
تامر :- والله مفيش امل اسمعها منك خالص
دينا :- امل ماتت محروقه هههههههه
تامر :- يا خفه ده انا اللى قلبى حرقنى وبحلم باليوم اللى هيتقفل عليا وعليكى باب واحد يا لهههههوى على اللى هعملوا فيكى هطلع عليكى القديم والجديد
دينا :- بكسوف اتلم وبلاش قلة ادب
تامر :- انتى اللى دماغك شمال انا اقصد مش هخرجك من البيت خالص وهخليكى ليا انا وبس إنما الحاجات التانيه دى مش هتكلم كتير هخليكى تشوفى بنفسك
دينا :- والله العظيم انت غلس وانا غلطانه اصلا أن اتصلت بيك باى وقفلت السكه وضحكة وقالت قليل الادب بس بموت فيه
~•~•~•~•~•~•~•~•~•~•~•~•~•
فى شقة منتهى

فى اوضتها كانت قاعده وعماله تعيط واتصل بيها علاء مسكت التليفون لاقته هو مسحت دموعها وقالت

منتهى :- الو
علاء :- عامله ايه
منتهى :- كويسه
علاء :- نزلتى الشغل ولا لسه
منتهى :- لاء منزلتش
علاء :- مالك يا منتهى صوتك بيقول ان فيه حاجه
منتهى:- حاجه هه قال يعنى مش عارف أو عامل نفسك انك مش عارف
علاء :- فيه ايه
منتهى:- لاء متشغلش بالك شوية مشاكل بسيطه مع اهلى كل الحكايه منعونى من نزولى الشغل وهيجوزونى خليك انت بقى نايم فى العسل لحد ما الست ماما توافق على جوازك منى
علاء :- ايه اللى انتى بتقوليه ده
منتهى :- ايوه يا علاء زى ما انت سمعت بابا وافق على العريس المتقدم ليا بعد ما استناك تاخد خطوه وتيجى تتقدم ليا بعد فضيحة الحفله لكن انت ولا شغلت بقالك ولا همك الموضوع ولا كأن حاجه حصلت واخد كل حاجه بأستهتار لحد ما روحت من ايدك لحد تانى
علاء :- مستحيل يا منتهى تروحى لحد تانى انتى ليا انا وبس
منتهى :- فات أوانه الكلام ده يا علاء خلاص وسكتت شويه واتنهدت وقالت مش عارفه ايه المفروض يتعمل ويتقال فى وقت زى ده بس كل شئ قسمه ونصيب مع السلامه
علاء :- قبل ما تقفلى بس هقولك كلمتين خليكى فكراهم اوعى تفكرى أن انا هتخلى عنك بالبساطة دى يا منتهى انا بحبك وده كان شئ صعب يحصل فى حياتى انتى ليا ومش هتكونى غير ليا ولو حد فكر يخدك منى مش هيحصل كويس قولى لابوكى انا جاى ليه النهارده
منتهى :- كانت فرحانه بكلام علاء وقالت ماشى هبلغه باى وقفلت السكه واتنهدت براحه وخرجت بلغت امها تبلغ ابوها عن معاد علاء
~•~•~•~•~•~•~•~•~•~•~•~•~•
فى فيلا رودينا

فى اوضت رودينا

كانت قاعده فى اوضتها زى كل يوم ودخل عليها ابوها وقعد جنبها وقال

ابو رودينا :- واخرتها
رودينا :- آخرة ايه يا بابا
ابو ردينا :- آخرة اللى انتى فيه ده هتفضلى لأمته حبسه نفسك فى اوضك كده
رودينا :- يعنى يا بابا هعمل ايه هخرج فين ما انا قاعده كده ومرتاحه
ابو ردينا:- لاء يا حبيبتى مش مرتاحه فين رودى اللى كانت كلها حيويه وضحكتها اللى كانت مش بتفارق وشها فين رودينا اللى كانت ماسكه شغلى احسن من مليون راجل فينك يا بنتى من كل ده ايه جرارك
رودينا :- دموعها نزلت منها وقالت مبقاش ليا نفس لاى حاجه يا بابا بقيت مش عايزه اقابل حد ولا اشوف حد
ابو رودينا :- يا بنتى انا محتاجك جنبى الشغل تقل اوى عليا
رودينا :- مش عايزه يا بابا ارجوك سبنى قاعده فى اوضى مش عايزه اتعامل مع الناس تانى
ابو رودينا :- بقولك محتاجك يا بنتى الحمدالله شركة أدهم الحناوى رجعت اشتغلت من جديد ورجعوا اشتغلوا تانى معانا وده انجاز كبير لينا شركة أدهم لما كانت شغاله معانا كانت بدخل مكسب حلو اوى لينا وعلشان كده بقولك الشغل تقل عليا ومحتاجك جنبى
رودينا :- اول ما سمعت اسم شركة أدهم قلبها وجعها ودموعها نزلت منها وقالت ليه رجعت اشتغلت تانى معاهم يا بابا ليه
ابو رودينا :- يا بنتى ده مكسب كبير لينا
رودينا :- اتنهدت وقالت اللى حضرتك شايفه صح اعملوه
ابو رودينا :- يعنى هترجعى تنزلى الشغل تانى
رودينا :- بقلة حيله حاضر يا بابا اللى حضرتك تشوفه
ابو رودينا :- ربنا يبارك ليا فيكى يا حبيبتى وخرج وسابها
رودينا :- افتكرت اللى حصل ما بينها وبين فادى اخر مره واترمت على السرير وقعدت تعيط
~•~•~•~•~•~•~•~•~•~•~•~•~•
فى الشركه الخاصه بمصطفى جوز ماجده ام ادهم دخل أدهم بكل شموخ وكبرياء من غير ما يستنا السكرتيره تستأذن من مصطفى
مصطفى :- اول ما شاف ادهم داخل عليه والسكرتيره بتجرى وراه بتحاول تمنعه بص لسكرتيره وأمرها تطلع بره ومدخلش حد عليهم وبص لادهم وقال منور مكانك يا ابنى
ادهم :- ابنى هههه انت اخد عليا اوى
مصطفى :- ماانت زى ابنى برضه ما انت اخ لعيالى
ادهم :- داس على سنانه وقال انا مش ابن حد اياك تقول الكلمه دى تانى مفهوم
مصطفى :- يا سيدى اللى انت عايزه يا ادهم باشا
ادهم :- مد أيده وقال خد انا محدش يكسر عينى أبدآ
مصطفى :- ايه ده
ادهم :- فلوسك اللى دفعتها ليا
مصطفى :- وانا مطلبتهاش منك ولا وقولتلك أن انا عايزها
ادهم :- صدقه يعنى لا فيك الخير
مصطفى :- محدش قال كده دى من فلوس امك مش دافع ليك حاجه من معايا
ادهم :- وانا امى ماتت دفعتهم ليا ازاى
مصطفى :- حرام عليك اللى بتعملوا فيها ده امك كبرت مبقتش زى الاول ومحتاجك جنبها
ادهم :- امممم كبرت ومحتاجانى جنبها وهى كانت فين وانا صغير ومحتاجها جنبى كانت الهانم نايمه فى حضنك وناسيه الدنيا كنت أنا اخر همها وهى دلوقتى اخر همى خليك انت وولادك جنبها وتعتبرنى موت من ساعة ما سبتنى علشان انانيتها وحدف ليه الشيك ومشى لحد الباب
مصطفى :- امك عندها كانسر يا ادهم
ادهم :- وقف مكانه ومتحركش
مصطفى :- امك عندها كانسر ورفضت تتعالج بسببك فضلت تموت هنا جنبك احسن ما تتعالج وتعيش بعيد عنك
ادهم :- لف ليه وقال لعبه جديده من الاعبكم
مصطفى :- تقدر تخدها وتكشف عليها وانت تتأكد بنفسك املى الوحيد فيك يا ادهم انك تقنعها تتعالج هى بتحبك وهتسمع كلامك انا مقدرش اعيش من غيرها يا ادهم وأخواتك محتاجنها جنبهم
ادهم :- هى كده كده ميته فى نظرى مش هتفرق معايا كتير إذا كانت هتعيش ولا هتموت وفتح الباب ومشى وسابه
مصطفى :- ربنا يهديك يا ابنى وتقدر تقنعها أنها تتعالج وقعد يشوف شغله
~•~•~•~•~•~•~•~•~•~•~•~•~•
عند داليا ودينا

وصلوا الاتنين عند الدكتور اللى حجزه ادهم لداليا ودخلوا انتظروا دورهم وبعد وقت دخلوا عند لدكتور

الدكتور :- اهلا وسهلا اتفضلوا حضراتكم
دينا وداليا :- قعدوا قصاد بعض
الدكتور :- مين فيكم داليا سعيد
داليا :- انا يا دكتور
الدكتور :- اتفضلى حضرتك قولى بتشتكى من ايه
داليا :- عندى صداع دايمآ رهيب ومليش نفس للاكل تملى
الدكتور :- اخر بريود ليكى كانت امته
داليا :- بأحراج ليه حضرتك
الدكتور :- لانها ممكن تكون اعراض حمل
داليا :- بأحراج احم ل.ل.لاء مش حامل
الدكتور :- حضرتك مش متجوزه
داليا :- بصت لدينا وقالت ا.ا ايوه ب.ب.بس يعنى كان فيه مشاكل ما بينا ولسه راجعه مش بقالى يومين
الدكتور :- بتفهم اه تمام اتفضلى حضرتك على السرير
داليا:- راحت نامت على السرير
الدكتور :- بدء يكشف عليها وبعد وقت قال اتفضلى حضرتك خلاص وراح قعد على الكرسى وانتظر داليا تيجى
داليا :- قامت من على السرير وراحت قعدت على الكرسى
دينا :- خير يا دكتور
الدكتور :- حضرتك بتاخدى اى نوع من المخدرات
داليا :- لاء طبعآ يا دكتور
الدكتور :- بس انتى بدنيآ مش فيكى حاجه إنما لاحظت انك مش بتقدرى تتحكمى فى أعصاب ايدك
داليا :- فعلا يا دكتور بقالى يومين اعصاب ايدى سايبه خالص ومش بتحكم فى اى حاجه مسكها
الدكتور :- ايوه دى بتبقى اعراض مخدر ماشى فى الجسم
دينا :- ازاى يا دكتور المدام صحفيه مشهوره وحضرتك عارف اكيد هى مرات مين ومستحيل هى تعمل كده انا متأكده من كلامى
الدكتور :- عمومآ اللى هيأكد كلامى من عدمه التحليل ده المدام تعمله ومش هياخد وقت كتير على ما تظهر النتيجه
داليا :- اوك يا دكتور
الدكتور :- فيه معمل تحاليل هنا تقدرى تعملى فيه
دينا :- اخدت منه الروشته
الدكتور :- ممكن اسألك سؤال
داليا :- اتفضل يا دكتور
الدكتور :- اوقات كتير بتحصل معاكى حاجه او حد يقولك انتى عملتى كذا ومش بتبقى فكراها
داليا :- لاء بس بتحصل معايا حاجه شبه كده يعنى ممكن اكون بحلم حلم وأقوم الاقى حاجه حصلت فى الحلم موجوده فى الحقيقه بمعنى أن انا حلمت بحد بيضربنى بالقلم قومت لاقيت اثر القلم ده موجود فى الحقيقه على وشى وحاجات تانى احم بتبقى زى كده
الدكتور :- احتمال كبير ميكونش حلم بيبقى حقيقه بس مع اثر المخدر بيخليكى تشوفى كل حاجه بتحصل على أساس حلم فتقومى تلاقى حاجه تدل على اللى حصل معاكى
داليا :- مستحيل يا دكتور انا متأكدة أن بيبقى حلم مش حقيقه
الدكتور :- نشوف النتيجه الاول وبعد كده نقرر إذا كان حلم ولا حقيقه
وخرجت داليا ودينا وهما مصدومين من كلام الدكتور وراحوا المعمل عملت التحليل وقعدوا ينتظروا النتيجه وهما متوترين ومر الوقت وراحت دينا جابت النتيجه ودخلوا تانى عند الدكتور
الدكتور :- اخد النتيجه منهم وقعد يبص فيها وقال ............
*********************
إلي هنا ينتهي الفصل الحادى و الثلاثون من رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة