-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية تمرد صحفية بقلم دودو محمد - الفصل الرابع والثمانون

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة دودو محمد علي موقعنا قصص 26 و موعدنا اليوم مع الفصل الرابع والثمانون من  رواية تمرد صحفية بقلم دودو محمد. 

رواية تمرد صحفية بقلم دودو محمد - الفصل الرابع والثمانون

اقرأ أيضا: روايات رومانسية
رواية تمرد صحفية بقلم دودو محمد
رواية تمرد صحفية بقلم دودو محمد

رواية تمرد صحفية بقلم دودو محمد - الفصل الرابع والثمانون

اشرقت شمس صباح يوم جديد بنورها الساطع فى سماء الاسكندريه لتبدء دينا بفتح عيونها قامت قعدت واخدت نفسها براحه وبصت لتامر وابتسمت ومشيت ايديها على شعر تامر
تامر حس بحركة دينا وبلمسة ايديها على راسه فتح عينه وابتسم ليها وقال

تامر :- صباح الفل يا قلبى
دينا :- بحب صباح النور يا حبيبى
تامر :- قام قعد بفرحه وقال يااااااه اول مره تقوليلى يا حبيبى
دينا :- ما انت حبيبى وقلبى وعمرى كله
تامر :- يا سيدى يا سيدى على الكلام الحلو ده كان مستخبى فين بس
دينا :- انا عندى كلام اكتر من كده بكتيررر بس هروب مكرم كان قلقنى إنما دلوقتى خلاص ارتحت بعد موته ومن هنا ورايح مفيش غير حب فى حب
تامر :- شدها فى حضنه وقال وانا منتظر الحب ده منك يا روحى
دينا :- رفعت عينيها ليه وقالت عايزه اقولك على حاجه
تامر :- قولى يا عمرى
دينا :- بفرحه انا حامل
تامر :- بصلها بأستغراب ومردش عليها
دينا :- ضحكت وقالت مالك بقولك انا حامل
تامر :- حامل يعنى هيكون فى بطنك نونو يعنى انا هبقى اب وقام وقف وشدها فى حضنه ولف بيها جامد بفرحه وقال مبروك يا احلى واجمل واحده فى الدنيا دى بحالها
دينا :- بحب الله يبارك فيك يا حبيبى انا مصدقتش نفسى لما روحت عملت التحليل والدكتور قال ليا مبروك انتى حامل كنت مستنيه النهارده علشان اقولك لاقيتك انت جايب ليا احلى خبر أن مكرم اتقتل وهو بيحاول يهرب منكم
تامر :- قعد على السرير وقال حاولت على قد ما اقدر مضربش عليه نار واخليه حى بس للاسف حاول يهرب وضرب علينا نار وكان لازم اقتله علشان امنع وقوع ضحايا اكتر من كده على ايده بس صعبت عليا جاسمين بنت عمه ماتت على أيده وهى كانت جايه تساعدنا اننا نوقعه لو كانت سابت الرصاصه تيجى فى اكرم مكانش هيحصل ليه حاجه لانه كان لابس قميص واقى للرصاص
دينا :- قعدت جنبه وقالت طيب ليه جاسمين ملبستش هى كمان قميص واقى
تامر :- لأننا كنا متأكدين أن هو مش هيأذيها كنا متوقعين أنه هيحاول يأذى أكرم وده فعلا اللى حصل بس جاسمين طلعت تجرى عليه ووقفت قدامه واخدت الرصاصه بداله
دينا :- يلا ربنا يرحمها عمرها وانتهى
تامر :- ومكرم انا زعلت عليه برضه بس هو اللى ضيع نفسه ووصل نفسه لنهايه دى ربنا يرحمهم هما الاتنين
دينا :- هيندفنوا امته
تامر :- لما الطب الشرعى يدينا تصريح بخروجهم
دينا :- كويس أن ادهم اخويه مرحش الفرح ده
تامر :- اللى عرفته من اكرم قبل الفرح أن ادهم زعلان من اكرم علشان حاول يكلم أكرم ويقنعه أن هو يرجع عن الجوازه دى واكرم رفض والاتنين شدوا مع بعض فى الكلام ومن ساعتها محدش فيهم بيكلم التانى علشان كده محضرش الفرح
دينا :- ماهما بيزعلوا من بعض كتير وبيرجعوا تانى لبعض محدش فيهم بيقدر يستغنى عن التانى
تامر :- عارف واكرم نفسه كان مستنى لما نمسك مكرم وكان ناوى يروح يفهم ادهم كل حاجه ويصالح فاطمه ويرجعها تانى ليه
دينا :- ربنا يصلح حالهم
تامر :- يارب اهم حاجه خلى بالك على نفسك وعلى اللى فى بطنك
دينا :- حاضر
تامر :- باس راسها وقال ربنا يخليكى ليا يا قلبى يارب
دينا :- وميحرمنيش منك يا عمرى
تامر :- يلا اجهز نفسى بقى علشان متأخرش على الشغل
دينا :- ماشى يا قلبى
تامر :- دخل الحمام اخد شاور واتوضه وخرج لبس هدومه واده فرضه ونزل راح الشغل
~•~•~•~•~•~•~•~•~•~•~•~•~•
فى بريطانيا

عند منتهى وعلاء

جهز علاء علشان يدخل العمليات وقعدت جنبه منتهى ومسكت ايديه وقالت

منتهى :- متقلقش يا حبيبى أن شاءالله هتعملها وتنجح
علاء :- منتهى اوعدينى أن مهما كانت النتيجه عمرك ما هتبعدى عنى وتسبينى
منتهى :- باست أيده وقالت انا معاك يا علاء على المره قبل الحلوه انت مش بس جوزى انا بحس معاك بحنية الاب وخوف الاخ وامان الزوج انت كل حياتى ومقدرش ابعد عنك
علاء :- باس راسها وقال ربنا يبارك ليا فيكى بعشقك يا توته
وفى الوقت ده جت الممرضه واخدته على اوضت العمليات
منتهى :- دموعها نزلت منها وراحت وراهم تستنى خروج علاء من العمليات وقعدت ومسكت المصحف فى ايديها وفضلت تقراه فيه وبعد وقت تليفونها رن بتبص لاقته ادهم ردت بدموع وقالت ايوه يا ادهم
ادهم :- علاء عامل ايه خرج ولا لسه
منتهى :- بدموع لسه مخرجش
ادهم :- أن شاءالله هيخرج بالسلامه وهتنجح العمليه وربنا هيكرمكم بالذريه الصالحه
منتهى:- بدموع انا اهم حاجه عندى هو عايزاه يخرج ليا بالسلامه بس مش عايزه اى حاجه من الدنيا تانى
ادهم :- أن شاءالله اول ما يخرج طمنينى
منتهى :- حاضر مع السلامه وقفلت السكه مع ادهم وفتحت المصحف تانى وقعدت تقراه فيه وبعد وقت طويل خرج علاء من العمليات وهو لسه فى البينج قامت تجرى ومسكت أيده وبصت لممرضه وسألتها عن حالته وطمنتها عليه ودخلوا الاوضه ونيموا على السرير وخرجوا قعدت جنبه منتهى بدموع وقالت علاء حبيبى رد عليا ياريت كانت المشكله فيا انا ولا كنت انت اتعذبت كده وباست أيده وقالت بدموع علاء رد عليا طمنى عليك ارجوك علاء
علاء :-وهو تحت تأثير البنج قال منتهى حبيبتى متسبنيش انا بحبك مقدرش اعيش من غيرك منتهى امممم منتهى
منتهى :- بدموع ولا انا أقدر اعيش من غيرك والله العظيم بحبك انت اجمل حاجه حصلت ليا ونامت على صدره وقالت ياريت كنت انا مكانك ياريت
علاء :- بحبك يا منتهى بحبك منتهى م.ن.ت.ه.ى
منتهى :- حبيبى رد عليا انت سامعنى
علاء :- بألم امممم منتهى
منتهى :- ايوه يا قلبى
علاء :-بألم اااااه تعبان يا منتهى تعبان
منتهى:- ثوانى طيب اخليهم يجيبوا ليك مسكن وخرجت وسابته وبعد شويه جت ومعها الممرضه واديته مسكن وخرجت تانى
علاء :- اممممم
منتهى :- عامل ايه دلوقتى
علاء :- يعنى الالم بدء يقل شويه
منتهى :- مسكت أيده وباستها وقالت حمدالله على السلامه يا قلبى
علاء :- ابتسم ليها بحب وقال الله يسلمك يا عمرى
منتهى :- معرفش أن انا غاليه عندك اوى كده كنت بتنادى عليا وبتقول انك بتحبنى بجد ولا كانت تخاريف بنج كده وخلاص
علاء :- ابتسم ليها بحب وقال انا مش بحبك انا عديت مرحلة الحب دى بمراحل انا بقيت مجنون بيكى يا منتهى وبعدين الناس بتقول أن كلام البنج ده بيبقى حقيقى كلام طالع من القلب علطول مش مزيف
منتهى :- انا عارفه بنغشك بس
علاء :- احلى واجمل منغشه ومسك ايديها وباسها وقال ربنا يديمك فى حياتى وميحرمنيش منك يارب
منتهى :- احيه انا نسيت اتصل بأخوك ادهم وأبلغه انك خرجت ومسكت تليفونها بلغت ادهم بخروج علاء وقفلت معاه وقعدت جنبه ومسكت أيده وفضلوا يتكلموا مع بعض
~•~•~•~•~•~•~•~•~•~•~•~•~•
فى اسكندريه

فى فيلا ادهم

كان قاعد ادهم على السرير وماسك تليفونه وخرجت داليا من الحمام وهى لابسه البورنص وقالت

داليا :- علاء عامل ايه دلوقتى
ادهم :- الحمدالله عمل العمليه وخرج الاوضه وحالته مستقره شويه كده وهكلم الدكتور وأشوف اخبار العمليه ايه
داليا :- ربنا يكرمهم يارب وتنجح ويرزقهم الذريه الصالحه
ادهم :- يارب
داليا :- ادهم
ادهم :- امم
داليا :- مش ناوى تروح تعزى أكرم فى موت اخوه وبنت عمه
ادهم :- اكيد هروح ليه اعزيه
داليا :- وانا هروح لفاطمه المستشفى حالتها صعبه اوى رافضه تكلم اى حد
ادهم :- بس احنا كده ظلمنا أكرم انا من الاول وانا حاسس ان الموضوع ده فيه حاجه غلط اصل انا عارف أكرم بيحب فاطمه ازاى ومكنتش مقتنع خالص بأنه كره فاطمه واهو طلع كله خطه بينه وبين تامر علشان يوقعه بيها مكرم وراحت ضحيتهم بنت عمه
داليا :- بس أكرم غلط كان لازم يعرف فاطمه علشان مكانتش وصلت للحاله اللى هى فيها دى هو عارف ان فاطمه بتحبه ومش هتستحمل تشوفه مع واحده غيرها
ادهم :- يا بنتى مسمعتيش تامر وهو بيقول انا اللى نبهت عليه ميقولش حاجه لحد علشان الخطه تمشى زى ما هو عايز
داليا :- ايوه بس قلب فاطمه اتكسر اوى يا ادهم
ادهم :- عارف بس بكره لما تعرف أنه عمل كده علشان مصلحتها وخايف عليها هتسامحه
داليا :- ربنا يصلح حالهم يارب
ادهم :- بص عليها وشدها نيمها فى حضنه وقال هو انتى ازاى بتحلوى اوى كده
داليا :- بدلع علشان متجوزه احلى واجمل راجل فى الدنيا
ادهم :- قرب من شفايفها وباسها برقه وقال انتى اللى عيونك حلوين ويسحروا ملايين خطفتى قلبى بنظره واحده منهم
داليا :- باسته فى شفايفه وقالت بعشقك يا ادهم بعشقك
ادهم :- قرب منها وباسها بوسه طويله ومد أيده على حزام البورنص
داليا :- مسكت أيده وقالت ادهم مش هينفع دلوقتى لازم نجهز بقى علشان منتأخرش على الشغل
ادهم :- بص فى عينيها وقال ششش مش هنتأخر ولا حاجه وقرب من شفايفها وباسها
داليا :- غمضت عينيها وسابت أيده تشد حزام البورنص ولفت دراعها حاولين رقابته وعمقت البوسه اكتر
ادهم :- ابتسم على استسلام داليا ليه وشد الحزام بتاع البورنص قلعه ليها وقرب منها و(سكتت شهرزاد عن الكلام الغير مباح)
~•~•~•~•~•~•~•~•~•~•~•~•~
فى المستشفى

عند فاطمه

كانت دموعها نازله منها ورافضه تتكلم مع اى حد وقاعده على السرير وبتبص قدامها
وقاعد جنبها على السرير ممدوح وحزين على حالة أخته اللى وصلت ليها دى

ممدوح :- فاطمه مينفعش سكوتك ده اتكلمى قولى اى حاجه اصرخى اضربى اشتمى بس اهم حاجه متسكتيش كده
فاطمه :- ساكته ومش بتتكلم ودموعها نازله منها
ممدوح :- يا فاطمه ردى على اخوكى اللى ملهوش غيرك فى الدنيا دى وقلبه نار عليكى ردى عليا ارجوكى وبص لايه لاقها قاعده سرحانه قال بأستغراب مالك يا ايه
ايه :- بدموع انا خايفه على أكرم اوى ومش عارفه ايه اللى حصل فى الفيلا
ممدوح :- طيب اتصلى بيهم يطمنوكى
ايه :- بدموع محدش بيرد
وفى الوقت ده الباب اتفتح ودخل أكرم والدموع فى عينه بص على فاطمه وشاف الحاله اللى هى فيها راح قعد جنبها ومسك ايديها وقال بدموع
أكرم :- سامحينى يا فاطمه ارجوكى سامحينى
فاطمه :- والدموع نازله من عينيها سحبت ايديها من أيده
أكرم :- فاطمه انا بحبك والله العظيم بحبك واللى حصل ده
فاطمه :- حطت ايديها على ودنها علشان متسمعش حاجه والدموع نازله من عينيها
أكرم :- حاول ينزل ايديها من على ودنها علشان تسمعه
فاطمه :- انهارت وقعدت تصرخ وجت الممرضه والدكتور بسرعه ومسكوها والدكتور أداها حقنه مهدأه وزعق لممدوح وطلب منهم يخرجوا بره الاوضه
ممدوح :- مسك أكرم من هدومه وقال كفااااايه بقى اللى عملتوا فيها انت مش طلقتها عايز منها ايه وضربه بالبوكس فى وشه وقال انا سبق وحذرتك انك ملكش دعوه بيها وضربه تانى وقال قولتلك مش هرحمك يا اكرم
ايه :- جريت بدموع ووقفت قصاد أكرم وقالت لا يا ممدوح ارجوك كفايه
ممدوح :- بعصبيه ابعدى يا ايه ملكيش دعوه
ايه :- بدموع مقدرش ده اخويه يا ممدوح
ممدوح :- وانا جوزك وبقولك ابعدى
أكرم :- بدموع جاسمين ومكرم ماتوا
ايه :- بصدمه م.م.مكرم وجاسمين ماتوا وقعدت فى الارض وقالت معقول مكرم خلاص مات ليه بس ليه
أكرم :- قتل جاسمين واتقتل وهو بيهرب
ايه :- ااااااه يا مكرم ليه عملت فى نفسك كده ليه
ممدوح :- صعبت عليه ايه قعد جنبها فى الارض واخدها فى حضنه
ايه :- انا كنت عارفه أنه هيتعدم فى اى وقت من الأوقات بس متوقعتش أنه هيوجعنى اوى كده لما يموت صعبه عليا والله يا ممدوح يارب الصبر من عندك يارب
ممدوح :- بص لاكرم وقاله امشى ومش عايز اشوف وشك هنا تانى وانسى اختى خالص فاهم
أكرم :- انا بحب فاطمه ومكنتش اقصد اعذبها ولا اوصلها للحاله اللى هى وصلت ليها دى بس كان لازم اعمل كده علشان أوقع مكرم ويتمسك قبل ما يأذى حد وأولهم فاطمه
ممدوح :- كلامك ده مبقاش ينفع اختى ادمرت وعلى ايدك انت السبب لكل اللى وصلت ليه فاطمه ومش هرحمك عليه امشى مش عايز اشوف وشك هنا تانى
أكرم :- بصله بوجع وخرج وسابهم
ايه :- مسكت فى ممدوح اكتر وقعدت تعيط
~•~•~•~•~•~•~•~•~•~•~•~•~•
فى شركة ادهم

وصل ادهم الشركه ودخل مكتبه وطلب يشوف فادى وبعد وقت دخل ليه فادى وقال

فادى :- نعم يا ادهم
ادهم :- عملت ايه مع رودينا
فادى :- ولا حاجه روحت وطلبت منها تسامحنى رفضت اعتذرت ليها وبرضه رفضت
ادهم :- وكالعادة اخد نفسك ومشيت من عندها
فادى :- طيب اعمل ايه مش راضيه تسامحنى مش انت قولت ليا اسيبها عليك
ادهم :- كلمتها ورفضت برضه تسامحك
فادى :- طيب والعمل
ادهم :- انت ليه بارد كده مش حاسس انك ندمان على اللى عملته معها وبتروح تصالحها كده تأدية واجب كده وخلاص
فادى :- لاء عارف ان انا غلطان وان انا جرحتها جدآ كمان بس احنا بشر مش ملايكه وبنغلط حاولت أقنعها أننا ننسى اللى فات ونبدء من جديد بس بترفض وبتسمعنى كلام صعب اوى
ادهم :- استحمل وافضل حاول معها لحد ما تسامحك
فادى :- حاضر بعد الشغل هروح ليها احاول معها تانى
ادهم :- ملكش دعوه بالشغل روح ليها دلوقتى
فادى :- بس
ادهم :- قاطعه وقال مفيش بس اتفضل اعمل اللى قولتلك عليه
فادى :- وقف واتنهد وقال حاضر عن اذنك وخرج نزل من الشركه ركب عربيته وراح على شركة رودينا
ادهم :- احسن تستاهل اللى بيحصل فيك ده ومسك تليفونه وطلب رودينا وانتظر ردها
رودينا :- السلام عليكم
ادهم :- وعليكم السلام ورحمه الله وبركاته عامله ايه يا رودينا
رودينا :- الحمدالله
ادهم :- اعملى حسابك فادى جاى ليكى قومى بالواجب معاه بقى
رودينا :- اوك هطلع عينه زى ما اتفقنا
ادهم :- ايوه كده يلا اسيبك تجهزى نفسك باى
رودينا :- باى
ادهم :- قفل مع رودينا وقام اخد مفاتيحه وخرج سأل السكرتير عن اى اجتماعات قال عنده اجتماع واحد سابه ونزل ركب عربيته وراح عند أكرم وبعد وقت وصل عند الفيلا ونزل من عربيته دخل لاقه وفاء لابسه اسود وبتعيط راح عند منير ومد أيده وقال
ادهم :- البقاء لله
منير :- اترمه فى حضن ادهم وعيط وقال مكرم مات يا ابنى مكرم خلاص سابنا ومات
ادهم :- طبطب عليه وقال اقوى يا عمى هو اللى عمل فى نفسه وفيكم كده ادعيلوا بالرحمه والمغفره هو ده اللى محتاجه دلوقتى
منير :- بدعيلوا بالرحمه وبالصبر على فراقه دايمآ
ادهم :- ربنا يديك الصحه ويخليلك أكرم وايه يارب
منير :- يارب يا ابنى اتفضل ادخل
ادهم :- راح عند وفاء وباس راسها وقال ربنا يصبر قلبك يا امى ويرحمه
وفاء :- يارب يا ابنى يارب
ادهم :- مش محتاجه اى حاجه انا زى أكرم ابنك
وفاء :- طبطبت على أيده وقالت ربنا يخليك يا ابنى انت غلاوتك عندى من غلاوة أكرم بالظبط
ادهم :- تعيشى يا امى
وفاء :- أكرم فى اوضه فوق اطلع ليه
ادهم :- عن اذنكم وطلع عند اوضت أكرم وخبط على الباب وفتحه ودخل
أكرم :- اول ما شاف ادهم طلع يجرى واترمى فى حضنه وقعد يعيط
ادهم :- طبطب على ضهره وقال البقاءلله اجمد يا اكرم عارف ان موتهم صعب عليك بس كده احسن موت أكرم انقذ أرواح كتير كانت هتروح على ايديه وموت جاسمين صعب عارف وبالذات أنها كانت جايه تساعدكم بس كانت هتمسك فيك اكتر لاننا كلنا عارفين بنت عمك كانت بتحبك قد ايه وكانت صعب هتتنازل عن الفرصه اللى جت لحد عندها
أكرم :- عارف كل ده بس الفراق صعب اوى يا صاحبى حتى لو كان اللى مات ده اخوك اللى بيكرهك بس موته صعب ووجعنا كلنا عليه
ادهم :-ربنا يرحمه ويرحم جاسمين ويغفر ليهم يارب
أكرم :- يارب
ادهم :- مروحتش لفاطمه وفهمتها الحقيقه
أكرم :- قعد على السرير بوجع وقال لسه راجع من عندها حالتها صعبه اوى ورافضه تسمع اى كلمه منى
ادهم :- صدمه كبيره ليها اوى هى بتحبك ومتوقعتش منك كده
أكرم :- بدموع عارف بس كان غصب عنى والله انا كنت رافض من الاول على الخطه دى بس تامر صمم عليها وأكد عليا محدش يعرف نهائى وفضلت مده طويله جدآ لحد ما قدرت انطق كلمة الطلاق ومقدرتش استحمل فكرة الطلاق دى ورديت فاطمه ليا فى سعتها
ادهم :- يعنى انت رديت فاطمه ليك
أكرم :- هز راسه وقال ايوه فاطمه مراتى فى نفس الساعه اللى طلقتها فيها
ادهم :- وهى عارفه بكده
أكرم :- للاسف لاء ورافضه تسمع منى حرف واحد
ادهم :- داليا تبقى تقولها
أكرم :- لاء مش عايز حد يقولها انا عايز انا اللى اقولها الكلام ده بنفسى زى ما وجعتها بأيدى ادويها انا برضه بأيدى
ادهم :- خبط على كتفه وقال ربنا يصلح ليكم الحال يا صاحبى
أكرم :- يارب يا ادهم
ادهم :- امته هتدفن الجثث
أكرم :- لما إذن النيابه يطلع هنستلم الاتنين وندفنهم
ادهم :- انا موجود لو احتاجت اى حاجه وهكون معاك فى الدفنه والعزا
أكرم :- ربنا يخليك يا صاحبى وتفضل فى ضهرى دايمآ
ادهم :- خبط على كتفه وقال هروح انا بقى علشان عندى اجتماع مهم عايز حاجه
أكرم :- معلش اخلص بس من الدفن والعزا وانزل الشغل
ادهم :- متشغلش بالك انت بحاجه خالص انا شايف شغلك وشغلى لحد ما تبقى كويس وتقدر تنزل الشغل
أكرم :- وقف وحضن ادهم وقال ربنا يديمك فى حياتى يا صاحبى
ادهم :- خبط على ضهره وقال احنا اخوات طول عمرنا وهنفضل علطول كده
أكرم :- اكيد طبعآ هنفضل جنب بعض دايمآ
ادهم :- يلا سلام وخرج من عند أكرم ركب عربيته ورجع على الشركه ودخل على مكتبه وشويه والسكرتير بلغه ببدء الاجتماع ودخل قاعة الاجتماع وقعد وقال حمدالله على السلامه يا باشمهندس محمد
محمد :- الله يسلمك يا ادهم باشا
ادهم :- سألت عليك كتير الفتره اللى فاتت دى
محمد :- اه كنت مريض شويه
ادهم :- الف سلامه عليك نورت مكانك
محمد :- الله يسلمك يا باشا اهم حاجه الشغل كله ماشى تمام زى ما انا كنت موجود واحسن
ادهم :- الشغل كله تمام مفيش اى حاجه اتأثرت بغيابك أبدآ
محمد :- كنت عايز أسألك سؤال يا ادهم باشا
ادهم :- اتفضل أسأل
محمد :- كان فيه سكرتيره شغاله عندكم فى الشركه دى محتاج اعرف مكانها
ادهم :- اسمها ايه طيب
محمد :- نهى
ادهم :- نهى امممم مش فاكر إذا كان فيه سكرتيره شغاله عندنا بالاسم ده ولا لاء بس خير بتسأل عليها ليه
محمد :- لاء هى كانت شغاله عندكم سكرتيره لاستاذ فادى وانا قابلتها فى فرنسا واتجوزتها وحصلت شويه مشاكل وطلقتها وكنت بسأل عليها علشان عايز ارجعها تانى
ادهم :- انت عارف ان الشركه كبيره وفيها موظفين كتير اوى وصعب احفظ اسامى حد منهم بس انا هسأل استاذ فادى وارد عليك
محمد :- اوك انا سألت على استاذ فادى بس السكرتير قال إنه مشى من شويه
ادهم :- فعلا مشى متشغلش بالك هشوف انا وهرد عليك
محمد :- اوك تمام نبدء الشغل
ادهم :- نبدء
وبدأوا يتكلموا فى الشغل وبعد وقت انتهى الاجتماع ومشى محمد ودخل ادهم مكتبه ومسك تليفونه وطلب رقم نهى وانتظر الرد

نهى :- السلام عليكم
ادهم :- وعليكم السلام ورحمه الله وبركاته عامله ايه يا نهى
نهى :- الحمدالله يا استاذ ادهم
ادهم :- مرتاحه فى الشغل
نهى :- مرتاحه جدآ شكرآ يا استاذ ادهم جميل حضرتك ده عمرى ما هنسا
ادهم :- انتى موظفه مجتهده وسامر اخويه مبسوط جدآ من شغلك
نهى :- الحمدالله ده من فضل ربنا عليا
ادهم :- ربنا يوفقك المهم انا كنت عايز أسألك انتى تعرفى الباشمهندس محمد
نهى :- قلبها دق بسرعه من الخوف لما سمعت اسم محمد وقالت بخوف ا.ا.ايوه ده طليقى بس حضرتك بتسأل ليه
ادهم :- النهارده كان عندى اجتماع معاه وسألنى عليكى
نهى :- بخوف قالت لالالا بلاش تقول ليه مكانى ارجوك
ادهم :- متقلقيش انا قولت ليه انا معرفكيش اصلا بس ايه سر خوفك منه اوى كده
نهى :- بدموع لانه لو وصل ليا يبقى انا انتهيت كده انا شوفت الموت على أيده يا استاذ ادهم
ادهم :- على العموم متقلقيش محدش هيعرف مكانك ده نهائى
نهى :- بدموع شكرآ يا استاذ ادهم
ادهم :- ربنا معاكى سلام
وقفل السكه وحط التليفون على المكتب وبدء يشوف شغله
~•~•~•~•~•~•~•~•~•~•~•~•~•
فى شركة رودينا

وصل فادى عند رودينا ولسه هيدخل المكتب عندها السكرتيره منعته من الدخول وقالت إن رودينا مشغوله ومانعه اى حد يدخل ليها وقالت ليه ينتظر لحد ما رودينا تخلص شغلها
فادى قعد عند السكرتيره ينتظر الدخول لرودينا وبعد وقت طويل خرجت رودينا من المكتب بصت بقرف لفادى وقالت لسكرتيره أنها خارجه ولسه هتمشى
فادى :- استنى يا رودينا انا عايزك
رودينا :-انا مش فاضيه ليك ولسه هتمشى
فادى :- وقف قصادها وقال رودينا انا مستنيكى من بدرى وعارف ومتأكد انك كنتى ولا مشغوله ولا حاجه وانك قايله كده لسكرتيره علشان تخلينى اقعد واستناكى على الفاضى ومع ذالك قعد واستنيت كل ده خلاص بقى يا رودينا كفايه عند قولتلك اسف دى كانت غلطه واحنا بشر وبنغلط محدش معصوم من الغلط
رودينا :- والله ببساطه كده انا اسف انا شوفت ناس كتير اوى برده بس مشوفتش فى برودك ده الصراحه انا مش عارفه انت ازاى بارد اوى كده
فادى :- قولى كل اللى انتى عايزه تقوليه ليا المهم انك تسامحينى
رودينا :- بلاش تتعب نفسك كتير معايا علشان عمرى ما هسامحك فياريت تريح نفسك وتريحنى وطلقنى وخلصنى منك بقى
فادى :- مش هطلقك يا رودينا انا بحبك وصعب اسيبك تبعدى عنى
رودينا:- بتحبنى هه والله ضحكتنى بتحب مين يا فادى انت عارف معنى الحب ايه اصلا قبل ما تقولها
فادى :- مسك ايديها وقال انتى الحب يا رودينا هو ده معنى الحب اللى اعرفه
رودينا :- شدت ايديها من أيده وقالت والله انا الحب ولما انا الحب روحت حبيت غيرى ازاى يا فادى الحب ده يعنى انك متشوفش غيرى فى عينك إنما الحب عندك ليه معنى تانى خالص الحب اللى انت عايزه اللى هو تبقى ايد فى المايه وايد فى النار ولا عايز تتخلى عن الوجع ولا عايز ترتاح عايز عرايس لعبه قدامك كل ما تزهق من واحده تروح تلعب بالتانيه مضيعش وقت فى الزهق الحب عندك يعنى بحر غويط اوى اى حد ينزل فيه يغرق وتسحبه لقاع وتفضل تسحب وترمى فى قاعك وعمرك ما هتكتفى ولا تمل هتفضل طول حياتك كده بحر غدار شكله حلو اوى من بعيد بس غدار للى يقرب منه روح يا فادى امشى وانسانى وبلاش تتعب نفسك علشان أنا غرقت فى حبك وانتهيت ومبقاش فيا نفس اعافر معاك تانى وسابته ومشيت
فادى :- بص عليها بدموع وهى ماشيه واتنهد ومشى ركب عربيته وروح على بيته
رودينا :- ركبت عربيتها ودموعها نزلت منها اتنهدت بوجع ومسكت تليفونها وطلبت ادهم وانتظرت الرد

ادهم :- عملتى ايه
رودينا :- بدموع قولت ليه كلام بيوجع بس زى ما وجعه وجعنى اوى طلع من قلبى المحروق من جرحه ليا كان نفسى افضل اقول ليه كلام كتير اووووى بيوجع بس حسيت نفسى هبدء أضعف ودموعى هتخدعنى وتنزل قدامه سبته ومشيت
ادهم :- كل ما هتلاقى نفسك هتضعفى قوليلى واجى اخدك اخليكى تطلعى كل الطاقه السلبيه اللى جواكى
رودينا :- حاضر
ادهم :- اجيلك اوديكى
رودينا :- لاء انا هروح الفيلا احسن
ادهم :- اوك اللى يريحك اهم حاجه ريحى نفسك علشان اللى فى بطنك
رودينا :- حاضر باى وقفلت السكه مع ادهم واتنهدت بوجع وشغلت عربيتها وروحت على الفيلا
~•~•~•~•~•~•~•~•~•~•~•~•~•
مر اربع شهور على ابطالنا بدون احداث تذكر

فى فيلا ادهم

صحيت داليا من نومها وهى حاسه بضرب فى ضهرها حطت ايديها على ضهرها والايد التانيه خبطت على كتف ادهم وقالت

داليا :- بتعب ادهم يا ادهم
ادهم :- اممم
داليا :- قوم بسرعه شكلى هولد
ادهم :- فتح عينه بسرعه وقال بجد عندك طلق
داليا :- بتعب ايوه فيه ضرب جامد اوى فى ضهرى وقامت وقفت ومسكت بطنها وقالت ااااه
ادهم :- قام يجرى ومسك ايديها وقال أهدى يا حبيبتى خدى نفس وطلعيه براحه يلا
داليا :- اااااااه واخدت نفس وخرجته براحه وقالت لالالا مش قادره هموووووت بسرعه يا ادهم اااااااه
ادهم :- استنى طيب اغير هدومى
داليا :- مش هلحق مش لازم تغير هدومك بسرررررررعه يا ادهم اااااه هولد هولد مش قادره
ادهم :- بص على جسمه بهدوم البيت وقال هروح المستشفى كده
داليا :- مش وقت شكلك دلوقتى يا ادهم بقولك هولد ااااااه يلا بسرعه هموت
ادهم :- ميل عليها وشالها ونزل يجرى بيها
الجده :- فتحت الباب ومشيت بالكرسى وقالت فيه ايه يا ادهم
ادهم :- وهو شايل داليا قال داليا بتولد يا مديحه
داليا :- بصوت ااااااه هموت
ادهم :- خرج يجرى حطها فى العربيه وراح على المستشفى
سندس :- خرجت تجرى من الاوضه وقالت ايه ده فيه ايه
الجده :- داليا بتولد
سندس :- بفرحه بجد يعنى خلاص هبقى عمتو النهارده هيييييا هدخل ابلغ مؤمن ودخلت تجرى على اوضتها ومسكت تليفونها وطلبت رقم مؤمن وانتظرت الرد

مؤمن :- بصوت نايم فيه ايه يا سندس فيه حد يتصل بحد الفجر نامى يا سندس عندنا مدارس الصبح
سندس :- قوم يا لا انت نوم ايه هتبقى خالو كمان شويه
مؤمن :- خال ايه وعم ايه نامى الله يحرقك
سندس :- يا ابنى انت فوق بقولك هتبقى خالو يعنى داليا بتولد فى المستشفى
مؤمن :- داليا بتولد بجد
سندس :- لاء يا فالح متصله بيك الفجر علشان اهزر يخربيت الغباء
مؤمن :- هبلغ بابا وهروح ليها حالا وياريت تكونى هناك علشان اشوفك اصلك واحشتينى اوى الصراحه
سندس :- انت فى ايه ولا فى ايه اقولك اختك بتولد تقولى واحشتينى اموت واعرف دماغك دى مكانها ايه
مؤمن :- قلبى يا ناس
سندس :- تصدق انا غلطانه علشان اتصلت بيك اقفل يا مؤمن اقفل وقفلت معاه وضحكت وحضنت التليفون وقالت بعشقك يا ابن الذين
~•~•~•~•~•~•~•~•~•~•~•~•~•
فى المستشفى

وصل ادهم المستشفى ونزل يجرى من العربيه وفتح الباب وشال داليا ودخل يجرى المستشفى وحطها على سرير الكشف وشويه وجه الدكتور وكشف عليها وقال انها ولاده ودخلها اوضت العمليات علشان تولد وقعدة داليا تصرخ من كتر الوجع وادهم كان قلقان جدآ عليها ورايح جاى فى المستشفى بخوف وكل ما يشوف ممرضه يسألها على داليا ويطمنوه عليها وبعد وقت وصل مؤمن وسعيد وحمزه ودخلوا يجرو عند ادهم

سعيد :- بنتى عامله ايه
ادهم :- لسه بتولد جوه
حمزه :- من بدرى
ادهم :- من شويه
مؤمن :- يعنى قربت ولا لسه
ادهم :- بيقولوا لسه شويه
سعيد :- علشان بكريه بتاخد وقت شويه
مؤمن :- ايه بكريه دى يا حاج
سعيد :- يعنى اول ولاده ليها
مؤمن :- طيب ما ميرفت كانت اول ولاده ليها ومتأخرتش
سعيد :- لأننا احنا سبنها فتره كبيره عندها الطلق إنما داليا شكل الطلق مش من بدرى
ادهم :- معرفش هى صحتنى من النوم وقالت ليا عندها طلق وهتولد جبتها هنا علطول
وفى الوقت ده خرج الدكتور وقال
الدكتور :- مين جوز المدام اللى جوه
ادهم :- طلع يجرى عليه وقال انا جوزها خير
الدكتور :- مش هينفع نولد المدام طبيعى ولازم نفتح ليها قيصرى
ادهم :- قيصرى طيب ليه
الدكتور :- البيبى وضعه صعب ولازم نفتح قيصرى حالا
ادهم :- اوك المهم تكون هى كويسه
الدكتور :- متقلقش عن اذنكم وسابهم ودخل العمليات تانى
سعيد :- جيب العواقب سليمة يارب
والكل كان قلقان عليها ووصل مصطفى وساندرا وسندس ودينا وفاطمه ومنتهى والكل كان منتظر خروجها وبعد وقت طويل جدآ خرج الدكتور والكل جرى عليه
ادهم :- خير يا دكتور طمنى
الدكتور :- الولاده بتاعتها كانت صعبه جدآ بس الحمدالله ولدت وشويه وهتدخل الاوضه بتاعتها
والممرضه جابت البيبى وقالت
الممرضه :- العريس الصغنن بتاعكم اهو ومدت ايديها بيه لادهم
ادهم :- بص ليهم بفرحه ومد أيده وشال البيبى وابتسم بحب وباس راسه ومسك الدموع فى عينه وضمه فى حضنه واتنهد وقال شعور حلو اوى اللى انا حاسه ان بقى فيه حته منى ومن داليا بين ايديا يااااااه مش قادر اوصف الاحساس اللى انا حاسه ده
سعيد :- يتربى فى عزك يارب
ادهم :- بفرحه ربنا يخليك يا عم سعيد
والكل بارك ليه وهو ماسك البيبى فى أيده
سعيد :- هاته يا ابنى
ادهم :- مد أيده بيه وقال اتفضل يا عم سعيد
سعيد :- اخده بحب وباس راسه واذن ليه جنب ودنه وقال ربنا يجعله ذريه صالحه ليكم يارب
ادهم :- اخده منه وقال يارب يا عم سعيد
مؤمن :- قررتوا تسموه ايه
ادهم :- راح بيه عند مصطفى ومد أيده بيه ليه وقال هنسميه مصطفى ادهم مصطفى العدوى
مصطفى :- اخده منه وبص ليه بدموع وقال بجد يا ابنى
ادهم :- بحب ايوه يا بابا
مصطفى :- شد ادهم فى حضنه وطبطب عليه بدموع وقال ربنا يبارك ليا فيك يا حبيبى انا مش مصدق نفسى أن انا سمعت منك الكلمه دى وهتسمى حفيدى على أسمى كمان
ادهم :- ده حقك يا بابا ربنا يديك الصحه ويخليك لينا وباس راسه
مصطفى :- قرب حفيده ليه وباس راسه وحضنه وقال نورت عيلة جده مصطفى يا حبيبى
الممرضه :- ممكن ناخد البيبى
ادهم :- تخدوه ليه
الممرضه :- هنجهزه وهندخله لمامته كمان شويه علشان ترضعه
مصطفى :- خدى يا بنتى بس خلى بالك عليه
الممرضه :- متقلقش واخدت البيبى ودخلت بيه
وشويه وخرجت داليا على الاوضه بتاعتها والكل دخل وراها
ادهم :- قعد جنب داليا وقال حمدالله على السلامه يا قلبى
داليا :- بتعب انا تعبانه اوى يا ادهم
ادهم :- معلش يا حبيبتى هما ادوكى مسكن وشويه وهيعمل مفعول معاكى
سعيد :- حمدالله على سلامتك يا بنتى
داليا :- بتعب الله يسلمك يا بابا
مصطفى :- يتربى فى عزكم يا بنتى
داليا :- ربنا يخليك يا عمى
حمزه :- ربنا يجعله ذريه صالحه يا حبيبتى
داليا :- اللهم امين ويخليلك بنتك يارب
دينا :- حمدالله على السلامه يا دودى عقبال ما تشوفيه عريس يارب
داليا :- الله يسلمك يا قلبى عقبالك انت كمان لما تقومى بالسلامه يا حبيبتى
تامر :- امته بس ده انا حاسس ان الشهور مش بتمشى والله
داليا :- أن شاءالله هتعدى وهتفرح بالبيبى وهو بين ايديك انت وهى
فاطمه :- مبروك وصول حبيب خالته لدنيا ونورها كلها بوجوده فيها
داليا :- حبيبت قلبى يا طمطم الله يبارك فيكى يا احلى خالتو فى الدنيا كلها
منتهى :- حمدالله على سلامتك يا دولى
داليا :- الله يسلمك يا توته عقبال ما ربنا يرزقك بالذريه الصالحه يارب
علاء :- يارب يا داليا
فادى :- حمدالله على سلامتك يا داليا يتربى فى عزكم يارب
داليا :- الله يسلمك يا فادى عقبال ما ربنا يصلح ليك الحال انت ورودى يارب
ساندرا :- حمدالله على السلامه يا حبيبتى اخيرآ بقيت عمتو
داليا :- الله يسلمك يا سوسو يا حبيبتى يارب يبقى عسول كده لعمته
مؤمن :- وليه مش لخاله أن شاءالله ده انا حتى حليوه وكل البنات بتموت نفسها عليا
داليا :- بصت على سندس لاقتها بتبص بغيظ لمؤمن ضحكت وقالت متأكد من كلامك ده
مؤمن :- بص لسندس وقال الصراحه مش متأكد إذا كانت البنات هتموت عليا ولا لاء بس المهم يبقى حلو شبهى كده وخلاص
سندس :- اوعى يا داليا كفايه نسخه واحده فى الدنيا كلها بلاش تقرفى البشريه بنسخه تانيه منه
داليا :- يا بت الكلام ده من قلبك برضه
مؤمن :- اصلا جوجو حبيبت عمو طالعه نسخه منى
حمزه :- جوجو هو فيه فى زن جوجو وصداع جوجو اربعه وعشرين ساعه
مؤمن :- ده على اساس انكم انتو مش بترموها لسعديه الشغاله تخلى بالها منه ده انتو اب وأم بالاسم إنما أنا المربيه اللى بتربيها
الكل ضحك على كلام مؤمن وفى الوقت ده دخلت الممرضه بالبيبى وادته لداليا وخرجت
داليا :- شالت البيبى بحب ودموعها نزلت منها وقالت الله شوفت ابننا حلو ازاى يا ادهم
ادهم :- طالع حلو لمامته
داليا :- اخيرآ يا ادهم اتجسمت قصه حبنا فى صورة لحم ودم قطعه منك ومنى وباست أيده بحب وقالت ربنا يخليه لينا يارب
علاء :- بص لمنتهى وشدها فى حضنه بحب وطبطب عليها
منتهى :- بصت ليه بحب واتنهدت بوجع
فاطمه :- بصت ليهم بحب وضحكت ضحكه حزينه
مؤمن :- بص لسندس بحب وقال ليها بصوت واطى عقبالنا انا وانتى يارب
سندس :- بصوت واطى لما نتخرج الاولى يا اخويه
مؤمن :- كتك خوت لما يخوتك هى كلها سنه ورحمة امى ما هسيبك تبعدى عنى لحظه واحده بعدها
سندس :- بصت ليه بحب وضحكت بكسوف
وفى الوقت ده اتفتح الباب ودخل أكرم
فاطمه :- اول ما شافته اتوترت
أكرم :- حمدالله على السلامه يا داليا
داليا :- الله يسلمك يا اكرم
أكرم :- مبروك ما جالك يا صاحبى يتربى فى عزك يارب
ادهم :- تسلم يا صاحبى وشال البيبى ومد أيده بيه وقال ابن اخوك اهو
أكرم :- مد أيده وشال البيبى وقال بسم الله ماشاءالله يا ادهم سمتوه ايه
ادهم :- مصطفى العدوى
أكرم :- الله اسم حلو ربنا يخليه ليك وتفرح بيه يارب
ادهم :- يارب
أكرم :- بص بعينه على كل الموجودين دور على فاطمه لاقها واقفه وراه والدموع فى عينيها
فاطمه :- لما شافته بيبص عليها استأذنت منهم وخرجت تجرى من الأوضه
أكرم :- مد أيده بالبيبى لادهم
ادهم :- اخده منه وقال روح وراها ربنا يصلح ليكم الحال
أكرم :- خرج يجرى من الاوضه وراها وقال فاطمه يا فاطمه
فاطمه :- سرعت الماشيه بتاعتها ومرضتش توقف ترد عليه
أكرم :- طلع يجرى وراها وراح وقف قصادها وقال استنى يا فاطمه.
فاطمه :- حاولت تمشى من قدامه
أكرم :- منعها وقال اسمعينى يا فاطمه ارجوكى اربع شهور بتتهربى منى ورافضه تسمعينى
فاطمه :- لو سمحت سبنى امشى
أكرم :- يا فاطمه انتى لازم تعرفى الحقيقه
فاطمه :- بدموع مش عايزه اعرف حاجه ولا عايزه اسمع صوتك وابعد بقى من قدامى خلينى امشى
أكرم :- لاء مش هسيبك تمشى انتى لازم تعرفى أن انا مقدرش استغنا عنك واللى حصل ده كان مجرد تمث
فاطمه :- قطعته وقالت قولتلك مش عايزه اعرف حاجه وكلامك لا هيقدم ولا هيأخر لأن انا خلاص اخد قرار اخرجك من حياتى فياريت تبعد عن سكتى وتنسانى
أكرم :- يا فاطمه اسمعى كلامى للآخر وبعد كده قررى هتعملى معايا ايه
فاطمه :- لاء يا اكرم انا قررت خلاص وابعد لو سمحت علشان عايزه امشى
أكرم :- يا فاطمه
فاطمه :- يوووووه بقى وزقته بعيد عنها ومشيت وسابته
أكرم :- شكلك كده يا فاطمه مش هترضى تسمعى حاجه غير بالعافيه انتى اللى هتخلينى اعمل معاكى كده ورجع تانى عند داليا وادهم
*********************
إلي هنا ينتهي الفصل الرابع والثمانون من رواية تمرد صحفية بقلم دودو محمد
تابع من هنا: جميع فصول رواية تمرد صحفية بقلم دودو محمد
تابعوا صفحتنا على الفيس بوك للمزيد من روايات حب
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة