-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية بعد النهاية بقلم يسرا جمال - الفصل السادس

مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية ذات الطابع الإجتماعى مع رواية رومانسية جديدة للكاتبة يسرا جمال علي موقعنا قصص 26 وموعدنا اليوم مع الفصل السادس من رواية بعد النهاية بقلم يسرا جمال .

رواية بعد النهاية بقلم يسرا جمال - الفصل السادس

إقرأ أيضا: رواية غرام 


رواية بعد النهاية بقلم يسرا جمال

 

رواية بعد النهاية بقلم يسرا جمال - الفصل السادس

 وصلت الى الفيلا وصعدت فورا الى الغرفة التي اتخذتها مكانا لاقامتها ولملمت اغراضها بسرعة وانصرفت في فرح وعند باب الفيلا اوقفها صوت والدتها :

_ماشية يا دارين؟

لم تلتفت اليها_اه يا ماما عاوزة حاجة؟

قالت بحزن مرير_لا سلامتك

وغادرت دارين

____________________________________

في منزل هناء على الغداء

تحط هناء ايديها على قلبها

تتخض عائشة:انتي كويسة؟

هناء بتحاول تخبي تعبها:مفيش حاجة أنا تمام متقلقيش عليا

عائشة:مقلقش ازاي بس قومي نروح المستشفى ولا اقولك انا هجيب دكتور

هناء تمسك ايديها:قولتلك انا كويسة اقعدي عوزاكي

جلست عائشة في قلق:في ايه؟

هناء:انتي عارفة مامتك كان نفسها تشوفك حاجة كبيرة اوي وماتت قبل ما تحقق الموضوع دع

عائشة:ايه لازمته الكلام ده دلوقتي

هناء:اوعي تنسي نفسك وسط انك تحققي حاجة حلمها

عائشة:انسى نفسي؟؟

هناء:ايوه يا بنتي انا نفسي افرح بيكي

عائشة:ايه الكلام ده يا نونو انتي عارفة رأيي في الموضوع ده كويس اوي وانه مش وقته

هناء:يعني ايه مش وقته؟

عائشة:يعني مش وقته ومش بفكر فيه اصلاً انا كل همي دلوقتي الكلية والدراسات بعدها وحاملة هم الموضوع ده

هناء:وهيحصل حاجة لو الاتنين مع بعض ؟؟

عائشة:ميجوش ويا بعض

هناء:مين قال؟؟

عائشة:تقدري تلاقيلي حد يستحمل اني ابقى مشغولة في دراستي علطول لو تقدري تلاقيه اهلاً وسهلاً اتجوز النهاردة قبل بكرا

هناء:يعني انتي مش هتفضي ابداً من دراستك

عائشة:لسه بدري ومعتقدش حد يستحملني

هناء:بس انتي محتاجة حد جنبك

عائشة:قصدك حد يقيدني ذي ما بابا واهلي كلهم بيعملوا

هناء:والدك بيحبك

عائشة:كلام او حب انا مش عوزاه

هناء:محدش يقدر يعيش من غير اهله

عائشة:اكبر كدبة ما انا و رامي اهو كل واحد فينا عايش في ملكوت تاني خاااالص ومرتاحين والله

هناء:متقارنيش رامي بيكي على الأقل هو و والده بيتقابلوا ويقعدوا سوا وبنهم كلام

عائشة:لو على كده فأحب أطمنك بابا بيكلمني كل يوم يديني محاضرة ونقفل تاني

هناء:شوفي انتي بتتكلمي ازاي عنه

عائشة:ممكن نقفل الموضوع ده يا نونو بعد اذنك

صمتت هناء ولازالت تشعر بالقلق موقنة تماما انها ان رحلت فتلك المسكينة سينتهي بها الحال كحال والدتها الراحلة في قرى الريف حيث خطأ عمرها الذي ندمت عليه طول حياتها لا تذكر ان والدتها الراحلة قالت لمرة انها سعيدة هناك ولا تريد لحفيدتها نفس النتيجة

________________________________

جلسا يتناولان الغداء

دارين:انا خلاص حددت يوم الجمعة الجاية الفرح

فؤاد بفرحة:مبروك يا حبيبتي

دخل تامر الى الفيلا وعندما رآها

تامر:نورتي يا أميرة كنت عارف اني هاجي الاقيكي

أشاحت دارين بوجهها بعيدا عنه في غضب

فؤاد بغضب لتامر:انت ازاي تمد ايدك على اختك وانا على وش الدنيا

تامر يجلس في برود:هي اشتكتلك ؟

فؤاد:طبعا تشتكيلي امال تشتكي لمين يعني؟

تامر وقد هم بتناول الطعام:اسأل الهانم سحبت كام من حسابك

فؤاد:انا ادتها الكرت وانا موافق على اي مبلغ تسحبه

نظر اليه تامر:ده في حالة ان المبلغ يخصك

فؤاد بغضب:انت اتجننت يا ولد طبعا يخصني دي فلوسي

تامر:انا تعبت معاك علشان الشركة تكبر والهانم مش مهتمة وبتتصرف بانعدام للمسؤولية

فؤاد:ليك حق يا تامر في الشركة بس ملكش حق في مبلغ في حسابي في البنك ودي آخر مرة تتعامل فيها مع اختك بالطريقة دي فاهم ولا لاء؟

ألقى السكين بغضب على الطاولة ونهض

فؤاد بغضب:مخلصتش كلامي

صعد الى الأعلى ولم يرد

دارين:خلاص يا بابا سيبك منه

فؤاد محاولا الهدوء:تصرفاته بقيت لا تحتمل

دارين:اهدا معلش ربنا يهدي

فؤاد:يا رب ....قوليلي انتي عزمتي مامتك على الفرح

دارين:قولتلها بس شكلها مش ناوية تيجي

فؤاد:كلميها خليها تيجي

دارين:انا مش هتحايل على حد ييجي فرحي لاني اصلا مش محتاجة لحد يحضر فرحي وخصوصا هي

فؤاد:دارين دي مامتك

دارين:بابا ارجوك بلاش نفتح الموضوع ده

فؤاد بضيق:طيب

دارين:انا شبعت هقوم علشان ورايا حاجات كتير

فؤاد:طيب

ونهضت دارين وانتظر فؤاد حتى صعدت للطابق الثاني ودخل غرفة مكتبه واتصل بصفاء :

_الو

تردد للحظات ثم قال:ازيك يا صفاء انا فؤاد

صفاء بضيق:خير؟

_فرح دارين يوم الجمعة الجاي

_عرفت

_هتيجي؟

_فارق معاك تعرف؟

_انتي عارفة كويس انـ...

قاطعته:انا عارفة انك عاوزني احضر علشان منظرنا قدام الناس لكن انا هحضر علشان ده فرح بنتي حبيبتي

لم يجد رد فأغلق الخط

____________________________________

عادت الى المنزل دخلت الى غرفتها وقبل ان تبدل ثيابها سمعت طرقات على الباب

نسمة:ادخل

دخلت سامية وبخفوت:مصطفى برا تعالي

نسمة بتوتر:ايه اللي جابه؟

سامية بشك:قصدك ايه؟

نسمة بسرعة:لا لا مفيش انا جاية وراكي اهو

سامية:لا يلا معايا

وذهبتا سويا الى غرفة الصالون جلست نسمة بجوار باسم على الاريكة

نسمة:خير يا مصطفى ؟

مصطفى:علطول كده مفيش ازيك ؟

نسمة بنفاذ صبر:ازيك يا مصطفى؟

مصطفى:الحمد لله انتي عاملة ايه؟

نسمة:الحمد لله ...خير ايه سر الزيارة؟

مصطفى:مش المفروض نحدد معاد كتب الكتاب بقى طولنا في الخطوبة دي ده احنا داخلين على سنة

نسمة:معلش يا مصطفى انا مش مهيئة نفسيا للجواز دلوقتي

سامية بحدة:ايه الكلام ده؟

باسم يشير لوالدته ان تصمت فصمتت

مصطفى:وهتكوني مهيئة امتى؟

نسمة:معرفش ربنا يسهل

مصطفى:اخر كلام؟

نسمة:اه اخر كلام

مصطفى ينهض:طب عن اذنكم

نسمة:وانا كمان عن اذنكم

وذهبت الى غرفتها

سامية بإحراج:ما تخليك شوية يا ابني

مصطفى:لا يا خالتوا انا كده اتأخرت سلام

وغادر مصطفى سريعا وهو يشعر بالغضب من تصرف نسمة

سامية لباسم:عجبك التصرفات دي

باسم:اهدي يا ماما اما نفهم ليه مش مستعدة نفسيا للجواز يمكن عندها سبب مقنع

سامية بغضب:طيب خلينا نروح نشوف الست هانم مالها

باسم:لاء خليكي انتي انا هعرف اتكلم معاها

سامية:طيب يا باسم خلصني من الموضوع ده بقى

باسم:طيب اهدي

وذهب باسم لغرفة نسمة وطرق الباب

نسمة بنفاذ صبر:ادخل

دخل باسم بإبتسامة:ممكن شوية من وقتك

نسمة بهدوء:اتفضل يا باسم

دخل وأغلق الباب وجلس بجوارها على طرف الفراش وحاوطها بذراعه:

_في مشاكل بيتك وبين مصطفى؟

_لا والله يا باسم مفيش

_آمال ليه يا حبيبتي مش عاوزانا نكتب الكتاب دلوقتي ويبقى في شئ رسمي بينكوا

_يا باسم انتو مستعجلين ليه بس؟

_يا حبيبتي انتوا داخلين على سنة خطوبة

_معلش يا باسم انا عاوزة شوية وقت

_ما انتي لازم تديني سبب مقنع برضو

تنهدت بتعب:انا عندي شوية مشاكل في الشغل

_ايه خير؟

_حاجات كده انا ملبوخة فيها ومش فايقة اركز في حاجة تانية فخليني اخلص من الحاجات دي اول وبعدين افكر في موضوع الجواز ده

_عاوزة مساعدة

_لا يا باسم انت عارف انا بعرف احل مشاكلي في الشغل

_طيب يا حبيبتي ربنا معاكي

وقبل جبينها:تقومي تأكلي؟

_لا انا هنام شوية

_طيب تصبحي على خير

_وانت من اهله

وتركها وغادر الغرفة وهو لا يشعر بالارتياح ابدا لكن كالعادة تحدث مع والدته بطريقة طبيعية وبث في داخلها الارتياح

_________________________________

في صباح اليوم التالي لاحظ عدم وجودها على مائدة الطعام

مازن:ماما فين؟

كمال:مش عاوزة تأكل

مازن:ليه؟

كمال:متضايقة

مازن:ايه السبب؟

كمال:مقالتش حاجة

مازن:طيب انا هطلعلها

صعد مازن الى والدته طرق باب الغرفة وخل فوجدها في الشرفة ذهب و وقف الى جوارها :

_صباح النور

ابتسمت بحزن:صباح النور مروحتش كليتك ليه؟

_بلغني انك زعلانة قولت اجي اشوفك

_شكرا يا حبيبي متقلقش عليا انا كويسة روح انت شوف مصلحتك

_اروح وانتي زعلانة

_لا انا مش زعلانة انا كويسة

_يا ماما هو انا غريب علشان تضحكي عليا انتي متضايقة قولي السبب

نظرت الى النيل:بلاش اقول حاجة تخلينا نتخانق من بداية اليوم

_هو انا عمري اتخانقت معاكي

نظرت اليه وضحكت بسخرية ثم عاودت النظر للنيل

_في ايه يا ماما ؟

قالت بنفاذ صبر:دارين مشيت

_وانا بقول البيت بقى حلو ليه؟

نظرت اليه في حدة ثم نظرت الى ساعة معصمها:

_اتأخرت يا مازن يلا روح شوف مصلحتك

_بصي يا ماما دارين مش اول مرة تيجي وانتي عارفة انها بتيجي تقعد ليلة وتمشي فمتعمليش انك متفاجئة من اللي حصل

قالت منهية الجدال:انا عاوزة انام

مازن بحزن:انا بحاول ابسطك بس مفيش فايدة

وذهب وتركها

صفاء:محدش فيكوا حاسس بيا

_________________________________

طرق باب غرفة تامر وبعد لحظات فتح تامر الباب وقد بدا بملابس المنزل

فؤاد:منزلتش تفطر ليه؟

تامر:مليش مزاج افطر مع حد

فؤاد:طب غير هدومك بسرعة عندنا اجتماع في الشركة كمان ساعة

تامر:مش رايح الشركة النهاردة

فؤاد:ليه؟

تامر:تعبان

فؤاد:تعبان مالك؟

تامر: من الآخر انا قررت افصل النهاردة من الشغل تمام

فؤاد:ده بسبب حوار امبارح؟

تامر:افهمها ذي ما تفهمها

فؤاد يهز رأسه ايجابا:طيب يا تامر على راحتك

تامر:شكرا عن اذنك

واغلق الباب ومدد على سريره وبعد لحظات سمع ضجيج في الخارج مما زاد من غضبه وبعدها سمع طرقات على الباب

تامر:ادخل

دخلت علياء واخذت بعض الملابس

تامر:علياء

علياء:ايوه يا بيه؟

تامر:هاتيلي فطار هنا

علياء:حاضر

تامر:وايه الدوشة اللي برا دي؟

علياء:العمال بيطلعوا اوضة دارين هانم الجديدة

تامر يشعر بالغضب ويشير اليها ان تنصرف

وامسك جهاز التحكم الخاص بالتلفاز وبدأ يقلب القنوات وهو يشعر بالغضب فإذا كانت ستتزوج وتنتقل الى بيت آخر فلماذا تكلفهم ترتيب غرفة جديدة

جاءت علياء بعد دقائق و وضعت طعام الفطور وانصرفت حاول تامر ان يصرف الأمر عن تفكيره لكنه لم يستطع فنهض وارتدا جاكيته الرياضي وغادر الغرفة فوجدها تشرف على نقل الأثاث بنفسها ولاحظ ان الأثاث مختلف وجذب انتباهه

لاحظت دارين ذلك فاقتربت منه وقالت بفرحة قاصدة اغاظته :

_مش تباركلي جبت اوضة جديدة

قال بعدم فهم:ايه لازمتها وانتي هتتجوزي؟

_هو انا مقولتلكش

عندها نظر اليها في حذر

_انا وشريف هنتجوز هنا في الفيلا

صدم تامر من كلامها

فقالت هي بقصد اثارة غضبه:مفاجاءة مش كده؟

تركها تامر ودخل الى غرفته وهو في حالة غضب وصدم فقد كان يعد الايام لزفافها كي يرتاح من وجودها في المنزل وها هي تفاجئه بمكثوها في الفيلا بعد الزفاف

شعر انه سيفعل بها شيئا ان ظل هنا فبدل ملابسه سريعا وغادر في غضب

كانت دارين تعلم انه لن يقدر على التفوه بكلمة امام الغرباء فهو يهتم كثيرا لسمعة العائلة


عاد عصرا من الخارج وجدها جالسة على الأريكة اقترب منها وقبل رأسها

مازن:زعلانة مني؟

صفاء:لا يا حبيبي وازعل منك ليه؟

مازن:حسيت اني ضايقتك الصبح

صفاء:هو انا اتضايقت الصراحة

مازن:طب اعمل ايه وارضيكي؟

صفاء:انا معزومة على فرح يوم الجمعة وعوزاك تيجي معايا

مازن:بس كده من عنيا

صفاء بإبتسامة:شكرا يا حبيبي

مازن:يعني خلاص مش زعلانة ولا متضايقة

صفاء:لا خلاص قوم نتغدا سوا

مازن:يلا

____________________________________

مرت الأيام وجاء يوم الزفاف وقدمت نور وبعض الصديقات من الصباح ليكونوا بجوار دارين

دارين:ايه رأيكم في الفستان؟

نور بإعجاب:واو تحفة يا دارين

لارا بغيظ:كويس

دارين:كويس؟؟...بس؟؟

لارا:شوفت الاحلى منه

دارين:مستحيل ده متصمم مخصوص علشاني من احسن مصمم

لارا:مش لايق عليكي اصلاً

دارين:افندم؟؟

نور:انسة لارا دي خطوبة لو عندك كلمة حلوة قوليها لو معندكيش اتفضلي

لارا:انتي مين انتي علشان تطرديني اصلاً

دارين:معاكي حق هي مش من حقها تطردك بس انا بقى من حقي بيتهيقلي انتي عارفة طريق الباب

غضبت لارا وغادرت لتلتفت نور لدارين:ايه الناس دي

دارين:سيبك منها انا عارفة هي جاية ليه اصلاً وسبتها تيجي تحرق دمها واهي مشيت

نور:يعني هي جاية تحرق دمها ايه الهيافة دي

دارين:بصراحة لو مكانها كنت هعمل نفس الموضوع ده فضول

وكملت:ما علينا من كل ده خلينا نركز في تجهيزي عبال ما باقي البنات تيجي

نور:لو بالرزالة دي همشي دلوقتي

دارين:هههههه لا كويسين متقلقيش

نور:المهم مبروك

دارين:الله يبارك فيكي ....مش عارفة متوترة ليه ؟

نور:لا مش عاوزين توتر النهاردة ___________________________________

وبدأت الاستعدادات للزفاف وكانت الحديقة مليئة بالزينة الراقية وكانت قمة في الروعة وازدادت روعتها في المساء

في داخل الفيلا استعدت دارين امام المرآة وكانت غاية في الجمال

دارين لصديقاتها:شكلي حلو

نور:قمر يا دودو

كريمان:تأخدي العقل يا دارين

تشعر دارين بالسعادة البالغة لسماعها الثناء على مظهرها

سمعوا طرقات على الباب

دارين:اتفضل

دخل فؤاد وانبهر من جمالها

دارين:بابا

افاق من شروده:هاه..

دارين:روحت فين؟

فؤاد يقترب منها ويقبل رأسها:مبروك يا حبيبتي

دارين:الله يبارك فيك

فؤاد:يلا علشان نكتب الكتاب

دارين:طيب

خرج فؤاد من الغرفة

دارين لصديقاتها:يلا يا بنات هيكتبوا كتابي

وبمجرد ان نطقت تلك الجملة شعرت بإحساس غريب جعل الابتسامة تتلاشى

نور:مالك يا دارين؟

دارين متجاهلة ذلك الشعور وتبتسم:لا ابدا انا كويسة يلا بينا

وخرجت دارين وتعلقت بذراع والدها ونزلت بجواره وجلسوا معا وكتبوا الكتاب وكانت دارين وشريف غاية في السعادة

فؤاد:طب يلا بقى

شريف:اتفضلوا انتو يا عمي كلكم واحنا بعدكم

فؤاد:ليه يعني؟

شريف بضيق:تعليمات زياد

فؤاد:طيب

وغادر فؤاد وصديقات دارين

عندها امسك شريف بيدي دارين

شريف بفرحة:انا النهاردة اسعد انسان في الدنيا كلها

دارين:ليه يا شريف ملبستش بدلة بيضا

نظر شريف الى ملابسه ثم نظر اليها:

_بتتكلمي في ايه دلوقتي ؟

_ما انت لو بتوريني البدلة اللي هتلبسها وتأخد رأيي بس

_لاحظي يا دارين انك كمان مورتنيش الفستان

_ماله فستاني محدش شافه الا وقال عليه تحفة

_انا كمان بدلتي شيك جدا وبيتهيقلي يا دارين احنا مش جايين النهاردة نتخانق على الموضة واللبس

_طيب يا شريف انسى الكلام ده احنا برضو فرحنا دلوقتي

_طب كويس انك خدتي بالك

_الساعة بقيت 9

نظر الى ساعته وهز رأسه ايجابا

دارين:طب يلا

أمسك كفها وابتسم لها وأزيحت ستار على باب الفيلا حسب ترتيبات زياد وبمجرد أن خرجا حتى تعالت الصيحات تبارك لهن واشتغلت احدى الأغنيات وتساقطت عليهم الأزهار

حينها كادت السعادة تقفز من أعينهم

اشتغلت احدى الأغاني الرومانسية ووقف شريف ودارين للرقص معا

____________________________________

وصل السائق أمام الفيلا

صفاء:يلا يا مازن وصلنا

نظر مازن:ايه ده؟

صفاء:مكان الفرح

مازن:فيلا فؤاد الحكيم ؟

صفاء:اه ما النهاردة فرح دارين

مازن:اه قولتيلي بقى

صفاء:قصدك ايه؟

مازن:قصدي ان العائلة دي انا مليش علاقة بيها عاوزة تدخلي تفرحي ببنتك اتفضلي وخليني انا برا

صفاء برجاء:هتسبني لوحدي يا مازن

مازن:مقلتيش من الاول ليه؟

صفاء بدموع:علشان عارفة انك مش هتوافق

مازن:ولما عارفة اني مش هوافق ليه تخليني اجي بكدبة

صفاء:علشان خاطري يا مازن عديها ولو خايف حد يضايقك فمتخافش النهاردة فرح ومحدش هيقدر يكلمك لانـــ...

مازن يقاطعها:انا مش خايف من حد منهم فاهمة ده

صفاء تصمت وتهز رأسها ايجابا

بعد لحظات يشعر بالاشفاق على حال والدته

مازن:ماشي يا ماما يلا ننزل

فرحت كثيرا وغادرا السيارة سويا 

*********************
إلي هنا ينتهي الفصل السادس من رواية بعد النهاية بقلم يسرا جمال 
تابع من هنا: جميع فصول رواية ولا فى الأحلام بقلم دعاء عبد الرحمن
تابع من هنا: جميع فصول رواية أبو البنات بقلم رهف سيد
تابعوا صفحتنا على الفيس بوك للمزيد من روايات حزينة
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة