U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية خادمتى ولكن ج1 - لولو طارق - الفصل الأول

مرحباً بكم أصدقائي وأحبابي عاشقي القراءة والروايات الرومانسية مع رواية رومانسية جديدة للمتألقة لولو طارق والتي سبق أن قدمنا لها العديد من القصص والروايات الجميلةعلي موقعنا قصص 26 وموعدنا اليوم مع الفصل الأول من رواية خادمتى ولكن ج1 - لولو طارق 

رواية خادمتى ولكن ج1 - لولو طارق - الفصل الأول

اقرأ أيضا: روايات رومانسية
رواية خادمتى ولكن ج1 - لولو طارق
رواية خادمتى ولكن ج1 - لولو طارق

رواية خادمتى ولكن ج1 - لولو طارق - الفصل الأول

روان : ريم ياريم
ريم بنوم : عايزا ايه على الصبح سبينى انام شويه قبل معاد الشغل
روان : لا بقولك ايه ابوكى عاملها معايا زى كل سنه وخدت منه فلوس السكن بالعافيه .... ولا فلوس موصلات ولا أكل ولا مصاريف الكليه ولا حتى تصوير ملازم مهمه ... انا تعبت بقى .... حتى محاولاتى انى أقعد فى سكن الجامعه فشل مفيش فايده
ريم : اتعدلت ... حيلك ..حيلك ...موشح كل سنه ......هاتى جزمتى من تحت السرير ... انتى عارفه لازم أهربهم قبل ما ابوكى يشوفهم .......قولتلك أشتغلى وانتى بتدرسى هناك وكدا كدا ابوكى مش شايفك ولا ها ياخد حاجه منك

روان : 😂😂 مهرابهم فى الجزمه دا لو قفشنا ها يودينا المعتقل .......هو انتى فاكره انى بمشى نفسى بفلوسك دى ما بتكفيش أسبوع يا بنتى وطبعا بشتغل ومفيش شغلانه أستمريت فيها أسبوع الا لما أضرب صاحب الشغل وامشى من قلة أدبهم ... قوليلى أعمل ايه انا ....
ريم : 😂😂 حد قالك تبقى جميله كدا وتغريهم ....
روان : ما انتى مزه اهووو واحل منى ... اشمعنا انا يعنى
ريم : ومين قالك ان محدش دايقنى بس انا عملت لكل واحد حد وصدرت التناحه والوش الخشب فا فقدو الامل فيا ....... خدى يا ستى كفايه دول
روان باستها : كفايه يا قمر يارب تتجوزى محمد ويسعدكم
ريم بزعل : هو طول ما ابوكى ورانا ها نتجوز مانتى شايفه عايز يجوزنى لخناشيررر عشان الفلوس بيبعنى بالرخيص وقافل بابه فى وش محمد ...

روان : خليكى مصره على موقفك لحد ما يزهق ويجوزكو لبعض ..... انتى عارفه ابوكى بيحبنا بس نقول ايه بقى نصيبنا هى الحاجه الوحيده السيئه الا فيه ... الفلوس بس واحنا صغيرين عمره ماكان كدا
ريم : يارب يا روان انا تعبت انا وهو ..... جهز الشقه ومش ها يكلفه حاجه .... انا كمان بحبه وعارفه انه طيب بس أقول ايه عايز يستفيد من جواز بنته ازاى دا
روان : ربنا يهديه يا حبيبتى معلش .. أستحملى
ريم : انا عندى 25 سنه يا روان ها استحمل لحد أمتى قوليلى
منيره : صباح الخيررر يا حبايبى بترغووو فى ايه على الصبح كدا
روان : مفيش يا ست الكل وصباح العسل والجمال والقلب الا كله حب و....
ريم : اه مسلكه امورك ما بتضعيش وقت
منيره : ربنا ما يحرمنى منكم ... خدى يا روان الفلوس دى
روان باستغراب : منين دى يا ماما ... اوعى تكونى سرقتى فتحى ها يقيم علينا الحد
ريم : 😂😂😂 امك بقت حراميه
منيره : 😂😂😂 ....لا الحمد لله ياروان متخافيش ... برغم ظروفنا وحياتنا الصعبه زى ما ربتكم نعيش وما نمدش ايدينا لحد ولا على فلوس غيرنا ... حتى لو فلوس أبوكم عمر أمكم ما تعمل كدا .......
روان : يالهوووى انتى زعلتى يامنيره .... انا عارفه انك عمرك ما تعمليها لو ها تموتى من الجوع ... وبتبوسها حقك عليا انا أسفه
منيره : مش زعلانه يا حبيبتى عارفه انك بتهزرى كان نفسى تعيشو أحسن من كدا .... بس دا نصيبنا ... دى فلوس السلسه الا جدتك الله يرحمها ادتهلى بعتها امبارح عشانكووو معلش لو معايا أكتر مش ها أستخسر فيكو انتى محتاجه مصاريف الكليه .... غير مصاريفك التانيه اهو دول يسدو على الاقل مصاريف كليتك
روان بزعل : ليه ياماما السلسه دى عزيزه عليكى تبعيها عشانى
ريم : ياماما انا ادتها فلوس ارجوكى رجعيها تانى ارجوكى
منيره : يابنتى هى مش أغلى من راحتكووو .. اختك محتاجه لكل قرش واحنا بعيد عنها ... خدى وبطلى انتى وهى ...
روان : حضنتها جامد ... والله ياماما لازم أعوضك عن دا كلووو ها أنسيكى الفقر والهم يا حبيبتى ....
منيره : هششش ابوكى جه وجاب الفطااار ياله انا ها اطلع أجهزه .....
كلهم طلعووو وقاعدين يفطرو مع بعض ..... فى طبق فول واحد ...
ريم : يابابا هات باقية الرغيف انا جعانه
فتحى : لا كفايه عليكى كدا ها تبقى زى العجله ومش ها نعرف نجوزك
روان : وانا يافتحى ... انا جعانه وها اسافر ادينى بقية الرغيف بتاعى
فتحى : ضربها على راسها فتحى يا أم لسان طويل دانتى لهفه لوحدك 100 جنيه ...وبيطول فيها قوووى . 100 جنيه يا مفتريه فلستينى كان لازم تتنيلى وتخشى كليه ... اتعلمى من أختك خدت معهد سنتين وبتشتغل وتساعدنا فى البيت ...
روان : بقولك ايه يا فتحى انا مش زى أختى هبله .... كفايه انى ما دخلتش الكليه الا انا عايزاها وخلتنى حولت من علمى لأدبى ... كفايه الا انت عامله فينا بتنتقم مننا بعد كدا ها نشم الأكل .....
منيره : كاتمه الضحكه بالعافيه وريم بتضحك بصوت عالى
فتحى : بتضحكى على ايه يا جزمه ... وانا بشممكو الاكل يا أم لسان طويل ... دانتو بتاكلو فى لحمى كل يوم فطار وغدا وعشا ... وهات .. هات ... ايه ماعندموش دم ولا بتحسووو ..... ومره واحده ضرب روان على ايديها سيبى يا بنت بطلى أكل كتره بيعمل دهون وامراض
ريم : هى كلت غير نص رغيف يا بابا سبها تاكل
فتحى : لا كفايه قومووو ياله وسيبو بقية الفول دا للعشااا وانتى قومى غورى مش لهفتى ال100 جنيه
روان : قامت خدت شنطتها وحاجتها الا محتاجها وسلمت على أهلها وبدأت رحلتها ......
***********************

***********************
مروان : خد شاور وطالع من الحمام فى اوضته
مازن : داخل من غير ما يخبط على أخوه وبيقوله ... انا قولتلك 50 مره هات لنا خدامه فى البيت مش كل يوم انزل من غير فطار وانا الل بحضر كل حاجه لنفسى
مروان : مش انت الا بتطفشهم بقلة أدبك ... أعملك ايه يعنى ومش عايز رجاله لازم بنات
مازن : أعمل ايه بحبهم بموت فى قربهم وهما بيموتو فيا وفى حلاوتى .... بيخلووو لحياتى معنى .... مش ذنبى انك ما بتتأثرش وجبله
مروان : جبله طب غور برا خلينى البس وفى ظرف 5 دقايق تكون جاهز فاهم
مازن : يابنى عنست وعايزنى أعنس جمبك الشقه دمها تقيل من غيرهم .... و اومر .. اومر ... ياحبيبى غلط على صحتك
مروان : ال5 دقايق قربت تخلص ووقعتك ها تبقى سودا ..
مازن : جرى على برا وهو بيقول مفترى حد مسلطه عليا دا نشفلى حياتى كلها اهئ اهئ حتى السكراتريه فى الشركه جايبهم رجاله ناقصه هى ....
مروان : بيضحك على صوت أخوه العالى وهو بيسمعه الكلام ومستمتع جدا .... لان أخوه بيحبب الستات جدا وهو نفسه يخليه يبعد عن الطريق دا لانه بيعمل مشاكل كتيرر... وبيخاف عليه منهم . .....
مازن : انا جاااهز ......
مروان بجديه : اتفضل قدامى ونزلو راحووو الشركه .......
ايمن : حمدالله على السلامه يا فندم
مروان : الله يسلمك جهزتلى اوراق المناقصه الجديده
ايمن : ايوا يا مروان بيه جهزتها وعلى مكتب سعتك
مازن : هو محمد مجاش انهارده يا ايمن
ايمن : ايوا يا مازن بيه مراته تعبانه جدا ومقدرش يجى
مروان : يعنى ساعته قاعد جمب مراته فى البيت
مازن : خلاص يا مروان غصب عنه البنيه تعبانه يعمل ايه يعنى
مروان بصرامه : مين الا وافق له على الاجازه
ايمن : محسن يا فندن
مروان: ابعتهولى حالا واتفضل روح شوف شغلك
ايمن بتوتر : حاضر ... حاضر .... وطلع جرى
مازن : حرام عليك يا عدو الانسانيه بيقولك الراجل مراته تعبانه يرميها والا يطلقها عشان خاطرك
مروان : انا محبش الاهمااال والدلع لها امها .... اختها ... الجيران ... مش سعت الباشا .... وروح انت كمان على شغلك ما تزهقنيش .... ياله ....
مازن : يا ياساتر انا مش عارف مين الا ها تطيق تتجوز واحد زيك .... دا أمها والجيران .. داعين عليها وسابه وراح مكتبه قبل ما يتجنن من اخوه .....
مروان ؛ ايه يامحسن بقيت صاحب شركه وبتاخد قرارت تخص الا بيشتغلو هنا بالنيابه عنى
محسن : انا أسف يا مروان بيه ... بس مراته ملهاش اى حد هنا وتعبانه فا الاصول يبقى جمبها احنا بنى ادمين بردووو
مروان : وانا يا سيدى ما بفهمش فى الاصول ولا بنى ادم
محسن : العفو يا مروان بيه انت ابن أصول .... وراجل يعتمد عليه
مروان : خبط بأيده على المكتب .... انت عارف كويس انى ما بحبش الكلام دا فى الشغل ...واه يا سيدى انا مش بنى ادم فى شغلى والاجازات الاستثنائيه بالذات لازم تاخد موافقتى عليها .... واتفضل دا أخر انذار ليك وله هو كمان
محسن : حاضر يا مروان بيه وخرج من قدامه وهو مخنوق ومدايق من طريقته التعسفيه فى الشغل .... عكس أخوه تماما .....
*************
روان : السلام عليكم
صاحبة السكن : وعليكم السلام ورحمة الله وبركاته ... حمدالله على السلامه
روان : الله يسلم حضرتك اتفضلى ال100 جنيه ايجااار الشهر اهوووو
صاحبة السكن : لا يا حبيبتى الايجار غلى بقى 200 جنيه
روان بشهقه : 200 ليه يا ست فردوس احنا 3 بنات فى كل اوضه ها تاخدى فى الاوضه 600 جنيه
فردوس : أعمل ايه حكم القووى ابنى كان عايز 300 وانا بالعافيه خلتهم 200 معلش يا بنتى غصب عنى ...
روان بزعل : بس انا مش ها أقدر ادفع ليكى كل شهر 200
فردوس : روحى يا حبيبتى سكن الجامعه بتعتك
روان : ياريت مش نافع بردو ... حظى كدا أعمل ايه
فردوس : وانا أعمل ايه مش بأيدى
روان : طيب اتفضل خدى 100 جنيه دى نص شهر واول ما نص الشهر يخلص أكون جبتلك ال100 التانيه
فردوس : هاتى يا حبيبتى ولو اتاخرتى يوم واحد تفضى مكانك لغيرك
روان بغيظ : حاضر ....وسابتها وطلعت وهى بتقول وليه مفتريه . .. عايزا تكوش على الدنيا وفتحت ودخلت ...
ازيكم يا بنات
كلهم الله يسلمك .... ودخلت اوضتها .....
نور : حمدالله على السلامه شكلك قابلتى الحيزبونه
روان : دى أم اربعه واربعين .... ما بتغلبش ....
هدى : 😂😂😂 الوليه دى فاكرانا وارثين ..
روان : اعمل ايه انا الفلوس الا معايا يا دوب موصلات أسبوووع وأكل أسبوعين وادفع المصاريف ....
نور : مش عارفه والله يا بنتى انتى لازم تشتغلى
هدى : انتى دفعتى لها فلوس الايجار
روان : نص شهر بس
نور : خلاص من هنا لحد نص الشهر ما يخلص ربنا يحلها .....
روان : يارب .....
نور : وحشتينا يا رورو
روان : وانتو أكتر والله أخيرا الاحازه خلصت يا هدى ... هدى حبيبه قلبى وبتخن فى صوتها
نور وهدى : 😂😂😂😂
هدى : أخيرا يا حبى ..... وها نرجع للهم والمذاكره تانى مالها الانتخه والبلطجه على امك فى البيت .... قاعده رايقه أكل وشرب وفرجه على التليفزيون وانترنت .... عايزين ايه تانى فى حياتنا غيررر العريس المنتظرر
روان : انتظرى لحد ما تعفنى وويلاقوكى شبه السعلووه جاتك نيله
نور : انا بقى خلاص ها أخلص من هنا واتجوز انا ومؤمن من هنا ... حيححححح .. حبيبى وروحى وعقلى ... بقى جوزى وكتبنا الكتاب ....
روان : حيححححح مين يا بايره ..... لمى الدور معاكى بنات عفيفات شريفات فى الاوضه واحده نفسها تتجوز والتانيه طالعه معااش مبكررر وكله من أم اربعه واربعين الهى تتوكس البعيده ....
هدى ونور : 😂😂😂
هدى : بقولك ايه غيرى بسرعه وتعالى كدا سمعينا حاجه على زوقك ....
نور : اه والنبى يا رورو ... وحشنا صوتك
روان : لا انا مش فى المود انتى وهى وسبونى فى حالى ....
**************
مر ال15 يوم سريعاااا على الجميع ....
سيد : حارس العماره التى يقيم فيها مروان ومازن...... هى عايزا ايه الست حكمت يا هانم
هانم : مش عارفه والله يا سيد ... هى بعتت مع العيال وهما بيطلعو لها الخضار وقالت لهم خلى ابوكم يطلعلى
سيد : طيب تعالى نطلع لها انا وانتى .... وطلعووو ....
حكمت : ادخل يا سيد انت ومراتك ....
سيد : خير يا ست حكمت ..
حكمت : خير ان شاء الله انت عارف انى مش قادره أقعد لوحدى تااانى ..... ومحتاجه حد معايا ... عملت اعلان .. وواحده كلمتنى وقالتلى انها جايه انهارده أخر النهار .... فا انا عايزكو تبقو معايا ولو وافقت تشتغل ... تفهموها كل حاجه .... ومراتك تاخد بالها مننا فى الاول وتفتحو عنيكو عشان انا مش جيباها عن طريق مكتب ... لانهم بيطلبو مرتب عالى قوى........
هانم : عنيه يا ست حكمت الا انتى عايزاه ها نعمله
سيد : ما احنا بناخد بالنا منك لازمتها ايه المصاريف احنا قصرنا معاكى
حكمت : لا سيد كتر خيرك انت ومراتك بس انا محتاجه واحده تقعد معايا وتخلى بالها منى انا تعبانه والوحده تعبانى أكتر
سيد : الف سلامه عليكى يا ست حكمت .... حاضر اول ما توصل ها اجبها واطلعلك ... هى أسمها ايه
حكمت : استنى انا كتبته فى ورقه جمب التليفون .. اهووو اسمها روان
هانم : تأمرينا بحاجه تانيه
حكمت : الف شكر ... وقامو نزلو على تحت .....
****************
هدى : انتى اتجننتى
روان : ملهاااش اى حل تانى انا محتاجه سكن ومحتاجه أكل وفلوس موصلات ومحتاجه ملازم وبلاوى .... الست مسنه وقاعده لوحدها اروح أقعد معاها وارعايها واخد مرتب اعرف أتعلم بيه .... ماعنديش اى أستعداد اتخرج السنه دى من غير تقدير عالى .....
نور ؛ يعنى الحل تشتغلى خدامه
روان : انا مش خدامه انا ها اراعى ست كبيره محتاجه المساعده ... وحتى لو خدامه الشغل مش عيب
هدى : يابنتى دورى على أى شغل تانى
روان : انتى لفيتى معايا كام مره هاااه قوليلى عملنا ايه نروح ونرجع زى خبيتها .... دا غير قلة الادب الا شوفتيها بنفسك .... كفايه بقى واوعى كدا خلينى أخلص لم حاجتى الحايزبونه ها تلاقيها طالعه دلوقتى عشان تتاكد انى مشيت يا اديها الفلوس ...
هدى ونور حضنوها جامد وبيقولو لها معلش ان شاء الله ربنا ها يعوضك عن دا كله
روان : يابت انتى وهى انا زعلانه عشان بس ها أسيبكووو مش اكتر .... بس ها أشوفكم فى الكليه .... ياله أشوف وشكم على خيرر وسابتهم ومشيت .... وصلت العماره وبتسئل على الست حكمت
هانم : انتى مين يا حبيبتى وعايزاها ليه
روان : انا جايه أشتغل عندها
هانم : يالهوى يا ولاه دانتى شكلك متعلمه وقمررر ايه يابنتى الا رامكى على الشغلانه دى
روان : بأبتسامه الدنيا الا رامتنى ... هاااه ها تدلينى عليها والا ها تقفليها فى وشى
هانم : لا ياحببتى ربنا يفتح فى وشك الابواب المقفوله كلها ... والنبى ارتحتلك وحبيتك
روان : وانا كمان .....أسمك ايه بقى
هانم : هانم
روان : ماشى يا هانم ياله بينا
هانم : يا سيد ... سيد ... تعالى الست روان وصلت
سيد بصدمه : أهلا وسهلا وطالع معاهم وهو مش فاهم القمر دى جايه تعمل ايه هنا بشكلها دا ....
حكمت : اتفضلووو .... انتى روان
روان : ايوا يا فندم انا
حكمت : بس انتى صغيره وكمان
روان : انا اسفه انى ها أقطعك فى الكلام .... بس انا محتاجه للشغل دا جدا ... وبعد اذنك يعنى انا فى اخر سنه تجاره انجلش ولازم احضر كل محاضرتى .... واجيلك على طول وطلباتك كلها اوامر ومش ها أقصر معاكى
حكمت بزعل على البنت : ماعنديش اى مانع ... وانتى اعتبرى نفسك قاعده مع والدتك .... مش شغاله عندى .... وريها الاوضه الا ها تقعد فيها يا هانم ....
هانم : حاضر يا ست حكمت
روان ؛ طيب حضرتك يعنى انا اسفه كنت عايزا أسئل على
حكمت بفهم : بصى يا بنتى ... انتى مقيمه معايا هنا أكل وشرب والا انتى محتاجه .... دا بيتك ... اما المرتب معلش مش ها أقدر ادفع أكتر من الفين جنيه
روان بفرحه : حلوين قوى انا مش عايزا أكتر من كدا .....
حكمت : طيب قومى دخلى حاكتك دى وخلى هانم تفهمك كل حاجه ..... وانت يا سيد لو روان احتاجت اى حاجه أعملهلها على طول
سيد : أمرك يا ست هانم
روان وهى فى الاوضه لوحدها : ماشاء الله ايه الجمال دا .... انا ها أعيش هنا .... وبعدين سهمت وفكرت فى امها واخواتها ... وازاى ابوها حارمهم من كل حاجه .. ووصلهم للوضع دا .... قامت رصت هدومها وحاجتها كلها ... وغيرت وطلعت لحكمت الا قاعده منتظراها ونفسها تعرف حكايتها ايه
روان : ايوا بقى يا ست الكل ... بالظبط كدا قدامى ساعه والاكل يكون جاااهز وبعدين نشوف الا بعده ...
حكمت بأبتسامه : ها أجى اساعدك
روان : بصى مش ها أكذب عليكى انا فاشله فى موضوع الاكل بس بتعلم بسرعه قوليلى أعمل ايه وانا اعمله على طول
حكمت : لا دانتى شكلك حالتك حاله ياله قدامى ... ها تتعلمى أكلى كله فاهمه
روان : تمام يا فندم اتفضلى وانا فى ديلك
حكمت : 😂😂😂 ياله ... ودخلت معاااه وكل يوم تتعلم حاجه شكل وحكمت فرحانه ان روان بتتعلم بسرعه وشاطره فى كل حاجه ومريحاها وبتاخد بالها منها جدا .....
روان : هاااه ايه رايك طمنينى
حكمت : لا دانتى بقيتى أشطر منى والاكل يجنن
روان : بترفع ايديها وتنزلها وبتقول yes
حكمت : 😂😂😂 انا الاصل بردو
روان : طبعا يا جميل ... بقول يا حوحو
حكمت : قولى صدعى حوحو ....
روان : مش دى صور اولادك
حكمت بقهر : ايوا وصورهم
روان : هما فين
حكمت : بنتى اتجوزت وسافرت ونسيتنى ولا كأن لها أم وابنى ..... مشغول مع مراته ... الا اعتبرتنى ضرتها وحرمتنى منه ومن ولاده .... ما طمرش فيهم تعبى عليهم ولا بطنى الا شالتهم
روان بزعل عليها هى ما تستاهلش كدا : معلش يا جميل ... انتى عارفه الدنيا مشاغل وأكيد شغلهم وعيالهم لهايهم
حكمت : انتى بتبررى لهم تقصيرهم فى حقى انا لو ميته ها يرحو يزور قبرى مش يسبونى كدا وانا كبيره وتعبانه من غير سؤال حتى .... حتى احفادى اتحرمت منهم ....بيبقى نفسى ادعى عليهم .... بس مابقدرش يا بنتى بخاف يحصل لهم حاجه .... انا مسامحهم بس يسئلو عليا واشوف احفادى
روان حضنتها : ودموعها نازله ها يرجعو وها تعيشى وسطيهم ما تزعليش نفسك كدا .... عشان خاطرى
حكمت : مسكت وشها بين ايديها ودموعها نازله ... عشان خاطرك مسامحهم وها اسامحهم ... كان نفسى تبقى بنتى بجد ... بقالك شهر .. واخده بالك منى وماليه عليا البيت ... انا بشكر ربنا انه بعتك ليااا
روان بابتسامه ... انتى كدا بتضحكى علياا .. انتى وعدتينى ها نخرج انهارده ونخربها ... وبتحرك راسها والا ايه يا جميل
حكمت : ضحكت بس كدا .... ها نخربها ... خدى دول الاول ... دا مرتبك .... اول مرتب ليكى ...
روان بفرحه : الشهر عدى بسرعه طيب خلي الفلوس انتى مش مخليانى محتاجه حاجه حتى فلوس موصلات الجامعه وفرتيها عليا .... وبتخلى السواق بتاعك يوصلنى
حكمت : دا حقك والمفروض تاخدى أكتر من كدا انا الضحكه مابقتش بتفارقنى من ساعة ما شوفتك ... خدى ياله اتبسطى بأول مرتب ليكى
روان باستها : ممكن انزل يا جميل نصايه وارجعلك
حكمت : راحه فين
روان : ها أجيب طقمين واروش بقى .... ياااه اخيرا
حكمت : تعالى انتى جسمك من جسم نجلا بنتى عندى لها هدوم كتير جديده كنت بجبها لها على امل انها تجيلى وتزورنى وادهالها
روان : لا اكيد ها تجيلك كفايه الا بتعمليه ليا
حكمت : والله ماحد لابسهم غيرك ... وياستى لو جت ها أخليكى انتى الا تجبلها على ذوقك الحلووو ... ما تقلقيش انا عامله حسابهم عشان لو موت يلاقو حاجه غير الشقه يورثوها
روان : بعد الشر عنك ربنا يخليكى لهم
حكمت : مسكتها من ايديها ودخلت بيها الاوضه بتاعت بنتها الا قفلاها وفتحت الدولاب وروان اتفاجئت بكمية الهدوم وجمالها .... ايه رايك بقى ... وخدى دول كمان كام ساعه ونضارتين شمس ....
روان بعياط : انا مستاهلش دا كله لا يمكن أخدهم
حكمت : انا ها ابقى مبسوطه لو شوفتهم عليكى .... وبطلى غلبه بقى ياله قيسى الهدوم وعيشى حياتك ....
روان : ربنا يخليكى يا أحسن حكمت فى الدنيا
حكمت : 😂😂 ماشى يا ستى ....
روان : بتقيس طقم ورا طقم وهى مبسوطه ومش مصدقه نفسها ......
*****************
مازن : حد يطرد الصارخ يا مفترى
مروان : أنت مش ها تجبها البررر اعمل ايه عشان اتوبك عنهم
مازن : بعد الشررر اتوب ليه دول أجمل حاجه فى الدنيا
مروان؛ خلاص اتجوز واتلم ....
مازن : لسا ملقتش لتخطف قلبى ... وبتسهرنى الليالى
مروان : يا راجل دانت بتحب على روحك
مازن : 😂😂😂😂 ...تعالى انت معدوم الخبره وانا ها افهمك
مروان : وانت بقى خبره
لؤى : طبعا يابنى ... بص البنات دى الفاكهه .... الحلويات ... حاجه كدا بتخلى لحياتك طعم ولون مختلف ..... اما الحب بقى .... فا دا محتاج الا تخطفك وتسهرك الليالى وتجننك كدا ... طول الوقت مش قادر تفكر غير فيها ... وبتتمنى قربها .... ترغى معاها كتيررر .... دى بتكمل الا ناقصك .و
مروان: خلاص ها تقول شعررر خليك انت فى احلامك دى ... بس خف .... وشوف شغلك
مازن : هو كله شغل انت ايه يابنى متبرمج
مروان: بالظبط كدا بطل لماضه واشتغل بدال ما انت مضيع وقتى ووقتك ... وروح شوف شغل المصنع ... والطلبيه الجديده ... عامله ايه
مازن : حاضر يا سيدى امرى لله بس الله يخليك انا زهقت من سيد شوف واحده كدا تخلى لحياتنا طعم
مروان: ها اشوف بس بطل حركاتك
مازن : حاضر .... حاضر ... ومشى من قدامه ... وبيقول بصوت واطى الواحد يعيش ازاى من غير حركات ...مجنون دا والا ايه 😂😂😂
*********
ريم : اه انا تعبت من شغل الزفت دا
منيره : معلش يا حبيبتى ربنا معاكى
فتحى : فين المرتب مش انهارده القبض
ريم : يابابا انا محتاجه فلوس سبهوملى
فتحى : يا سلام وانا اعمل ايه أقطع نفسى عليكووو هاتى يا بت
ريم : طيب انت ها توافق على جوازى من محمد امتى
فتحى : انتى عايزا تتجوزى المعفن دا انا عايز اجوزك واحد مريش
ريم : وانا مش ها اتجوز غيره جهز شقته ومش ها يخليك تجيبلى حاجه عايز ايه تانى
منيره : وافق يا فتحى بنتك بقى عندها25 سنه حرام عليك
فتحى : حرمت عليكم عيشتكم وتعبى فيها وصرفى عليها مين يعوضنى عنه
ريم : منا شغاله بقالى 5 سنين وكل شهر بتاخد مرتبى فى ايه تانى
فتحى : انتى بتعايرنى بمرتبك
ريم بعياط : عشان خاطرى يابابا انا بحب محمد وهو بيحبنى سبنى اشوف حياتى ....
فتحى : يابت انا بحبك وعايز أسعدك وتسعدينا معاكى ....
ريم ودموعها مش عايزا تقف : وانا كمان بحبكوووو وبحب محمد عايز تحرمنى منه عشان الفلوس ... يابابا لو ادونى فلوس الدنيا كلها عشان أستغنى عنكو لا يمكن ها اوافق ابدا ليه عايز تبعنى للعايز يدفع أكتر ... انا بنتك واول فرحتك ... ما تعملش فيا كدا
منيره : بدموع وحرقه على بنتها : يا فتحى انت حرمتنا من كل حاجه الا حبك .... اوعى تعمل فى حبايبك كدا
فتحى : انا بقيت وحش دلوقتى ... طيب يا ريم انا موافق عشان ما تقوليش ابويا غصبنى عل الجواز من غير محمد وفرق بينى وبينه .....
ريم بفرحه : قامت اترمت فى حضنه ربنا يخليك لينا يا بابا وما يحرمنا منك
منيره : ربنا يسعدك يا حبيبتى روحى فرحى محمد اجرى وشوفيه ها يجى امتى .....
ريم لسا بتقوم ....
فتحى : خدى يابت ها تاخدينى فى دوكه فين المرتب المحروس ها يجى يلاقى البيت فاضى
ريم: خد يابابا ... اتفضل وقامت عشان تفرح محمد
****************
محمد : بجد يا ريم أخيرا يا حبيبتى
ريم : الحمد لله ربنا عالم بينا يا محمد
محمد : اخيرا ها يتقفل علينا باب واحد .... وعد منى اسعدك واخليكى مش محتاجه لحد
ريم : انا متاكده يا محمد احنا مش حبايب وبس لا احنا جيران ومتربين مع بعض وعارفه اد ايه انت طيب وبتراعى الا حواليك .... ربنا ما يحرمنى منك .....
محمد : فرحتى روان
ريم : لسا ها افرحها هات تليفونك اكلم نور صاحبتها واقولها .... وبتكلمها
نور : الحمد لله ياريم .... انتى عامله ايه واخباركم ايه
ريم : كله تمام خلاص ها نتجوز انا ومحمد يا نووور فين روان افرحها
نور : فهمت ان روان مقالتش لهم حاجه ...الف مبررروك ياحبيبتى ...... بصى خدى الرقم دا كلميه عليه ...... وقفلت معاها
ريم : ممكن اعمل مكالمه تانيه
محمد : 😂😂😂😂 انتى تعملى الا انتى عايزاه .... اول حاجه ها اعملها ها اجبلك تليفون يا حبيبتى ....
ريم : بفرحه طيب هات واتصلت على اختها ...
روان : الله يسلمك يا حبيبتى عامله ايه وكلكم عاملين ايه
ريم : ابوكى وافق على جوازى يا روان باركيلى يا بت مش ها تنزلى بقى
روان : بفرحه مبررروك يا حبيبتى ربنا يتملك على خيررر .... انا بشتغل يا ريم ودا رقم الشغل وها احاول استأذن وانزلك يا حبيبتى ها اجبلك حاجات حلوه قوووى معايا
ريم : ربنا معاكى .... خلى بالك على نفسك
محمد : انزلى بسرعه
روان : اسرع من البرق يا جوزى أختى يا عسل
محمد : عقبالك يا عفريته
روان : لا .... انا يابنى ها اطلع عينهم واختار وانا حاطه رجل على رجل .....
محمد : من حق الجميل يدلع ...... واتشرطى كمان وانا فى ضهرك ......
روان : عارفه يا كبيررررر ادخل انت العيله برجلك اليمين بس وانا اتشرط براحتى
محمد : ماشى يالمضه ياله ها نستنى رجوعك .... سلام ...
***********
روان : شوفت يا جميل انتى وشك عليا حلوووو ازاى
حكمت : فرحينى طيب
روان : اختى الا حكتلك عنها خلاص ها تتجوز محمد .....
حكمت : بجد بابكى وافق .....
روان : بجد الحمد لله البت كانت خلاص ها تعنس وتقع فى اربيزانا 😂😂😂
حكمت : وانتى بقى ها تخلصى تعليمك وتتجوزى
روان : بصراحه انا مش فى دماغى جواز والكلام الفارغ دا ..... مش عايزا أعيش تعيسه ..... عايزا ابقى مستقله محدش بيتحكم فياااا وبيزلنى با اللقمه الا ها ياكلهلى ..... مش عايزا واحد يقولى اهلك ابوكى ... امك .... انتى مش راحه ...مش جايه ... ها تمشى على مزاجى .... ووووووو مبيبطلوووش .... على ايه بقى ..... ها أشتغل واعمل الا نفسى فيه .... واخلى ماما واخواتى مش محتاجين حاجه من حد ..... نفسى فى كتيررر قوووى ....
حكمت : الدنيا مش عقد كدا يا حبيبتى والراجل مش وحش قوى كدا .... طبعك الا ها يغلب على عيشتك معاااه وشخصيتك هى الا ها تتحكم فى اذا كنت ها تعيشى مبسوطه والا تعيسه وتابعه لغيرك ..... وانتى شكلك كدا على كلامك معايااا بنيتى صورة الجواز والراجل بشكل عام من حياتك الشخصيه ..... وحياة مامتك وبابكى ودا غلط لانه ها يأثر على شخصيتك وحياتك فيما بعد
روان : ما انكرش الصراحع ان جزء من كلامى من وضعنا احنا وحياتنا ..... بس بابا مش وحش غير فى الفلوس وبس .... بيحبنا جدا وبيخاف علينا وبيحب ماما بس هو عنده مشكله او مرض أسمه بخل .... انا معتبراه مريض .... وبخاف اعيش او اعانى من الا أمى عاشته وعانت منه
حكمت : ما تفكريش كتيررر وعيشى حياتك وحبى واتحبى وادرسى الا قدامك وركزى وفوتى بعض التافهات.... وخلى ليكى شخصيه
روان : مش عايز أشغل تفكيرى من دلوقتى لما يجى وقتها يا جميل كلامك دا هو الا ها اعمل بيه . ... ماشى
حكمت : بمناسبه الكلام الجميل دا بقى والمناسبه الحلوه دى خدى لاختك كام طقم لها هديه وتعالى نجيب لها ميكب وبرفن حلووو كدا وكام حاجه عليهم
روان : انتى كدا بتحرجينى وكمان انا متقله فى المصاريف قوى عليكى
حكمت : انتى لو فلبينيه او من اى دوله او حتى جايلى عن طريق مكتب .... مرتبك ها يبقى مش اقل من 6 الاف جنيه .... وبردو بيتعمل معاهم اكتر من الا بعمله وكل الا ادتهولك من البيت يعنى مش عبئ علياا .... ابدا انا الا مقصره ..... بس والله اعتبرتك بنتى واكتر مش بتشتغلى عندى فاهمه
روان : فاهمه يا جميل .... ياله نخرج بقى .... عايزا ابسطك واخليكى تشوفى الدنيا من جديد .....
حكمت : بأبتسامه ياله يا حبيبتى .......
*******************
مروان : محسن لو سمحت عايزا الحسابات الا تخص ميزانية طلبية الاجهزه الا بنصنعها الجديده
محسن : حاضر يا مروان بيه فى حاجه تانيه ....
مروان : لا روح انت ..... وانت يا ايمن جهز نفسك عشان ها نروح المصنع مع بعض .... عايز اشوف الوضع بقى ايه دلوقتى
ايمن : حاضر يا فندم ..... كنت عايزا اطلب من حضرتك طلب
مروان : عايزا ايه ....
ايمن : كنت محتاج سلفه ضرورى يا فندم عشان مصاريف اولادى بتاعت المدرسه .....
مروان : انت عندك كام عيل
ايمن : عندى اربعه بنتين وولدين ..... البنت الكبيره فى كلية الهندسه والاصغر منها فى اعلام والولدين تؤام فى تانيه ثانويه عامه
مروان : ماشاء الله ربنا يبارك لكم فيهم
ايمن : ربنا يخليك يا فندم
مروان : اعملى ورقه بالمصاريف الا محتاجنها كلها .... وانا عنيا ليك لحد ما يخلصو تعليهم ..... ما تشلش همهم خالص
ايمن بفرحه : ربنا ما يحرمنا منك ابدا ويزيدك
مروان : روح شوف شغلك ياله انت عارف مبحبش الكلام الكتير والكسل وقت الشغل
ايمن : حاضر ... حاضر ... وخرج وهو فى قمة سعادته .....
مازن دخل عليه : اخيرا لقيت حد خارج مبسوط من عندك
مروان : خيرررر عايز ايه
مازن : عندى ليك خبررر حلوو ....
مروان : قول
مازن : طلبيه اكبر من الا ها نسلمها ...... وموافقين على كل شروطنا وبأعلى سعر
مروان : احبك انا كدا
مازن : سهره حلوه بقى عشان خاطر الشغل الجامد دا
مروان : مليش فيها وانت عارف
مازن : عشان خاطرى ما تزعلنيش
مروان : ماشى يا سيدى ها تسهرنى فين ما بروحش كبريهات والكلام الفارغ دا
مازن : ها اسهرك .... سهره عمرك ما ها تنساها ابدا ..... سبلى نفسك ..... وخلصو شغل ومشيو ونزلو قدام عماره وطالع بيه على شقه ......
مروان : انت يازفت اوعى تكون شقه مشبوهه
مازن : ياريتها شقه مشبوهه 😂😂😂 ورن الجرس اهلا بالحبايب والواد الا غايب
شريف : اهلا وحضنه وباسه حضن مروان جامد ودخلو جوا
مروان : انا أخر من يعلم انك رجعت مصر
شريف : منا مأكد على مازن يقولك والراجل جابك اهوووو ماقصرش ....
مازن : يابنى دا واحد مفترى لا بيشكر ولا بيحمد ...... مش شايفنى ببوسك ودا نادر لما تحصل ... يعنى انا كمان لسا شايفك
مروان ؛ هو انا ها اخلص من لسانك
مازن : دا من ظنه الاسود فيا فاكرنى جايبه شقه مشبوهه وفيها مزز....
شريف : 😂😂😂😂
مروان : انت غيرت شقتك والا ايه
شريف : ايوا ...... كدا احسن واوسع ...... انت عارف كل يوم الاسعار بتغلى فا قولت ابيع الشقه واشترى واحده تانيه اكبر عملت توكيل لاخويه وبعهالى واشترى دى ووضبها
مروان : حلوه مبروك عليك ..... ها تسافر تانى والا قاعد
شريف : قاعد عايز اتجوز واستقر هنا
مازن : نويت تتوب ها اعك مع مين انا .... والا جمبك قفل بعيد عنك
شريف : 😂😂😂 اتوب مين دا من ساعه ما كلمتنى .... وانا جهزت للسهره وشاهى ومنال و سهر فى السكه لهنا
مروان : انتو بتهرجووو بقى انا ما صدقت شاهى الزفت دى بعدت عنى ....
شريف : انت لسا مديها الوش الخشب
مازن : يابنى دا مرمط البنيه .... شاهى ملكة جمال العرب
مروان : انا ها أمشى يا تتصل تلغلى معاهم بأى حجه .... انا ما بحبش العك والقرف بتاعك انت وهو .....
شريف : طيب اقعد انت واحشنى يغورو يا عم هدى اعصابك وطلع تليفونه اتصل على شاهى واتحجج انه فى مشوار ضرورى ونزل .
مازن : فقرى وعايز يفقرنا معاه
مروان : الا انتو بتعملوه هو الفقر والقرف بعينه .... انضفو بقى ....
شريف : خلاص بقى فكها ما تقفلش الليله ........
مروان : ناوى تعمل ايه
شريف : انا صفيت كل شغلى برا ..... ولسا مش عارف الصراحه
مروان : مش عارفه تعالى انضم لينا انا محتاجك معايااا وخصوصا ان رضا البنهاوى شادد حيله اوى اليومين دول وبيلعب من تحت لتحت .... وعايز يوقع شركتنا ....
شريف : وانت ساكت ليه
مروان : انا واخد الامور واحده واحده عشان اعلمه درس عمره ما ينساه وكمان انت عارف انا مليش فى شغل الشمال وهو كله على بعضه شمال فى شمال ....
شريف : فتح عينك عليه لان اكيد فى جواسيس تابعه
مازن: اكيد .... المهم ها تبتدى معانا من امتى
شريف : طيب فرصه اراجع نفسى وافكر
مروان : بقولك ايه انت ها تعيش الدور عليا ..... بكرا تكون فى مكتبك الا ها يجهز قبل وصولك فاهم
شريف : بخوف مصطنع : فاهم .. فاهم ...... بدئو قاعدتهم وطلبو اكل دليفرى .... واستمتعو بوقتهم جدا مع بعض .....
**********************
روان رجعت هى وحكمت بعد ما خرجو واتفسحو وعملو شوبنج وجابت لها كل الا نفسها فيه .... وطلعو فوق ....
حكمت : اه فكرتينى بايامى الحلوه .. بس تعبت
روان : لازم تخرجى وتشوفى الدنيا وحلاوتها يا حوحو
حكمت : 😂😂 انا شكلى مش ها ابطل خروج بعد كدا طلعتى عفريته ....
روان : شبيك لبيك .... ياله بقى عشان تغيرى وتاخدى علاجك وتنامى .... بس ممكن اسافر بكرا .... يومين وارجع
حكمت : ممكن يا حبيبتى هو انا ها امنعك عن اهلك ....
روان : انا ها اكلم هانم تاخد بالها منك ماشى
حكمت : ما تقلقيش عليا .......وابقى خلى بالك على نفسك
روان باستها من خدودها .... انت تامر يا جميل ... ياله ياله ....
*****************************
اشرقت شمس يوم جديد .........
نور : هى روان ماجتش ليه انهارده
هدى : مش قولتى ان ريم بابها وافق على جوازها من محمد .... يبقى اكيد سافرت
نور : ايوا صح .... ممكن بردو .... بس ايه روان اتغيرت خالص
هدى : اتغيرت ازاى يعنى ... زى ما هى
نور : يا بت لبسها وحياتها .... ما اتخيلتش ابدا ان الشغل دا ها يعمل فيها كدا كنت خايفه عليها بس الحمد لله
هدى : ربنا بيعوضها بردو ..... تخيلى كدا كانت بتقضى بقية الشهر ازاى مهمله فى اكلها وبتاخدها لحد الكليه كل يوم مشى ...... ولا يمكن تاخد جنيه مننا .....
نور : هى تستاهل كل خير لكل مجتهد نصيب . ... ياله بقى عشان معاد المحاضره التانيه بدء .....
***************
روان : انت تعرف بيت سامح ابن ماما حكمت يا كرم
كرم : طبعا عارفه انا سواق الست حكمت بقالى 10 سنين .... بس بتسألى ليه
روان : كنت عايزا اقابله
كرم : بلاش البيت مراته مبتحبش حد ومعاملتها وحشه وممكن تعمليلو مشاكل
روان : للدرجه دى
كرم : واكتر ...... دى الهانم شافت الويل بعيد عنك وفى الاخر منعتها تشوف عيال ابنها وابنها ...... لو عايزاه ضرورى ممكن نروح له فى شغله .....
روان : خلاص ماشى .... وبعد مرور الوقت كرم وصل شغل سامح ونزل بلغه وطلع معاااه
سامح : افندم مين انتى وعايزانى ليه
روان : اهلا يا استاذ سامح انا روان وبشتغل عند والدة حضرتك
سامح : وبتشتغلى ايه ان شاء الله عند والدت حضرتى ....
روان : قاعده معاها بونسها فى وحدتها وبشوف طالباتها
سامح : الهانم الا قدامى والجمال دا كله شغاله خدامه عند ماما ..... ليه بقى وعشان ايه
روان : بقول لحضرتك ...... خدامه مش خدامه مش فارقه ... انا جايه لحضرتك عشان امك ليها حق عليك انت واختك ..... وحرام بعد العمر دا كله ترموها كدا ولا كأنها عايشه ...... مسألتش نفسك لوجرالها حاجه ها تسامحو نفسكو ازاى ...... والدتك لها حق عليك ومهما كان ظروفك فاد عمره ما يمنعك حتى انك تسئل عليها وتودها .... اتقى ربنا .....
سامح : انتى جايه تدينى درس فى الاخلاق ... انتى مين انتى .... والظاهر انها فعلا خرفت على رأى مراتى ... وشكلك مقشطاها ... ماهو بينضحك عليها من اقل كلمه
*********************
إلي هنا ينتهي الفصل الأول من رواية رواية خادمتى ولكن ج1 بقلم لولو طارق
تابع من هنا: جميع فصول رواية خادمتى ولكن بقلم لولو طارق
تابع من هنا: جميع فصول رواية قاسى ولكن أحبنى بقلم وسام أسامة
تابع من هنا: جميع فصول رواية عروس بلا ثمن بقلم إيمى نور
تابعوا صفحتنا على الفيس بوك للمزيد من روايات حب
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة