-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية بعد النهاية بقلم يسرا جمال - الفصل الثالث

 مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية ذات الطابع الإجتماعى مع رواية رومانسية جديدة للكاتبة يسرا جمال علي موقعنا قصص 26 وموعدنا اليوم مع الفصل الثالث من رواية بعد النهاية بقلم يسرا جمال .

رواية بعد النهاية بقلم يسرا جمال - الفصل الثالث

إقرأ أيضا: رواية غرام 


رواية بعد النهاية بقلم يسرا جمال

 

رواية بعد النهاية بقلم يسرا جمال - الفصل الثالث

سناء:صباح الخير يا شادي

رد بضيق وتعب:صباح الخير

سناء:مالك يا حبيبي ؟

شادي:مليش يا ماما بس عاوز انام

سناء:طب ما تنام شوية ده لسه شوية على الشغل تلحق تنام

شادي:مش هينفع لازم انزل الحق اوقف تاكسي ما انا سايب العربية عند الشركة

سناء:طيب يا حبيبي استنى اشرب قهوة علشان تفوق وتعرف تشوف شغلك وافطر اي حاجة عبال ما أعملك القهوة

شادي:حاضر يا ماما

اخرج هاتفه واتصل بفارس :

فارس:الو

شادي:الو فارس ازيك؟

فارس:الحمد لله انت عامل ايه؟

شادي:تمام الحمد لله

فارس:ايه خير في حاجة؟

شادي:لا ابدا بس بقالي مدة مسألتش عليك وانت كمان متصلتش قولت اكلمك اشوفك

فارس:اه معلش يا شادي انشغلت بالشغل

شادي:ولا يهمك انا كمان انشغلت

فارس:بس قولي ايه اخبارك ؟ اشتغلت؟

رد بضيق:اه الحمد لله

فارس بإستغراب:مالك بتقولها من غير نفس ليه؟

شادي:لا ابدا متشغلش بالك

فارس:ده على اساس انك بعد اللي قولته ده فعلا مش هشغل بالي

شادي:اصل في شوية مشاكل في الشغل مش مرتاح له ابدا

فارس:طب ليه مكلمتنيش اساعدك

شادي:متشكر يا فارس انا اصلا في الشغل ده مؤقتا لحد ما أشوف شغل تاني

فارس:طب اسمع هبعتلك عنوان تروح عليه دي شركة كويسة جدااا وانا اعرفها روح وانا هبلغهم انك هتروح واعمل مقابلة مش هتخسر حاجة

شادي:ايوه يا فارس لكن....

قاطعه:مفيش لكن ولا حاجة اعمل اللي بقولك عليه اعتبر الشغل التاني جه يا سيدي

قال بإحراج:متشكر اوي

فارس بمرح:يا عم اشكرني لما يقبلوك اصلا

شادي:ههههههههه ايه ده بقى مش هيقبلوني كمان

فارس:لو عجبتهم هيقبلوك متنساش الشركة معروفة

شادي:تمام

فارس بسرعة:معلش يا شادي هقفل دلوقتي علشان عندي اجتماع

شادي:تمام شوف شغلك سلام

فارس:سلام

واغلق شادي الخط جاءت والدته ووضعت القهوة امامه

سناء:انت لسه مفطرتش؟

شادي:هفطر اهو

سناء:بقول ايه يا شادي؟

شادي:خير يا ماما؟

سناء:ما بلاش الشغل ده لو صحتك هتتعب

شادي يبتسم بحنان:متقلقيش عليا يا ست الكل انا هبقى كويس

سناء:يا ابني الاهم صحتك

شادي:قولتلك متخافيش عليا انا كويس

سناء:ربنا معاك يا ابني

شادي: يا رب ..... انا هنزل قبل ما اترفد بقى

سناء:والقهوة ؟

شادي:هشربها هناك

سناء:طيب خود بالك من نفسك

شادي:حاضر وانتي كمان سلام

وقبل رأسها بحب

______________________________

جلس فؤاد بمكتبه يباشر عمله وبعد وقت سمع طرقات على الباب :

فؤاد:اتفضل

دخلت السكرتارية:استاذ شريف برا يا فندم

فؤاد:خليه يتفضل

دخل شريف:صباح الخير يا عمي

فؤاد:صباح النور يا شريف تعالا اقعد

وجلس شريف

فؤاد:تشرب ايه؟

شريف:ملوش لزوم

فؤاد:لاء ازاي لازم تشرب حاجة

شريف:خلاص هأخد ليمون

فؤاد:سلمى واحد ليمون وواحد قهوة مظبوط

سلمى:حاضر يا فندم

وذهبت السكرتارية

فؤاد:ها يا شريف ايه سر الزيارة السعيدة؟

ارتبك شريف:هو بابا مقالكش ؟

فؤاد بإنتباه:مقاليش ايه؟

شريف:انا كلمته النهاردة الصبح في الموضوع وقالي انه هيكلمك

فؤاد:يبقى اكيد نسي قولي انت

ارتبك بشدة:هو الموضوع انا عارف انه مفاجاءة ومش عارف بقى هتكون سعيدة ولا حزينة بالنسبالك

قلق فؤاد:قول يا شريف متنشفش دمي

شريف:بصراحة يا عمي انا جاي بخصوص دارين

فؤاد بإستغراب:مالها دارين؟

استجمع قواه:انا جاي طالب ايد دارين على سنة الله و رسوله

تفاجأ فؤاد من الطلب

ودخلت الساعي و وضع الليمون والقهوة وانصرف

ارتبك شريف لعدم سماعه رد من عمه

فؤاد يفيق من تفاجئه ويرتشف رشفة من فنجان القهوة ويعيده :

فؤاد:بص يا شريف انت انسان ممتاز جدا وانت عارف اني بعتبرك ذي تامر وانا عمري ما ألاقي احسن منك طبعا

قلق شريف:وبعدين؟؟

فؤاد:انا مش حابب اديك رد دلوقتي غير لما اشوف رأي دارين بعد كده نبقى نتكلم

شريف:ده الطبيعي يا عمي بس في النهاية انت ليك رأي وانا حابب اعرفه

فؤاد:انا مش عاوز اقول رأيي غير لما اعرف رأي دارين

قال بأسى:ذي ما تحب يا عمي

فؤاد مغيرا الموضوع:احكيلي بقى عملتوا ايه في السفرية تامر الندل جه على مكتبه علطول مكلفش نفسه يجيلي يقولي حصل ايه

شريف متصنع الإبتسامة:كل خير يا عمي

فؤاد:عرفت تامر على رجل الاعمال؟

شريف:اها واندمجوا جدا مع بعض وهيكون في شغل قريب بينهم

فؤاد بمرح:قصدك بنا إنت ناسي إن أنا وتامر سوا سوا

شريف:لا طبعا مش ناسي

كان فؤاد يلاحظ أن نبرة صوت شريف تغيرت لكنه حقا لا يستطيع أن يعطيه ردا فالموضوع بالنسبة له مشوش بعض الشئ

______________________________

وصلت نور متأخرة إلى عملها لا تدري أهو حظ أم ماذا ؟!

دينا:نور المدير طلبك تروحي له أول ما توصلي

نور:يا الله بقى أعمل إيه؟

دينا:بتقولي إيه؟

نور:مبقولش

وتركت حقيبتها وإتجهت إلى مكتب المدير طرقت الباب وإستجمعت قواها ودخلت

نور:قالولي حضرتك طلبتني

سامر:واضح إنك بتحبي التأخير؟

نور:اطلاقا يا فندم

سامر:آمال؟

نور:حظ ..!

سامر بدهشة:حظ؟؟

نور شعرت بالخجل وصمتت

سامر:شوفي يا أنسة نور أنا مبحبش الأسلوب ده وبحترم الصراحة أكتر حاجة في حياتي وبحترم الشخص الملتزم بمواعيده

نور:أنا أسفة يا فندم أوعــ....

قاطعها:أنا مبحبش الأسف اللي ممنوش فايدة أحب أفعال لا كلام

نور:حاضر يافندم

سامر:في شركة عندها مشكلة في أجهزة الكمبيوتر وأنا اخترتك تروحي تحلي المشكلة دي

وأكمل بسخرية:أصل واضح إنك بتحبي تتفسحي

كتمت نور غيظها منه فهي تعلم أنه يعاقبها بتلك الطريقة بينما كتب هو العنوان وأعطاها الورقة أخذت الورقة وانصرفت في غضب إلى مكتبها وحملت حقيبتها

دينا:إيه اللي حصل؟

نور بغضب:مفيش

دينا:آمال بتأخدي حاجتك ليه هو رفدك؟

نور:ما تخليكي في حالك يا دينا بقى الله

وانصرفت في غضب

____________________________

عائشة:يا بابا انا كويسة

أمين:طب خودي بالك من نفسك

عائشة:حاضر

أمين:تخلصي محاضراتك وعلى البيت فاهمة؟

عائشة:حاضر يا بابا مش معقولة كل يوم نفس الكلام

أمين بغضب:مش عاجبك ولا إيه ولا العيشة هناك نسيتك انك هترجعي تعيشي هنا تاني

انقبض قلبها لقد نست حقاً انها تظن انها تحررت من سجنها وها هو يثبت لها العكس تماماً

ردت بانكسار:مش قصدي يا بابا انا اسفة

أمين:سلام

عائشة:سلام

وأغلقت الخط وهي تفكر في مستقبلها التي تخشى ان ينتهي في قرى الأرياف مع عائلتها ___________________________________

فؤاد يبدو شاردا ولاحظ تامر ذلك

تامر:خير ؟

أفاق فؤاد:عاوز حاجة يا تامر؟

تامر:في حاجة في الشغل شغلاك؟

فؤاد:لا الموضوع ملوش علاقة بالشغل

تامر:يبقى خلاص ميهمنيش

فؤاد:بس ليه علاقة بأختك

وضع تامر الملف على الطاولة بغضب:عملت إيه تاني ما هي طول عمرها شاطرة في المصايب

فؤاد:تامر متعصبنيش الموضوع مش كده

تامر:آمال إيه؟

فؤاد:شريف طلب ايد دارين

تامر:شريف مين؟

فؤاد:شريف ابن عمك

تامر:لا معلش أنا وشريف متربيين سوا مينفعش أرميه الرمية دي

فؤاد:قصدك إيه؟

تامر:قصدي إنت عارفه دارين مش هتتحمل مسؤولية جواز دي مش عارفة تتحمل مسؤولية نفسها

فؤاد:أنا جه على بالي الكلام ده كله بس أشرف عمك كلمني وبعدها جه في بالي حاجات تانية

تامر:حاجات إيه؟

فؤاد:حاجات إن الجوازة دي هتفيد؟

تامر:هتفيد مين وإزاي؟

فؤاد:هفيد الكل ...دارين لما تتجوز هتفهم إن الحياة مسؤوليات وهتشيل المسؤولية بعد كده ...وبعد الجواز هنمضي عقود ضم الشركتين وهيكبر شغلنا

تامر:بس أنا معتقدش دارين هتوافق

فؤاد:لا هتوافق شريف ممتاز

تامر:هي دي ينفع معاها شخص ممتاز ؟

فؤاد:بنتي وعارفها هتوافق متأكد مليون في المائة

تامر:طيب لما نشوف

____________________________________

_ما تشوف شغلك يا بشمهندش

شادي:هي مشكلة الكمبيوتر اتحليت وأنا قولت لاء

_يعني هو الشغل الكمبيوتر بس

شادي مختصرا للجدال:حاضر يافندم

واتجه إلى مهندسة الكمبيوتر التي بدأت تحل المشكلة ووقف خلفها

شادي بغضب:مش هنخلص بقى

نور ببرود:والله مش عاجبك تعالا اشتغل مكاني

شادي:هو شغل مين بالظبط

نور:خلاص يبقى تستنى أما أخلص شغلي وإنت ساكت

شادي:صبرني يا رب

لم تجب نور

شادي:قدامك قد إيه ؟

نهضت والتفتت اليه:

نور:متزعجنيش بقى و.....

صدمت كما صدم هو

نور:شادي!

شادي:نور!

نور:إنت بتعمل إيه هنا؟

شادي:يعني هكون بعمل إيه بشتغل

ثم أردف بأسف:متأسف يا نور على صوتي العالي

نور:حصل خير ...إيه أخبار عمتو سناء؟

شادي:تمام كويسة الحمد لله وخالو ماهر عامل إيه؟

نور: الحمد لله

شادي:والله زمان لازم تيجي تتعشي معانا النهاردة

نور:اتعشا إيه بس مش هينفع طبعا

شادي:لا أبدا ماما هتفرح أوي لما تشوفك

نور:ربنا يسهل

شادي:عموما لو تحبي هعدي عليكي وأهو نأخد طنط ريهام بالمرة

نور:لا خلاص إن شاء الله هاجي بعربيتي علشان أعرف أروح إنتو مغيرتوش عنوانكم صح؟

شادي:آه ....مش هعطلك علشان مترفدش أنا وإنتي النهاردة

نور:OK

وجلست تباشر عملها

نور وشادي اقارب لكن بسبب بعض الخلافات لم يبقوا على تواصل ولم يتقابلوا منذ مدة

_____________________________________

جلسوا يتناولون الغداء

كمال:مالك يا صفاء؟

صفاء:تفتكر أنا ظلمت أولادي ؟

كمال:ليه بتقولي كده؟

صفاء:محدش فيهم بيفكر يكلم التاني

كمال:والله يا صفاء أنا مش حابب أتدخل في الموضوع

صفاء:أنا بسألك بس مش بقولك أتدخل

كمال:أنا شايف إنك عملتي الصح

صفاء:و إزاي الصح قلب ضدي كده ؟

كمال:متخليش السلبية دي تأثر عليكي ..حياتك مع فؤاد كانت مستحيلة وإنتي اعترفتي بده

صفاء:بس لا تامر ولا دارين بيردوا عليا ولا حتى بيردوا على أخوهم

كمال:أنا عاوزك تصبري يا صفاء مسيرهم يتكلموا سوا

صفاء:خايفة أوي ميحصلش يا فؤاد

كمال:هيحصل وبكرا تشوفي

صفاء: يا رب

أمسك كفها بحنان وقبله:بلاش تخلي الكلام ده يأثر عليكي أنا عاوزك مبسوطة

ابتسمت بحب:ربنا يخليك ليا

مازن:احم احم نحن هنا

صفاء:هههههه إنت هنا من إمتى؟

مازن:لسه جاي

صفاء:طب اغسل إيدك وتعالى كل

أحمد بمرح:وبالنسبالي يا طنط أجي ولا إيه؟

مازن:إنت إيه اللي دخلك قولتلك وصلني واتكل

أحمد:ده أنا جاي أعمل خير وأديك الكشكول بتاعك نسيته معايا

يأخذه مازن :يا حنين

صفاء:تنور يا أحمد اقعد اتغدا معانا

أحمد:شايف الناس اللي بتفهم

مازن:طب انجر قدامي

أحمد:ok

_____________________________________

عادت دارين من التسوق تحمل بعض الأغراض فوجدت والدها جالس على طاولة الطعام

دارين بإبتسامة:مش معقول بابا بنفسه هيتغدا معايا ؟

جاء تامر من الطابق العلوي وجلس هو الآخر

دارين بضيق:شكلي هتغدا في أوضتي

فؤاد:تعالي يا دارين عاوزك

دارين:هغير هدومي واجي

فؤاد:تعالي اتغدي أول معانا

دارين:طيب يا بابا هغسل إيدي وأجي

فؤاد:طيب

وأعطت دارين أغراضها لعلياء وذهبت إلى دورة المياه

تامر لفؤاد:إنت ناوي تقولها دلوقتي؟

فؤاد:مفيش داعي نستنى

جاءت دارين وجلست :خير يا بابا ؟

وبدأت بوضع الطعام في طبقها

فؤاد:عندي ليكي خبر عاوز اقوله

نظرت إليه بإستغراب:خبر إيه؟

فؤاد: شريف طلب إيدك النهاردة مني

دارين تنظر إليه في دهشة:شريف ابن عمو أشرف ؟

فؤاد:آه مالك مستغربة ليه؟

دارين:لا أبدا بس أنا وشريف اخوات بس مينفعش غير كده

فؤاد:اخوات إيه يا دارين إحنا هنهزر ده إنتي بينك وبينه 6 سنين

دارين:طب إيه المشكلة ما أنا بيني وبين تامر 10

فؤاد:دارين شريف شاب ممتاز

دارين:مختلفناش يا بابا بس أنا مفكرتش في شريف قبل كده

فؤاد:طب قدامك وقت تفكري فيه

دارين للحظات سرحت به وشعرت بخجل فهزت رأسها يمينا ويسارا:

دارين:لالا طبعا شريف إيه اللي أتجوزه

تامر:أنا ده كان رأيي من البداية شريف يستاهل واحدة أحسن منك

دارين بغيظ:قصدك إيه؟

تامر:قصدي إن إنتي مش مناسبة ليه؟

دارين بغضب:إذا كان هو اختارني بنفسه

تامر:أنا عارف ومتأكد إن الموضوع مش هيكمل عارفة ليه؟

دارين:ليه؟

تامر:علشان اللي ذيك لو فكرت تتجوز يبقى لازم تتجوز واحد شبها ..تافه رقم واحد ..وغير متحمل للمسؤولية

دارين بغضب:شايف يا بابا الكلام اللي بيقوله

تامر ببرود:زودي غبي كمان... هيشوف الكلام اللي بقوله ازاي ...اسمها سامع الكلام اللي بيقوله

دارين بغضب:إنت أصلا طول عمرك كده مبتحبش تشوفني مبسوطة إلا وتضايقني وتنكد عليا

تامر:آمال أعيش إزاي

دارين:إيه رأيك بقى إن انا وشريف مناسبين جدا لبعض

فؤاد يبتسم:يعني موافقة يا دارين؟

دارين:موافقة يا بابا بس عاوزة أقابله مرا ونتكلم شوية

فؤاد:ده أكيد

دارين:خلاص تمام معنديش مانع

ابتسم تامر بسخرية

بينما أكملت طعامها في نظرة تحدي

_________________________________

طرق باب غرفتها

نسمة:اتفضل

دخل باسم فوجدها أمام الحاسوب

باسم :نسمة ممكن شوية؟

تلتفت إليه:أكيد طبعا اتفضل

أغلق الباب وذهب وجلس على طرف الفراش:عاوز أكلمك بخصوص مصطفى

نسمة ارتبكت:ماله مصطفى؟

باسم:إنتو ناويين على كتب الكتاب إمتى؟

نسمة:لسه بدري إحنا مخطوبين من مفيش ولسه الشقة مخلصتش

باسم:أنا بقول كتب كتاب مش فرح

نسمة:وإيه لزمة كتب الكتاب ؟

باسم:مش هينفع تفضلوا مخطوبين كده أهو ياستي على الاقل تروحوا وتيجوا مع بعض علشان الشقة

نسمة:أنا بقول نأجل موضوع كتب الكتاب ده أساسا مصطفى هيسافر

باسم:ما هو مصطفى كلمني وعاوز يكتب الكتاب بعد ما يرجع من السفر وأنا شايف إن ده كويس

نسمة:نعم؟؟؟ بسرعة كده ؟ ده مسافر النهاردة بليل

باسم:وهيرجع كمان يومين

نسمة:لا يا باسم إنتو متسرعين أوي

باسم:متسرعين إزاي مش إنتي موافقة عليه؟

نسمة:موافقة آه لكن نتسرع لاء يا باسم

باسم:مفيش تسرع لما نكتب الكتاب كمان يومين بالعكس هيكون ده وقت ممتاز وكمان إنتي ومصطفى تعرفوا بعض يعني مش محتاجين خطوبة علشان تتعرفوا على بعض

نسمة:باسم أنا مش بتكلم على تعارف

باسم:آمال؟؟

نسمة:السرعة دي بتوترني من فضلكم نصبر شوية

باسم بقلق:ذي ما تحبي يا نسمة هقوله إنك عاوزة نصبر شوية

نسمة:متشكرة يا باسم ممكن تسبني أكمل شغل؟

باسم:طبعا

وغادر الغرفة وهو يشعر بالريبة

__________________________________

نور:ماما أنا معزومة النهاردة على العشا

ريهام:عند مين؟

نور:عند عمتو سناء

ريهام:ودي شوفتيها فين؟

نور:لا أنا شوفت ابنها كنت بعمل شغل في الشركة اللي بيشتغل فيها

ريهام:طيب يا نور متتأخريش

نور:كنت فكراكي هترفضي

ريهام:مش عاوزة تروحي يا نور بلاش

نور:لا أنا هروح علشان ميزعلوش أنا بس استغربت إنك وافقتي رغم إن كان في خلافات

ريهام:خلاص بقى كانت أيام و راحت وحصل قبل كده وباباكي صالحنا

نور:طيب أنا هقوم اجهز

ريهام:طيب وخلي موبيلك مفتوح علشان مقلقش عليكي

نور:حاضر يا ماما

ريهام:يحضرلك الخير يا حبيبتي

_________________________________

كانت شاردة طوال اليوم مما أثار قلق مازن

مازن:بابا هي ماما مالها النهاردة؟

كمال:متضايقة شوية

مازن:من إيه يعني؟

كمال:بدل ما تعرف السبب دور على حاجة تفك ضيقتها

مازن:طب أنا رايح أركب خيل أخودها معايا

كمال:خيل إيه دلوقتي؟

مازن:ده أحلى وقت تركب فيه خيل

كمال:هتروح مع مين؟

مازن:مع أحمد

كمال:مش جايبلك جنان في حركاتك غير أحمد ده

مازن:بس جدع والله

كمال:طيب متتأخرش

مازن:أخود ماما معايا ؟

كمال:شوفها يا ابني

توجه اليها وهي جالسه في الشرفه

مازن:حبيبتي

التفتت إليه:خير يا مازن؟

مازن:تيجي معايا ؟

صفاء:أجي فين؟

مازن:هركب خيل أنا وأحمد تيجي تقضي وقت ممتع وتشوفي سبق هايل

صفاء بحدة:أنا مش قولتلك تبطل موضوع الخيل ده مش رجلك اتكسرت منه قبل كده

مازن:ده علشان كنت مبتدئ

صفاء:يعني دلوقتي بقيت محترف

مازن:بالظبط كده ولو مش مصدقة تعالي شوفي بنفسك

صفاء:لا أنا مبحبش الحاجات دي بس متتأخرش علشان مقلقش عليك

مازن:حاضر

وقبل خدها وذهب

_______________________________

جلست نور لتناول الغداء معهم

نور:والله وأنا كمان مش مرتاحة في شغلي بس هعمل إيه

سناء:دوري على شغل تاني

نور:أكيد طبعا هدور بس المشكلة عندي في الوقت

سناء:ربنا معاكي يا بنتي ....آمال ماهر أخباره إيه بقاله مدة مبيتصلش

نور:هوأنا مشفتوش من ساعة ما اشتغلت

سناء:ليه؟

نور:شغل المركز بيخليه مشغول ..أنا أصحى لشغلي يكون هو نايم أنا أرجع من الشغل يكون هو في الشغل وبيرجع متأخر

سناء:طول عمره غاوي تعب

نور:ياريت تكلميه يا عمتو والله

سناء:أكيد

شادي:كفايا كلام يا ماما سيبيها تأكل

سناء:آه صح لامؤاخذة يا بنتي

نور:لا يا عمتو عادي ده إنتي وحشاني جدا و وحشني الكلام معاكي

*********************
إلي هنا ينتهي الفصل الثالث من رواية بعد النهاية بقلم يسرا جمال 
تابع من هنا: جميع فصول رواية ولا فى الأحلام بقلم دعاء عبد الرحمن
تابع من هنا: جميع فصول رواية أبو البنات بقلم رهف سيد
تابعوا صفحتنا على الفيس بوك للمزيد من روايات حزينة
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة