-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية بعد النهاية ج2 بقلم يسرا جمال - الفصل العاشر

  مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية ذات الطابع الإجتماعى مع رواية رومانسية جديدة للكاتبة يسرا جمال علي موقعنا قصص 26 وموعدنا اليوم مع الفصل العاشر من رواية بعد النهاية الجزء الثانى بقلم يسرا جمال .

رواية بعد النهاية ج2 بقلم يسرا جمال - الفصل العاشر

إقرأ أيضا: رواية غرام 


رواية بعد النهاية ج2 بقلم يسرا جمال

رواية بعد النهاية بقلم يسرا جمال ج2 - الفصل العاشر

مازن:المدير المؤقت ومش بكلامي ده بكلام فارس

ياسر:نعم؟؟

مازن:معنديش وقت اعيد لحضرتك الكلام من فضلك اتفضل برا بدل ما اجيب الامن

وتركه ياسر وغادر المكتب واتصل بوليد

وليد:الو

ياسر:انت على علم باللي اسمه مازن ده اللي ماسك شغلك

وليد:اه طبعاً فارس قالي

ياسر:يا ابني هو اي حد يمسك شغلك

وليد:عمي من فضلك مازن صاحبي وفوق كده فارس اداله الثقة دي وانا بصراحة متطمنله جداً طالما فارس متطلمنله

ياسر:يعني واثق في الغريب ومش واثق في عمك

وليد:هي مش بدرجة القرابة الفكرة كلها ثقة لو فارس ادهالك في يوم صدقني هوافق وانا مغمض ....وبصراحة انا بدأت اشك في موضوع انك جاي تقف جنبي ده

وأغلق وليد الخط

____________________________________

في فيلا _رائد شريف الحكيم_

شريف:ايه رأيك يا حبيبي حلوة؟

رائد:تحفة

شريف:دي بتاعتك

رائد:بتاعتي انا؟؟

شريف:اه وبعد اذنك انا ضيف عندك

وأكمل:انا مجهزتش اوضتك سبتهالك تجهزها بنفسك واي حاجة مش عجباك هنغيرها

رائد:بجد؟

شريف:طبعاً بجد بقولك بتاعتك

رائد:ممكن مامي تيجي هنا؟

شريف:بص يا حبيبي هي بتاعتك اه بس انا قاعد هنا حالياً لما امشي هي ممكن تيجي

رائد:هو انت ومامي ليه مبقتوش مع بعض تاني ؟

شريف:علشان اصلاً مكانش في اولاني يا رائد عمرنا ما كنا مع بعض

رائد:بس انا عاوزكم مع بعض ممكن تحاولوا

شريف:بس احنا مش عاوزين نحاول

رائد:ليه؟

شريف:علشان احنا مرتاحين كده

رائد:بس الصور بتبين ان انتو كنتوا مبسوطين اكتر وانتو مع بعض

انتبه شريف له:وانت شوفت صور لينا فين؟

رائد:عند مامي بس متقولهاش

شريف:مش هقولها بس انت متفتش في حاجة حد تاني حتى لو انا او مامي

رائد:حاضر يا بابي اسف

وأكمل:ليه مترجعوش وانتو كنتو مبسوطين؟

شريف:دي صور يا حبيبي نحب نبان فيها بشكل حلو حتى لو فينا اوجاع الدنيا برضو هنضحك علشان الصورة تطلع حلوة

رائد:يعني انت ومامي مكنتوش مبسوطين مع بعض ابداً؟

شريف:مامي كانت احلى حاجة في حياتي انا منكرش لانها كانت حب حياتي انا محبتش غيرها وانبسطت فترة معاها وانفصالنا كان في منتهى الهدوء

رائد:وليه انفصلتوا؟

شريف:علشان حتى الحب اللي مكانش كفايا مكانش موجود كان وهم

رائد:يعني ايه؟

شريف:يعني كلام كتير صعب اشرحه وصعب تفهمه دلوقتي بعدين يا رائد

رائد:بس انا عاوزكم مع بعض

شريف:مش اي حاجة في الدنيا دي هتعوزها هتاخدها ثم انا ومامي دايماً جنبك ومش هنسيبك ابداً

سمعوا صوت بوق سيارة فنهض رائد فتلك السيارة اتت لأخذه لوالدته

فنهض شريف وجثى على ركبتيه أمام رائد

شريف:ابقى اسأل عليا دايماً يا رائد انا مليش غيرك حرفياً

رائد:وانا مستحيل انساك يا بابي

وقبله رائد فعانقه شريف ثم ذهب رائد

_______________________________________

في منزل مصطفى في اليوم التالي

جلست نور تشرب نيسكافيه وتعبث على مواقع التواصل الاجتماعي بلا هدف في محاولة لتشتيت انتباهها عن قصة السفر تلك

جاء مصطفى الى جوارها:انا رايح لماما

أومأت برأسها إيجاباً

فأكمل هو:وبالمناسبة انا مش هتنازل عن الفرصة اللي جتلي دي وهقعد مع ماما شوية واديكي فرصة تهدي وتفكري كويس في الموضوع

التفتت اليه:جواب نهائي

أومأ برأسه ايجاباً:جواب نهائي

نور:تسافر بالسلامة

والتفتت مجدداً للآيباد الذي بيدها

مصطفى:بس كده

نور:يلا يا مصطفى الحق روح لخالتو بتشتكيلي منك وفاهمة ان انا حبساك جنبي

مصطفى:طيب يا نور سلام

وذهب مصطفى لتنهض نور وتحضرحقيبتها وبدلت ثيابها وكذلك فعلت لياسين وغادرت وهي مقررة الطلاق

_________________________________________

في مطعم وليد ذهب وليد باتجاه طاولة يجلس عليها عمه

وليد:عمي من فضلك ده مكان شغل لو في اي خناقة اجلها لما نكون في الفيلا

ياسر:خناقة ايه بس اقعد

جلس وليد:خير؟

ياسر:انا بس عاوز اعتذرلك عن اللي طلع مني انا مكانش قصدي اتهورت شوية بس من خوفي على مصلحتك

وليد:فارس عارف مصلحتي وبرضو بيخاف عليها واكتر مني كمان

ياسر:خلاص يبقى اثق في فارس

وليد:متشكر انك فهمت

ياسر:ايه مش هتعزمني على حاجة ولا ايه؟

ابتسم وليد:لاء ازاي اطلب اي حاجة على حساب المطعم

ونهض وليد وتركه وهو يتعجب من تلك المعاملة اللطيفة بل هذا التحول فتارةً هو ضد فارس وتارة يتجاهل الأمر ويتظاهر بالرضا لا يدري هل يصدق ان عمه حقاً شخصٌ جيد ام انها مجرد لعبة وان كانت لعبة فما الفائدة منها ففي النهاية لن يتخلى وليد عن فارس بأي حال من الأحوال

وجود عمه أصبح يسبب له القلق

_______________________________________

في فيلا الأنصاري

يعانق إبراهيم فارس:وحشتني يا فارس

فارس:وانت كمان يا بابا وحشتني

ابتعد إبراهيم:بس ايه اللي رجعكوا بدري ده انتو مكملتوش الا اسبوع

فارس:مقدرتش ابعد عن شغلي اكتر من كده قولت ارجع بقى وخلاص

إبراهيم:وفين مراتك؟

فارس:في شقتنا

إبراهيم:ومجبتهاش معاك ليه؟

فارس:انا قولت بلاش مشاكل

إبراهيم:مشاكل ايه؟

فارس:انا عارف يا بابا انك مش طايقها بلاش تبقوا في مكان واحد

إبراهيم:الكلام ده قبل ما تتجوزها دلوقتي هي مراتك لما تيجي هنا تاني تكون في ايدك انت فاهم دي بقيت من العيلة خلاص حتى لو انا مش عاوز

ابتسم فارس:حاضر

وأكمل:امال زياد فين؟

وقبل ان يتكلم إبراهيم يدخل زياد من الباب وعندما يرى فارس يذهب إليه ويعانقه:وحشتني يا باشا

فارس:وانت كمان عامل ايه؟

زياد:ذي الفل انت اللي عامل ايه؟

فارس:تمام

زياد:ايه شهر العسل وحش فقفلتوها على كده ورجعتوا ولا ايه؟

فارس:لا انا بس الشغل وحشني فقولت اجي

زياد:فعلا؟...عموماً نورت

فارس:شكلك مبهج اوي النهاردة

زياد:شكلي هعملها واتدبس ذيك قريب

فارس:بجد؟؟...مين؟؟

زياد:دارين

_______________________________________

في منزل ماهر

ريهام:يابنتي اهدي وارجعي بيتك بقى

والتفتت لباسم:ماتتكلم يا ابني

باسم:انا مش حابب اتدخل يا خالتو دي حاجة بينها هي وجوزها

ريهام:لا انا اكلم ابوكي بقى

ونهضت ريهام

باسم:آخر كلام ده يا نور؟

نور:آخر كلام

باسم:طب ما تخليني اتكلم معاه واقنعه

نور:مفيش فايدة مش هتفرق خلاص هو اختار بكامل ارادته وأكدلي ان ده آخر كلام عنده

باسم:طب هو عارف؟

نور:المفروض سيباله رسالة لما يرجع من عند خالته بقى هيعرف

باسم:طيب تمام

رن هاتف نور برقم مصطفى

نور:الو

مصطفى:ايه الرسالة دي يا نور

نور:انت اختارت وانا اختارت

مصطفى:ارجعي خلينا نتفاهم

نور:مفيش تفاهم انا خيرتك وانت اختارت تعالا نخلص الموضوع ده

مصطفى :اعقلي يا نور

نور:صدقني انا كده عقلت

مصطفى:يا نور من فضلك

نور:انت اللي من فضلك تعالا ننهي الموضوع ده بهدوء

مصطفى:انا اسف بس ده مش اختيارك لوحدك انا شريك حياتك

نور:بس فرصة الشغل كانت اختيارك عادي وقتها انا مش شريكة حياتك صح؟

مصطفى:متخلطيش الأمور ببعضها وخلينا نتفاهم من فضلك مش هينفع كلام في التليفون

نور:هو مفيش كلام اصلاً هستناك تيجي نخلص الموضوع ده ومتتأخرش من فضلك

غضب مصطفى:وبعدين معاكي يا نور بقى انا مش عارف اتفاهم كده من فضلك عاوز الاقيكي في البيت بكرا

واغلق الخط وهو منزعج ولايصدق انه اصبح يفكر كنسمة بل ومارفضه فيها في الماضي يفعله الأن يتعجب من نفسه ومع ذلك لا يستطيع لا لومها ولاتهنئتها على هذا القرار وكل ما يهمه الأن ان تعود نور إليه.

__________________________________

في شقة فارس

فارس:في ايه يا شهد ما اللي انتي عوزاه عملته معجبكيش المكان اخدتك ورجعنا مصر

شهد:انت بتهزر يا فارس هو في عروسة مبتعملش شهر عسل

فارس:ما انتي اللي معجبكيش المكان

شهد:انت اللي موديني اماكن غريبة يابان ايه وزفت ايه

فارس:انا من زمان وانا نفسي اعمل سياحة في اليابان ثم انتي معترضتيش على المكان لما قولت ولااقترحتي حتى مكان تاني

شهد:غلطتي هي يعني؟

فارس:مقولتش كده ومن فضلك يا شهد من دلوقتي نظام تقوليني كلام مقولتهوش ده انا مبحبهوش....ثم اليابان فيها أماكن كتير حلوة

شهد:انا مش فاهمة لغتهم انت بس اللي عارف تتعامل هناك واصلاً الاماكن مكانتش حلوة انا مكنتش مرتاحة

فارس:خلاص ياستي انتي بعد كده تختاري المكان تمام كده

شهد:وهنسافر تاني امتى؟

فارس:معرفش ياشهد احنا لسه راجعين هشوف وقت وبقولك ايه قدام بابا انا وحشني الشغل وعلشان كده رجعنا تمام؟

شهد:ليه بقى؟

فارس:مش عاوز مشاكل

شهد:طبعاً إبراهيم باشا مش طايقني

فارس:مفيش الكلام ده وعلى فكرة كان عاوز يشوفك

شهد:لا ياشيخ

فارس:ايه ياشهد ما تتكلمي كويس

شهد:خليك صريح باباك مبيطقنيش ومش بعيد يخليك تطلقني وانا اصلاً مليش حد يقف في ضهري

فارس:مفيش الكلام ده ونظام تاني محبهوش في الكلام انك تطلعيني كداب انا مليش في الكدب انا انسان صريح لو في حاجة هقولها علطول ومش هخبي

شهد:ده ايه الكلام اللي هيمشي بقواعدك ده كمان

فارس:ولا تجادليني كمان تمام؟

شهد:ماتقوم تاخدلك قلمين بالمرة يلا قوم

فارس:لا إله إلا الله وبعدين بقى في ايه

شهد:ايه مش عاجبك كلامي وتاخدها حجة وتطلقني

فارس بذهول:انتي مين مفهمك اني هطلقك انا مش فاهم

وجلس على الفراش في تعب

شهد:باصينلي في الجوازة حسدوني عليك رغم كل حاجة قولتها برضو اتحسدت

التفت اليها:رغم كل حاجة قولتيها؟؟؟....لا معلش افهم الجملة

شهد:اكيد يعني مش هقول متقدملي عريس غني وذي الفل قولتلهم انك كبير في السن وعندك مشاكل مادية كتير وان الفرح ده مش من فلوسك ده من فلوس جدك

نهض فارس:نعم؟؟

شهد:ايه في ايه؟

فارس:انا كبير ومفلس قدام قرايبك يعني ولا ايه؟

شهد:اه ومن فضلك لما تتعامل معاهم يبقى على الأساس ده

فارس:وان شاء الله احنا عايشين في شقة مين علشان ابقى عارف بس

شهد:شقتك يا حبيبي

فارس:طب الحمد لله قولتى حاجة صح

شهد:بس ايجار

فارس:انتي بتكدبي ليه يا شهد

شهد:آمال اقولهم الحقيقة ده بالكدب ده كله وحسدوني برضو

فارس:مين قال حسدوكي هو انتي محور الكون عندهم ثم فين الحسد ما قضينا يومين حلوين في اليابان

شهد:اوعى تقول اليابان قدام حد انا مفهماهم اني رايحة شرم الشيخ وكمان شهر العسل ده هدية من حد من صحابك

فارس بذهول:ايه الكلام اللي بسمعه ده؟!

شهد:مالك؟

فارس:اسمعي يا شهد دي آخر مرة تقولي كلام من دماغك انا هعدهولك قدام قرايبك علشان مطلعكيش كدابة لكن الهبل ده اوعي تكرريه تاني فاهمة ولا لاء؟

شهد:انت متعصب عليا ليه؟

فارس:انا متعصبتش يا شهد مع ان ده اقل واجب يعني الصراحة

شهد:يا فارس مع ناس ذي قرايبي لازم نداري على حياتنا

فارس:نداري مش نكدب في فرق يا هانم

شهد:يعني...

قاطعها:ولا كلمة خلاص اسكتي واسمعي الكلام وبعد كده كلامك تفكري فيه مش عارفة تفكري تقوليلي افكرلك وقدام بابا اوعي تقولي اي كدب فاهمة ؟

وتركها وذهب وهو في قمة الغضب من تلك التصرفات الغريبة التي لم يتوقعها

هل فهم الزواج خطأ أم اختياره خطأ؟..على الأغلب اختار خطأ وهذا واضح فهذا اول زواجهم ويتصرفون هكذا ماذا إذا مر سنين ما الذي سيحدث وماذا لو أصبح لديهم أطفال ما الذي سيحدث في لحظةٍ سأل نفسه"نتطلق؟!" لكنه أبعد الفكرة عن رأسه بسرعة فليس من المعقول أن يطلقها بسرعةً هكذا لابد من أن يحاول ويعطيها فرصة ويعطي لنفسه هو الآخر ليعتادوا على بعضهم البعض.

_______________________________________

في اليوم التالي في منزل ماهر

قرع مصطفى الجرس وباسم خلفه

باسم:اهدا شوية

مصطفى:اسكت انت

فتحت نور الباب

نور:مصطفى

وأكملت:طب كويس جيت علشان نخلص الموضوع

والتفتت لتدخل فأمسك يدها:موضوع ايه اللي يخلص هو بالسهولة دي

نور:سيب ايدي يا مصطفى

باسم:اهدوا يا جماعة او خوشوا جوا حتى الجيران هيتفرجوا علينا

التفت مصطفى حوله فدخل جاذباً اياها معه فدخل باسم وأغلق الباب

نور:سبني بقولك سبني

مصطفى:قدامي على البيت نتفاهم هناك

نور:الغي فكرة السفر اول هاجي معاك غير كده مش رايحة في حتة معاك وانسى اني اتراجع عن قراري

مصطفى:اعقلي يا نور احسنلك

نور:انت جاي تهددني ولا ايه

والتفتت لباسم:اطلب المأذون الكلام خلص هنا خلاص

باسم:ممكن تهدوا وتتكلموا شوية ....فين خالتو ريهام يا نور؟

نور:مش هنا وكويس انها مش هنا علشان متدخلش

باسم:تمام انا هسيبكم وانتو اقعدوا واتكلموا مفيش مشكلة هتتحل كده

مصطفى:لا يا باسم وتسيبنا ليه الهانم هتتفضل معايا دلوقتي

نور:انا قولت لاء

باسم:خلاص يا مصطفى مش هتفرق هنا من هناك المهم تتكلموا

مصطفى:انا ميتلويش دراعي يا نور مش تزعلي من قرار اخدته تسيبيلي البيت وتمشي مش بمشي كده انسي

نور:وانا مبلويش دراعك يا مصطفى انا كمان اخدت قرار طلقني

جذب:اه سيب ايدي بقولك

باسم يتدخل:يا مصطفى مش كده سيبها

مصطفى:متدخلش دي مراتي وهنحل مشاكلنا سوا

باسم:مش مبرر تهنها قدامي او قدام اي حد

مصطفى:صح عندك حق

وجذبها وفتح الباب:يلا على البيت

نور:سبني يا مصطفى ياسين جوا

مصطفى:خلي بالك منه يا باسم

وجذبها معه للخارج فوقف باسم أمامه

باسم بخفوت:انت اتجننت يامصطفى هتجرها قدام الناس على العربية

مصطفى بهدوء:انا صوتي واطي اهو ابعد من وشي

باسم:مش هبعد

مصطفى:امشي من قدامي يا باسم احسنلك

باسم:مفيش نزول بالطريقة دي ياتنزل معاك وهي راضية يا بلاش وانت فوق من عصبيتك اللي مجنناك دي

مصطفى يبعده من أمامه:قولتلك ابعد يا باسم

اختل توازن باسم

نور بفزع:باسم !

________________________________________

في فيلا الحكيم

تامر:مالك؟

دارين:زياد طلب ايدي

تامر:زياد مين؟

دارين:دكتور زياد اللي جه قبل كده عندنا على العشا

تامر:اه زياد....وقولتيله ايه؟

دارين:قولتله افكر

تامر:انتي فعلاً عاوزة تفكري ولا حجة علشان تتهربي شوية

دارين:مش عارفة يا تامر مش عارفة اوافق ولا لاء

تامر:ايه المشكلة في زياد؟

دارين:مفيش زياد شخصية ممتازة بس برضو مترددة

تامر:ليه؟

دارين:شايفة نفسي ماما لو اتجوزته وانا مش عاوزة اكرر حياتها

تامر:ماما حياتها مكانتش وحشة

دارين:انت شايف كده ؟

تامر:اه شايف كده

دارين:يعني اوافق؟

تامر:انتي جيباني هنا علشان تسأليني تتجوزي ولا لاء؟

دارين:ما انا محتارة ومترددة اوي وخايفة في نفس الوقت

تامر:خايفة من ايه؟

دارين:تفتكر شريف هيبقى بالنسباله عادي ؟

تامر:مش هيعملك حاجة يا دارين بعد معاملتنا دي وبابا معانا مش هيعمل حاجة خلاص

صمتت دارين تفكر

تامر:انا هقوم امشي قبل ما بابا ييجي

دارين:مش هترجع بقى

تامر:مش هينفع دلوقتي يا دارين واعتقد انها مش هتنفع خالص اصلاً الا اذا هو قالي ارجع

وقبلها:يلا سلام

دارين:سلام

تامر:وياريت لو احتاجتيني تاني تجيلي انتي انا مش عاوز اجي هنا واعمل مشاكل لو جه فجأة

أومأت برأسها إيجاباً

_________________________________________

في بيت سامية

سامية:يعني هيتطلقوا؟

باسم:معرفش هو زقني ووقعت وراح معايا المستشفى وبعدها اختفى

سامية:شكلهم هيتطلقوا

باسم:هحاول اصلح ما بنهم واخليها تشيل الفكرة دي من دماغها واكلمه يشيل فكرة السفر من دماغه

سامية:واحنا مالنا؟

باسم:مالنا ايه بس يا ماما دي عندها ولد وكمان حامل انتي عاوزة ولادها يعيشوا بعيد عن ابوهم

سامية:ما تسافر معاه هي مكبرة الموضوع ليه؟

باسم:ملناش دعوة هي حرة يا ماما

سامية:برضو ملناش دعوة سيب كل واحد براحته

باسم وقد فهم ماترمي إليه:مش هيرجع لنسمة يا ماما حتى لو طلبها بنفسه مش هدهاله

سامية بفرحة:هو طلب نسمة؟

باسم:لا مطلبهاش ولو طلب مش هجوزهالوا

سامية:ليه؟

باسم:ايه هو اللي ليه يخطبها وبعدين يسيبها ويتجوز بنت خالتها وبعدين يطلق بنت خالتها ويرجعلها ده ايه لعب العيال ده ثم نسمة مش لعبة ولا نور لعبة علشان نتعامل معاهم كده

سامية:ومقولتش الكلام ده ليه لما ساب أختك وراح لنور

باسم:الوضع مختلف في الأول كانت خطوبة فعادي لكن جواز وعيال لاء مسمحش بده نور ذي أختي ومقبلش الكلام ده عليها

سامية:لكن نسمة أختك بجد فعادي

باسم:قولتلك نسمة وضع مختلف ثم هي اختارت مصطفى كان عاوز يكمل هي اللي سابته وهو لو عنده كرامة ميرجعلهاش تاني

سامية:يعنـ...

قاطعها باسم:ماما الموضوع منتهي

ونهض وتركها فرن هاتفه الخليوي

باسم:الو

نور:انت كويس؟

باسم:ايه يا بنتي ده خدش متاخديش في بالك

نور:طب الحمد لله كنت حاسة بالذنب علشان ده بسببي

باسم:لا ياستي مش بسببك انا اللي حشري وبحشر نفسي في اللي مليش فيه

ابتسمت نور من مزاحه

باسم:قوليلي ايه الأخبار؟

نور:ولا حاجة حياتي رجعت لطبيعتها تاني وماما طبعاً بتزن عليا علشان ارجع بيتي

باسم:تحبي تاخدي مفتاح بيتي وتقعدي هناك بعيد وتفكري براحتك

نور:لا ملوش لزوم شوية وهتزهق وبعدين هي شايلة عني ياسين

باسم:طب وصلتي لإيه في موضوعك مع مصطفى ؟

نور:كلمت بابا علشان ييجي ويخلص الموضوع

باسم:يا بنتي اعقلي طب فكري في ولادك

نور:انا كده بفكر فيهم بس محدش فاهم ولا حد هيفهم من اصله... كده احسن نبعد عن بعض طالما مش عارفة امنعه من السفر

باسم:بس بتحبيه يا نور

نور:الحب مش كفاية يا باسم وانت عارف ثم هو بسفره ده بيحكم على الحب ده بالموت

وأكملت:يلا سلام

باسم:سلام

_________________________________________

عاد فارس إلى منزله في المساء حيث غادره بعد تلك المشادة بينه وبين شهد وفضل الذهاب لعمله

وجد العشاء معد وشهد تنتظره وعندما رأته ذهبت إليه وعانقته:اتأخرت ليه؟

عانقها فارس رغم أنه ليس متقبلاً بعد لتصرفاتها وقال:انتي عارفة اني بتأخر في الشغل

ابتعدت ونظرت اليه:الكلام ده قبل الجواز دلوقتي في واحدة في حياتك تاخد بالك منها

ابتسم فارس وأومأ برأسه إيجاباً

فارس:بس ايه اللي حصل كنا بنتخانق قبل ما انزل

شهد:ميبقاش قلبك اسود بقى وبعدين انا قررت اسامحك

فارس بذهول:نعم؟..تسامحيني ؟؟!

وأكمل متسائلاً:هو انا اللي زعلتك؟

شهد:مش انت اللي زعقت؟

فارس:لا انا مزعقتش

شهد:هو الواحد لما بيتعصب بيفتكر هو عمل ايه؟

فارس:انا متعصبتش يا شهد ومزعقتش وانا اصلاً مش عصبي واسألي اللي يعرفوني هيأكدولك الموضوع ده

شهد:انت قصدك ان انا اللي زعلتك ؟؟

فارس بتنهيدة:حصل خير يا شهد انا اتضايقت شوية وخلاص ممكن ننسى اللي حصل

شهد:ما انا بقول كده من بدري انت اللي بتفتح في اللي فات

فارس:خلاص يا شهد انسي

شهد:طب ايه مش عاوز تتعشى؟؟

فارس:لا انا جعان نوم

شهد:لا مليش دعوة انا مستنياك من بدري علشان نأكل سوا

فارس:ايوه بس...

جذبته من ذراعه مقاطعة اياه:يلا بقى يا فارس مش هتندم

وجلسوا سوياً

شهد:عملالك بقى مكرونة بالبشاميل هتاكل صوابعك وراها

فارس:مكرونة بالبشاميل؟..مش تقيلة شوية على العشا؟

شهد:هو انت فيك حاجة يا فارس ده انت جلد على عضم

فارس:نعم؟؟

شهد:لازم تاكل ووتتغذا ثم انت يعني متعود تتعشى ايه؟

فارس:لا مش بتعشى بنام خفيف

شهد:لا من هنا ورايح الكلام ده مش هينفع هتفطر وتتغدا وتتعشى كمان

فارس:ربنا يسهل

وملأت له طبقه

شهد:دوق بقى وقولي رأيك في عمايل ايديا اكيد هتعجبك

فارس:موعدكيش الصراحة هههههههه

شهد:قصدك انا اكلي وحش ولا ايه؟

فارس:مش القصد يا شهد بس الواحد بياخد وقت عبال ما يتعود على أكل غير اللي كان متعود عليه يعني انا كنت متعود على اكل ماما الله يرحمها وبعدين اكل من برا وده الصراحة اتعوديت عليه علطول وبعدين بابا واخدت وقتي وبعدين ديانا وكده يعني

شهد:مين ديانا دي؟

فارس:الشغالة

شهد:اسمها غريب

فارس:ما هي اجنبية مش من هنا؟

شهد:حلوة؟؟

فارس:نعم؟؟

شهد:حلوة؟

فارس:ايه السؤال الغريب ده هو انا هركز في حاجة ذي دي هي شاطرة في شغلها وخلاص

شهد:يعني طالما من برا ومش مصرية تبقى أكيد حلوة

فارس:ما علينا يلا نأكل ومش هأكل كتير يا شهد علشان انا مش متعود

شهد:يعني ايه يعني هتسبني أكل لوحدي

فارس:هقعد معاكي حاضر

شهد:هتقعد تتفرج يعني

فارس:في ايه ياشهد

شهد:على فكرة ممكن تقولي مستناش تاني وانام علطول

فارس:مقصدش كده

شهد:اصلاً عادي كان لازم افهم لوحدي

فارس:انا مقصدش يا شهد وحيلي مهدود مش قادر اتجادل معاكي

شهد:وكمان زهقت مني تمام ممكن تقوم تنام تحب أسبلك الأوضة كمان

فارس مذهول ولا يدري بماذا يجيبها هي من الأساس لا تعطيه فرصة ولا تريد أن تفهم كلامه قرر انهاءاً لهذا الجدال أن يتذوق طعامها فتناول ملعقته وتذوق طعامها بالطبع لم تعجبه لكنه تظاهر ان الطعام رائع

فارس:واو دي احلى مكرونة بشاميل اكلتها في حياتي

شهد بفرحة:بجد؟

فارس:اه بجد

شهد:خلص واعبيلك تاني

فارس:تسلمي حبيبتي

شهد:هقوم اجبلك حاجة تشربها

من الأساس لا يشرب شيئاً أثناء تناول الطعام لكنه أومأ برأسه ايجاباً

شهد:تشرب ايه؟

فارس:اي حاجة على ذوقك

شهد:طيب رجعالك علطول

ونهضت شهد وذهبت

فارس في نفسه"اهدا يا فارس دي اول سنة جواز ولسه بتاخدوا على بعض"

_______________________________________

بعد مرور عدة أيام في فيلا فؤاد

فؤاد:ايه الصعب في الموضوع عوزاه او لاء مش عوزاه

*********************
إلي هنا ينتهي الفصل العاشر من رواية بعد النهاية ج2 بقلم يسرا جمال 
تابع من هنا: جميع فصول رواية ولا فى الأحلام بقلم دعاء عبد الرحمن
تابع من هنا: جميع فصول رواية أبو البنات بقلم رهف سيد
تابعوا صفحتنا على الفيس بوك للمزيد من روايات حزينة
أو أرسل لنا رسالة مباشرة عبر الماسنجر باسم القصة التي تريدها
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة