-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية جحيم حبك بقلم شيماء عصمت - الفصل الثالث

 مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة شيماء عصمت علي موقعنا قصص 26 وموعدنا اليوم مع الفصل الثالث من رواية جحيم حبك بقلم شيماء عصمت

رواية جحيم حبك بقلم شيماء عصمت - الفصل الثالث

إقرأ أيضا: روايات عالمية

رواية جحيم حبك بقلم شيماء عصمت

رواية جحيم حبك بقلم شيماء عصمت - الفصل الثالث

 مسك بغضب: مزعله امك ليه يامقصوفة الرقبة انتي؟

نرجس: والله يااختي ماعملت حاجة كل ده عشان رفضت عريس الغفلة اللي هي جيباهولي

ام نرجس بغضب حزين: يرضيكي يامسك يابنتي اللي هي بتعمله ده؟ كل عريس يتقدملها ترفضة وكل مره بحجة شكل .. مره دا طويل ومره دا قصير مره ابصر ايه لما تعبت منها .. المرادي الاستاذ حسن ابن ام حسن اللي في الشارع اللي ورانا متقدملها الراجل الله واكبر عليه جمال واخلاق وعلام .. دا موظف حكومي حد ياااناس يرفض موظف حكومي

نرجس بتريقة: رئيس جمهورية يعني ولا ايه؟

مسك ضربتها بخفة وبصتلها بحده ..

ام نرجس بحزن موجهه كلامها لـ نرچس: يابنتي انتي مكملتيش علامك .. انا عايزة حد كويس ويستتك وكفاية الشقى اللي انتي فيه دا .. عاجبك شغلك في المصنع اللي انتي فيه .. انتي بتكبري وفرصك بتقل .. لو تريحي قلبي بس وتقوليلي انتي بترفضي العرسان دي كلها ليه؟

نرجس: ياما ابوس ايدك انا مرتاحة كده وقت ماهحس اني رايده الجواز هتجوز ليه السربعة دي

مسك بمرح مصطنع: بقولك ايه ياخالتي ام نرجس متعمليلي كوباية شاي من اديكي اللي زي العسل دي .. بصراحة محدش بيعمل شاي حلو زي شايك ابدااا

ام نرجس فهمت ان مسك عايزة تقعد مع بنتها لوحديهم .. بهدوء قالت: من عنيا يابنتي احنا عندنا كام مسك يعني

قالت اخر كلامها وهي خارجة بره الاوضة .. مسك بسرعة قفلت الباب ورجعت قعدت قدام نرچس

مسك: وبعدين

نرچس بأستغراب: وبعدين ايه؟ مش فاهمة؟!!

مسك: بلاش لف ودوران يا نرچس انا عرفاكي اكتر من نفسك .. لحد امتى هتفضلي معلقة نفسك بحبال دايبة

نرچس بتهرب: مفيش حاجة من اللي في دماغك يامسك انا بس اللي مش عايزة اتجوز دلوقتي

مسك بقوة: يعني مش مستنية حد يانرجس

نرچس بتوتر: حد؟ حد زي مين يعني

مسك: زي خالد اخويا مثلا

نرچس وقفت بحده زي مايكون تعبان لدغها وبتوتر كبير قالت: ايه اللي بتقوليه دا يامسك خالد اخوكي! لا طبعا .. خالد دا زي

قاطعتها مسك: اوعي تقولي زي اخوكي انا معرفكيش من يوم ولا اتنين يانرجس .. لا .. انا اعرفك من زمااان من يوم ما اتولدتي .. وعرفاكي وفهماكي اكتر من نفسك .. انتي مش بنت خالتي وبس انتي صحبتي واختي وكل حاجة ليه غلاوتك عندي قد غلاوة خالد اخويا واكتر كمان بس مش كفاية وجع قلب لحد كده

نرچس ببكاء: مش بأيدي يامسك غصب عني والله .. بحبه .. بحبه وبطلب من ربنا كل يوم انه يزرع حبي جوه قلبه زي مازرع حبه في قلبي

مسك طبطبت عليها: انتي الف واحد يتمناكي يانرجس .. كفاية قلبك اللي زي العسل ده واخويا لسه قدامه مشوار طويل .. لسه هيكون نفسه وعارفة ومتأكدة ان خالد مش بيفكر في جواز دلوقتي

نرچس بحزن: حتى لو بيفكر هيبصلي انا؟ هيبص لنرجس الجاهلة اللي مكملتش علامها!! هيبص لواحدة زيي

مسك بـ أنكار: ايه واحدة زيك دي؟ انتي فيكي ايه ان شاء الله ناقصة ايد ولا رجل؟ مش معنى انك مكملتيش تعليمك تبقي وحشة ولا نقصك حاجة ابدا هو كان بكيفك يعني انك متتعلميش ولا ظروف العيشة اللي احنا عايشنها والحمدلله احنا احسن من غيرنا .. انتي 100راجل يانرجس .. متقلليش من نفسك عشان حد انتي حاجة كبيرة اوي اوي ويابخت اللي انتي من بخته .. واخويا ييقى ربنا بيحبه لو فعلا طلعتي نصيبه

نرچس رمت نفسها في حضن مسك وبكت من جوه قلبها .. صعب انك تحبي حد مش حابك واصلا مش حاسس بيكي .. بس الحب مش بأدينا ولا بـ اختيارنا .. ولكن بـ أختيارنا نتناسى ونقوى ونحفظ كرامتنا

___________

اما في شقة مسك


اختك فين ياخاالد!!!!!

خالد: رحيم تعال اتفضل

رحيم بغضب: مش وقته والله اختك فين

خالد: فين يعني ايه؟ هتلاقيها على العربية

رحيم بقلق: يعني هي مش هنا! ومش على العربية لان العربية مقفولة .. ومش بترد على تليفونها هتكون راحت فيييين!!!!

خالد بتوتر: يمكن بتشتري حاجة وجاية على هنا انت هتقلقني ليه

رحيم: لاني بقالي ساعة برن عليها والهانم مش بترد

خالد: خلاص تعالى ننزل ندور عليها

_تدورا على مين بالظبط .. هو فيه ايه

دا كان سؤال المسك اللي سألت بأستغراب وهي طالعة على درجات سلم العمارة

رحيم بغضب: انتي كنتي فين ياهانم ومش بتردي على الزفت التليفوووون ليه

مسك: انت بتزعقلي ليه دلوقتي مسمعتوش ايه اللي حصل يعني

خالد: صلو على النبي ياجماعة صوتكم عالي واحنا على السلم ميصحش كده

رحيم ومسك: عليه الصلاة والسلام

خالد: تعالي يارحيم ادخل ونتكلم بهدوء جوه

رحيم دخل فعلا وقعد على الكرسي اللي موجود وبيبص لمسك بغضب .. اما خالد فدخل يعمل لرحيم حاجة يشربها

رحيم بغضب حاول يتحكم فيه: كنتي فين

مسك: عند خالتي ام نرچس هكون فين يعني

رحيم: ردي عدل يامسك انا على اخري انتي حرة بقا .. مرنتيش عليا ليه وقولتيلي انتي راحة فين ولا حتى قولتي لـ اخوكي

مسك: والله انا مش صغيرة عشان اخد الاذن قبل ما اروح في حته

رحيم بص في عنيها بتركيز: انتي شايفه كده؟

مسك بعند: اه

وقف بحده وبقوه قال: يبقى خسارة قلقي عليكي

قال كلامة وخرج بره الشقة .. مسك جريت تحصله وهي بتنادي عليه ..

مسك: سي رحيم ياسي رحيم استنى بس

رحيم: عايزة ايه ياهانم

مسك: خلاص متزعلش انا مقصدش بس انت اللي غلطان من الاول ازاي تزعقلي كده

رحيم: الغلط غلطي يعني؟ والهانم مغلطتش؟

مسك: انا مغلـ

رحيم بحده: اييييييه

مسك: غلطت

رحيم: اه بحسب

مسك: بصراحة مكنش معايا رصيد وخالتي طلبتني ضروري فروحتلها علطول

رحيم: ومكنتيش عارفة تعدي عليا تقوليلي انتي راحة فين ولا لازم عقلي يشت مني وقعد اقول ياترى راحت وجت منين واجري ادور عليكي زي العيال الصغيرة

مسك بأبتسامة: ليه كل ده يعني هتووه مثلا

رحيم: لا وانتي الصادقة هتتخطفي انتي مش دريانة باللي بيحصل والزمن المهبب اللي بقينا فيه

مسك: ياعم خليها على الله وبعدين انا محدش يقدر يعملي حاجة دا انا كنت قسمته نصين

رحيم: خاطب بلطجي ياناس

مسك: اذا كان عاجبك

رحيم: من ناحية انه عاجبني فهو

مسك: شششش ايه صلي على النبي كده وشوف انت رايح فين

رحيم:عليه افضل الصلاة والسلام .. طب بقولك ايه امي عزماكي انتي وخالد تتغدوا معانا يوم الجمعة بعد بكره يعني

مسك: اممممم

رحيم: ايه امممم دي

مسك: لا اصل غريبة يعني دي اول مره امك تعملها

رحيم: ايه امك دي؟ اسمها والدتك يامتعلمة وبعدين ولا غريبة ولا حاجة بس عشان هنحدد معاد كتب الكتاب

مسك: دا مين اللي قال الكلام ده

رحيم بتحدي: انا! عندك مانع؟ خالد اسبوع وهيخلص امتحاناته وانا خلاص جبت اخري هنكتب الكتاب يعني هنكتب الكتاب .. وبعدين نبقا نستنا شوية على ما نجهز كل حاجة لشقتنا اظن معندكيش اي حجج

مسك: لا معنديش .. وكملت بصوت هامس موصلش لرحيم: ربنا يستر بقا

_____________

اما في اكبر مطعم من مطاعم مصر .. كريم كان قاعد ومعاه هدى ودار بينهم الحوار التالي

هدى: ها ياسيدي جتلك على طول زي ماطلبت في ايه بقا قلقتني

كريم بهدوء: لا قلق ولا حاجة بس لنا لقيت فكره مشروع بـ مليون جنية

هدى بحماس: ايه هي

كريم: بصي ياستي دلوقتي الناس بتحب اكل الشارع ولاحظت ان في اقبال على عربيات الاكل اللي بتكون موجودة في شوارع كتير وفعلا في اكل بجد حلو

هدى: طبعا عارفة بس مش فاهماك احنا هنعمل ايه؟ يعني هنعمل عربيات اكل في الشارع؟ بس دي فيه منها كتير!!! كدا احنا هنتميز بأيه؟

كريم: هنتميز بأننا هنفتح مطعم لاكلات الشوارع

هدى: لا معلش فهمني مش فاهمه انا

كريم: يعني ياستي هنجيب ناس من اللي فاتحين عربيات في الشارع سواء بيعملوا اكل حلو او حادق .. ومش هنختار اي حد لا احنا هنختار الافضل مابينهم وبدل مابيشتغلوا في الشارع هنشغلهم معانا هنا وهيبقى ليهم نسبة من الارباح كمان يعني مش مجرد ناس بتطبخ حتى ديكورات المطعم هتبقى مستوحاه من عربيات اكل الشوارع وكمان اسعار الاكل هتبقى معقوله .. يعني اي حد يقدر يشتري وبأذن الله هعمل فروع في مناطق مختلفة

هدى بحماس: فكره ممتازه ياكريم اعتقد محدش فكر فيها قبل كده (غيري طبعا 😎😂)

كريم: موافقة يعني ولا ادور على شريك غيرك

هدى: معاك وش

كريم وش!!! انتي متاكدة انك لسه راجعة برا مصر من يومين بس؟

هدى: يابني انا مصرية ابا عن جد مش معنى اني سافرت كام سنة لـ أوروبا اني انسى بلدي يعني

كريم: عندك حق ياصحبي

هدى :تاني صاحبك؟ يا حبيبي انا بنت والله مش كان ربنا تاب عليك وبطلت تقولي الكلمة دي

كريم بأستفزاز : اعمل ايه يعني وانا فعلا حاسك صاحبي

بصتله بغيظ وحزن حاولت تدارية وسكتت 🙂

*********************
إلي هنا ينتهي الفصل الثالث من رواية جحيم حبك بقلم شيماء عصمت
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة