مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة شيماء عصمت علي موقعنا قصص 26 وموعدنا اليوم مع الفصل الثالث عشر من رواية جحيم حبك بقلم شيماء عصمت
رواية جحيم حبك بقلم شيماء عصمت - الفصل الثالث عشر
رواية جحيم حبك بقلم شيماء عصمت - الفصل الثالث عشر
بعـد صيـاح نرچس بـ جملة "قتلت خالـد يارحيـم .. قتلـــــته"
الشـارع اللي كان فاضي والجميع نيـام خـلال دقايق كان كل اهل المنطقة متجمعيـن حواليـن رحيـم وجثـه خـالد .. وسؤال دايـر بين الكـل ليـه رحيـم قتلــته
……………
في شقـة "مـسك"
مـسك كانت لسـه مخلصـه صلاتهـا ولبسـه أسدالهـا ، سمعت دوشـه وفي صريخ مش عارفة ايـه مصدره .. بـ سرعة جريت على شباكهـا تطل منه وتعرف ايـه اللي حصل .. قلبهـا مقبوض وقلقانـه على أخوهـا .. شافت ناس كتير متجمعيـن على أول الشارع .. لمحت الطفل "عبدالله" بيجري ندهت عليـه
مـسك بـ قلق: هو فيـه ايـه ياعبدالله؟ تعرف اهل الحارة متجمعيـن كده ليـه يا حبيبي
عبدالله بـ حزن طفولي: عمو رحيـم ضرب عمو خالـد أخوكي وعوره
مـسك بـ خضـة : يامصبتي خالـد
نزلت جري على الشارع وعقلهـا متخيلش لـ لحظه انـه يكون مضروب بـ سلاح
وصلت لمكـان تجمهر النـاس .. شافت "نرچس" بتبكي بـ أنهيـار .. وحد مرمي على الارض وحواليـه بقعة من الدم بـ تكبر وشخص حاطت ايديه علي المكان اللي بينزف
شهقت بـ رعب لما شافت ان الشخص المتصاب ده بيكون أخوهـا "خالـد"
مـسك بـ صراخ: خــــــالد
وقعت على الارض جانبه ونشلته من رحيم وضمته لـ حضنهـا
مـسك بـ أنهيـار: خالـد فيك ايـه؟ ايـه اللي حصل؟ ايـــه اللي حصل؟ خالـد خليك معايا متسبنيش ياحبيبي .. يارب يــــارب
الكل بيبصلهـا بـ شفقـة من شكلهـا المنهـار ..
رحيـم حاول يشيل خالـد من بين أيديهـا رفضت بقوة
مـسك: متلمسهــوش .. وكملت كلامهـا للواقفين: اطلبـوا الاسعاف انتوا بتتفرجوا على ايـه اطلبـوا الاسعـاف بـسرعــــة
ثواني في دقايق على ما وصل الاسعاف وتم نقل "خالـد" للمشفى
…………………
في شقـة رحيـم
سميحـة سمعت الجيران وهمـا بيقولوا ان أبنهـا قتـل "خالـد" في الاول ماصدقتش لحد ما شافت بعنيـها رحيـم أبنهـا وهو جنب جثه خالـد
سميحـة بـ عويل: يامراري الواد اللي طلعت بيـه من الدنيا هـ يروح مني يامصبتي السوده
سـالي طلعت من أوضتهـا على صريخ أمها وهي هزيله وتعبانه
سـالي بـ تعب: فيه ايـه ياماما عامله في نفسك كده ليـه؟
سميحـة بـ بكاء:انتي نايمة على ودانك ياختي ومش دريانه بـ المصيبة اللي احنا فيهـا اخوكي هـ يتعدم ياختي حبل المشنقنة هـ يلف حواليـن رقبته اااه ياني
سـالي بـ خضـة: فال الله ولا فالك بتقولي كده ليـه ياماما
سميحـة: اخوكي قتل خالـد قتلـه وكل الناس شافته .. كله من بنت الكـ*لب اللي أسمهـا مـسك كان يوم اسود يوم مادخلت حارتنـا ياحرقة قلبي عليك يابني .. اااه يارب نجيـه يارب دا هو سندنا في الدنيـا .. اعمل ايه واروح فيـن يا ميلة بختك يابني اااه يا ضنايا
سـالي بـ صدمة دخلت أوضتهـا .. خدت تليفونهـا واتصلت على رقم متسجل عندهـا
سـالي بغضب: الحقني اخويـا راح في داهيـة و بسببك .. رحيـم قتل خالـد عارفـة يعني ايـه قتله يا "سهر" وكل ده بسبب خطتك القذرة .. انا لو اخويـا مش طلع من المصيبة اللي هو فيهـا دي ، هـ أفضحك يا سهر وهـ فضح خطتك الحقيـرة كلهـا ، ومش هـ يهمني اي حاجة واي حد حتى نفسى انتي سامعه ، منك لله ياشيخة منك لله
…………………
أمـا عنـد سهر
كانت هـ تتجنن من اللي حصل وقلبهـا بينبض برعب وقلق على رحيم اينعم هي اللي حطت الخطه مع سـالي و ازاي يورطوا خالـد ويلغوا فرح "رحيـم ومسك "
بس ما اتخيلت للحظه ان رحيـم يقتله ويتسجن ويبعد عنهـا دي ممكن تموت فيهـا
سهر لـ نفسهـا: فكري يا سهر فكري لازم رحيـم يخرج من المصيبة دي لازم .. مش هـ أخلي حاجة تأذيك يا رحيم على جثتي دا يحصل
………………
امـا في المستشفى
خالـد دخل أوضه العمليـات ورحيم ومسك منتظرين بره
"مـسك"
بـ تتلى أيات من القرآن ولسنهـا مبطلش دعاء ولو ثواني .. دموعهـا بـ تنزل من دون أرادتهـا .. خالـد لو جراله حاجة هي هـ تموت!!
"رحيـم"
شايف حالتهـا اللي كسرت قلبـه .. دي أول مره يشوفهـا بـ الضعف ده .. من أول يوم شافهـا فيه من ست سنين اول ما سكنت هي وأخوهـا في حارتهم .. كانت لسـه يادوبك بنت 19 سنـه ومعاهـا أخوهـا 16سنـة .. عقلهـا دائما كان أكبر من سنهـا كانت بتشتغل في مطعم ولمـا المطعم قفل فكرت وفتحت "عربيـة الكبـدة" ورفضت مساعدة اي حد .. عمرهـا ما عملت اي تصرف غلط بتعامل الكل كويـس عارفة ربنـا ودا اللي وقعه في حبهـا وطلبهـا يومهـا كان ليهـا شرط
مـسك: انا مش هـ بطل شغل .. وان كنت معترض على عربيـة الكبـدة فـ أنـا ناويـة أفتح مطعم لمـا ربنـا يفرجهـا عليـا لو موافق نقرأ الفاتحة امـا لو لا فـ كل شيء قسمة ونصيب
يومهـا كبرت في عينـه أكتر واكتر .. بنت فيهـا كل المواصفات اللي تتحب .. متعلمة وذكيـة وطموحة وفوق كـده حسنـه الخلق .. لا طلبت مهر بـ المبلغ كذا ولا حتى شبكة بـ كذا
كل اللي قالتـه "على قد لحافك مد رجليك اللي هـ تقدر تجيبـه هاتـه كل واحد وظروفـه وانـا عارفة ظروفك وقبلاهـا"
فاق من سرحانـه واتنهد بـ قهر وحزن ازاي هانت عليـه يكسرهـا بـ الشكل ده يوم فرحهـا؟
ازاي هرب وأتخلى عنهـا؟
الف أزاي وأزاي ومش لاقي أجابـه!
قرب منهـا يوسيهـا ويادوب هـ يلمسهـا بعدت عنـه بـ نفور قتلـه
مـسك بـ غضب: أياك تلمسني أيــاك ، انت جاي هنـا ليـه؟ عايز تشمت فيـا؟ فرحان وانت شايفني مقهورة على أخويـا؟ انت هنـا ليـه يا رحيــم
رحيـم: جاي أقف جانبك انا مأذتش خالـد يا مـسك
مـسك: تقف جانبي؟ بـ أماره ايـه؟ ناسي من شهر فات انت عملت ايـه؟ انا محدش أذاني قد ما انت أذتني وكل اللي بيحصل في أخويـا دا بسببك
رحـيم قرب منهـا وحاول يمسك أيديهـا بس بعدت عنه
رحيم بـ رجاء: صدقيني يامسك مش انا اللي ضربتـه انا لقيته مرمي على الارض غرقان بدمـه
مـسك بـ سخرية ووجع : سبحـان الله من شهر فات اترجيتك عشان تصدقني ان أخويا مظلوم ودلوقتي انت جاي تترجاني .. عارف ايـه اللي يوجع؟
رحيم بـ وجع: أيـه!
مـسك: اني متأكدة ان انت مضربتهوش .. لانك مش بلطجي يارحيم مشكتش انك عملت كده للحظة .. بس اللي متأكدة منه انك السبب في اللي حصل لـ أخويـا .. انت أدتني أكبر درس أتعلمته في حياتي أن مينفعش اتعشم وأثق ف اي حد مهما كانت درجة قربـه ليا .. انا عايزاك تطلع من حياتي مش عايزة اشوف وشك من النهـارده ابعد عن تربيه الشوارع
رحيم: انا أسف يا مـسك أسف على كل كلمة قولتهـا غلطت في حقك بس أخوكي يستاهل
مـسك: انت ظالم يارحيم ظالـــم مش مكفيك اللي هو فيـه!! انت ازاي كده ابعد عني وعن أخويـا لاخر مره هـ أقولهـالك عشان بعد كده لو قربت منه هـ أقطعك بسناني انت واللي ويقفلك
رحيـم: انا بحبك يا مـسك وأخوكي هو اللي فرق بينا
مـسك: حب؟ تعرف ايـه انت عن الحب؟ لو الحب بـالنسبالك انك تتخلى عني وتخلي اللي مكنوش يقدروا يرفعوا عينهم فيـا بـقو يخوضوا في شرفي وسمعتي فـ أنا مش عايزة الحب ده .. انما حكايـة ان أخويـا هو السبب فـ معتقدش وعارف انا متأكده انك من جواك عارف ان خالد بريء بس مش عايز تصدق عارف ليـه؟ عشان عايز تصدق ان أختك اللي انت مربيهـا لا أستحاله تهز ثقتك فيهـا وانهـا لا يمكن تضيع شقاك عليهـا يمكن يكون عندك حق محدش يحب انـه يشوف عمره وتعبـه بيروح هدر بس اكيد محدش بيحب الظلم وانت ظلمت أخويـا وبـ تسرعك ظلمتني معـاه امشي يا رحيـم امشي ومتجيش هنـا تاني وانسى انك عرفت في يوم واحدة اسمهـا مـسك عبدالرحمن
………………
في بيت "هدى"
هدى كانت في المكتبـة بتشتري أدوات الرسم بتاعتهـا وبـالمرة تفكر في تصرف "كريم" الغريب .. وايـه سبب غضبـه من "وليـد" تخيلت انـه ممكن يكون غيران عليهـا بس في نفس اللحظة شالت التفكيـر ده اصل مش معقول!
وصلت بيتهـا وفتحت باب شقتهـم واتفاجئت بـ وجود "كريم"
طـارق "والد هدى" : تعالى ياهدى مش هـ تصدقي كريم جاي دلوقتي ليـه
هدى بـ أستغراب: خيـر ان شاء الله
ردت ألفـت "والده هدى" : كريم طلب أيـدك ياهدى ألف مبروك يا حبيبتي
هدى بـ صدمـة: ها!!…
…………………
في المستشفى
الدكتور خرج من عند "خالـد"
مـسك جريت عليـه بـ لهفـة وكذلك رحيـم
مـسك: طمني يادكتور اخويا حالتـه ايـه
الدكتور بـ عمليـه: الحمدلله المريض حالته كويسـه ومن حسن حظه ان الطعنـه موصلتـش لـ تجويف البطن كلهـا ساعة ولا اتنين والمريض يفوق
مـسك اتنهدت بـ راحة الى حد ما
الدكتور كمل: كمان اداره المستشفى بلغت البوليس عن الحادثة دي محاولة الشروع في قتل البوليس على وصول
مـسك بصت لـ رحيم والدكتور مشي
رحـيم بـ هدوء: مش هـ أهرب انا معملتش حاجة وحمدلله على سلامـه أخوكي
خلص كلامة وراح قعد على كرسي من اللي موجودين
ساعة مرت والبوليس كان قابض على رحيم او بـمعني اصح هو سلم نفسـه وهو واثق من برأته
وكمـان "نرچس" وصلت المستشفى واتطمت على وضع "خالـد" من "مـسك"
نرچس بـ راحة: الحمدلله ان خالـد كويس انا قلبي كان هـ يقف من الخوف عليـه
مـسك بـ أبتسامة بسيطـة: وانا اللي فكرت انك بطلتي تحبيـه
نرچس: اهو من صغري ملقتش غيره قدامي قولت أمـا احبـه
مسك: انتي مجنونـة والله
نرچس: بس عارفة احسن انهم قبضوا على اللي ما يتسمى رحيم خليـه يتبهدل زي ما بهدلك
مـسك بـ حدة: نرجــس!
نرچس بلا مبالاه: بلا نرجس بلا بطيخ يستاهل قتال القتله ده
مـسك: اللهم لا شماتـه ياهانم ثم مين قالك ان رحيـم هو اللي عملهـا
نرچس: مش محتاجة ذكاء يعني خالد النبي حارسه و صاينـه واقع وعايم في دمـه واللي ينشك في زوره رحيم فوقيـه هيكون من اللي عملهـا انا مثلا!!!
مـسك: لا أنـا! افتح دماغك يا بني ادمه بـ راس عجل انتي يابت عايزة تنقطيني
نرچس: قولي انك حنيتي بقا؟ وكملت بـ تريقه: وصعبان عليكي سي رحيم
مـسك: طب والله العظيم انا ماغلط انتي فعلا بني ادمـه بـ راس عجل غوري يابت روحي ودا مفتاح شقتي بكره الصبح تيجي بـ هدوم ليـا و لـ خالـد هـ تلاقي هدومـه على الحبل وفي فلوس تحت مخده سريري خدي وهاتي فرخة حلوه كده واسلقيهـا وهاتيهـا بـ شوربتهـا أخويـا محتاج يتغذى بعد النزيف دا كلـه
…………………
في بيت هدى
هدى كانت لسـه واقفـه وما زالت على صدمتهـا بس من جواهـا بترقص زي الاطفال في ليله العيد
طارق: ايـه يا هدى واقفة كده ليـه تعالي اقعدي جنب عريسك
هدى بصت حواليهـا تتأكد اذا كان في حد جانبهـا متوجهله الكلام ده غيرهـا
وكريم من شكلهـا كان هـ يضحك بس مسك نفسـه
ألفـت قربت من بنتهـا وحست بالحيـرة اللي هي فيهـا
ألفـت بـ حنان: تعالي اقعدي ياحبيبتي اكيد اتفاجئتي
هدى قعدت وأخيـرا بصت لـ كريم اللي قاعد بـ كل ثقة وكأنـه متأكد انهـا هـ توافق؟!!!
هدى بـ تحدي: ومين قـال اني موافقة اتجوز كريم أبن عمي
الكل بـصلهـا بـ ذهول وخصوصـا كريم اللي بـ أستغراب قال:
كريم: ومش موافقة ليـه يابت عمي؟
وكمل بغضب : ولا فيـه حد في حياتك؟
هدى بـ أستفزاز: والله انا حره ملكش تسألني فيـه ولا مفيش الوحيد اللي ليـه الحق هو بابـا غير كده لا
كريم بـ تحدي: طب أعملي حسابك ان خطوبتنا الاسبوع الجاي دا بعد اذنك طبعا يا عمي
طـارق: وأنا موافق ياكريم أيدك نقرأ الفاتحة
هدى بـ صدمة: بابا!…
طارق بـ صرامـة: الفاتحـة ياهدى
…………………
في شقـة أبراهيم عدوي
سهر طلعت بـ سرعة من أوضتهـا واتوجهت لـ غرفـة والدهـا وهي منهارة من العياط بعد ماعرفت ان البوليس قبض على رحيم
سهر بـ أنهيـار هألحقني يا بابا
أبراهيم بـ قلق ورعب من منظر بنته الوحيدة: في ايـه ياقلب أبوكي بتعيطي كده ليـه
سهر بـ شهقات بكاء: رحيم اتسجن يابايا رحيم قبضوا عليـه متهمينـه في قتل خالد بس هو اكيد بريء أكيــد .. اعمل اي حاجة يابابا عشان خاطري اعمل اي حاجة وطلعـه رحيم لو جراله حاجة وبعد عني هـ موت يا بابا هـ مــــوت
تابع من هنا: جميع فصول رواية رواية احفاد الجارحي بقلم آية محمد
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا