-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية جحيم حبك بقلم شيماء عصمت - الفصل السادس

 مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة شيماء عصمت علي موقعنا قصص 26 وموعدنا اليوم مع الفصل السادس من رواية جحيم حبك بقلم شيماء عصمت

رواية جحيم حبك بقلم شيماء عصمت - الفصل السادس

إقرأ أيضا: روايات عالمية

رواية جحيم حبك بقلم شيماء عصمت

رواية جحيم حبك بقلم شيماء عصمت - الفصل السادس

 نرچس راحت عند مـسك تطمن عليها .. في الوقت اللي دخلت فيه مدخل بيت مـسك هو نفس وقت وصول "خالـد" من الجامعة

خالد: ازيك يا نرچس انتي طالعة عندنا ولا ايه

نرچس بخجل: الله يسلمك ياخالد .. اه طالعة اطمن على مـسك

خالد بأستغراب: تطمني على مسك! ليه؟ هي مش على العربية؟!!!

نرچس: هو انت متعرفش اللي حصل ولا ايه!

خالد: لا معرفش هو فيه ايه بالظبط؟!!

نرچس قالتله على اللي حصل مع مـسك بأختصار

خالد بقلق: طب تعالي يلا نطمن عليها .. نرچس كانت لسه هتطلع على السلم منعها خالد وبحرج قال: استني اطلع انا الاول وانتي اطلعي ورايا

نرچس فهمت انه مش عايزها تطلع على السلم قدامه .. بصتله بحب وفخر انها بتحب انسان زي ده .. ودعاء صامت لـرب العالمين انه يجعل "خالـد" من نصيبها


________________


في شقة مـسك


مسك كانت لسه مخلصة صلاتها واعدت تقرأ الورد بتاعها .. قاطعها صوت خبط على الباب صدقت وقفلت المصحف .. وبخطوات بطيئه اتجهت للباب وفتحته

خالـد قرب عليها بلهفه وضمها: انتي كويسة يامسك ايه اللي حصلك ومين اللي اتخانق معاكوا .. بص على رجلها وبخوف قال: رجلك جرالها ايه

مـسك بأبتسامة حب من قلقة عليها : اهدى ياحبيبي دي حاجة بسيطة مفيش حاجة مجرد جزع بسيط .. اهدى كده وادخل بدل مانرجس واقفة بقالها ساعة

خالـد: يعني متاكدة انك كويسة

مـسك: والله العظيم كويسة وسع بقا خلي البت تدخل الله!! تعالى يا نرچس واقفة كده ليه

نرچس فعلا دخلت واخدت مسك في حضنها .. اما خالد فـأستأذن منهم ودخل اوضته عشان يسيب مسك ونرجس على راحتهم

مسك اخدت نرچس ودخلت على اوضتها وقفلت عليهم .. وبعد اسئلة كتيره من نرجس لـ مسك تطمن عليها وبالمرة تعرف ايه اللي حصل وبالتفصيل الممل!!

مسك: وبس ياستي هو دا اللي حصل

نرچس: ياختي ايه الراجل اللي شايف نفسه ده يكونش ابن بارم ديله

مـسك: اسمها ابن بارون ديله ياهبله .. المهم اهو راح لحاله وربنا عداها على خير .. كنت خايفة على رحيم يابت مش عشان هينضرب وكده .. لا خالص انا عارفة ان رحيم بـ100راجل ويسد مع اي حد بس واضح ان الراجل اللي عامل الخناقة واحد تقيل خفت يسجنه زي ماقال

نرچس: ليه هي الدنيا سايبه ولا ايه .. بالك انتي لو انا كنت موجودة كنت قعدت عليه فطتسته

مـسك: هههههههه يخرب عقلك هموووت .. متخيله المنظر والله ههههههه

نرچس: سيبك انتي .. اول مره احس انك بتحبي رحيم

مـسك بأستغراب وأبتسامة بسيطة: وهو انا لو مش بحبه كنت اتخطبت ليه ؟ او حتى استحملت امه والصفرا اخته؟!!

نرچس: ياسيدي ياسيدي .. اومال ليه مصدرة الوش الخشب للراجل طول الوقت؟

مـسك بقوة: لان دا اللي المفروض يحصل .. رحيم "خطيبي" مش "جوزي" يعني لسه ملهوش اي حقوق عندي .. يعني مينفعش اخد راحتي وارحرح معاه في الكلام وكده .. والحمدلله ربنا رزقني بـ واحد زي رحيم .. عارف حدودو ربنا وحدودو معايا .. انا عشان بحبه مش عايزة اغضب ربنا فيه .. عشان يجمعنا على خير واساسنا يبقى سليم ومتين .. ايوه بقالنا سنتين مخطوبين بس عمره ما لمس ايدي .. حتى لو بالغلط والشهادة لله هو عمره ما حاول حتى .. راجل بجد .. وحتى كلمة "بحبك" عمره ما قلهالي بس بيعبر عنها في كل موقف بحتاجه فيه .. بوقفته جانبي ومساعدته ليا حتى لو مطلبتش .. بخوفه عليا حتى من نفسه .. انا محوشاله كل مشاعري .. كل حاجة حلوة شيلهاله لحد ما ابقى مراته على سنة الله ورسوله .. فهمتي حاجة يافالحة

نرچس: اومال .. فهمت طبعا هو انا هبلة

____________

الايام بتمـر .. وخالد خلص امتحاناته ومنتظر النتيجة .. مـسك مستمره في شغلها على عربية الكبدة .. اما رحـيم فـ اشترى الورشة وابتداء في تجديدها ونقل شغله كله فيها .. سهر بتحاول على قد ماتقدر تلفت انتباه رحيـم ليها بس كل محاولتها بائت بـالفشل .. حتى "سيمحـة" مقدرتش تقنع رحيم بـالغاء جوازة من مـسك .. و رحيـم كان صارم معاها جدا وخصوصا بعد اللي عملته مع مـسك وقت خناقته مع كريم .. كريم اللي رجع عند مـسك واعتذر منها على اسلوبه اللي كان "زفت" معاها وكمان عرض عليها انها تشتغل معاه في مشروعة .. مـسك قبلت اعتذاره بس رفضت رفض تام شغلها معاه .. بس دا ممنعهوش انه يسبلها "الكارت" بتاعه عشان لو غيرت رأيها .. رحـيم اتفق مع مـسك على معاد كتب الكتاب وفكرة الغدا اللي كان في بيته بحجه تحديد معاد كتب الكتاب .. فـ مسك لغتها تماما وخصوصا بعد معاملة سميحة معاها .. الاوضاع مستقرة والحياة ماشية وكل واحد مركز في حياته .. كل الايام شبة بعضها الا انهاردة .. عشان انهارده نتيجة "خالـد" هتظهر وراح بنفسه يشوفها .. اما مـسك فضلت انها تستناه في البيت حتى مفتحتش عربيتها انهارده

___________

مـسك كانت قاعدة متوتره وقلقانة بتدعى من كل قلبها ربنا يعوض صبرها خير .. وخالد ينجح وبتقدير عالي .. تليفونها رن وكان رحيم

مـسك بتوتر: الــو .. سي رحيم

رحـيم: كنت متأكد اني هلاقيكي قلقانة كده .. اطمني ان شاء الله خير .. خالـد تعب وذاكر وبأذن الله ينجح ويحقق حلمك وحلمه

مـسك بتمني: اللهم اميـن .. ادعيله يارحيـم ربنا يفرح قلبه ويجيب المجموع اللي بيتمناه وينجح .. خالـد تعب ويستاهل ينجح يستاهل والله

رحيـم: ان شاء الله يا مـسك اطمني بس انتي ومتتوتريش ربنا هيجبر بخاطرك يامسك

مـسك: ربنا يخليك يارحيم ويخليك .. مكملتش كلمها وصوت خبط الباب قاطعها بلهفة قالت: الباب بيخبط يارحيم اكيد خالد هقفل وابقى اكلمك تاني

رحيم: تمام ابقي طمنيني يامسك .. سلام

مسك :حاضر ياخويا مع السلامة

قالت كلامها وقفلت ورمت التليفون على الكنبة وطلعت تجري على الباب فتحت بلهفة واتصدمت من اللي شافته

_____________


في ورشة رحيـم


رحيـم كان شغال اتفاجئ بصوت وراه

_رحيـم

التفت يشوف مين وأتفاجئ بوجود سهر بنت المعلـم أبراهيم عدوي

رحـيم بأستغراب من وجودها: خير ياانسه سهر العربية فيها عطل تاني؟!!

سهر برقة: لا العربية كويسة جدا .. بس انا اللي مش كويسة

رحيـم: خير في حاجة؟ المعلم إبراهيم كويس؟

سهر: لا ابدا بابا كويس انا عايزة اقولك على حاجة مهمة جدا يارحيم

رحيـم وهو غاضض بصره عنها: اتفضلي قولي .. انا سامعك

سهر: مش هينفع هنا ممكن نتقابل في اي مكان بعيد عن الورشة والحارة

رحـيم: افندم!!!!! لا طبعا مينفعش .. اذا كان خطبيتي مقعدتش معاها القاعدة اللي انتي بتقولي عليها دي؟ فـ هعملها معاكي انتي!!!

دا طبعا اللي قاله لنفسه ومقدرش يقولوا ليها

سهر: ها يارحيم قولت ايه

رحـيم: قولت لا اله الا الله .. بس اعذريني مش هقدر اقابلك في اي حته .. انتي لا تقولي اللي عندك هنا لا اما اجي انا عند المعلم ابراهيم وتقولي اللي انتي عايزاة قدامه

سهر بدموع مزيفة: ارجوك يارحيم خلينا نتقابل في اي مكان بعيد عن هنا الموضوع حياة او موت وحيات اغلى حاجة عندك توافق ارجووووووك

رحيـم سكت ثواني بيفكر يعمل ايه؟ يوافق! ولا يرفض بس كان قراره في الاخر

رحـيم: موافق .. قوليلي عايزة نتقابل فين وامتى؟!!!

_____________

كريم كان مستمر بتنفيذ مشروعة .. قدر يجمع احسن ناس بتبيع اكل في الشارع طبعا بـ مساعدة هدى .. اشترى المكان اللي هيعمله مطعم .. ومنتظر انتهاء تشطيبة عشان يبدأ بالتتفيذ .. في الفترة اللي فاتت راح كتير حارة "مـسك" كان بيكتفي انه يراقبها من بعيد في حاجة جواه بتشده ليها .. حاجة معرفش يفسرها .. لما راح اعتذرلهـا وعرض عليها تشتغل معاه كان من جواه بيتمنى توافق .. بس للاسف رفضت ومحاولش يضغط عليها وفي نفس الوقت مقدرش يبطل يراقبها .. أمـا هدى فكانت حاسه بتغير في كريم من وقت الخناقة اللي حصلت عند "رحيـم و مـسك" .. بس معرفتش سبب التغير دا ايه .. بتحاول تقرب منه وتلفت انتباهه ليها .. بس دايما بتتراجع وتخاف تخسره للابد لو عرف حقيقة مشاعرها!!!


…………………………


في شقة مـسك


مـسك طلعت تجري على الباب .. فتحت بلهفة واتصدمت من اللي شافته

مـسك بصدمة: أنتي

نرچس: ايوه انا يااختي مستنيه مين؟ وسعي كده وخليني ادخل .. خلصت كلمها وزقت مـسك ودخلت وقعدت وربعت كمان

مـسك: انتي ايه اللي جابك يابت؟ ودلوقتي! انتي مروحتيش الشغل؟

نرچس: لا مرحتش يااختي مقدرش يامسك قلبي واكلني عليه

مـسك: قلبك واكلك على مين يامقصوفة الرقبة انتي؟!!

نرچس بخجل وارتباك: على سي خالد طبعا مش انهارده نتيجته هتظهر

مـسك: وانتي عرفتي منين ياهانم

نرچس: ياحبيبتي انا بعد الايام واليالي عشان اشوفه متخرج كده ويبقى اجدعها مهندس فيكي يامصر

مـسك: طب لمي الدور ياختي واتظبطي كده ولا اقوم ارقعلك على سداغك (خدودك .. تقريبا 😂😂)

نرچس: اكبتي مشاعيري اووي ياختي اكبتتي

مـسك: لا مشاعيرك بلا بتنجان .. انا هموت من القلق يابت يا نرچس خالـد اتاخر اوووي

نرچس: كل تأخيرة وفيها خيره .. عارفة يامسك رغم ان خالـد لما ينجح ويبقى بشمهندس قد الدنيا والفرق بيني وبينوا هيبقى زي الفرق بين السما والارض .. بس في كل صلاة ليا كنت بطلب من ربنا يحققله كل اللي بيتمناه .. خالـد ابن حلال ويستاهل كل خير

مـسك: ايه الكلام العبيط دا؟!! انتي الف واحد يتمناكي ولو ليكي نصيب فـ اخويا يبقى ربنا راضي عنه وبالقوي كمان .. اعرفي قيمة نفسك يانرجس .. وعقدتك انك مكملتيش تعليمك انسيها ومتركزيش معاها .. خالـد ميفرقش معاه الكلام ده .. دا تربيتي يابت

قاطع كلامهم خبط على الباب .. مـسك: اكيد دا خالد .. اجبر بخاطرنـا يارب

بسرعة جريت على الباب وفتحته لقت خالـد قصادها بس عيونه مليانـه دموع وراسه منحنيه بـأنهزام

*********************
إلي هنا ينتهي الفصل السادس من رواية جحيم حبك بقلم شيماء عصمت
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة