-->
U3F1ZWV6ZTMzNTg0ODE3NzI1X0FjdGl2YXRpb24zODA0Njk2NDgxODg=
recent
آخر القصص

رواية حارة حورية بقلم دودو محمد - الفصل الثانى

مرحباً بكم أصدقائي وأحبابي عاشقي القراءة والقصص الرومانسية مع رواية رومانسية جديدة للكاتبة المتميزة دودو محمد والتي سبق أن قدمنا لها العديد من القصص والروايات الجميلة علي موقعنا قصص 26 وموعدنا اليوم مع الفصل الثانى من رواية حارة حورية بقلم دودو محمد

رواية حارة حورية بقلم دودو محمد - الفصل الثانى

اقرأ أيضا: قصص رومانسية

رواية حارة حورية بقلم دودو محمد

رواية حارة حورية بقلم دودو محمد - الفصل الثانى

 منزل عائلة يحيى


يجلس يحيى على السرير وهو منفعل ويقوم بهاء بتهدأته وفى ذلك الوقت سمعوا صوت طرق على الباب ذهب بهاء بأتجاه الباب وقام بفتحه وقال


بهاء :- خير يا امى

اعتماد :- يلا يا حبايبى حضرت ليكم الأكل

بهاء :- ليه تعبتى نفسك بس يا امى

اعتماد :- مفيش تعب ولا حاجه يلا قبل ما الأكل يبرد

بهاء :- ماشى هجيب يحيى وجاين وراكى علطول

اعتماد :- ماشى يا ابنى وتركته وذهبت

بهاء :- نظر بأتجاه يحيى وقال قوم يلا علشان ناكل

يحيى :- مش عايز مليش نفس

بهاء :- فكك شويه بقى وقوم يا ابنى بلاش نكد الله يكرمك ده انت بقيت اوڤر اوى والله

يحيى :- بهاء بقولك ايه متزهقنيش عايز تاكل روح كل انت انا هنام واغلق عيناه

بهاء :- ده انت بقيت غتت يا اخى هوف وتركه وخرج من الغرفه

يحيى :- فتح عينه ونظر أتجاه الباب وتنهد بحزن

بهاء :- ذهب اتجاه اعتماد وقال أنا ماشى بقى يا امى

اعتماد:- رايح فين يا ابنى الأكل جاهز

بهاء :- معلش يا امى انا مش جعان انا كنت بقول كده علشان أخلى يحيى ياكل بس هو رفض ونام وانا كمان هروح انام الوقت أتأخر تصبحى على خير

اعتماد :- وانت من أهله يا حبيبى

بهاء :- مش محتاجه حاجه منى يا امى

اعتماد :- سلامتك يا حبيبى

بهاء :- ابتسم لها وفتح باب الشقه وخرج منه واغلقه خلفه

.................................................................

فى حارة حوريه


جلست حوريه على الأريكة بجانب شرفة غرفتها وهى تشعر بقلق بالغ وتنتظر عودة الرجال وفى ذلك الوقت اعلن هاتفها بوجود اتصال التقطته سريعآ ونظرت فى الشاشه واجابة بلهفه قائله


حوريه :- طمنى عملتوا ايه

اللمبى :- كله تمام يا ست حوريه والرجاله اتعلم عليها وبيوتهم بقت رماد

حوريه :- بفرحه الله ينور عليكم يا رجاله انا كنت واثقه فيكم انكم قدها وقدود كده انام وانا مرتاحه سلام وأغلقت المكالمه ووضعته على الأريكة وقامت نامت على فراشها وتنهدت بأرتياح وابتسمت قائله ايوه كده علشان الناس تعرف مصير اللى يفكر يقرب من حارة حوريه ونظرة إلى صورة والدها المتعلقه على الحائط وقالت نام وارتاح يا حبيبى متخلقش لسه اللى يجى على بنت المعلم نصار هيفضل اسمك عالى مهما حاولوا يوقعوه الأرض وهحافظ على اسمك اللى انت عملته لاخر يوم فى عمرى وأغلقت عيناه وذهبت فى نوم عميق

....................................................................

اشرقت شمس صباح يوم جديد بنورها الساطع فى سماء الاسكندريه ليبدء يحيى بفتح عينه على صوت رنين جرس الباب نهض من فوق فراشه وذهب اتجاه باب غرفته وخرج وجد امه خارجه من غرفتها ونظرت له بتسأل وقالت


اعتماد :- مين اللى هيجى لينا فى وقت زى ده

يحيى :- ممكن يكون السمسار ومعاه الناس اللى هتشوف الشقه

اعتماد :- تنهدت بحزن وقالت طيب يا ابنى روح افتح ليهم على ما ادخل البس الاسدال

يحيى :- حاضر يا امى وذهب بأتجاه الباب وقام بفتحه وقال أستاذ عطيه اتفضل

عطيه :- معلش جيت ليك بدرى شويه بس الناس حبت تشوف الشقه قبل ما تروح شغلها علشان لو عجبتها تسحب الفلوس من البنك النهارده

يحيى :- لاء عادى ولا يهمك اتفضلوا يا جماعه شوف شغلك انت يا استاذ عطيه

عطيه :- فيه حريم فى الاوض ولا حاجه

اعتماد :- خرجت من غرفتها وقالت السلام عليكم

الكل :- وعليكم السلام ورحمه الله وبركاته

يحيى :- هند فى الاوضه بتاعتها ولا مشيت يا ماما

اعتماد :- لا اختك نزلت الجامعه بتاعتها من بدرى

يحيى :- ماشى خد راحتك يا استاذ عطيه

عطيه :- قام بمعاينة المكان للزبائن وبعد وقت انتهى وتحدث معهم وذهب إلى يحيى وقال الناس عجبتهم الشقه اوى بس المبلغ اللى انت عايزه كتير اوى

يحيى :- والله يا استاذ عطيه انا مرضتش اطلب رقم اكبر من كده وطلبت مبلغ أقل من المفروض

عطيه :- طيب نزل حاجه منها الناس جاهزه وفلوسها على الترابيزه

يحيى :- نظر لأمه وتنهد واعاد نظره مره أخرى إلى عطيه وقال بص انا هنزل خمسه الاف جنيه من المبلغ المطلوب بس مش هقدر انزل اكتر من كده والله

عطيه :- طيب زقها كمان شويه

يحيى :- والله ده أخرى لو عجبهم مفيش اى مشكله

عطيه :- تنهد وقال على بركه الله هما هيمشوا دلوقتى وبليل هيجيبوا الفلوس وتكتبوا العقد

يحيى :- أن شاءالله

عطيه :- وبالنسبه لشقه اللى قولتلك عليها هتروح تشوفها أمته

يحيى :- النهارده أن شاءالله على العصر كده

عطيه :- خلاص ماشى شوف هتروح أمته واتصل بيا علشان اجيلك

يحيى :- تمام

عطيه :- ماشى يلا السلام عليكم ونزل هو واللى معه

يحيى :- أغلق الباب خلفه ونظر لأمه وتنهد بحزن ودخل على غرفته

اعتماد :- نظرت بحزن على حائط الشقه وتنهدت بوجع وجلست على الأريكة تسترجع ذكرياتها الجميله مع زوجها فى الماضى

.....................................................…........

فى حارة حوريه


استيقظت حوريه من نومها و تململت على فراشها بأرتياح شديد ونهضت اتجهت إلى شرفة غرفتها ونظرت منه على الحاره لتطمئن عليها واتجهت إلى المرحاض ودلفت إلى الداخل وبعد وقت خرجت وارتدت ملابسها وخرجت من غرفتها وقالت


حوريه :- رضا يا رضا

رضا :- ركضت إلى حوريه قائله صباح الخير يا ست حوريه

حوريه :- صباح النور يا رضا حضرى الفطار بسرعه

رضا :- حاضر من عينيا هوا

حوريه :- نظرت فى الهاتف الخاص بها وقامت بالاتصال باللمبى وانتظرت الرد

اللمبى :- صباح الخير يا ست حوريه

حوريه :- صباح النور يا لمبى اجهز وتعالى ليا بسرعه فاهم

اللمبى :- حاضر ربع ساعه بالكتير واكون عندك

حوريه :- وهات الرجاله معاك

اللمبى :- حاضر

حوريه :- يلا سلام وأغلقت الهاتف وقالت بصوت مرتفع رضا بتعملى ايه كل ده

رضا :- جاءت تركض وقالت اهو والله الفطار جاهز ووضعت الطعام فوق الطاوله

حوريه :- بدأت تأكل ونظرت لرضا وقالت عملتى ايه فى العريس اللى كان متقدم ليكى

رضا :- الحمدالله رفضه

حوريه :- بتسأل رفضيه ليه

رضا :- ها ك.ك.كده حاسه أنه مش مناسب ليا

حوريه :- انتى فيه حد فى حياتك

رضا :- ها ل.ل.لاء

حوريه :- بعصبيه رضاااااا بلاش كدب انتى عارفه ان انا مبحبش الكدب

رضا :- بتوتر ا.ا.ايوه ب.ب.بحب واحد

حوريه :- مين

رضا :- ها

حوريه :- اتكلمى علطول مين

رضا :- ا.ا.اللمبى

حوريه :- اللمبى! انتى بقى اللى الولا اللمبى قالى عليها

رضا :- ا.ا.ايوه

حوريه :- وانتى اللى رجالة رجب كانوا بيضايقوكى

رضا :- ا.ا.ايوه

حوريه :- ومقولتيش ليا ليه

رضا :- م.م.ما اللمبى قالى أن هو هيقولك والله

حوريه :- نهضت وقالت بعصبيه حسك عينك تخبى عنى حاجه تانى فهمه

رضا :- ح.ح.حاضر

حوريه :- وعلى فكره الولا اللمبى بيحبك بجد

رضا :- ابتسمت بكسوف وقالت ع.ع.عارفه وانا كمان بحبه

حوريه :- طيب اجهزى بقى علشان تبقوا فى بيت واحد وانا هتكفل بكل حاجه

رضا :- بسعاده بجد يا ست حوريه ربنا يخليكى لينا وميحرمناش منك أبدآ

حوريه :- ابتسمت لها وقالت يلا بلاش كلام كتير وشوفى اللى وراكى وتركتها واتجهت إلى باب الشقه وفتحته وخرجت وأغلقت الباب خلفها

رضا :- نظرت بحب اتجاه الباب وقالت ربنا يسعدك ويفرح قلبك يارب يا ست حوريه واتجهت إلى المطبخ

..................................................................

فى منزل يحيى


التقط يحيى الهاتف الخاص بي واجرى اتصال ببهاء وانتظر الرد


بهاء :- يويو صباح الخير

يحيى :- يلعن ابو شكلك

بهاء :- بضحك خلاص خلاص

يحيى :- بتندم الواحد أنه فكر يتصل بيك والله

بهاء :- خلاص بقى يا ابنى بهزر معاك المهم قولى عملت ايه

يحيى :- الناس هتيجى بليل تخلص فى الشقه

بهاء :- طيب مبروك عقبال ما انت كمان تخلص وتجيب الشقه اللى هتعيشوا فيها

يحيى :- هروح النهارده العصر وجهز نفسك انت كمان علشان هتيجى معانا

بهاء :- نعم وانا مال امى وانا كنت خلفتك ونسيتك

يحيى :- اخلص جهز نفسك زى ما قولتلك سلام

بهاء :- استنى يا ابنى انت يا زفت قفل ابن الناس الطيبه

يحيى :- ألقى الهاتف على السرير ونهض ذهب إلى المرحاض وبعد وقت خرج وارتدى ملابسه وأدى فرضه وخرج من غرفته ونظر لأمه وقال انا نازل يا ماما عايزه حاجه

اعتماد :- عايزه سلامتك يا حبيبى رايح فين كده

يحيى :- هتمشى شويه على البحر لحد ما يجى الوقت اللى هروح اشوف فيه الشقه

اعتماد :- طيب مش هتاكل

يحيى :- لاء مليش نفس

اعتماد :- يا ابنى انت مبقتش تاكل خالص

يحيى :- معلش يا ماما مليش نفس عن اذنك وتركها ونزل إلى الاسفل

اعتماد :- تنهدت بحزن وقالت يارب ريح قلبه قلبى بيتقطع علشانه

.................................................................

فى حارة حوريه


تجلس حوريه على المقعد الخاص بها وتنظر إلى رجالها بفخر قائله


حوريه :- الله ينور يا رجاله انا فخوره بيكم بجد وبابا اكيد حاسس بيكم وفرحان ان هو ساب رجاله يعتمد عليها بجد

اللمبى :- احنا رقابتنا علشانك يا ست حوريه عمرنا كله فداكى

حوريه :- تسلم يا لمبى المهم دلوقتى البيوت اللى اتحرقت دى عايزاها ترجع احسن من الاول انا قعدتهم فى البيت الكبير بتاعى لحد ما بيوتهم تتصلح حاولوا تنجزوا بس فى اليومين دول

اللمبى :- حاضر تأمرى بحاجه تانى يا ست حوريه

حوريه :- خلى عيونكم مفتحه علشان اكيد المعلم رجب مش هيسكت وهيحاول يرد لينا الضربه

اللمبى :- متقلقيش احنا واخدين بالنا كويس اوى

حوريه :- خلاص روحوا اعملوا اللى قولتلكم عليه

الرجال تحركت وقبل أن يتحرك اللمبى نظرت له حوريه وقالت استنا انت يا لمبى عايزاك

اللمبى :- اؤمرى يا ست حوريه

حوريه :- بالنسبه ليك انت والبت رضا تروح تكلم أهلها وانا هتكفل بكل حاجه

اللمبى :- ها ر.ر.رضا

حوريه :- ايوه رضا هى قالت ليا كل حاجه

اللمبى :- ا.ا.انا والله كنت ناوى اقولك ب.ب.بس ي.ي.يعنى

حوريه :- خلصنا خلاص نفذ اللى قولتلك عليه

اللمبى :- ربنا يخليكى لينا يا ست الكل

حوريه :- يلا روح شوف شغلك

اللمبى :- من عينيا

حوريه :- اه استنى

اللمبى :- نعم

حوريه :- ايه اخبار فلوس الشهر دفعوها ولا لسه

اللمبى :- كله دفع الا شعبان

حوريه :- وليه مدفعش

اللمبى :- بيقول الشحنه بتاعة العربيات الجديده اتحجزت فى الجمرك ودفع مبلغ كبير علشان يخرجها ومش معاه يدفع الشهر ده

حوريه :- والله مش ذنبى يتصرف هاته ليا وانا هتصرف معاه

اللمبى :- حاضر هيكون عندك حالا عن اذنك

حوريه :- بسرعه وتنهدت وقالت كل شهر واحد يطلع بسبب شكل علشان ميدفعوش ونهضت ذهبت اتجاه الباب ونظرت على الحاره ورأت بعض الوجوه الجديده فى الحاره نظرت بأستغراب وقالت ودول مين دول أن شاءالله وقالت بصوت مرتفع انتوا يا اخ منك ليه

بهاء :- حضرتك بتنادى علينا احنا

حوريه :- وانت شايف فيه حد غيركم انتوا بتعملوا ايه هنا

يحيى :- وانتى مالك بتسألى ليه وازاى تتكلمى معانا كده

حوريه :- بغيظ انت اللى ازاى تتكلم معايا كده انت متعرفش انا مين

يحيى :- معرفش ولا يهمنى اعرف تبقى مين امشى منك ليه

حوريه :- وقفت قصادهم تمنعهم من التحرك وقالت انتوا مش هتمشوا خطوه واحده من هنا غير لما اعرف انتوا بتعملوا ايه هنا فى الحاره

عطيه :- قرب من اذن يحيى وقال بصوت واطي لم الدور دى تبقى الست حوريه

يحيى :- بصوت عالى حصلنا الرعب مين يعنى الست حوريه

حوريه :- بغيظ انت شكلك مجنون انا ابقى ستك وست الحاره دى كلها وممكن ادفنك مكانك ومحدش يعرف ليك طريق

يحيى :- بضحكه عاليه قال خوفت انا كده غورى يا بت بعيد امشى انت وهو

حوريه :- رفعت يدها وقبل أن تضربه بالقلم

يحيى :- مسك يدها ونظر فى عينها بتحدى وقال متخلقتش لسه اللى تفكر تمد ايديها عليا

حوريه :- بصدمه انت اتجننت انت ازاى تسمح لنفسك تمسك ايدى كده ده انت يومك مش معدى

يحيى :- ضغط بقوه على يدها وقال ورينى هتعملى ايه

حوريه :- بصوت مرتفع لمبى ولا يا لمبى

اللمبى :- ركض بأتجاه حوريه ونظر بصدمه ومسك يحيى من لياقة ملابسه وقال سيب ايد الست حوريه ده انت يومك مش فايت ازاى تسمح لنفسك تلمسها

بهاء :- بقلق ها احنا اسفين يا جماعه هو ميقصدش والله احنا اسفين يا ست حوريه اللى ما يعرفك يجهلك احنا لسه جداد فى الحاره وجاين نشوف شقه هنا ومنعرفش حاجه والله

حوريه :- بغيظ يتأسف ليا الاول احسن والله اخلى رجالتى تمسح بيكم الأرض

يحيى :- بتحدى بتحلمى

حوريه :- يبقى انت اللى جبته لنفسك ولا يا لمبى شوف شغلك

اللمبى :- لسه هيضربه

بهاء :- خلاص والله انا بتأسفلك مكانه اهو بترجاكى يا ست الكل

حوريه :- هو اللى يتأسف

يحيى :- بعصبيه اسكت يا بهاء انا مقولتش ليك اتكلم على لسانى

بهاء :- ما تخلص بقى يا ابنى خلينا نخلص من ام الشغلانه السوده دى

يحيى :- بعصبيه بهاااااااء مسمعش حسك

حوريه :- نظرت اتجاه اللمبى تأمره أن يضربه

اللمبى :- فهم ما تريده حوريه وقام بصفعه قويه على وجه يحيى

يحيى :- تفاجئ بالصفعه وقام برد الصفعه

بهاء :- يا دى ام اليوم اللى مش فايت ومسك يد يحيى ودفعه بعيد وقال ما خلاص بقى يا ابنى يخربيت ام الدماغ الناشفه دى

حوريه :- اتعصبت اكتر بعد ما قام يحيى بصفع اللمبى على وجه

اللمبى :- اخرج سلاح من جيبه ووجه اتجاه يحيى

بهاء :- بخوف نهار مش فايت ابوس ايديك يا ست حوريه أنهى الموضوع واللى انتى عايزاه هنفذه

حوريه :- يعتذر ليا الاول

بهاء :- مش هيعتذر صاحبى وانا عارفه شوفى اى حاجه تانيه

حورية :- يعتذر

بهاء :- اخلص يا يحيى اتنازل لو مره واحده فى حياتك

يحيى :- لو اخر يوم فى عمرى ما هعملها

حوريه :- شكله فعلا اخر يوم فى عمرك ولا يا لمبى هات الرجاله يالا

بهاء :- نهار تشريح ليه رجاله ليه هو احنا تلاته بس مش محتاجين لكل ده والله واقترب منها وقال سامحيه أصله مريض نفسى وبيتعالج

حوريه :- نظرت إلى يحيى من أعلى إلى أسفل ومن أسفل إلى أعلى وقالت اممم مريض يبقى خلاص سماح ليس على مريض حرج خد صاحبك وأمشى ومش عايزه اشوف وش حد فيكم هنا تانى اتفضل

بهاء :- اللهى يعمر بيتك يا اميره يا بنت الامره ويخليكى لأهلك ويفرحوا بيكى يارب ونظر ليحيى وقال يلا بينا

يحيى :- انت قولتلها ايه

بهاء :- ها ولا حاجه امشى يلا

يحيى :- مش هتحرك من هنا غير لما تقولى قولتلها ايه

بهاء:- ق.ق قولتلها انك عصبى اوى ومستحيل تعتذر وممكن تكسر الحاره كلها فوق دماغهم خافت وقالت لاء خلاص مش عايزين خساير وخد صاحبك وأمشى

يحيى :- بعدم تصديق قال والله

بهاء :- يادى النيله ما تمشى بقى وخلصنا فى يومك اللى مش فايت ده

يحيى :- نظر بتحدى لحوريه وقال مش ماشى وهاخد الشقه من غير حتى ما اشوفها واللى مش عجبه يخبط راسه فى الحيط

بهاء :- يا حلاوووووه ليه ها انت ليه مصمم تطلعنا من هنا جثث

يحيى :- محدش هيقدر يقرب مننا امشى يا استاذ عطيه

حوريه :- يا اخ انت متسوقش فيها بقى مش علشان مريض هتستعبط فيها اتفضل خد اللى معاك وأمشى

يحيى :- مين ده اللي مريض

بهاء :- وضع يده على وجهه

يحيى :- نظر لبهاء بغيظ ونظر لحوريه وقال أنا اعقل من عشره زيك والشقه هسكن فيها برضاكى أو غصب عنك يلا استاذ عطيه يلا يا زفت الطين وتركهم وذهب على الشقه

بهاء :- نظر إلى حوريه واشاره بيده اشاره تدل على أن يحيى مجنون وذهب خلف عطيه ويحيى

حوريه :- ده ايه البلاوى اللى بتتحدف على الواحد دى ياربى وقالت بصوت مرتفع ولا يا لمبى

اللمبى :- ايوه يا ست حوريه

حوريه :- عايزاك تعرف كل حاجه عن الناس دى لتكون تبع اللى اسمه رجب دخلتهم مش عجبانى

اللمبى :- من عينيا يا ست حوريه

حوريه :- روح شوف شغلك يلا

اللمبى :- حاضر وتركها وذهب

حوريه :- نظرت إلى العقار التى توجد بيها الشقه إلى الأعلى وقالت ياترى حكايتكم ايه وتنهدت ونظرت إلى ذراعها مكان يد يحيى وقالت هعرفك ازاى تمسك دراع الست حوريه ازاى .

*********************
إلي هنا ينتهي الفصل الثانى من رواية حارة حورية بقلم دودو محمد
تابعوا صفحتنا على الفيس بوك للمزيد من روايات حب
ليست هناك تعليقات
إرسال تعليق

إرسال تعليق

يسعدنا تلقي اقتراحاتك أو تعليقك هنا

الاسمبريد إلكترونيرسالة