رواية فصيلتي القوية بقلم ريناد يوسف - الفصل الثانى والعشرون
رواية فصيلتي القوية بقلم ريناد يوسف - الفصل الثانى والعشرون
تابع من هنا: روايات رومانسية جريئة
في بيت صغير بسيط جدا من بيوت الصعيد
حسنه :روح ياحمد اللهى يجحمك يابعيد
ام حسنه :يبتي حرام عليكي الميت متجوزش عليه الا الرحمه
حسنه :له مش ده اللي يترحمو عليه
اترحم عليه ليه وهو سابني في الدنيا من غير مليم اوحمر وكل حاجه حجز عليها البنك وفوق دول ودول ولده ده اللي اتبليت بيه اعمل فيه ايه انا؟
ام حسنه :يبتي ليه رزق ربنا اللي خلقه مهينساهش ..وانتي عواد الفرارجي متقدملك وعاوزك
حسنه : عاوزني انا بس... بطولي معاوزش ولد حمد معاي مراضيش بيه ...
ام حسنه :يبقي خلاص بلاها منها الجوازه دي هترمي ولدك اياك
حسنه :عتقولي ايه انتي بلاها كيف الجوازه دي ...واعيش كيف وناكلو منين ؟انا هتجوز عواد وان كان عالواد انا عارفه هوديه فين . وابتسمت بخبث
ام حسنه :ربنا يهديكي علي نفسك يابنيتي
*****************
في الارض عند مهاب
ريناد :ميهو يلا الغدا جاهز
مهاب :ميهو ؟ ميهو مين يابت احمد انطقي ..ميهو ديه اسم ياباني انتي عتعرفي علي واحد يباني وعتندهيني بأسمه ؟
ريناد :يباني مين يعم انت وصيني مين انا بدلعك ميهو دلع مهاب
مهاب :لا والله محصل ايش جاب مهاب لميهو هاه
ريناد :يووووه كل مااجي ادلعك مش بيعجبك ولا اسم ادلعك ازاي انا دلوقتي !!!
مهاب :يبت الدلع مش بالاسامي قولي مثلا ياقلبي ياعمري ياقطعه من روحي يابيبي ...قولي يابيبي مالو بيبي ...حلو بيبي ...
ريناد :بطل مياصه بيبي ايه دا كمان بيبي دا بتاع العيال السيس
مهاب :اهو انا عحب جلع العيال السيس ده
ريناد :طب يلا يابيبي الغدا
مهاب:ايوه اكده اقوم اكل بنفس
ريناد ضحكت بخفه وقعدت علي السفره واخدت قمر الصغيره من مهاب وقعدتها علي رجلها وندهت لحسن اللي جه هو كمان وقعد علي كرسيه وابتدو ياكلو وهما مبسوطين في جو اسري جميل
*****************
اما فمصر في فيلا احمد المصرى
رعد :قمري
قمر :قول اللي عاوز تقوله من غير لف ودوران بلا قمري بلا نجومي اصلك معتدلعنيش غير لما تكون عاوز حاجه
رعد : اه ياظالمه يانكارة الدلع
قمر :متقول ياولد رهف وتخلص
رعد ابتسم 😁:طب بقولك ايه مش هتخاويلنا عيالنا ياقلبي
قمر :مهما مخاوين بعض عيالنا ياحبيبي عاوز تخاويهم ايه تاني؟؟
وبعدين انا اول بطن جبت ٣ ايش ضمني ان البطن الجايه مجيبش حاجه وعشرين عيل مره وحده هاه؟؟
مين يقدر يربي كل مره كتيبه وانت بتخلف جمله ؟
اذا كان دول وقضو علي اخر شوية عقل فيا اعمل ايه انا بعد اكده
رعد :طب بس متظلميش العيال بس وانا اساسا واخدك من غير عقل خالص
قمر :ليه ياولد رهف كنت مطلعني من السرايا الصفرا ولا لقيتني ماشيه في الطريق ناكشه شعري وخلجاتي مقطعين؟!! متنقي الفاظك ياحظابط
رعد بجديه :يعني مش هتخلفي تاني؟
قمر :ايييييون
رعد :اخر كلام
قمر:جوااااب نهائي
رعد :خلاص يبقا متزعليش بقا من اللي هعمله
قمر كانت بتحط هدوم رعد بتاعت الشغل فشماعه ولما سمعت الكلمه دي وقفت اللي بتعمله ولفت علي رعد ببطئ وهي رافعه حاجب واحد
وياتري ايه ياواد رهف اللي هتعمله ومش عاوزني ازعل منيه
رعد بثبات زائف :هتجوز عشان اخلف واخاوي عيالي
قمر :ياحبيبي ...وخايف لزعل من اكده ؟..له ياحبت قلبي انا مزعلش بالعكس دنا افرحلك واهيصلك وارقصلك واعملك فرح محصلش
رعد بصلها بتوجس
قمر :ايه مالك ممصدقنيش ياك ؟ له دنتا يبقي معتعرفش غلاوتك عندي يبو العيال... واتحركت علي باب الاوضه قفلته بالمفتاح ورجعت بصت لرعد اللي عمال يبص شمال ويمين عشان يلاقي مخرج من الاوضه مش لاقي 😅
قمر راحت بالراحه علي درج الكوميدينو وفتحته جامد وبرقت لرعد وفجأه طلعت مقص كبير ومسكته بأديها الاتنين وبتقرب لرعد اللي طلع فوق السرير
رعد :ايه ياقمر ياحبيبتي ماسكه المقص دا ليه ياقلبي
قمر :هحلقلك ياقلبي انت مش عريس ولا ايه وبالمره اقصلك ضوافرك واقلملك ودانك ونقطعو شوية حجات اكده ملهمش لزمه عشان تتجوز علي نضيف
رعد نزل قرب لقمر وهو مبتسم 😁 هو انتي صدقتي ياشيخه دنا بهزر
قال اتجوز قال طب هو انا الاقي وحده تاني زيك فين والنعمه لو لفيت العالم ملاقي انتي وحده بس وانا خدتك وخلاص وزاح المقص من قدام وشها
قمر :طب والعيال
رعد :لا عيال ايه بقي منا دلوقتي اتأكدت اني لو اتجوزت عليكي مش هعرف اخلف ..
قمر :ايوه اكده اتعدل الا انا شيطاني واعر قوي
رعد :عاااارفه انتي هتقوليلي عليه !!
فجأه سمعو صوت احمد المصري بيندهلهم من تحت
قمر :ايوه يبا الحج نازلين اهه وبصت لرعد :قدامي علي تحت ياعريس 😬
وادتله مفتاح الاوضه ورعد فتح ونزل وهي نزلت وراه
قمر :صباح الخير ياامي صباح الخير يبا الحج
الكل :صباح النور
الكل قعد علي السفره
قمر :العيال مشيو
رهف :اي يمه سويتلهم ريوق واجه الباص تبع الروضه اخدهم ومشيو الله يحفظهم
قمر :ربنا يخليكي لينا يارهوفه يم قلب طيب انتي
رهف :ولو روح قلبي هالزعاطيط ياالله شوبحبهم
رعد :والله انا شايف انك انتي اللي بتربي يارهف وقمر قاعده فاضيه بقولها تجيبلنا عيل ولا اتنين تاني مش راضيه
قمر برقتله وزامت
رهف :يمه اتركها عاراحتها نعمه من اله ربي يحفظهملك ويربو بعزك
احمد :بقولك ايه هي بتفكر صح علي فكره
قمر : حبيبي ياعمى 😗😗
رعد :لا والله يعني كلكم موافقين الست هانم علي قرارها ؟
احمد :ايوه عشان هي بتعرف تفكر... حلوين كده وبعدين هي ليها دور تاني
كبير ومسؤليه لازم تتحملها
رعد :وياتري بقا ايه هي المسئوليه والدور العظيم ده
احمد :هتكمل تعليمها وهدخلها كليه خاصه وفي الاثناء دي هتمسك الشركه وتتعلم كل كبيره وصغيره عشان الشركه دي محدش هيكون فاضي ليها غيرها
قمر شرقت وهي بتشرب وبصت لحماها بعيون مبرقه :
انتا عتتكلم عن مين يبا الحج مين هي اللي هتكمل تعليم ومين هي دي اللي هتمسك الشركه ؟
وفجأه ابتسمت 😁ايوه ايوه انتو عتعملو اكده عشان اخلف تاني طب وهو يعني لازم تخضوني الخضه دي وتعليم وشغل وبتاع انا اصلا لو استنيتو علي كنت هخلف لحالي انا اصلا ارنبه انتو بس اللي مواخدينش بالكم وقامت وهي حاطه اديها عالسفره ومبتسمه 😁 طب اسيبكم انا تختارو فأسامي العيال واطلع انا اريح الا الخضه كانت شديده قوي
احمد :اقعدي ياقمر انا مش بهزر وانتي هتكملي تعليمك وتمسكي الشركه ودا اخر كلام
قمر بلعت ريقها وبصت لرعد اللي عمال يتهز كله من الضحك ووشه احمر وعمال ياكل وكل مايبص علي منظرها اللي عامل زي الفار المبلول يزود في الضحك
ريناد بصت لرهف اللى وطت وشها لطبقها وبتاكل وبصت لحماها اللي شابك صوابعه تحت دقنه وباصصلها ومثبت عيونه عليها
قمر :ياسنه سوخه ياولاد دا باينه الكلام صوح ولا ايه انا الدنيا مالها بقت بتسود ليه قدامي بينو هيغمي عليا ولا ايه ؟
حد يسندني يوديني جناحي مش قادره اتنفس وبتقوم ..
احمد :اقععععععدي ياقمر
قمر :قعدت قمر اترزعت قمر اتربربت قمر اهه
احمد :من بكره تجهزي نفسك عشان تنزلي الشركه وانا كلفت حد يقدملك في كليه محترمه وتنفعك في الكارير بتاعك الجديد كسيدة اعمال
قمر :سيدة اعمال ... والكولدير بتاعك ...؟ متلحق مرتك يارعد
رعد بضحك :احسن احسن تستاهلي يلا اجري اتعلمي واشتغلي واشقي مالك لو وافقتي تخلفي
قمر :منتا مش فاهم منا بومه ومعفهمش حاجه واصل... وانت كمان يارعد المفروض متسيبنيش اكده امشي من دماغي وانت عارف دماغي عتوصلني لفين 😭😭
رعد :يلا ياماما اطلعي جهزي كتبك واقلامتك وبرياتك عشان المدرسه 😂😂😂
قمر :ياحزنك ياقمر يبت شمس هرجع لابتسجح تاني ؟!!وبصت لحماها
بص يبا الحج انتا باين عليك عتتكلم من صوح وبجد وجديد
احمد :☹جد وجديد
رعد :تقصد حق وحقيقي بس اعذر صدمتها ...ووطي تحت الطربيزه وبص تحت قمر اللي بصتله ومثلت العياط
قمر :معملتهاش عشان عندي امل ان ابوك يكون عيهزر معاي هزار تقيل شويتين ع الصبح وبعد شويه يضحك ويقولي ضحكت عليكي
احمد :لا مبهزرش ياقمر وهتنزلي الشركه وتمسكي كل حاجه عشان دا مال جوزك واولادك وجوزك مش فاضي من وظيفته وريناد في ارضها وانا مش هدوملكم العمر كله عشان كده لازم انتي تنزلي الشغل وتمسكي كل حاجه لغاية مايكبرو احفادي ويستلمو منك الشركه
قمر :طب عقولك انا عندي اعتراض بسيط
احمد :قولي معترضه علي ايه
قمر :هنزل الشركه بس مهتعلمش وبعدين الشغل مش لازمن يكون للي حداهم كليات يعني ...شفتش انت عبد الغفور البرعي كان جاهل وفضل يبيع صموليات ومسامير مصديه لغاية مابقي مليونير وبقي احسن واحد فالوكاله
احمد :عبد الغفور مين ووكالة ايه
قمر :وكالة البلح
احمد :يابنتي ايه دخل وكالة البلح واسمه ايه دا فشغلنا وشركتنا ؟
قمر :اقولك انا ...انت مفهمتش قصدي صوح ..انا قصدي ان مش مهم التعليم واصل في البزنس
احمد :لا مهم ومهم جدا كمان
قمر بزعيق :وانا عقول مش مهم يعني مش مهم ...وانا مش هتعلم وديه اخر كلام حداي ان كان عالشغل هشتغل كيف الحماره مهكلش ولا املش...
لكن تعليم وزاكري وافهمي وامتحني وسمعي وقومي من الفجور رمحي فدنيت ربنا ...قسما بالله ميوحصول ولو حكمت اشنقلكم نفسي في النجفه داي ..ورفعت ايديها ورزعت الطربيزه وقامت بالخطوه السريعه عالسلم وفجأه وقفت وبصت لرعد اللي ميت من الضحك واول ماشافها بتبصله عمل حركه بأديه كأنه بيقرا فكتاب وضحك
قمر :😭😢😢بكت بصوت عالي وطلعت جري
احمد :اطلع عقل مراتك واقنعها تكمل تعليمها يارعد
رعد :اقنع مين ياحج دي لو كنت قابلتها قبل مااكمل تعليمي كانت اقنعتني هي اني مكملش ....انسي.. قمر والتعليم زي قضبان القطر لايلتقيان وبعدين نزلها الشركه وعلمها وعلي رأيها الخبره اهم من التعليم وبعدين هي تشوفها تقول هبله لكن هي ذكيه جدا وبتفهم ...
رهف :والله انا حاسه انها راح تخروب الشركه وراح نصفي بالشارع كلنا
احمد :لا متخافيش انا هفضل معاها لغاية مااتطمن انها شربت الشغل كله وفهمته انا عاوز افضي لاحفادي بقا والعب معاهم وافضالك انت كمان ياجميل وقرب منها
رعد :احم احم مش هتكبرو انتو علي عمايلكم دي ابدا !!
احمد :وانت مالك يابارد غيران روح لمراتك فوق
رعد :اروح لميييين وهي دلوقتي تلاقيها بتقطع في شعرها وبتاكل في عفش الاوضه انا اصلا خارج وهبات في الكتيبه لبكره تكون هديت ...
وقام مشي وهو خارج بص علي بلكونة اوضته هو وقمر لقي خيالها من ورا الستاره رايحه جايه وحاطه اديها علي دماغها ضحك بصوته كله وخرج ركب عربيته واتحرك علي كتيبته وهو فرحان فقمر اللي متأكد انها علي وشك انها تطق من الغيظ دلوقتي
************
في البلد ..
ام حسنه :واخده ربيع ورايحه بيه علي فين ياحسنه
حسنه :رايحه اوديه عند عمه هو اولي بيه يربيه وبالمره عشان تبقي عينه علي كل حاجه ويعرف عن عمه الصغيره قبل الكبيره ولما ياجي الوكت لمناسب تبقي كل حاجه تحت يده ويعرف ياخدها وكت ماهو عاوز ويعيش ويعيشني معاه فبغدده كيف اللي عايشين فيها عيال شمس ولا فكرك هقضي عمري واموت واندفن وانا مرت الفرارجي اياك من بعد ماكنت ست ستات البلد ومرت كبيرها
ام حسنه :يبتي طب وهتقدري علي فراق ضناكي كيف انتي قلبك ديه ايه محطوط مكانو حجر صوان ؟
حسنه :ليه يعني هو انا عيملت ايه دنا هودي ولدي حدي عمه وهخليه يتمرمغ فخيره ...
ام حسنه :هتوديه يبقي خدام حدي عمه ياحسنه !!هتوديه كلاف للمواشي وخدام للارض ويخلوه مرمطون ليهم ؟
حسنه :له اتطمني مهاب ميعملش اكده فولد اخوه انا عارفاه زين...
مهاب قلبه ابيض وميعرفش غل ولا كره واصل ...اذا كان الكبار عمره مخلص حقه منيهم هيخلص عمايلهم فيه من حتته عيل صغير ؟ له عمرها متحصل ...
ام حسنه :ربنا يهديكي يابنيتي وينور بصيرتك ويردك عن اللي فدماغك ديه
حسنه :ادعيلي بس انتي ربنا ينولني اللي فمرادي واللي فبالي وبس ..
واخدت ربيع من ايده وخرجت بيه وسط نظرات امها اللي كلها حسره والم علي حفيدها وعلي بنتها اللي شيطان الفلوس عامي عنيها عن اي حاجه تانيه في الدنيا
حسنه وصلت الارض عند مهاب ونزلت وهي مذهوله من المنظر اللي شايفاه علي مدد الشوف من اشجار وفيلا فوق الخيال وعلي بعد منهم مزرعة مواشي عملاقه وكذا مبني جمب بعض وابتسمت بخبث ومسكت ايد ابنها ودخلت بيه واتوجهت لباب الفيلا
ربيع :انتي موديانا علي فين يامه
حسنه :مودياك عالجنه ونعيمها ياولدي مودياك علي مملكتك واملاكك واملاكي
ربيع :انا مش فاهم حاجه وبرضو مش عارف رايحين فين والبيت الكبير ده لمين ؟
حسنه :هتعرف كل حاجه فأوانها ياولدي اما البيت ديه فبيت عمك وهو اللي هتقعد فيه من اهنه ورايح وهتكبر جواه وجوا الارض دي
ربيع :يعني انتي هتسيبيني وتمشي اهنه لحالي يامه ؟
حسنه :ايوه ياولدي بس كل شهر هاجي ازورك واقعد معاك زي متحب
ربيع :له انا مش عاوز اسيبك ومش عاوز اسيب ستي ومش عاوز اسكن في البيت الكبير ديه خديني معاكي
انا عحبك قوي يامه متسيبنيش 😢
حسنه نزلت علي الارض قصاد ابنها ومسحت دموعه وقربت علي ودنه :
ياولدي اوعاك تفكر اني فرحانه ببعادك عني ولا اني رميتك وسبتك ....له دا غصب عني وعنك عشان انا حداييش فلوس اصرف عليك واربيك وبعدين الخير اللي عيتمرمغ فيه عمك ديه انت ليك حق فيه ومع الايام كله لازمن يبقا ملكك انت وتحت يدك ...وتعيش وتعيشني وتعوضني ...اتفقنا ياولدي
ربيع 😢😢😢
حسنه :ربيع خليك راجل عشان مزعلش منيك واسمع الكلام
ربيع :حاضر يامه حاضر هسمع الكلام بس والنبي متنسيني وابقي كل شويه تعالي زوريني
حسنه :انا عمري مقدر انساك ياولدي حد يقدر ينسي روحه وكل شويه هاجي اطمن عليك وعلي احوالك متخافش ومسحت دموعه واخدته واتوجهت لباب الفيلا
مهاب كان خارج للارض عشان يشق عليها واتفاجأ بحسنه علي باب الفيلا
وقف مكانه ساكت وافتكر كل حاجه مرت بيه من حسنه واخواته اول ماشافها وملامح وشه اتغيرت وظهر عليه التعصيب :
خير ايه اللي رماكي اهنه ؟
حسنه :الشديد القوي ياولد شمس ومسكت ابنها من دراعه اللي كان اكبر من حسن بسنه او اقل وحدفته علي مهاب اللي استغرب من تصرفها ده ومسك الولد قبل مايقع
حسنه :خد لحمك انت اولي تربيه بدل الغريب انا اخوك الله يجحمه سابني من غير مليم ولحد اهنه مش عارفه اصرف عليه هو كل يوم بيكبر وطلباته بتزيد خده حتي شغله معاك بلقمته ولو مش عاوزه ابقي ارميه فأي حته عشان انا هتجوز ومش هينفع يقعد معاي
كلام حسنه كان كأنه سكاكين بتقطع فقلب ابنها اللي رغم صغر سنه فهم انها بتتخلي عنه وبتختار حياتها وانها رمته ومش عاوزاه تاني دي كمان بتقول لعمه لو مش عاوزه ارميه في الشارع !!وابتدا يتخنق من كتر الدموع ...
مهاب عقله مكنش قادر يستوعب الموقف كله وان ازاي ام تتخلي عن ابنها كده عشان حياتها ..؟
ايه ده ايه الناس دي ؟
وقبل مايستوعب ويقدر يرد عليها كانت بتتحرك بالخطوه السريعه وبتبعد عن باب الفيلا ومتجهه للطريق بسرعه
مهاب بص للولد اللي صعب عليه جدا وحط ايده علي دماغه وملس علي شعره وابتسمله بس من غيرر ولا كلمه
ريناد كانت واقفه ورا مهاب وشايله بنتها قمر وسمعت كل حاجه وشافت الموقف كله وكانت واقفه جامده ومستنيه اي رد فعل من مهاب علي الموقف ده لكن مهاب اكتفي بالسكوت
ياتري ريناد هتقبل ابن حمد وسطهم
وياتري لو عملو كده دي ممكن تكون غلطه يدفعو تمنها بعدين
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا