قصص 26 قصص 26

آخر الأخبار

random
جاري التحميل ...

يسعدنا تلقي اقتراحاتك أو تعليقك هنا

قصص قصيرة كوميدية .. الفانوس السحرى ( الحلقة الرابعة )

نعود اليكم من جديد والجزء الثانى من مجموعة قصصية كوميدية من القصص القصيرة بعنوان ( الفانوس السحرى ) والتى نقدمها لكم من خلال موقعنا قصص 26 , نستعرض لكم الجزء الرابع والذى تدور احداثه من وحى الخيال تدور احداثها داخل مصر من الشخصيات الطبيعية التى نقابلها يوميا فى حياتنا .
قصص قصيرة كوميدية .. الفانوس السحرى ( الحلقة الرابعة )

لقراءة الجزء الاول  , الجزءالثانى , الجزء الثالث .. 

الفانوس السحرى .. العروسة الصينى 


تمر الشهور وتلعب البليه مع زيزو ويكون ثروة لا بأس بها من البضائع الصينى التى تصل له بصفة مستمره ويتخاطفها التجار ويغرق السوق بكل ماهو صينى وفى أحدى الأمسيات يغلق مكتبه عليه ويفتح الخزنه ليحصى مابها من أموال قبل أن يرسلها للبنك فتظهر توكى خادمة الفانوس فجأة

- فيه ايه ياتوكى أنا مادعكتش الفانوس أيه أللى جابك دلوقتى ..؟
- سورى مسيو زيزو أنا جايه أستأذن منك هغيب عنك ثلاثة أيام فى زيارة للصين فى مأموريه واجتماع هامين لجميع عفاريت الفوانيس فى العالم وبقولك علشان ماتقلقش .
لو دعكت الفانوس وماظهرتش فى الأيام الثلاثة اللى جايين ..
- ماشى ياست توكى تروحى وتيجى بالسلامه .. باى زيزو .. باى توكى
وبعد ثلاثة أيام تظهر توكى من غير أن يدعك زيزو الفانوس فيفزع منها .
-ايه ياتوكى إعملى أى حاجة كوحى إتنحنحى .. أى حاجه تفهمينى أنك جايه مش عايز الحركات دى ممكن فى حركة منهم أطب فيها ساكت
- سورى مسيو زيزو أنا جايبالك خبر مهم هيخليك تكسب من وراه قد اللى كسبته عشر مرات
- قولى ياوش السعد فرحينى .. شوف ياسيدى الوكاله الصينيه لعفاريت الفوانيس عرفت من مندوبيها إن مصر من ضمن الدول اللى بتعانى من أزمة عنوسه للشباب
لأسباب أنت عارفها فقررت الوكاله أن تفتح فرع لها فى مصر وستقوم بتوريد العرايس من الصين لحل هذه المشكله 

وأختارتك لتكون مدير فرع العرايس الصينى بالأضافة للتجارة والبضايع ولك مرتب سنوى ضخم ومكافأة عن كل جوازه تتم بين شاب مصرى وفتاه صينيه
- إستنى عليا شويه أقلب الموضوع دا فى دماغى
- ولا تقلب ولا حاجة خد الكتاب ده فيه جميع الشروط ونظام الشغل اقرأه على مهلك .
ورد عليا ادعك الفانوس هتلاقينى قدامك والوكاله مديالك ثلاثة أيام تفكر وترتب نفسك وترد عليها من خلالى بالموافقه أو الرفض ولعلمك يازيزو إذا رفضت ففيه ألف واحد هيوافقوا فما تضيعش الفرصة دى من أيديك
- هبقى خاطبه ياتوكى على آخر الزمن وأقلب الوكاله لمكتب جواز
- ما تستعجلش يازيزو معاك كراسة الشروط إقرأها الأول وبعد كده أحكم
- ماشى ياست توكى لما نشوف آخرتها أيه معاكم يابتوع الصين .. سلام
يجلس زيزو يقلب فى كراسة الشروط وهو يتعجب .. 

ويسأل نفسه مش كفاية ان الصين غرقت السوق المصرى ببضاعتها عايزه دلوقتى تغرقها ببناتها .. 
لا الأمر ده فيه أنه .. ويبدأ بقراءة الشروط وهو يضرب كفا بكف وكل فتره يقول معقول الكلام ده
لو أى شاب مصرى ضاربه السلك - ومفيش أكثر منهم فى الزمن ده - وقرأ الشروط دى راح يبصم بالعشره ويتجوز تلات أربع بنات مره واحده .. 

الشروط المطلوبه أن يكون مصرى الجنسيه ويعمل فى أى مهنه أو وظيفه لا يشترط المؤهل لايشترط سكن خاص غير مطلوب شبكه أو مهر أو أثاث ولا يوجد مؤخر ولا قايمه ولا شيكات على بياض ولا وصولات أمانه.. العروسه يمكنها أن تقيم فى بيت العائلة لو توفر لها غرفه بسرير وحمام مشترك ..والعروسه مستعده أن تغير ديانتها وتعتنق الديانه الأسلاميه أو المسيحيه حسب ديانة الزوج .. المطلوب فقط 1500 دولار قيمة تذكرة الطيارة من الصين إلى القاهرة وسيتم عقد القران فى مقر السفارة الصينية فى الزمالك ومصاريف العقد ستقدمها السفارة هدية للعروسين وعاشت الصداقة المصرية والصينية ..


انتظروا معنا الجزء الخامس

نرجو ان تنال قصة الفانوس السحرى من مجموعة قصص قصيرة كوميدية اعجابكم ويسعدنا تلقى ارائكم وتعليقاتكم من خلال التعليقات اسفل القصة او من خلال صفحتنا على الفيس بوك .. دمتم بخير :) 

عن الكاتب

Khaled Ahmed

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

قصص 26