هذا الموقع محمي بموجب اتفاقية حماية حقوق المحتوي العالمية

روايه بنت الاكابر بقلم مها جعفر- الفصل الثانى عشر

مرحباً بكم أصدقائي وأحبابي عاشقي القراءة والقصص والروايات مع روايات رومانسية مصرية ورواية رومانسية جديدة للكاتبة المتألقة مها جعفر علي موقعنا قصص 26 و موعدنا اليوم مع الفصل الثانى عشر من رواية بنت الاكابر بقلم مها جعفر. 

رواية بنت الاكابر بقلم مها جعفر - الفصل الثانى عشر

رواية بنت الاكابر  بقلم مها جعفر
رواية بنت الاكابر  بقلم مها جعفر

رواية بنت الاكابر بقلم مها جعفر - الفصل الثانى عشر

فريده:دانا افتحي
دانا بعد شويه تفتح
فريده بقلق:قافله ع نفسك ليه.. حصل حاجه
دانا باصه ف الارض:لا انا كويسه
فريده تمد ايدها وترفعلها وشها وهنا تتصدم انه عنيها محمره م كتر العياط
فريده بخوف:انتي بتعيطي ليه... حصل ايه يا دانا
دانا تترمي ف حضنها وتعيط وفريده تضمها وتفضل تمسح ع شعرها
فريده:خلاص اهدي وقوليلي مين زعلك
دانا تبعد عنها براحه ويدخلوا يقعدوا وتبدأ تحكيلها كل حاجه حصلت م اول ما راحت ل يوسف
فريده:خلاص اهدي
دانا:هو اللي مشي يا فريده
فريده:هو ده الحب اللي بجد يا دانا..... هو كان بيحافظ عليكي... مكنش عايز يلهيكي ع اي حاجه
دانا:كان اطمن عليا حتي
فريده:هو وعدك يا دانا انه هيرجع
دانا:انتي شايفه ان ده كفايه
فريده تتنهد:انا معرفش يوسف اد ما انتي تعرفيه بس لو فعلا بتحبيه وواثقه فيه كان ده هيبقي كفايه بالنسبه ليكي دانا تعيط:انا تعبت
فريده:متيأسيش يا دانا.. هو بيحبك ومش هيسيبك
دانا:تفتكري
فريده:مش انا اللي كنت بقولك ابعدي ع حسن وغلط وعيب
دانا تهز رأسها بالايجاب
فريده:انا دلوقتي اللي بقولك حاولي مع يوسف
دانا:انتي واثقه كده فيه
فريده:اللي يزعقلك عشان خاطر روحتيله شقته واللي يوعدك م 4 سنين وراجع مش ناسي وعده ده انا اثق فيه وانا مغمضه
دانا تحضنها:يارب يحلها بقى
فريده تمسح ع شعرها:هيحلها باذن الله... هو مجروح بس منك لكن الجرح ده هيتداوي
دانا:يارب يا ديدا
فريده:يالا بقي ننزل عشان عايزاكوا ف حاجه مهمه
دانا:خير
فريده:تعالي بس
دانا تقوم معاها وينزلوا ووفاء تطمن ع دانا ويقعدوا
وفاء:خير يا فريده
فريده تتنهد:حصل مشاكل ف البنك بسبب القروض وطالبوا بيها
وفاء:فجأه كده
فريده:البركه ف فريد بيه
وفاء:هو اللي عمل كده
فريده:اه
دانا:وبعدين كملي
فريده:البنك اداني مهله اللي هو اخر الشهر ده يعني ولو مسددتش هيحجزوا ع كل حاجه بمتلكها
دانا بصدمه:يعني ايه
فريده:يعني احنا هننزل للارض
وفاء:انتي مينفعش تكتبي اي حاجه بأسم حد فينا
فريده:مليش الحق اتصرف ف اي حاجه
وفاء:سألتي المحامي
فريده:اه
نادر:احنا ملناش الحق غير ف فلوس البنك وفريده سحبت كل الفلوس االي ف البنك
دانا:والفلوس دي كام
فريده:نص مليون
دانا:بس
نادر:فريده كانت ساحبه الفلوس كلها عشان المشروع اللي ف الغردقه
دانا:طيب ما انتوا معملتوش المشروع
نادر:بس كان بدات فيه ف سحب الفلوس دي
فريده:ساكته ليه يا ماما
وفاء:انا مش هاممني اي حاجه يا فريده اهم حاجه انتوا
فريده تطبطب عليها:انا اسفه
وفاء:انتي ملكيش دعوه
دانا:ايه اللي هيحصل دلوقتي طيب
فريده:المفروض نسيب الفيلا دي خلال اسبوع
دانا:نروح شقه المعادي
نادر:يا دانا ركزي كل حاجه بأسم فريده هيتحجز عليها انتوا دلوقتي متمتلكوش حاجه غير النص مليون جنيه
فريده:دانا انا ان شاء الله هحل كل حاجه ده مجرد وقت مش اكتر
دانا تقوم تحضنها:انا مش قصدي يا فريده.. انا بستفسر بس مش اكتر
فريده:ولا يهمك
وفاء:نروح عند صفاء طيب
فريده تبصلها
دانا:نروح برجلينا عندها
وفاء:خلاص ده كان اقتراح
فريده:تالا اقترحت اننا نروح عندها
دانا:لا
فريده:مانا موافقتش عشان اخوها استقر معاها وعشان منبقاش حمل عليهم
وفاء:انت مش كان عندك شقه يا نادر قبل ما تتجوز
نادر وفريده يبصولها ويبصوا لبعض
نادر:انا اقترحت ع فريده وموافقتش
وفاء:ليه يا فريده هو دلوقتي مفيش غيره يشلنا وهو اولي بينا
فريده تتنهد:ان شاء الله يا ماما وتقوم وتسيبهم
ووفاء ودانا يبقوا مستغربين
نادر يبتسم:انتوا عارفين فريده مبتحبش تبقي تقيله ع حد
وفاء:عارفاها ..ربنا يهديها
نادر:يارب ..ع اذنكوا
ويخرج ورا فريده
نادر:سرحانه ف ايه
فريده تبصله ومتردش عليه
نادر يقعد جنبها ع المرجيحه اللي ف الجنينه
فريده تتنهد:شقتك دي فين
نادر:ف الجيزه
ويسكتوا الاتنين ونادر يقطع سكوتهم
نادر:فريده انا عارف ان اللي حاصل صعب بس زي ما قولتي ل دانا ده شويه وقت
فريده:مش عارفه اعمل ايه
نادر:احنا قدامنا لاخر الاسبوع يعني مفيش وقت... ممكن ننقل شقتي ونفضي الفيلا وبعدها نبقي نفكر
فريده تتنهد وتقوم تدخل اوضه الرياضه ونادر يقوم وراها وفريده بتلف ع كل جهاز وكأنها بتودعهم هي اصلا تقريبا حياتها كلها هنا
نادر محترم سكوتها وواقف متابعها
فريده:موافقه
نادر بأستغراب:علي؟!
فريده تبصله:اننا نقعد ف شقتك لحد اما اشوف حل... انا للاسف مقداميش غيرك
نادر يبتسم:كان عندي حاجه تانيه
فريده:ايه
نادر:انا معايا فلوس ممكن احطهم ع اللي معاكي وكده هنبقي نزلنا ل مستوي اقل درجه بسيطه م اللي كنتوا عايشين فيه
فريده:لو احتاجنا حاجه هقولك
نادر:لا معلش يا فريده اما نتنقل عندي انا اللي هصرف
فريده:بس انت مش ملزم تصرف علينا
نادر:معلش ده شرطي انا هنا متكلمتش عشان انا عارف انك. هتتحججي بأنه بيتك واني منساش نفسي والكلام ده بس معلش ده شرطي
فريده:هنشوف يا نادر
نادر:لا مش هنشوف احنا رجاله ولامؤاخده
فريده تضحك وهو يبتسم انه عرف يضحكها
نادر:يالهوووي لو تثبتي ع الضحكه دي
فريده تكشر تاني
نادر:ليه كده
فريده تخرج م جنبه م غير ما ترد عليه وهو يبتسم ل كسوفها اللي بتداريه ف شخصيتها ويخرج هو كمان وراها وتروح تبلغ عيلتها بقرارها ويبدأوا يجهزوا نفسهم ويلموا حاجتهم وتمر الايام ونادر يصرف فلوس للموظفين زي ما وعدهم ويبقي شايل كل حاجه ع فريده تقريبا ويفضوا كل حاجه والبنك يحجز ع كل حاجه بأسم فريده
°°°°°°°°°°°°°°°°°°°°°°°°°°°°°
يوصلوا بيت نادر بالحاجات البسيطه والمهمه اللي خادوها
نادر:نورتوا
وفاء:ده نورك يا ابني
نادر:انا عارف ان الشقه مش اد المقام
وفاء تحط ايدها ع كتفه:بتفكرني ب عيلتي وعيشتي زمان.. ف متقلش كده
نادر يبتسم
دانا بتتفرج ع الشقه:بس زوقك حلو يا نادر
نادر:هي الشقه اوضتين بس ده لاني عايش لوحدي
وفاء:ولا يهمك هنحلها
نادر:انا ممكن انام ع الكنبه ف الصاله وانتوا
وفاء تقاطعه:انا ودانا هنام ف اوضه وانت وفريده ف اوضه
نادر:بس
وفاء:مبسش ..السراير كبيره ماشاء الله
نادر:خلاص اللي يريحكوا ويتجه ناحيه فريده اللي واقفه ف البلكونه
نادر:ساكته ليه
فريده تبصله: بعمل فلاش باك لزمان عشان ارجع اتأقلم
نادر:انا عارف ان
فريده تحط ايدها ع شفايفه:انا فاهمه ...وممكن متبررش اي حاجه
نادر يمسك ايدها ويبوسها ف كف ايدها:ممكن
فريده تشد ايدها بسرعه وتتوتر وتستغرب هي ازاي الحركه دي طلعت منها بتلقائيه كده وازاي مشاعرها متحكمه فيها كده ونادر ف نفس الوقت فرحان م جواه ان فريده معاملتها معاه متغيره وفرح بحركتها حتي لو كانت بتلقائيه يكفيه ان ده طالع م جواها
دانا:والنبي ما ناقصه حب دلوقتي انتوا الاتنين
الاتنين يفوقوا م شرودهم ويبصولها
دانا:انا جعانه
نادر:نطلب
فريده تقاطعه:لا ...عايزين م دلوقتي نحافظ ع اللي معانا
نادر:بس
فريده:معلش يا نادر عايزين نحافظ ع اللي معانا احنا منعرفش الوضع ده هيتحل امتي
وفاء:انا موافقه فريده
نادر:خلاص هنزل اجيب اكل
دانا:بما انه اول يوم لينا هنا ف خليه فري
نادر يضحك:حاضر ...
فريده:اه يا نادر ممكن تعمل لكل واحد فينا شفره الاسانسير عشان اما ننزل ونسخه م المفاتيح
نادر:كويس انك فكرتيني
فريده تبتسم نص ابتسامه
ونادر يستأذنهم وينزل
فريده:عايزه اتكلم معاكوا
دانا:خير
فريده:نادر شرط ان هو اللي هيصرف علينا طالما احنا ف بيته واتكلمت معاه اليومين اللي فاتوا ف الموضوع ده وهو موافقش حتي اني اساعد
وفاء:ربنا يبارك فيه يارب ...فعلا راجل
دانا:وبعدين
فريده:عايزين نحاول نلم ايدنا شويه عشان منتقلش عليه
وفاء:اكيد يا فريده
دانا:حاضر يا ديدا متقلقيش
فريده:وانتي يا دانا لو احتاجتي حاجه قوليلي م وراه متقوليش قدامه وأنا هديكي م معايا
دانا:حاضر
•••••••••••••••••••••••••••••••
تالا:اتنقلوا شقه نادر
يوسف:وجامعه دانا
تالا تفكر شويه وترد عليه:فريده قالتلي انها هتقعد لحد اما يحلوا الموضوع
يوسف:يعني هتأجل السنه دي
تالا:اه
يوسف:طيب
تالا:مانا قولتلك اتجوزها
يوسف:اسكتي يا تالا
تالا:انت حر
يوسف:هي فريده رافضه نهائي اننا نساعدها... غالبا لو كل اللي تعرفه ادولها مبلغ هتسدد
تالا:لا فريده مش موافقه ع حاجه زي دي
يوسف يتنهد ويفتح الموبايل ويلعب فيه
تالا:صحيح يا چو هو مهاب مكلمكش
يوسف:اشمعني
تالا:يكون حدد ميعاد عشان يخطبني
يوسف يبصلها:قولي انه كلمك وقالك
تالا تبص للسقف
يوسف:وحياه امك
تالا تضحك:حبيبي
يوسف:جاي يوم الخميس
تالا:طيب يا دوب الواحد ينزل يجيب الفستان بقي
يوسف يضحك ويفضلوا يخططوا لخطوبه تالا
•••••••••••••••••••••••••••••••••
دانا:ايه يا عم التأخير ده
وفاء:خدي منه الحاجات طيب
دانا تاخد منه الاكياس وتحطهم ع التربيزه
فريده:ايه يا نادر ده كله
نادر:دي حاجات بس تبقي ف التلاجه
فريده:كل ده
نادر:اه
دانا تبدأ تفتح الاكل وتاكل
وفاء:يا بت بطلي قله الذوق دي
الكل يضحك ويقعدوا ياكلوا مع بعض
وفاء:عايزين نبقي نجيب حاجات نحطها ف التلاجه عشان م النهارده هنطبخ بنفسنا مش هتقضيها اكل م الشارع
فريده:انا مع ماما
دانا:انتوا بتعرفوا تطبخوا
فريده:فريد اما رمانا ف الشارع مكنش رامي معانا خدامه تطبخلنا
دانا:اعوذ بالله.. بستفسر يا ديدا
فريده:لازم تتعلمي عشان ماما مش هتعمل حاجه انتي عارفه انها تعبانه وانا مش هعمل لوحدي
دانا:لا ...ييعع... انتي عايزاني اقف اطبخ ولا اروق
فريده بعصبيه:لازم يا دانا
نادر:خلاص يا فريده انا هساعدك
فريده تبصله:انت بتعرف تطبخ
نادر:اه مانا كنت عايش لوحدي ف بعرف اعمل خفيف
وفاء:انت صحيح يا نادر اهلك فين
نادر:اهلي ف البلد
دانا:ايه ده انت م بلد
نادر:اه
دانا:فلاح يعني
فريده تبص ل دانا بعصبيه
دانا:سوري ...انا مقصدش
نادر:ولا يهمك
وفاء تبتسم:منين انت بقي يا نادر
نادر:قليوب
وفاء:هما ليه مجوش الفرح
نادر يبص ل فريده
فريده:احم ...عشان جت مفاجأه يا ماما
نادر:بالضبط
وفاء:نبقي نروح نزورهم
نادر:تنوروا
وفاء:ده نورك يا ابني
ويخلصوا اكل ويقوموا
فريده:انا هدخل انام
وفاء:ماشي يا حبيبتي
فريده:متنسيش العلاج
وفاء:حاضر
فريده:هنام فين
نادر:اختاري الاوضه اللي تعجبك مش هنختلف
فريده تبتسم وتتجهه ناحيه اوضه ونادر متابعها بعينه ويبتسم اما يلاقيها راحت ناحيه اوضته وعرفتها لوحدها
°°°°°°°°°°°°°°°°°°°°°°°°°°°°°°
مهاب:ايه يا عم انت فين
نادر:موجود اهو
مهاب:مش بشوفك خالص
نادر:انت عارف اللي حاصل بقي
مهاب:اه واتفاجئت والله
نادر:الحمد لله
مهاب:طيب ما تيجي يا عم
نادر:تعالي انت يا صاحبي نقعد ف الكافيه اللي ف الجيزه
مهاب:اشطا يا صاحبي
ويقفلوا ونادر يقوم يدخل الاوضه
نادر باصص ف الارض:انا بعتذر طبعا
فريده:انا عارفه انك مينفعش تخبط
نادر يبصلها:انا نازل شويه
فريده:طيب
نادر:مش عايزه حاجه
فريده تهز رأسها بالسلب
ونادر يفضل واقف شويه
فريده:فيه حاجه
نادر:بحبك
فريده تبصله وهو يخرج قبل ما ترد عليه وهنا هي تبتسم وتنام
•••••••••••••••••••••••••••••••••
تالا:عامله ايه
دانا:تالا!!
تالا:مستغربه ليه
دانا:اصلك اول مره تتصلي بيا... هي فريده موبايلها مقفول
تالا بسرعه:لا انا عايزاكي انتي
دانا تبص ل وفاء وتقوم تطلع بره ف الصاله وتقف ف الشباك
دانا:خير
تالا:انتي بتحبي يوسف
دانا:ليه السؤال ده يا تالا
تالا:انا يوسف مبيخبيش عني حاجه وهو بيتعذب
دانا:هو رافضني يا تالا
تالا:بس هو مجروح منك مش اكتر لكن هو عايزاك
دانا:والمطلوب مني انا اايه
تالا:حاولي معاه يا دانا خساره حبكوا يضيع كده بسبب هبلك
دانا:هو رافض حتي محاولتي
تالا:لا يوسف مش رافض
دانا:حاضر يا تالا هحاول
تالا:انا بعتذر اني ادخلت واني كلمتك
دانا:انتي زي فريده يا تالا متقوليش كده
تالا:حبيبتي
دانا تبتسم وتقفل مع تالا وتقرر انها هتحاول ومش هتيأسش
°°°°°°°°°°°°°°°°°°°°°°°°°°°°°°
نادر:ايه يا شباب
مهاب:ابو الصحاب
نادر يضحك ويحضنه
مهاب:عاش م شافك
نادر:حبيبي
.......:طب ايه هفضل واقف عاطف
نادر يضحك:يوسف ويحضنه
يوسف:واحشني يا ابني
نادر:وانت كمان يا صاحبي
يوسف:ايه الجواز بياخد الناس كده
مهاب:اه ما هو ماشاء الله اتكفي ع بوزه
يوسف يضحك ويقعدوا ويبداوا يدردشوا
مهاب:ايه اللي حصل ده يا ابني
يوسف:لا م الاول عشان جيت الفرح اصلا عاطف
نادر يضحك
مهاب:الاخ مكنش راضي يشتغل مجرد انه بيعملي شغل وخلاص لا كان عايز شركه يشتغل فيها ويبقي موظف محترم وطبعا انا وقتها كنت شغال مع فريده الصياد وعارفها وعارف نظام شغلها ف قولتله يروح يقدم هناك وكلمت تالا اختك وقولتلها
*فلاش باك*
مهاب:اتفضلي يا انسه تالا
تالا تبتسم وتقعد:خير ...فيه حاجه حضرتك عايزها ف التصاميم قبل ما اشتغل
مهاب:لا انا كنت عايز خدمه تانيه
تالا:اتفضل
مهاب:انا كان عندي واحد صاحبي هو مهندس واشتغل ف كذا شركه قبل كده بس محصلش نصيب ف كنت سامع انكوا عايزين مهندس جديد ف قولت ارشحه
تالا:طيب خليه يحضر ال Cv بتاعه ويجي يقدم
مهاب:طيب كويس جدا
تالا:بس معلش يا مستر مهاب... هي فريده مبتحبش الوسطه وكده والشغل ده ف هي هتختار اللي شغله يعجبها
مهاب:طيب خلاص مفيش مشكله
تالا:اوكيه ...ع اذنك
*باك*
مهاب:بس تالا اختك بعد كده فريده خلتها هي اللي تشوف الناس وده م حظ نادر ف عينته
يوسف:اوبا وبدات قصه حبك انت وفريده
مهاب:لا دول مكنوش طايقين بعض فعلا واصلا انا كنت مكلمه ع شخصيه فريده اللي انا اتعاملت معاها وفهمته انها صعبه جدا ولازم يستحمل
يوسف:بس طبعا الباشا مهموش.. ده سايب اكبر الشركات ف مصر عشان مكنش فيه تقدير ليه وللي بيعمله ف هيخاف م فريده او انه يطرد م عندها
مهاب:بالضبط واصلا نادر عفوي ومستفز ف تعامله مع اي حد بيحس منه بتكبر ف ده اللي عمله
يوسف:وطبعا يا نادر فضلت مستمتع بأستفزازها لحد اما وقعت ف حبها يا معلم
مهاب:لا لا اصلا جوازهم ده غريب هحكيلك
نادر بعصبيه:ف ايه يا مهاب ما خلاص هو احنا بنتكلم ع واحده ماشي معاها... دي مراتي اللي بقالكوا ساعه بتتكلموا عنها
مهاب:ايه يا عم انا اتكلمت
نادر:هو انت كده لسه ما اتكلمتش
يوسف:خلاص يا مهاب هو عنده حق مينفعش سيرة مراته تبقي وسطنا كده
مهاب:انا مقصدتش انا كنت بحكي م باب الصحوبيه
نادر:لا معلش يا مهاب
مهاب:خلاص يا ابني حقك عليا
نادر:مش زعلان منك والله بس عشان تاخد بالك
مهاب يضحك:لا بس الباشا واقع
يوسف:الله يرحم اما كان كل يوم مع واحده
مهاب:شوف حتي اللي لسه متعرف عليك م 3 سنين حفظك
الكل يضحك
مهاب:ايه رأيكوا نشيش
يوسف:يالا جدا
نادر:يالا
ويطلبوا شيشه ويبدأوا يدردشوا ويقعدوا قعده الصحوبيه وهزار وضحك
نادر:هقوم امشي بقي
مهاب:يا عم ما تخليك قاعد
نادر:لا يا صاحبي كفايه كده
يوسف:يا ابني سيبه ده واحد متجوز الله يكون ف عونه
نادر:لا يا راجل
يوسف يضحك:حبيبي
ويمشي نادر
يوسف:هي دانا معاهم بردو
مهاب:اكيد يعني
يوسف:اممم
مهاب:اشمعني
يوسف:عادي بسأل
مهاب:امممم ..طيب ياالا احنا كمان
يوسف:يالا
ويحاسبوا ويقوموا يمشوا
•••••••••••••••••••••••••••••••••
نادر:مين
........:لا متقولش انك مسحت رقمي
نادر:نعم
..........:نادر متهزرش
نادر:انا بشبه ع الصوت
.........:هتفتكر اهو
نادر:منار؟!
.........:حياتي انت
نادر:عايزه ايه يا منار
منار:سمعت انك رجعت الجيزه
نادر:وبعدين
منار:وحشتني
نادر:منار انتي اكيد عرفتي اني رجعت مع مراتي
منار:وانا مليش دعوه بيها
نادر:يعني عايزه ايه
منار:ما تجيلي البيت طيب ونتكلم
نادر:منار خلاص انسي اللي كان بينا ومتتصليش بيا تاني ويقفل نادر قبل ما ترد ويكمل طريقه للبيت
نادر:ايه اللي مصحيكي
دانا:مش عارفه انام عشان متعودش لسه
نادر:هتتحل باذن الله
دانا:ان شاء الله
نادر يبتسم:تصبحي ع خير
دانا:وانت م اهله
ويدخل نادر الاوضه ويلاقي فريده نايمه لكن يلاحظ انها نايمه ب بيجامه بناتي وسايبه شعرها ....هو حاسس بتغيرها
ويفوق م شروده ع صوت فريده
فريده:ف ايه باصص كده ليه
نادر:هه ...لا مفيش بس مستغرب
فريده تقعد:مستغرب ايه
نادر:فريده ولبس بناتي مش غريبه دي
فريده:ملكش دعوه
نادر:احم ..بعتذر ويتجهه ناحيه الدولاب
فريده:خليك هخرج بره عقبال ما تغير
نادر يهز دماغه بالايجاب وتخرج فريده
دانا:بحسبك نمتي
فريده:لا ...انتي ايه اللي مصحيكي
دانا:عادي مش جايلي نوم
فريده:امممم
دانا:غريبه انك لابسه كده
فريده:مانا طول عمري بنام كده
دانا تمسك شعرها:بس ده مكنش بيبقي كده
فريده تبص م الشباك
دانا:اتغيرتي يا ديدا
فريده:انا متغيرتش
دانا:انتي بتحبيه فعلا يا فريده
فريده تبصلها وتسرح
دانا:ياااه هو السؤال صعب كده
نادر:احم
دانا وفريده يبصوا ناحيته
دانا:الظاهر ان نادر مش جايلوا نوم م غيرك
فريده:دانا
دانا:سوري
فريده:يالا روحي نامي بقي
دانا:تصبحوا ع خير
نادر:وانتي م اهله
دانا تسيبهم وتدخل الاوضه
فريده:اجبلك تاكل
نادر يبصلها:دانا عندها حق فعلا
فريده:ف ايه
نادر:انك اتغيرتي
فريده تبصله وللحظه تحس بخوف انها فعلا اتغيرت وتيجي تمشي م جنبه نادر يمسك ايدها
نادر:انتي فعلا بتحبيني يا فريده
فريده ترفع راسها وتبصله:متنساش نفسك
نادر ابتسامته تتحول لحزن ويسيب ايدها:انا اسف
فريده تمشي م قدامه وتدخل الاوضه وتفضل تلوم نفسها انها اتكلمت معاه كده
فريده:يستاهل .... انا متغيرتش ومش هتغير وتقرر فريده انها لازم تلحق نفسها وتغير هدومها وتلم شعرها
نادر يدخل
فريده:مش فيه حاجه اسمها تخبط ع الباب
نادر:انا حر
فريده:هننام ازاي
نادر يتجهه ناحيه السرير وينام
فريده:ده بجد
نادر:عايزه تنامي نامي هنا... مش عايزه انتي حره نامي ع الارض
فريده بعصبيه:ع الارض
نادر:اه
فريده:انا مبيتلويش دراعي
نادر:وانا مش بلوي دراعك ...ممكن تنامي ع الكنبه ف الصاله بردو
فريده:وماما
نادر:معرفش
فريده:ليه مش حاطط كنبه هنا
نادر:مش كلنا فريده بنت الاكابر
فريده بسخريه:مبقتش بنت أكابر وتاخد مخده وبطانيه تفرشها ع الارض وتنام
نادر يحط ايده ع كتفها:فريده طول عمرها هتفضل بنت اكابر ف نظري
فريده تبصله وهنا نادر يتفاجئ بدموعها اللي حاولت تداريها ومعرفتش
نادر يمسح دموعها:انا اسف
فريده:ولا يهمك
نادر:والله العظيم بحبك ومقصدتش اضايقك بس انتي اللي بدأتي
فريده تبتسم:انا اسفه
نادر يبتسم:دي تاني مره
فريده تبصله بأستفسار
نادر:تتأسفي
فريده تبتسم نص ابتسامه
نادر:قومي نامي ع السرير يالا
فريده:لا انا كده كويسه
نادر:قومي يا فريده عشان خاطري
فريده:لا
نادر:هشيلك
فريده تقعد بسرعه:لا
نادر يضحك
فريده تضحك ع ضحكه وهنا نادر يستغرب انها اول مره تضحك كده او ع الاقل معاه
فريده تقوم وتنام ع السرير:تصبح ع خير
نادر:وانتي م اهل الجنه والرسول
فريده تبتسم:عليه افضل الصلاه والسلام
ويناموا الاتنين فريده ع السرير ونادر ع الارض
°°°°°°°°°°°°°°°°°°°°°°°°°°°°°°
ف صباح اليوم التالي
دانا:اصحوا يا بشر
وفاء:دانا عيب كده
دانا:جعانه
وفاء:التلاجه جوا يا دانا ادخلي هاتي اكل
دانا:انتي عارفه اني مش هعرف اعمل حاجه
وفاء:خلاص استني هعملك
دانا:لا ...فريده لو شافتك هتقتلنا
وفاء تضحك ويقطع كلامهم جرس الباب
دانا:ده مين اللي هيجي دلوقتي
وفاء:معرفش افتحي
دانا:حاضر
وقبل ما تفتح الباب
نادر:استني يا دانا
دانا تقف وترجع ورا عشان توسع ل نادر وهو يفتح الباب
دانا بصدمه:مجدي!!
نادر:افندم
مجدي:فريده هنا يا دانا
نادر يقرب منه:معرفش انك اعمي لا وكمان مبتميزش الاصوات ولا اه صحيح انت مبتميزش غير صوت الستات بس(ويبص ل دانا)كان عندها حق فريده اما قالت عليه مش راجل
دانا هنا تندفع بضحكتها
فريده ورا الباب:ف ايه
نادر يبصلها:ده بتاع الزباله
دانا:بووووم
مجدي:احترم نفسك يا بني ادم انت
فريده تسمع الصوت وتكدب سماعها ف تمسك باب الشقه وتفتحه
فريده:مجدي!!
مجدي يبتسم:ازيك يا ديدا
نادر:انت عايز تروح لماما مضروب ولا ايه
مجدي:موجهتلكش كلام
نادر يندفع ناحيته ويمسكه م القميص
فريده قبل ما يعمل اي حاجه تمسكه م دراعه
فريده:سيبه يا نادر
نادر:انتي مش سامعه بيقول ايه
فريده تبصله:معلش سيبه وتنزل ايده براحه وتبص ل مجدي
فريده:حتي لو موجهتش ليه كلام ف انا مراته وم حقه يرد عليك.. هو هنا راجل البيت وهو اللي ليه الحق بس انه يدلعني
مجدي:ده بجد!!
فريده:انا ف الحقيقه معرفش انت جاي ليه هنا وعرفت مكانا منين ...انت غير مرغوب هنا ف لو سمحت امشي
مجدي هيتكلم دانا تقاطعه
دانا:مجدي انت اتهانت جامد وشكلك بقي وحش ف كفايه عليك كده وتمسك الباب وتقفله
*********************
إلي هنا ينتهي الفصل الثانى عشر من الرواية
تابع من هنا: جميع فصول رواية بنت الاكابر بقلم مها جعفر

تابعوا صفحتنا على الفيس بوك للمزيد من روايات رومانسية مصرية
أو أرسل لنا رسالة مباشرة عبر الماسنجر باسم القصة التي تريدها

جديد قسم : روايات رومانسية مصرية كاملة

إرسال تعليق