مرحباً بكم أصدقائي وأحبابي عاشقي القراءة وأجمل الروايات الممتعة والروايات الرومانسية مع رواية رومانسية جديدة للكاتبة شيماء عصمت علي موقعنا قصص 26 وموعدنا اليوم مع الفصل الحادى عشر من رواية جحيم حبك بقلم شيماء عصمت
رواية جحيم حبك بقلم شيماء عصمت - الفصل الحادى عشر
رواية جحيم حبك بقلم شيماء عصمت - الفصل الحادى عشر
"في شقـة رحيـم"
كانت سميحـة قاعـدة ومهمومـة .. مش قـادرة تفرح بـ أبنهـا و جوازة .. وكل تفكيرهـا .. فيهـا ايـه لـو كان أبنهـا أختـار واحدة أحسن من كده .. واحدة ترفعـه وترفعهـم لـ فوق مش تنزلـه لـ تحت .. واحدة معـاهـا كليـة مش مجرد دبلـوم .. واحدة زي "سهـر عدوي" مثـلا .. مـال وجمـال ونسـب!
بس هـ تعمل ايـه؟ حـاولت أكتر من مـره تخرب علاقتهـم وفشلت! مش يمكـن "مـسك" تكـون نصيبـة؟ وقدر أبنهـا انهـا تكون مراتـه؟!!
قاطع تفكيـرهـا خبط البـاب .. قامت بضيق تفتحـه
سميحـة فتحت البـاب لقـت "كوثر" جارتهـم
سميحـة: كوثـر! .. خير يا حبيبتي تعالى اتفضلي
كوثر: مش وقتـه يا ام رحيـم انتي قاعـدة هنـا ومش داريـه باللي بيحصل
سميحـة بـ قلق: استـر يارب قلقتيني فيـه أيـه يا كوثـر
كوثر: من شويـه ابنـك رحيـم طلع جري على بيت البت مـسك مراتـه وبعد شوية مـسك كانت بـ تجري بـ فستان الفرح وبردو طلعت جري على شقتهـا روحي شوفي فيه ايـه ربنـا معاكـوا
خلصت كلامهـا وأستأذنت من سميحـة ومشت .. أمـا سميحـة بسرعة قفلت شقتهـا وبـ سرعة اتوجهت لـ شقة مـسك
……………………
"في شقك مـسك"
سـالي بـ شراسة وانهيـار: انتي ازاي تقولي اني كدابة؟ للدرجة دي بتهكرهيني؟ انتي مش شايقه حالتي عاملة ازاي؟ اتقي الله وقولي كلمة حق دا منظر واحدة بتكدب؟ واصلا في حد يكذب في حاجة زي دي؟ مش هـ خاف على سمعتي وشرفي .. شرفي اللي اخوكي كان هيدوس عليه بـ جزمتـه .. دا جزاتي اني جاية افتح معاكي صفحة جديدة؟ جزاتي اني حاولت اقرب منك؟ انا كان عندي حق من الاول انتي متنفعيش رحيـم متنفعهوش ابدا
مـسك: اولا وانتي بتكلميني توطي صوتك انا مش طارشة وقادرة اسمعك واه انتي كدابة وكدابة كبيرة كمان وتمثيلك ده مش هـ يخيل عليا .. اخوكي لو اعمى ومش شايف كذبك فـ أنـا مش زيـ
قاطع كلامهـا صفعة رحيـم ليهـا
مـسك بـ صدمة حطت أيديهـا على وشهـا للحظة مستوعبتش ان رحيـم ضربهـا!! اول مره في حياتهـا حد يتطاول عليهـا بـ الضرب حتى والدهـا رحمه الله عمره معملهـا
مـسك بـ ذهول: أنت مديت أيدك عليا؟ ولا انا بيتهيئلي؟
رحيـم بـ غضب: واكسر رقبتك كمـان مش على اخر الزمـن واحدة زيـك هـ تغلط فيـا
مـسك: نعـــم!! واحــدة زيي؟ وهو انـا مالي ان شاء الله دا انا ضفري برقبة 1000 واحدة من عينة اختك وحسك عينك ايدك دي تتمد عليـا لا ما والله هـ تشوف مـسك تانية خالص عمرك ماكنت تتمنى تشوفهـا
رحيـم: انتي بتهدديني
مـسك:اه بـ أهددك وأعلى ما في خيلك اركبـه انا عمري ما هـ أسمح لاي حد انه يهني ويجي عليـا حتى لو الحد ده هو انت .. ومن اللحظة دي علاقتي بيك انتهت يا رحيـم ولا يمكن بيت واحد يجمعنـا
رحيـم بـ قسـوة: في ستين داهيـة اوعي تفكري نفسك مهمة ولا حتى ليكي قيمـة أنا اتجوزتك مجرد شفقة مش أكتـر حبيت أكسب فيكي ثواب وألمك من الشارع .. بس للأسف نسيت ان الواطي هـ يفضل طول عمـره واطي
لو كانت الكلمـات تقتل .. لـ ماتت "مـسك" في هذه اللحظة
الجملة دي كانت اقل حاجة تعبر عن حالة "مـسك" ومشاعرهـا .. بـس تعابيـر وشهـا كانت جامـدة بعيد تمامـاً عن الدمـار اللي جواهـا .. صدمتهـا في رحـيم تخطت الحدود .. كلامه اللي زي الرصاص عمال بيقتل في قلبهـا .. عمرهـا ماتخيلت انهـا تسمع منـه كلام زي ده وكأن بـ كذبـة أختـه تحول لـ شيطان هي متعرفهـوش!!
أمـا حالة رحيـم فـ كانت اشد واصعب منهـا .. صعب انـه يشوف اخته في الحالة دي .. شرفة وعرضه كان هـ يتاخد وبـ أبشع الطرق .. خالـد كان هـ يقضي على أختـه .. "خالـد" اللي بيعتبره زي أخـوه! ازاي يعمل كده وليـه؟ طول عمـره أنسـان محترم ليـه دلوقتي يعمل كده؟!! للحظـه كان هـ يشك ان دي كدبـة بس شكل أختـه المنهـار وتربيته ليهـا بعدت التفكيـر ده خالص .. سـالي مهمـا كـانت بتكـره مـسك عمرهـا ما تكذب كذبـة زي دي .. مستحيـــل!
قاطع سكوتهم اللي دام لـ لحظات دخول "سميحـة" اللي شهقت بـ صدمة أول ما شافت حالـة بنتهـا
سميحـة: يـالهووووي بنتي
جريت على سـالي وخدتهـا في حضنهـا وكأنت الاشارة لـ أنهيـار سـالي التام .. سميحـة حاولت تستفسر عن اللي حصل ومن كلمات سـالي اللي الى حد ما مش مفهومة وكمان منظر خالـد ربطت الاحداث واستنجت حاجة اتمنت من كل قلبهـا تكـون غلط
سميحـة بـ بخوف: أختك جرلهـا أيـه يا رحيـم
الجو اتكهرب والكل قلقان من رده فعلهـا ورحيم عاجز انـه يقول لهـا ان خالـد اعتدى عليهـا
بس مـسك كانت ليهـا رأي تاني خالص
مـسك بهدوء: بنتك بـ تتبلى على أخويـا بـ حاجة معملهـاش قال أيـه حاول يعتدي عليهـا ودا طبعـا كدب ولا انتي رأيك أيه يا حماتي
رحيـم بـ غصب: مـســـــك!!
مـسك: بلا مـسك بلا زفت .. المهزلـة اللي اختك عملاها دي لازم تنتهي ودلوقتي حالا
سميحـة بـ سوقية : قطع لسانك ياتربية الشوارع بقـي يا **** بتقولي على بنتي كده وأخوكي الـ*** الغلط ركبـة من ساسـه لـ راسـه .. هـ نستنى أيـه من ناس زيكم ياعيلة و*****
مـسك: لا لحد هنـا ومسمحلكيش انتي تحترمي سنك وتحترمي البيت اللي انتي فيـه
سميحـة: بلا تسمحيلي بلا نيلة انتي يابت بجحه كده ازاي مش مكسوفة من العملة النجسـة اللي أخوكي عملهـا
مـسك بـ صراخ: لـ المرة المليون هـ قولهـا أخويـا معملش حاجة وبنتك كدابـة .. كدابــــــة
انتبهت لـ قرب رحـيم الغاضب منهـا واللي كان لسه هـ يمد أيده عليهـا بـس منعته بـ قوة
مـسك: أياك تفكر تعمل اللي انت بتفكر فيـه .. لـ مرة واحدة بس شغل عقلك وبطل تفكر بـ مشاعرك .. انت تصدق ان خالد ممكن يعمل كده؟ من ساعة ما سكنا في شارعكم من كام سنة عمر اخويـا عمل اي مشكلة؟ طب حد أشتكى منـه؟ طب خلينـا في اللي حصل انهـارده .. اختك ايه اللي جبهـا هنـا؟ هـ تقول عشان تساعدني؟ طب ازاي وهي عارفة ومتأكده اني في الكوافير؟ طب لو مثلا نسيت او فعلا كانت مفكره اني هنا في شقتي .. ايه اللي دخلها الشقة من الاساس بعد مالقت خالـد لـ واحدة طب ليـه ما صوتتش ولمت الناس عليه؟ وليـه اتصلت بيك انت وبيتك بعيد عننا بكام متر؟ وليـه اصلا محدش اخد باله من اي حاجة بتحصل هنا؟ فكر بـ عقلك يا رحيـم ليـه خالـد يعمل حاجة زي كده اصلا؟!!!!
رحـيم لـ ثواني فكـر في كلام مـسك اللي لحد ما مقنع وبعد هدوء دام لـ ثواني قال
رحيـم بـ هجوم: عشـان عيل وسـ*خ وقليـل الاصل .. انتي عايزة تطلعي اخوكي بريئ و بـ أي طريقة .. بس ورحمة ابويا يا مـسك لـ اخليـه يكره الساعة اللي اتولد فيها
وبـ سخرية كمل: ونصيحة مني غيري الفستان ده اصل الفرح أتلغى
خلص كلامة وراح عند أختـه شالهـا بين ايديه وخرج ومعاه امه من شقـة مـسك
مـسك اللي كل حاجة حلوة اتكسرت جواهـا .. فرحتهـا وسعادتهـا وحتى حبهـا .. مبقاش فيـه الا جحيـم .. جحيم حبيب اتخلى عنهـا وحطم ثقتهـا فيـه .. جحيم حبهـا .. حبهـا اللي هـ تدفع تمنـه غالي أووووي
……………………
لـ حسـن حظ "سـالي" ان وقت ماحصل معاها اللي حصل .. الاغاني والموسيقى كانت شغاله وبـ اعلى صوت حتى وقت خروجها من بيت مـسك الكهرباء قطعت ومحدش لاحظ خروج رحيـم بيهـا .. والفضيحة ماتت وادفنت من قبل حتى ما تتعرف!!
بس فضيحة "مـسك" زي ما الناس سميتها كانت اتنشرت بـ سرعة البرق .. عن العريس اللي ساب عروستة ليلة فرحهم ويا عالم ايـه السبب! !!!
وكل واحد اخترع سبب على مزاجـه ومحدش عارف الحقيقة
……………………
بعـد مرور شهـر
شهر بـ حاله مر على أبطالنا ..
مـسك اللي كانت دايما في أوضتهـا من بعد خروج رحيـم من شقتهـا ..
لسه فاكرة كل حاجة اتقالت وحصلت في اليوم "المشئوم" .. فاكره بعد خروج رحيم جريت على اخوهـا وفوقته وبعدين ابتدات تعالج جروحة وبعد ما اطمنت عليـه طلبت من "نرچس" تبلغ الناس ان الفرح اتلغي ويلموا الصوان اللي اتنصب والانوار اللي اتفرشت ومن بعدهـا وهي حبيسة غرفتهـا .. في حالة جمود خالـد و نرچس قلقـوا منه
امـا الوضع عند سميحـة كان مختلف تماماً ..
سميحـة كانت قاعدة تفكر في حال عيالها اتبدل لـ أسوء حال .. ان كانت سـالي اللي دايما في أوضتهـا وليل نهـار تبكي .. خسرت كتير من وزنهـا .. بتصحى من نومهـا على كوابيس حتى أمتحانتهـا مرحتهـاش
او رحيـم اللي من يوم فرحـه المشؤم على اللي ما تتسمى اتلغى وهو أختفى ومحدش عارف هو فين .. وبـرغم سعادتها أن الجوازة اتلغت بس لسه مقهوره انها متخلصتش من "مـسك" بـ شكل نهائي .. ثواني وابتسمت بـ مكر وشراسة أخيراً عرفت هـ تعمل ايه
……………………
في شقة مـسك
خالـد في أوضته و حزين على وضع اختـه اللي يقلق .. مبكتش من يوم فرحهـا ما اتلغى .. دايما ساكتـه ورافضة نزولهـا للشـارع بل خروجهـا بره أوضتهـا ومن كتر خوفـه عليـها وانهـا تعمل حاجة في نفسهـا من شهر فات منزلش الشارع وعارف ايـه اللي بـ يحصل ويتقال فيـه .. وفي خلال الشهـر ده نرچس كانت بتجيب اي حاجة ممكن هو واختـه يحتاجوهـا
نرچس اللي رفضت الاستاذ "تامـر" بـ حجة ان وضع مـسك ميسمحش انهـا ترتبط بحد .. بس للاسف السبب الحقيقي كان انهـا لا عارفـة تحبـه او حتى تبطل تفكير في "خالـد"
……………………
في خلال الفترة الحزينـة اللي مرت على ناس كتير .. الا واحدة كانت اسعد انسانـة في الكون واللي هي "سهر" وطبعـاَ دا لان جواز رحـيم اتلغى ودلوقتى تقدر تفوز بيـه ويبقى ملكهـا!... دا غير فرحتهـا في مـسك وكسره قلبهـا دا غير سمعتهـا اللي بقت على كل لسـان
……………………
في شقة مـسك
في صباح يوم جديد .. يوم بارد من ليـالي الساعة 7الصبح
خالـد اتفاجئ بخروج مـسك من أوضتهـا ولبسهـا هدوم الشغل
خالـد بـ أستغراب: مـسك! صباح الخير ياحبيبتي انتي راحة فين كده
مـسك بـ أبتسامة: صباح النور يا خالـد .. ابدا كنت راحة على شغلي
خالـد قرب منهـا وضم ايديهـا بين ايده: مـسك انتي كويسه؟!!
مـسك: انا عمري ما كنت كويسه زي دلوقتي متقلقش عليـا ودلوقتي لازم انزل عشـان رايحـه السلاخانـة عايزة الحـق الحاجة الصابحـة وانت انزل روح شغلك كفاية قاعدة لحد كده
خلصت كلامهـا وخرجت من باب الشقـة و ما انتظرت رد خالـد اللي واقف مذهول من تغير اختـه المفاجئ!!!
…………………
وكـالعادة "مـسك" اتوجهت لـ عم مرعي السواق اللي دائما بيوصلهـا للمدبح (السلاخانـة: المكان ) .. عشان تشتري البضاعة اللي بتشتغل بيهـا واللي هي عبـارة عن (الكبـدة)
مـسك وصلت للمدبح اللي كل تجـارة عرفنهـا .. اشترت الكمية اللي محتجاهـا وفي طريق رجوعهـا لـ حارتهـا وهي على الطريق الرئيسي أتفاجئت بـ بنت واقعـة في الارض وواضح انهـا فاقدة الوعى ..
بسـرعة طلبت من عم "مرعى" يقف ونزلت تشوفهـا وتطمـن عليهـا .. لقت بنت ملامحهـا جميلة ومن هدومهـا الراقيـة عرفت انهـا مرتاحـة ماديـا .. حاولت تـفوقهـا بس معرفتش فـ قررت تخدهـا معاها على بيتهـا .. قرب منهـا عم مرعي وساعد مـسك يدخل البنت المكروباص
………………
وبعد فترة كانت "مـسك" وصلت بيتهـا ودخلت شقتهـا ومعاهـا البنت اللي لقتهـا .. ملقتش خالـد موجود فـ رجحت انـه راح شغله .. اما البنت فـ فاقت بسبب رائحة نفاذة .. فتحت عيونها بـ العافية اتفاجئت بوش "مـسك" قريب منها اووي .. قامت بسرعة مفزوعة
مـسك بهدوء: اهدى متخافيش
البنت بخوف: انا فين .. وكملت بشمئزاز : وايه الريحة دي
مـسك برفعة حاجب: انتي فين! فانتي بيتي اما بقا الريحة فـ دي ريحة الكبدة والفشـة ياحبيبتي .. ايه اول مره تشميها؟ 😏
البنت بأرتباك: مقصدش والله بس الريحة نفادة اووي
مـسك بجدية: ولا يهمك قوليلي بقا ايه اللي جايبك هنا وعلى الصبح كده
البنت ببكاء: انا عايزة اروح
مـسك وهي بطبطب عليها: انتي اسمك ايه طيب
البنت: عشق
مـسك: عاشت الاسامي ياعشق .. اسمك حلو زيك
عشق: مرسي وانتي اسمك ايه
مـسك بـ هدوء: محسوبتك (مـسك)
عشق: اتشرفت بمعرفتك
مسك: الشرف ليا قوليلي بقا ايه اللي رماكي على هنا
عشق محستش بنفسها غير وهي بتحكلها كل حاجة عن حياتها .. يمكن ارتاحتلها او كانت محتاجة تتكلم مع اي حد .. ختمت كلامها وهي بتقول بدموع: كان لازم اسيب صخر وامشي من البيت زي ما الحيوان سيف ما طلب والا كان هيقول لـ بابا ان امي لسه عايشة
( "عشـق و صخـر" أبطـال أولى روياتي عشق الصخر )
مسك بجدية: غلطانة ياعشق كان لازم تحكي لجوزك وتقدريه وزي ماعرفت ان جوزك واحد تقيل في البلد فـ اكيد كان هيقدر يحميكي من الواد الصايع ده .. وكمان زمان امك هتموت ياولداه من القلق عليكي
عشق بعند: لا انا مغلطتش انا كنت بحمي امي مش اكتر وبعدين انا قلت لماما اني هسيب البيت لفترة بسيطة وفهمتها كل حاجة
مسك: والله انتي بت خايبة ايه الهبل اللي انتي فيه دا .. ياختي استرجلي في نفسك شويه كده .. طول مانتي طرية كده هيكلوكي .. انشفي وروحي لـ جوزك واحكيله كل حاجة وهو هيقدر يتصرف
عشق: واضحي بـ امي يعني انا يستحيل اا
قاطع كلمها صوت كسر الباب الشقة اللي هي فيها .. واتفاجئت بـ "صخر" والحرس اللي معاه
مسك بردح : يالهووووووي انت مين ياجدع انت وهو وازاي تتجرء وتدخل بيتي كده طب واللهي لكون مصوته ولمى عليك امه لا اله الا الله
عشق برعب و ارتباك: صخر
مسك سكتت وعرفت ان دا زوج عشق
صخر قرب من عشق ورفع ايده بص في ساعته وبهدوء مرعب وملامح صخرية قال: مش الوقت لسه بدري على انك تزوري حد يا مدام عشق ..
قال اخر كلامه وهو بيضغط على كلمة (مدام) .. عشق بقت عامله زي الكتكوت المبلول مش عارفة ترد ولا تبرر موقفها .. متخيلتش للحظة ان صخر يلاقيها بالسرعة دي
صخر بص لـ مسك بهدوء وقال: بعتذر على كسر الباب دلوقتي الحرس هيصلحوا وشكرا على استقبالك للمدام في وقت زي ده ودا الكارت بتـاعي لو احتاجتي اى حاجة انـا في موجود وشكرا مره تانـيه عن اذنك
خلص كلامـه واخد مراتـه ومشي اما مـسك فـ قالت: ربنـا يهدي سركم ويبعـد عنكم "الحاقدين والحاسدين"
يادوب خلصت كلامهـا ولقت "سميحـة" واقـفة قدمهـا
مـسك بـ همس: يـاالله مكنتش ذكرت ربع جنيـه احسـن
وبـ هدوء عصب سميحـة قالت: اهلا يا خالتي سميحـة .. مش تخبطي
سميحـة بـ أستفزاز: وهو فين البـاب ده بيتك بقى زريبـه من غيـر بـاب
مـسك بـنفس الهدوء: ولمـا هي زريبـة جيالهـا ليـه ولا أشتقتي للمكـان
سميحـة بغضب: قصدك ايـه يابت
مـسك: والله افهميهـا زي ماتفهميهـا .. المهم انتي جايـه ليـه؟ وعايـزة ايـه على الصبح؟
سميحـة بـ استفزاز: جايـه اشوف اللي كانت مرات ابني والرجالـة اللي طالعـة نزلـه من عندهـا!!
وكملت لمـا لاحظت الجمود والصدمـة اللي على ملامح مسك
سميحـة بـ شماتـه: تؤتؤ ياعيني يامسك هو انتي ما تعرفيش ان رحيم طلقك غيابي؟!!!
مـسك فضلت ثابتـة وكأنها تمثال من صخر والصدمة اللي اترسمت على وشهـا للحظات اتمحت واتحولت لـ ابتسامـة حرقت دم "سميحـة"
مـسك بـ نفس الهدوء المريب: الحمد لله ربنـا نجاني منك ومن بيتك اللي كلـه شـر ليـا .. بس معلش يا خالتي هو انتي ما لحظتيش ان قد ايـه ابنك ضعيف؟ ضعيف لـ درجة انـه مقدرش يواجهني ويطلقني فـ وشي! ضعيف انـه سابني يوم فرحي اواجـه النـاس لوحدي .. ضعيف انـه باعت امـه تبلغني بـ طلاقي منـه! بـس عايـزة انبهـك لـ حاجة مهمـة ان هـ يجي يوم ويعرف ان بنتك كدابـة ومش بعيد تكوني انتي متفقـة معاها وقتهـا لو باس أيدي مش هـ ارجعلـه .. وزي ما داس عليـا هـدوس على كل حاجة كانت بنـا و مـسك بيـاعة الكبـدة اللي مكنتش عجباكي بكره تشوفي هـ تبقى ايـه وتوصل لـ فين .. وان كنت تواضعت وارتبطت بـ عيلة زيكم فـ وعد شرف عمري ما هـ كرر الغلطة دي .. ويلا بقى من هنـا اصل عنـدي شغل ولا تحبي اوصلك لـ بيتك!
سميحـة بغـل: مبقـاش اللي انتي يابنت الـ****
مـسك بـ قوة: اخرسي قطع لسانـك مش معنى اني محترمة سنك تتطاولي وتغلطي فـي والدتي وانـا اسكت لا دا بعيد عن شنبك
سميحـة بـ صدمـة: شنبي!!!
مـسك: ايوم شنبك ويلا من هنـا عشـان انتي ست كبيرة ومش عايزة اغلط فيكي يا .. ياخالتي
سميحـة الغضب والكرهه ناحيـة مـسك زاد .. وبعد ما كانت جايـة تشمت فيهـا وتشوفهـا وهي مكسوره ومزلولـة .. لقتهـا قويـة وعنيهـا قادرة ومش ضعيفـة ..
بعد ما سميحـة مشيت مـسك اتنهدت بتعب وبـ رجاء قالت: قويني يــارب .. قويني
تابع من هنا: جميع فصول رواية رواية احفاد الجارحي بقلم آية محمد
أو أرسل لنا رسالة مباشرة عبر الماسنجر باسم القصة التي تريدها
إرسال تعليق
يسعدنا تلقي اقتراحاتك أو تعليقك هنا